[1] Cheqaqtapunin qankunapurapi qhellipi puriy kasqanqa uyarikun. Chay hina qhellipi puriyqa, mana-judío runakuna purapipas manapunin uyarikunchu. Huk runataqsí taytanpa warminwan tiyashan.
[2] ¡Qankunaqa, hatunchakuywan hunt'aykusqaraqmi kashankichis! Aswanchá waqapakuwaqchis karqan. ¿Qankunapuramanta chay hina ruwaq runataqa manachu wikch'upuwaqchis karqan?
[3] Aycha kuerpopiña mana chaypichu kashani chaypas, espiritupiqa chaypin kashani. Chaypipas kashayman hinan, chay hina ruwaq runataqa, ña chaninchaniña.
[4] Señorninchis Jesucristoq sutinpi qankuna huñunakuqtiykichisqa, ñoqaq espirituypas, Señorninchis Jesucristoq atiyninwanmi, qankunawan kashan.
[5] Chay runaqa, aycha kuerpon sinchi ñak'ariypi kananpaq, Satanasman hap'ichisqa kachun. Chay hinapin Señor Jesuspa hamunan p'unchaypi, espiritunqa qespisqa kanqa.
[6] Rimaykachayniykichisqa manan allinchu. ¿Huk chikan lebaduralla llapan peqata poqochisqanta manachu yacharqankichis?
[7] Paskua fiestapi nak'ana Korderonchis Cristoqa, ñoqanchisraykun sakrifikasqaña karqan. Chayrayku, mosoq peqa kanaykichispaq, mawk'a lebaduramanta llimphuyakuychis. Qankunaqa, mana lebadurayoq peqapunitaqmi kankichis.
[8] Chay hinaqa, ama mawk'a lebadurawanchu, nitaq millay ruway lebadurawanchu, nillataq mana allin kaqpa lebaduranwanchu fiestataqa ruwasun. Aswanpas, cheqaqmanta kaq, hinallataq cheqaq kaq mana lebadurayoq t'antawan fiestataqa ruwasun.
[9] Qhellipi puriqkunawan ama huñunakunaykichispaqmi kartaq chawpinta qelqamurqaykichis.
[10] Manan nishaniqa: ‘Kay pacha kawsaypi qhellipi puriqkunamanta, qolqe sonqokunamanta, suwakunamanta, idolota yupaychaqkunamanta t'aqakuychis,’ nispaychu. Chay hina kaqtinqa, kay pachamantachá lloqsipunaykichis kanman.
[11] Kunantaq ichaqa, qelqamuykichis: ‘Pipas “Diospi iñiqmi kani,” nishaspa, qhelli puriypiraq, qolqe sonqo kaypiraq, idolota yupaychaypiraq, ñakaypiraq, machaypiraq, otaq suwakuypiraq purishanman chayqa, amapuni chay hina runawanqa huñunakullaypaschu, nitaq mikhullaypaschu,’ nispay.
[12] ¿Imapaqtaq ñoqaqa mana iñiqhawa runakunatari chaninchashayman? ¿Manachu qankunaqa, qankuna ukhupi kashaq iñiq runakunata chaninchanaykichispaq kashankichis?
[13] Mana iñiq runakunataqa Diosñan chaninchanqa. Chay hinaqa, qankuna ukhupi kashaq, chay millay runata wikch'upuychis. (Deut. 17:7)