[1] Mayqenniykichispas huk wawqenpa kontranpi ima phiñanakuyllapas kan chayqa, ¿imanaqtintaq mana chanin runakunamanri kihakuq phawarinkichis? ¿Imanaqtintaq manari t'aqasqa kaq runakunamanchu rinkichis?
[2] ¿Icha t'aqasqakunaq kay pacha runakunata chaninchanankuta manachu yacharqankichis? Sichus kay pacha runakunata qankuna chaninchankichis chayqa, ¿manachu chay huch'uy kihakunallata chaninchayta atinkichis?
[3] ¿Angelkunata chaninchananchistaqa manachu yacharqankichis? Chay hina kaqtinqa, ¿manachu kay kawsaypi kaqkunataqa, aswantaraq chaninchayta atisunman?
[4] Sichus kay pacha kawsaypi kaqkunamanta kihanakuyniykichiskuna kashan chayqa, ¿imanaqtintaq iñiq t'aqaq pisipaq hap'isqan runakunatari chayta chaninchananpaq churankichis?
[5] Qankunaq p'enqakunaykichispaqmi chaytaqa nini. ¿Manachu qankunapurapi ch'ullallapas yachayniyoq chay wawqe-panakunapurapi chayta chaninchay atiqri kan?
[6] Ichaqa, huk wawqetaq, wawqenpa kontranpi kihakun. Chaytaqa, ¿manachu mana iñiqkunaq ñawpaqenpiraq ruwashankichis?
[7] Cheqapaq chay kihanakuykuna qankunapurapi kasqanwanqa ñan urmaykunkichisña. Mana chanin kaqta muchukuyniykichisqa, ¿manachu aswan allin kanman karqan? Hinallataq, q'otuspa suwachikuyniykichispas, ¿manachu aswan allin kanman karqan?
[8] Qankuna kikiykichistaqmi ichaqa, mana chaninta ruwashankichis, hinallataq q'otuspa suwakushankichis. ¡Chaytaqa, wawqe-panakunatawanraqmi ruwashankichis!
[9] Mana chanin ruwaq runakunaqa, manan hanaq pacha qhapaq suyumanqa haykunqakuchu. ¿Manachu chaytaqa yachankichis? Ama pantaychischu. Manapunin, qhellipi puriqkunapas, nitaq idolota yupaychaqkunapas, nitaq wasanchaqkunapas, nitaq warmiman hina tukuqkunapas, nillataq qharipura t'inkinakuqkunapas Diospa qhapaq suyunmanqa haykunqakuchu.
[10] Hinallataq, manan suwakunapas, nitaq qolqe sonqokunapas, nitaq machaqkunapas, nitaq millay k'amikuqkunapas, nillataq q'otuspa suwakuqkunapas Diospa qhapaq suyunmanqa haykunqakuchu.
[11] Chay hinan qankunamanta wakinniykichispas karqankichis. Ichaqa, mayllisqa, hinallataq ch'uyanchasqañan kapunkichis. Hinan Señorninchis Jesuspa sutinpi, hinallataq Diosninchispa Espiritunpa chawpinta chaninman tukuchisqa kapunkichis.
[12] Tukuy imaymanakunatapas ruwaytaqa atinin, ichaqa manan llapanchu allinniypaqqa kanman. Tukuy imaymanakunatapas ruwaytaqa atinin, ichaqa manan ñoqaqa mayqen kaqwanpas atipachikusaqchu.
[13] Mikhunaqa wiksapaqmi. Wiksapas mikhunallapaqtaqmi. Diosmi ichaqa, iskaynintapas mana imaman tukuchipunqa. Kuerpoqa manan qhellipi purinapaqchu. Aswanpas Señorpaqmi. Señorpas kuerpollapaqtaqmi.
[14] Imaynan Diosqa Señorta kawsarichimpurqan, chay hinallatataqmi ñoqanchistapas atiyninwan kawsarichimpuwasunchis.
[15] ¿Aycha kuerpoykichisqa Cristoq miembronkuna kasqanta, manachu yachankichis? ¿Cristoq miembronkunata qechuspachu, qhellipi puriq warmiq miembronkuna kanankupaq churasaq? ¡Imaynallanmantapas manapunin!
[16] Diosqa ninmi: ‘Iskayninkun ch'ulla aychallaña kapunqaku,’ nispa. (Gen. 2:24) Chayrayku, qhellipi puriq warmiwan hukllachakapuqqa paywanmi ch'ulla kuerpollaña kapun. ¿Chaytaqa manachu yachankichis?
[17] Pipas Señorman hukllachakuqtaqmi ichaqa, paywan ch'ulla espiritullaña kapun.
[18] Qhellipi puriymanta ayqekuychis. Runakunaq mayqen hucha ruwasqankupas, aycha kuerponkumanta hawapin kashan. Qhellipi puriq runataqmi ichaqa, kikin kuerponpa kontranpi huchallikun.
[19] Kuerpoykichisqa, qankunapi kashaq Santo Espírituq tiyakunan t'aqasqa cheqasmi. Chay Santo Esiritutaqa Diosmantan chaskirqankichis. Chaymi qankunaqa, mana qankunaqñachu kankichis. ¿Chayta manachu yachankichis?
[20] Diosqa ancha balorniyoqwanmi rantirqasunkichis. Chayrayku kuerpoykichispipas, espirituykichispipas, Diosta hatunchaychis. Chaykunaqa Diospan kanku.