[1] کْرَمِࢽْدٜ یَ ࢻِبِ بَࢽَمَ جَمَ عِیسَىٰ غَوُ بْلَ کَࢽْکَرِیَیٜدَ ࢽَیِرُو أَسُࢽْجَغَکِّ؞
[2] کْمَࢽْدٜ ࢽَࢽْغَرُو جِرِ مُمِࢽَّرُو جُسّْࢽَلَࢽْ تِیَ مُکُّو یِࢽْدِࢽْ مُووُواْ، لَمَرْ ࢻِࢽْ یَیٜ ࢽَیِࢽْ مْرَدُࢽْجُوَدْࢽْ تِرُو بَࢽَغْࢽُواْ، تِمَ أَمْ ࢽغْوُ وُࢽْ کُࢽْدٜࢽُّو بَࢽَ سَدْࢽَ ࢽَࢽْغَرُو؞
[3] یَ بِلْکِسُوَ کوَࢽْجُ أَکِلَآ لٜوَࢽُواْ، وُوَ رُوکُّو عِیسَى أَلْمَسِیوُیٜ کِدَوُ،
[4] تَیِ دُوُوࢽْ رُوࢽِ ࢽَࢽْغَرُو کَاࢽجَ ثَلَدْࢽَدْ؞ وُ رُࢽِ غْࢽِ، جَمَ عِیسَىٰ غَوُ ࢻْرْدُࢽْجَ کْرْدِ سَمَّ یٜ تَیِیَ أَرْدِجَࢽَ؞
[5] جَمَ عِیسَىٰ غَوُ ࢻَࢽّجَࢽْ ثَࢻْتَیْسُودْ یٜیَ لٜوَࢽُواْ؞ أَࢻَࢽِتُسْ رَاکّْࢽَدَ لٜوَࢽُواْ، تِمَ عِیسَىٰ غَمَ بُرْوُویٜ ثِدِ أَسِیَیٜ وُو؞
[6] مَرْیَمْ ࢽَیِ ࢽَࢽْغَرُو جَوْرُو ࢽغْࢽْࢻْتْࢽَدَ لٜوَࢽُواْ؞
[7] أَࢽْدَرُوࢽِکُسَّ یَ یُࢽِیَتُوَ، کْرَمِیَࢽِ یٜ، سَوَوَࢽِ کُوسُویٜ یٜدَ لٜوَࢽُواْ، تَیِدْ دَوُ کْࢽْغَیَمْبَیٜࢽْ ࢽُووَدَ، کُورُو وُࢽْ بُرْوُوࢽُّو أَلْمَسِیوُوَ جَاࢽَ؞
[8] أَمْࢻِلِیَتُسْ کْمَࢽْدٜ ࢽَࢽْغَرُو رَاکّْࢽَدَ لٜوَࢽُواْ؞
[9] أُرْبَࢽُسْ سَوَࢽْدٜ کِدَ أَلْمَسِیوُیٜࢽَّ سِتَکِسْ رَاکّْࢽَدَا لٜوَࢽُواْ؞
[10] أَࢻَلُسْ أَلْمَسِیوُلَࢽْ أَرْدِیَدَدَ لٜوَࢽُواْ؞ أَمْ ࢻَدُو أَرِسْتَبُلُسّٜیَ لٜوَࢽُواْ؞
[11] کْرَمِࢽِ حِرُدِیَࢽَّ لٜوَࢽُواْ؞ أَمْ کْمَا غَوُ ࢻَدُو ࢽَرْکِسُسّٜیَ لٜوَࢽُواْ؞
[12] یَ تَرَࢻِࢽَا یَ تَرَࢻُوسَا کِدَ کْمَࢽْدٜىٰࢽْ جَوْرُو ࢽغْࢽْࢻْتَࢽَدَ لٜوَࢽُواْ؞ یَ ࢻَرْسِ تْرَاࢽَدَ لٜوَࢽُواْ، تِ یٜ کِدَ کْمَࢽْدٜىٰࢽْ جَوْرُو ࢽغْࢽْࢻْتْࢽَ؞
[13] رُࢻُسْ کَمْ کْمَࢽْدٜ تِیَ کْرٜجْࢽَدَ یَࢽْجُ تِ یَࢽِ غَیْ یٜدَا لٜوَࢽُواْ؞
[14] أَسِࢽْکْرِتَّ ࢻِلٜغُوࢽَّ حٜرْمٜسَّ ࢻَتْرُوبَسَّ حٜرْمَسَّ کْرَمِیَ تَیِیَ رُوکُّودَا لٜوَࢽُواْ؞
[15] ࢻِلُولُوغُسَّ یَ یُلِیَتُوَ ࢽِرِیُسَّ یَࢽْجُغْࢽَ کَمُیٜیَ أُولِمْࢻَسَّ مُمِࢽَّ تَیِیَ رُوکُّو سَمَّآ لٜوَࢽُواْ؞
[16] کَتّٜࢽْدُوࢽْ لٜوَ کْرَوُویٜࢽْ لٜوَدْࢽُواْ؞ جَمَ أَلْمَسِیوُوَ غَوُ سَمَّ ࢽَیِیَ لٜوَࢽْجَیْ؞
[17] کْرَمِیَ، لُواْࢽْجَکِّ، أَمْ أَلَمْدُ ࢻَࢽْدُوَّدَ وَجَࢽٜ یَکْتُ ثَدِمَسُو، تَکَّلْ ثَکِّمَسُورُو حَࢽْغَلْدْࢽُواْ، تَیِرُو کَدْࢽُواْ!
[18] أَمْ أَࢽِ غَیْ کْمَࢽْدٜ أَلْمَسِیوُرُو غْࢽِ، ثُرُوࢽْجَمَرُو کِدَ ثَدِّ، کُورُو مَࢽَکْجِࢽْجَا جَجَکْتُࢽْجَاࢽْ کَرْوُ أَمْ أَوُو دِوِ أَسُجَیْوَوُویٜدَ جَمْبَجَیْ؞
[19] لَوَرْ غَࢽْدُویٜدَ وُࢽْدُ یَیٜ ࢽُوجْࢽَ؞ ࢽَیِ ࢽَࢽْغَرُو کَرْوُࢽِ کْجِجْࢽَ، أَمَّ کْلَ أَوُو ࢽغْلَیٜࢽْ رَشِدُرُو وَلُّوٜ کْلَ أَوُو دِوِیٜࢽْ بِوُ بَوُووَرُو وَلُّوِیَ، رَاکُّو؞
[20] اللَّه ࢽَࢽْلٜوَیٜ تُسّْࢽِّࢽْ ثِدِیَ سِࢽْدُویٜࢽْ إِوُلِیسَّ غْرْࢽٜجِ؞ سٜرْ کْمَࢽْدٜ عِیسَیٜ ࢽَیِلَࢽْ دْغَ!
[21] تِمُوتِ سَوَࢽِ کِدَیٜدْ ࢽَیِیَ لٜوَࢽْجَیْ، أَدْغَیْمَ لُسِیَسَّ جَسُوࢽَّ سُوسِࢻَتَا کْرَمِیَࢽِدْ یٜ لٜوَࢽْجَیْ؞
[22] وُ تَرْتِیُسْ وُوتِیَ أَدَ رُوُࢽْکّْࢽَدْ ثُ کْمَࢽْدٜىٰࢽْ ࢽَیِیَ لٜوَࢽْجَکِّ؞
[23] غَیُسْ تِ دُوُوࢽْ وُوَ جَمَ عِیسَىٰ غَوُ سَمَّایٜ سُوسَمَࢽْدٜدْ لٜوَࢽْجَیْ؞ إٜرَسْتُسْ أَسُسُمَ بْلَیٜ کْرَمِࢽْدٜ کَرْتُسَّ رُوکُّو یٜ لٜوَࢽْجَیْ؞
[24] [سٜرْ کْمَࢽْدٜ عِیسَى أَلْمَسِیوُیٜ ࢽَیِ سَمَّلَࢽْ دْغَ! أَمِࢽْ؞]
[25] [تُو، اللَّهرُو دَرَجَ تِیُو، کْلَ کَوُرِ کْجِ عِیسَى أَلْمَسِیوُیٜ مَوُوࢽْکِّیٜࢽْ کْࢽْدُوُو ࢽَیِرُو دُࢽُو ࢽجُویٜ ࢽَࢽْجُࢽْ مبٜجِ؞ کُورُو کْلَ ࢻَسَلْ اللَّهیٜ کْرْدِیَا وُجْࢽَ تْࢽْ جَمَࢽْ کُرٜىٰࢽْ جَکْتْࢽَ دُوُوࢽْ،
[26] کْرْمَ أَوُو ࢽَوِیَ رُوُجَࢽَ ࢽَࢽْغَرُو جَمَ دُࢽِیَیٜ سَمَّرُو بَیِࢽْجِیٜ إِسَࢽُوجَاࢽَیٜࢽْ، کُورُو وَدَ اللَّه سَوِسُومَیٜ، وَدَ دُوُوࢽْ تَیِ تِیَ مْرْسَجَ جَارُو ثِࢽَدْ یٜࢽْ،
[27] اللَّه تِلُو ࢽَࢽْرَشِدُ ثْدَࢽَدْرُو عِیسَى أَلْمَسِیوُیٜࢽْ حَرْ أَبَدَ أَبَدِࢽُّو دَرَجَ تِیُو! أَمِࢽْ؞]