[1] Wawqe-panaykuna, ñoqaqa manan espiritual runakunata hina rimaykuytaqa atirqaykichischu. Aswanpas huchapakuq runakunata hinallaraq, hinallataq Cristopi wawachakunata hinallaraqmi rimaykuyta atirqaykichis.
[2] Manaraqmi mikhunataqa chaskiyta atirqankichischu, nitaqmi kunankamapas chaskiyta atishankichisraqchu. Chayraykun lechellataraq qoshaykichis. Manataqmi mikhunataraqchu qoshaykichis.
[3] Qankunapurapi tumpanakuykunapas, huchatariykunapas, hinallataq t'aqa-t'aqa hatariykunapas kasqanwanqa, ¿manachu aycha runallaraq kashankichis? Hinallataq, ¿manachu huchapakuq runakuna hinallaraq purishankichispas? Chayraykun qankunaqa huchapakuq aycha runalla kashankichis.
[4] Huk kaqmi nin: ‘Ñoqaqa Pabloqmi kani,’ nispa. Wakintaq nin: ‘Ñoqaqa Apolospan kani,’ nispa. Chay hinapiqa, ¿manachu huchapakuq aycha runallaraq kashankichis?
[5] Hinaqa, ¿pitaq Pablori? ¿Pitaq Apolospasri? Paykunaqa, serbiqkunallan kanku. Paykunaq chawpinkutataqmi qankunapas iñikapurqankichis. Sapankankutaqmi imaynatachus Señorpa qosqanman hina kanku.
[6] Ñoqan tarpurqani. Apolostaq qarparqan. Diostaqmi ichaqa, wiñachirqan.
[7] Chay hinaqa, manan tarpuqpas, nitaq qarpaqpas imapaschu. Aswanpas wiñachiq Diosmi baleqqa.
[8] Tarpuqpas, qarpaqpas kaq kamallan kanku. Sapanka hukmi ichaqa, llank'asqanman hina pagonta chaskinqa.
[9] Ñoqaykuqa Diospa yanapaqnillanmi kayku. Qankunataq ichaqa, Diospa chakran, hinallataq Diospa sayarichisqan wasi kankichis.
[10] Diospa allinpaq qokuynin qowasqanman hinan, ñoqaqa yachaywan qhawaspa wasi ruwachiq hina, teqsita churarqani. Chay patamantaqmi, huk perqashan. Ichaqa sapanka hukyá imaynatachus patanman perqasqanta qhawachun.
[11] Diospa churasqan teqsiqa Jesucriston. Paymanta wak teqsitaqa manan pipas churayta atinmanchu.
[12] Ichaqa kay teqsi pataman mayqenpas qoriwan, qolqewan, sumaq umiña rumikunawan, k'aspiwan, ichhuwan, otaq q'achuchawanpas perqashanmanmi.
[13] Chay hina kaqtinqa, sapanka hukpa ruwasqanmi rikuchisqa kanqa. Hinan haqay p'unchaypi sut'inchasqa, hinallataq ninawan rikuchisqa kanqa. Chayrayku sapanka hukpa ruwasqan, imaynaña kaqtinpas, ninawan probasqa kanqa.
[14] Sichus chay teqsi patapi mayqenpa perqaspa ruwasqan takyanqa chayqa, paymi premiota chaskinqa.
[15] Sitaqchus mayqenpa ruwasqanpas ruphasqa kapunqa chayqa, paymi chay ruwasqanta chinkachipunqa. Ichaqa, chay ninata ñak'ayllaña pasaruqtinpas, payqa qespisqapunin kanqa.
[16] ¿Diospa t'aqasqa cheqas, hinallataq Diospa Espiritunpa tiyakunan kasqaykichistari, manachu yachankichis?
[17] T'aqasqa cheqasqa, Diospa tiyakunan t'aqasqa cheqasmi. Chaytaqmi qankunaqa kankichis. Chayrayku, sichus pipas Diospa tiyanan chay t'aqasqa cheqasta thuninqa chayqa, paytapas Diosqa thunillanqataqmi.
[18] Ama pipas pay kikintaqa q'otukuchunchu. Sichus qankunapurapi, kay tiempopi mayqenpas yachaysapaman tukun chayqa, yachaysapa kananpaqqa, mana yuyayniyoqman tukuchun.
[19] Kay pachapi yachayniyoq kayqa, Diospa ñawpaqenpi mana yuyayniyoq kaymi. Qelqataqmi nin: ‘Yachaysapakunataqa Diosmi paykunaq yuyaysapa kaynillankupi hap'irqon,’ nispa. (Job 5:13)
[20] Yapamantan nillantaq: ‘Yachaysapakunaq yuyaykusqanku ch'usaq kasqanta Señorqa reqsinmi,’ nispa. (Sal. 94:11)
[21] Chay hinaqa, amaña pipas runakunapiqa hatunchakuchunchu. Tukuy chaykunaqa qankunaqllan kanku.
[22] Pabloña kaspapas, Apolosña kaspapas, Cefasña kaspapas, kay pachaña kaspapas, kawsayña kaspapas, wañuyña kaspapas, kunan kaqña kaspapas, hamuq kaqña kaspapas, llapallanmi qankunaqlla kanku.
[23] Qankunaqa Cristoqmi kankichis. Cristotaqmi ichaqa, Diospapuni.