[1] ¿Manachu apóstol kani? ¿Manachu kacharichisqa kani? ¿Manachu Señorninchis Jesucristota rikurqani? ¿Manachu qankunaqa Señorpi llank'anay kapuwankichis?
[2] Apóstol hina Señorpi llank'asqay selloqa qankunan kankichis. Chayraykun, wakinkunapaqña mana apostolchu kani chaypas, qankunapaqqa cheqaqtapunin apóstol kani.
[3] Chaytaqmi ñoqaq kontraypi rimaqkunaman defiendikuyniyqa.
[4] ¿Manachu ñoqaykuqa mikhunatapas, ukyanatapas chaskiyta atiykuman?
[5] Wakin apostolkunaqa, Señorpa wawqenkunapas, Cefaspas iñiq esposankuta puriyninkupi pusayta atinkupunin. ¿Manachu ñoqaykupas chay hinallatataq pusayta atiykuman?
[6] ¿Icha Bernabewan, ñoqallawanchu llank'aytaqa mana saqepuyta atiykuman?
[7] ¿Pitaq kuartelpi kashaspari, kikinpa gastonwan soldado hina serbiyta atinman? ¿Pitaq rurunta mana mikhunanpaqri ubas chakrata llank'anman? ¿Pitaq tropantin uywanpa lechenta mana ukyananpaqri michinman?
[8] ¿Aycha runa kayllaypichu chaykunataqa nini? ¿Manachu chay hinallatataq Kamachikuy Simipipas nishan?
[9] Moisesmi Kamachikuy Simipi qelqarqan: ‘Erapi saruq torotaqa aman senq'apankichu,’ nispa. (Deut. 25:4) ¿Torokunallatachu Diosqa kuidan?
[10] ¿Icha ñoqanchismantawanchu chaytaqa nirqan? Ñoqanchispaqmi chayta qelqasqa karqan. Chakra llank'aqqa suyakuywanmi llank'anan. Hinallataq eraqpas, erasqan ruruta mikhuykuyta munaspanmi eranan.
[11] Sichus ñoqayku qankunapaq espiritual kaqkunata tarpurqayku chayqa, ¿qankunamanta aycha kaqkunata kosechanaykuri sinchi askhachu kanman?
[12] Sitaqchus wakinkuna qankunamanta chaskirqanku chayqa, ¿ñoqaykuri aswantaraqchu chaskinayku? Ichaqa chay qowanaykikutaqa manan mañakurqaykikuchu. Aswanpas Cristoq allin willakuyninman mana hark'achita churanaykupaqmi, hinalla llapanta muchukurqayku.
[13] ¿Dios yupaychana wasipi llank'aqkunaqa chaypi mikhuna kaqkunamanta, mikhusqankuta manachu yacharqankichis? Hinallataq, ¿altarpi serbiqkunapas, altarmanta tupaqninta chaskisqankuta manachu yacharqankichis?
[14] Chay hinallataqmi, allin willakuy willaqkunaqa, chay allin willakuymanta kawsanankupaq Señorqa kamachikurqan.
[15] Ñoqan ichaqa, mana hayk'aqpas chay tupaqniytaqa chaskirqanichu. Nitaqmi chay hinata ñoqawan ruwanaykichispaqchu qelqamurqaykichis. Ichaqa, sichus pipas chay hatunchakuyniyta qechuwanman chayqa, ñawpaqtaraq wañukapuyniymi, aswan allinqa kanman.
[16] Allin willakuyta willanayqa willanaypunin. Chayrayku, sichus allin willakuyta willashani chayqa, manan imamantapas hatunchakuyniyqa kanchu. Ichaqa, manachus chay allin willakuyta willayman chayqa, !ay ñoqamanta, imaynaraq kanman!
[17] Chaymi, sichus sonqomanta ruwashani chayqa, pagoyqa kapuwanqan. Sitaqchus mana sonqomantachu ruwashayman chaypas, chay llank'anaqa qosqapunin kawarqan.
[18] Chay hinaqa, ¿imataq premioyri kanqa? Cristoq allin willakuyninta yanqallanmanta willasqaymi premioyqa kanqa. Chay hinapin, allin willakuymanta tupaqniytaqa mana chaskisaqchu.
[19] Hinaña llapa runamanta kacharichisqa kani chaypas, askha runakunata tarinaypaqmi, llapa runaq kamachinman tukurqani.
[20] Judío runakunapaqqa, paykunata tarinaypaqmi, judío runaman tukurqani. Kamachikuy Simiwan kaqkunapaqpas, manaña Kamachikuy Simipi kashaspaypas, Kamachikuy Simipi kashaqmanmi tukurqani. Chay hinapi, Kamachikuy Simipi kashaqkunata tarinaypaqmi, Kamachikuy Simipi kashaqman tukurqani.
[21] Mana Kamachikuy Simipi kashaqkunapaqqa, manapas Kamachikuy Simipichu kashayman hinan tukurqani. Ñoqaqa Diospa kamachikuyninmanta mana kacharichisqachu kashaspaypas, Cristoq kamachikuyninpiñan kashani. Chay hinapi, mana Kamachikuy Simipi kashaqkunata tarinaypaqmi chaytaqa ruwani.
[22] Pisikallpayoqkunata tarinaypaqmi, pisi-kallpayoqmanqa tukurqani. Imaynapipas wakinkunallapas qespisqa kanankupaqmi, llapapaq imaynachus kasqankuman hina llapanmanpas tukurqani.
[23] Allin willakuyrayku, hinallataq chaypi llank'aysikuqmasin kanaypaqwanmi, chaytaqa ruwani.
[24] Estadiopi phawaqkunaqa, cheqapaq llapallankun phawanku. Llallispa premiota chaskiqtaqmi ichaqa, ch'ullallapuni. ¿Manachu chaytaqa yachankichis? Chay hinaqa, llallispa premiota chaskiq hinapuni phawaychis.
[25] Llapa llallinakuqkunaqa, lliw mana allin kaqkunamantan kuidakunku. Paykunaqa tukukuq pilluta chaskinankupaqmi chay hinata kuidakunku. Ñoqanchismi ichaqa, mana tukukuq koronata chaskinanchispaq llallinakushanchis.
[26] Chaymi ñoqaqa chay hinata phawashani. Manan hawan ukhuntachu phawashani. Chay hinatan maqanakuni. Manataqmi ch'usaq wayrata saqmaq hinachu maqanakuni.
[27] Aswanmi aycha kuerpoyta sinchitapuni muchuchishani. Chay hinapin, aycha kuerpoytaqa kamachini. Mana hinaqa, hukkunaman willaq kashaspaychá, Diospa mana baleqpaq qhawarisqan rikukuyman.