[1] Ñoqaqa runakunaq rimayninkunatapas, hinallataq angelkunaq rimayninkunatapas rimaymanmi. Munakuyniytaq ichaqa, mana kanmanchu chayqa, hatun kampana waqaq hinallan kayman, otaq platillo chin-chin niq hinallan kayman.
[2] Ñoqaqqa Diospa rantinpi rimanaypaq kapuwanmanmi. Hinallataq tukuy pakasqa yachaykunata, tukuy reqsiykunatapas entiendiymanmi. Hinallataq orqokunatapas wak ladoman suchurichinaypaq hunt'asqa iñiyniyqa kapuwanmanmi. Ichaqa, manataq munakuyniy kanmanchu chayqa, manan imapaschu kani.
[3] Llapan kaqniykunatapas wakchakunaman qosqa kananpaq rakipuymanmi. Hinallataq kuerpoytapas ruphachisqa kananpaq hap'iykuchikuymanmi. Ichaqa munakuyniytaq mana kanmanchu chayqa, manan imapaqpas baliwanmanchu.
[4] Munakuyqa muchukuyniyoqmi, hinallataq khuyapayakuqmi. Munakuyqa manan tumpanakuyniyoqchu. Munakuyqa manan pay kikinmanta rimaykachayniyoqchu. Munakuyqa manan hatunchakuyniyoqchu.
[5] Munakuyqa manan ima p'enqay kaqtapas ruwanchu, nitaqmi pay kikillanpaqchu maskhan. Munakuyqa manan usqhayllatachu phiñarukun. Manataqmi sonqonpipas mana allin kaqkunataqa waqaychanchu.
[6] Munakuyqa manan, mana chanin kaqmantaqa kusikunchu. Aswanpas cheqaq kaqmantan kusikun.
[7] Munakuyqa tukuytapas ñak'arillanmi, tukuytapas kreellanmi, tukuytapas suyakullanmi, tukuytapas muchukullanmi.
[8] Munakuyqa manan hayk'aqpas tukukunqachu. Diospa rantinpi rimaykunan ichaqa, tukukapunqa. Wak simi rimaykunapas ch'innipunqan. Hinallataq tukuy ima yachaypas tukukapullanqataqmi.
[9] Chay hinaqa, wakillantan reqsinchis. Wakillantataqmi profetisanchispas.
[10] Ichaqa k'apak kaq hamuqtinñan, mana k'apak kaqqa tukukapunqa.
[11] Maypachachus wawallaraq karqani chayqa, wawa hinallaraqmi rimarqanipas, wawa hinallaraqmi yuyaykurqanipas, wawa hinallaraqmi chanincharqanipas. Kunan machu runaña kaspaytaqmi ichaqa, wawa kaspa ruwasqaykunata saqepuniña.
[12] Kunanqa espejopi hinan ayphallataraq rikushanchis. Haqay p'unchaypin ichaqa, uya-uyapura rikusunchis. Kunanqa wakillantaraqmi reqsini, haqay p'uchaypin ichaqa, imaynan ñoqaqa reqsisqa karqani, chay hinatapuni ñoqaqa reqsisaq.
[13] Kunantaqmi iñiypiwan, suyakuypiwan, munakuypiwan ima kinsantin kashallanpuni. Chay kinsantinmanta aswan balorniyoqqa, munakuymi.