[1] Imakunamantachus qelqamuwasqaykichismantaqa ninin: ‘Qharipaqqa, warmita mana tupaykunallanpas allinmi kanman,’ nispa.
[2] Ichaqa qhellipi puriyhawa, sapanka qharipas esposayoq kachun. Hinallataq sapanka warmipas, qosayoq kachun.
[3] Qosaqa, imachus esposanpaq ruwananta hunt'achun. Chay hinallataq warmipas, imachus qosanpaq ruwananta hunt'achun.
[4] Warmiqa, kikin kuerponmantaqa manan munayniyoqchu, aswanpas qosanmi. Chay hinallataqmi, qosapas kikin kuerponmantaqa manan munayniyoqchu, aswanpas esposanmi.
[5] Warmi-qhariqa ama mananchanakuychischu. Maypachachus kuskamanta rimanakuspa ayunanaykichispaq, hinallataq Diosman parlanallaykichispaqmi, huk pisi tiempollata mananchanakuwaqchis. Mayninpiqa manan aycha kuerpoykichis watakuyta atinkichischu. Chayrayku Satanaspa ama wateqasqan kanaykichispaq, wakmanta hukllaman huñuykunakapuychis.
[6] Kaytaqa Diospa yuyaychawasqallantan nini. Manataqmi Diospa kamachikuyninta hinachu nini.
[7] Aswanmi llapan qharikuna ñoqa hina kananta munayman. Ichaqa sapanka hukmanmi, imayna kananpaqpas Diosqa qorqan. Wakinmanmi huk hina kananpaq, wakinmantaq wak niray kananpaq qorqan.
[8] Mana esposayoqkunamanwan, biudakunamanwanmi nini: ‘Ñoqa hina sapallanku qhepakuyninkuqa allinmi kanman,’ nispay.
[9] Ichaqa qharimanta, warmimantapas ñak'ayllaña kashanankumantaqa, kasarakuyninkun aswan allinpuni kanman. Chayrayku, sichus aychanku watakuyta mana atinkuchu chayqa, kasarakuchunku.
[10] Kasarasqakunatataqmi kamachini. Manan ñoqaqchu, aswanpas Señorpa kamachikuyninmi. Ninitaqmi: ‘Kasarasqa warmiqa, ama qosanwan t'aqanakuchunchu.
[11] Ichaqa sichus t'aqanakun chaytaq, sapallanña ch'isiyakapuchun, otaq qosanwan kutinakapuchun. Hinallataq qosapas, esposanta ama wikch'uchunchu,’ nispay.
[12] Wakinkunamantaq, manan Señorchu, aswanpas ñoqan nini: ‘Sichus mayqen wawqeqpas mana iñiq esposan kan, hinaspataq chay esposa paywan tiyakuyllatapuni munan chayqa, ama wikch'uchunchu.
[13] Hinallataq, sichus mayqen warmiqpas mana iñiq qosan kan, hinaspataq qosanqa paywan tiyakuyllatapuni munan chayqa, ama wikch'uchunchu,’ nispay.
[14] Mana iñiq qosaqa, esposanpi ch'uyanchasqan. Hinallataq, mana iñiq warmipas qosanpi ch'uyanchasqan. Mana hina kaqtinqa, wawankunachá qhellichasqa kankuman. Kunantaq ichaqa, ch'uya kanku.
[15] Sichus mana iñiq qosa, otaq mana iñiq warmi t'aqanakapuyta munan chayqa, t'aqanakapullachun. Chay hinaqa manan mayqen wawqepas, nitaq mayqen panapas rantisqachu kashan. Aswanpas Diosmi thak kaypi kawsananchispaq waqyawarqanchis.
[16] Yaw kasarasqa warmi, ¿ichapas qosayki qespichisqa kananta maymantataq yachanki? Otaq yaw qosa, ¿ichapas esposayki qespichisqa kananta maymantataq yachanki?
[17] Sapanka hukyá, imaynatachus Señorqa qorqasunkichis, hinallataq imaynatachus sapanka hukniykichista Diosqa waqyarqasunkichis, chayman hina kawsaychis. Chay hinatapunin llapa iñiq t'aqakunapipas kamachimushani.
[18] ¿Pillapas sirkunsidasqa kashaspachu waqyasqa karqan? Chay hinaqa, sirkunsidasqallaña qhepakuchun. ¿Pillapas mana sirkunsidasqa kashaspachu waqyasqa karqan? Chay hinaqa, amaña sirkunsidachikuchunñachu.
[19] Sirkunsidasqa kaypas, mana sirkunsidasqa kaypas, manan imapaschu. Aswanpas Diospa kamachikuyninkunata kasukuymi balenqa.
[20] Sapanka hukpas imayna kashaspachus waqyasqa karqan, chay hinallapuniña kashachun.
[21] ¿Kamachi kashaqtiykichu waqyasqa karqanki? Ama llakikuychu. Ichaqa sichus kacharichikuyta atinki chayqa, kacharichikuyá.
[22] Pipas kamachi kashaspa Señorpi waqyasqa karqan chayqa, Señorpa kacharichisqanñan kapun. Chay hinallataqmi, mana kamachi kashaspa waqyasqa kaqpas, Cristoq kamachinña kapun.
[23] Ancha balorniyoqwanmi rantisqa karqankichis. Chay hinaqa, amañayá runakunaq kamachinkunallachu kashaychis.
[24] Wawqe-panaykuna, imayna kashaspachus sapanka hukniykichispas waqyasqa karqankichis, chay hinallapuniña Diospaq qhepakapuychis.
[25] Donsella sipaskunapaqmi ichaqa, Señorpa kamachikuynin mana kapuwanchu. Chaywanpas, hunt'aqpuni kanaypaq, Señorpa yanapakuyninta chaskiq hinapuni, yuyaychaykuyniyta qoykichis.
[26] Yuyaykusqayman hinaqa, kay kawsayqa sasapuni kasqanrayku, runaq sapallan ch'isiyakapuyninmi aswan allinqa kanman.
[27] Kasarasqañachus kashanki chayqa, amaña t'aqanakuytaqa yuyaykuyñachu. Mana kasarasqaraqchu kashanki chaytaq ichaqa, amaña kasarasqa kayta maskhayñachu.
[28] Ichaqa, sichus kasarakunki chayqa, manan huchallikunkichu. Hinallataq donsella sipas kasarakun chaypas, manallataqmi huchallikunchu. Chaywanpas, chay kasarasqakunapaqqa kay pacha kawsaypi sasachakuykunaqa kanqapunin. Ñoqataq ichaqa, manaña chaykunaq kashanantaqa munaymanñachu.
[29] Ichaqa wawqe-panaykuna, kaytan niykichis: ‘Kay pachaqa tukukapushanñan. Hinallataq tiempopas pisillañan kashan. Chayrayku, kay qhepaq tiempopi, kasarasqa kaqkunaqa, manapas esposayoqchu kashawaqchis hina kaychis.
[30] Hinallataq waqaqkunapas, manapas waqashawaqchischu hina kaychis. Kusikuqkunapas, manapas kusikushawaqchischu hina kaychis. Hinallataq, rantikuqkunapas, mana imayoqpas kashawaqchis hina kaychis.
[31] Kay pachaq sumaq kayninqa tukukapushanñan. Chayrayku, kay pachapi kaqkunawan q'ochukuqkunapas, manapas kay pachapi kaqkunawan q'ochukushawaqchischu hina kaychis,’ nispay.
[32] Ichaqa mana llakin-llakin kashanaykichistan munayman. Mana kasarasqa qhariqa Señorpa kaqninkunallapiñan yuyaymanan. Imaynatachus Señorta kusichiyllapiñan yuyaymanan.
[33] Kasarasqa qharitaqmi ichaqa, kay pacha kawsaypi kaqkunamanta, imaynatachus esposanta kusichiyllapi yuyaymanan.
[34] Kasarasqa warmiwan, donsella sipaswanqa, huk niraykaman kanku. Manaraq kasarasqa warmiqa Señorpa kaqkunapin yuyaymanan. Payqa, aycha kuerponpipas, hinallataq espiritunpipas ch'uya kayllapiñan yuyaymanan. Kasarasqa warmitaqmi ichaqa, kay pacha kawsaypi kaqkunamanta, imaynatachus qosanta kusichiyllapiña yuyaymanan.
[35] Qankunaq allinniykichispaqmi chaytaqa nishani. Manan toqllata churanayraykuchu, aswanpas sumaqta kawsakuspa, ama imaqpas hark'asqan, Señortaqa serbikunaykichispaqpunin chaytaqa nishani.
[36] Ichaqa, mayqen taytaqpas, donsella ususin kashanmanmi. Hinallataq chay ususin kasarakunan tiempopiña kaspan, kasarakuyta munashanmanmi. Chay taytapaqtaq, ususin kasarakunan tiempomanta pasarapusqanqa manan allinchu kanman. Chay hinachus kanman chayqa, kasarachispanqa manan huchallikunchu. Chay hinaqa, kasarachillachun.
[37] Ichaqa mayqenpas sonqonpi allin yuyaykusqa kashan. Hinaspataq mana imaqpas qatirisqan, sonqon kamachiyta atin. Hinataq ususinta donsellallata waqaychayta munan chayqa, allintan ruwan.
[38] Chay hinaqa, pipas donsella ususinta kasarachin chaypas, allintan ruwan. Mana kasarachiqmi ichaqa, aswan allintaraq ruwan.
[39] Kasarasqa warmiqa, qosanpa kawsanankaman kamachikuy simiwan qosanman hukllachasqa kashan. Sichus qosan wañukapun chaytaqmi ichaqa, piwanpas kasarakapunanpaq, chay kamachikuy simimanta kacharichisqaña kapun. Ichaqa iñiq runallawanpuni kasarakuchun.
[40] Ñoqataqmi ichaqa, nini: ‘Sichus sapallanña ch'isiyakapunqa chayqa, yuyaykusqayman hinaqa, aswan kusisqaraqmi kanqa,’ nispay. Hinallataq, yuyaykusqayman hinaqa, ñoqaqpas Diospa Espiritunqa kapuwashanmi.