[1] أَدْ ࢽَࢽْغَرُو کُورْکِّ: «اللَّه جَمَࢽْجُوَ وَیٜࢽُو وَ؟» أَعَ، تْمَّرُو ࢽغَیْ غْࢽِ! وُ کْلَࢽِمَ إِسْرَاءِیلَمَ، کَدُوُ ࢽَوِ إِبْرَاهِیمْبٜ، جِرِ بِلِیَمِࢽُیٜ؞
[2] اللَّه جَمَࢽْجُ ثَمَࢽْ ࢽُوجْࢽَدَ وَجْࢽِّ؞ رَ، أَوُو کِتَوُ کْلَ ࢽَوِ إِلْیَیٜࢽْ وُلْجْࢽَ، جِرِ سُوࢽْجُ کْلَ إِسْرَاءِیلَوُیٜࢽْ اللَّهرُو ثْدّْࢽَدَ ࢽُوࢽُوِّ وَ؟
[3] تِیٜ: «کْمَࢽْدٜ، ࢽَوِیَࢽْمْبَ ثٜىٰسْࢽَ، لَیَ دُوَدُرَمّْمْ وُرْجَࢽَ، وُ رُࢽِمَ غَمّْکُّو، کُورُو وُوَ ࢽجٜجُورُو مَسَیْ،» ثْࢽَّ؞
[4] أَوِ اللَّه جَاوُرُو ثُو؟ «أَمْ ࢻُوُ بَعَلّٜࢽْ تُࢽْغُرُمْجَࢽِّ دْوُ تُلُرْ کْلَࢽِرُو غْࢽَیٜکُّو،» ثْࢽَّ؞
[5] جَمَࢽْ کْرْمَیٜࢽْ یٜ ࢽغَیْمَ، أَمْ لَا غَࢽَ غَࢻْثَࢽَ اللَّه سٜرْࢽْجُࢽْ کْرٜجْࢽَ مبٜجِ؞
[6] أَمَّ کْرٜࢽْجُدْ کْلَ سٜرّٜࢽْ ࢽَࢽْغَرُو، تِدْ کْلَ کِدَیٜࢽْ غْࢽِ تْدِ؞ أَدْ غْࢽِیَ، سٜرْ اللَّهیٜدْ غَدٜرُو سٜرْ غْࢽِ؞
[7] تُو، أَوِ غْلٜ؟ جَمَ إِسْرَاءِیلَیٜ أَوُو مَجِدَ ثُوَࢽْدْࢽِّ؞ أَدْ یَیٜ تَیِ دُوُوࢽْ اللَّه کْرٜجْࢽَدْ ثَوَࢽْدْࢽَ، تَیِ غَدٜدْیٜ اللَّه کْلَࢽْجَ کِبَّجْغْࢽَ،
[8] کِتَوُلَࢽْ رُوُوَدَدْ غَیْ: «اللَّه کَرْوُࢽْجَا جَکْثْࢽَ، تَیِرُو سِمْ ثَرُیْوَوُو یٜ، سْمُو ࢻَࢽْجَیْوَوُو یٜ ثِࢽَ، حَرْ کُمَرُو؞»
[9] کُورُو ࢽَوِ دَاوُدَیٜ: «مَسْࢽَࢽْجَ کٜلَّ کُتِّیَ تَکَّلَّرُو وَلْجُو، ࢽِیَࢽْجَ یٜ کْلَࢽْجَرُو وَلْجُو!
[10] سِمْࢽْجَ دُوُوَرُو وَلْجُو بَرٜ ثُرُࢽِّرُو، ࢽغَوُوࢽْجَ یٜ کُلُّمْبُو ࢽغُوَدَرُو وَلْجُو!» ثْࢽَّ؞
[11] دَجِ کُورْکِّ: «جَمَ إِسْرَاءِیلَیٜ تَلْدُࢽْجَدْ، ثَسُرْࢽَ ثِجَیْوَوُو وَ؟» أَعَ، تْمَّرُو ࢽغَیْ غْࢽِ! أَمَّ أَیَوْࢽْجَیٜمَࢽْ ࢽجْکَّوُودْ کْرْدِیَرُو کَدِیُو، ࢽَࢽْدْرِ جَمَ إِسْرَاءِیلَیٜیَ ثْدَرُو؞
[12] تَلْدُࢽْجَدْ بَرْغَ دُࢽِیَرُو کِکُّدُووَ، کُورُو ࢽجُرُوࢽْجَدْ بَرْغَ کْرْدِیَرُو کِکُّدُووَ، بَلّٜ اللَّهرُو وَلْدُࢽْجَ!
[13] ࢽَیِ ࢻْرْدُࢽْدُو کْرْدِدْرُو وُلْࢽْجَغَکِّ، وُ کْࢽْغَیَمْ کْرْدِیَیٜدْرُو، کِدَࢽِدَ جَجَࢽْغْکِّ،
[14] ࢽغَیْࢽِࢽْ کْرَمِیَࢽِیَ یَکّْکّٜ ࢽَࢽْدْرِ تَیِیَ ثْدَیْ، لَاࢽجَ ࢽجْکَّوُو ثَوَࢽْدُورُو؞
[15] تَیِیَ سْغْرِرُو ࢽجَکُّودْ سُولُو دُࢽِیَیٜ کِوُدُووَ، أَوِ غْلٜ مُواْࢽْجَ یٜ ثُوُدِ؟ کَرْمُولَࢽْ رُووَرُو ثِدُ، غْࢽَ؟
[16] سَدَا رُࢽْغُو ࢽٜمَ بُرْوُویٜدْ تَیِرْدْرُو، رُࢽْغُودْ سَمَّ ࢽغَیْ، کُورُو سِ کْسْکَیٜدْ تَیِرْدْرُو، دْلَمْبَدْ یٜ ࢽغَیْ؞
[17] دْلَمْبَ لَآ کْسْکَ جَیْتُࢽْ ࢻَدُویٜࢽْ کَمْجَࢽٜ، ࢽِ یٜ دْلَمْ یَ جَیْتُࢽْ کَرَایٜ دُوُوࢽْ تِرُو تَࢽّجَغَࢽٜ، ࢽُوَࢽْمْ سِ أَمْبَدُمَ یَ جَیْتُࢽّٜدْلَࢽْ کِوَࢽْدْمْبَ،
[18] بَرٜ کْلَ دْلَمْبَ أَࢽِیٜࢽْ کْلَࢽْمْ جَجَࢽْغْمِّ! أَمَّ جَجَࢽْغْمِرُو وَلْیٜࢽُووَ، ࢽِ غْࢽِ سِدَ رُوࢽْمِ، سِدْ ࢽِیَ رُوࢽْجِرُو تَࢽْغٜ!
[19] دَجِ ࢽِیٜ: «وُوَ کْسْکَدْرُو تَࢽْسَارُو دْلَمْبَدَ کَمْجَࢽَ،» ࢽْمِ؞
[20] جِرٜمَرُو، کَمْبْرْسٜࢽَمْبُࢽْجَ ࢽَࢽْغَرُو کَمْغٜرَ، أَمَّ ࢽِدْ کَمْبْرْسٜࢽْمْ ࢽَࢽْغَرُو دَࢽْمَّ؞ تُو، بَرٜ رُوکُرَمَرُو وَلّْمِّ، بِیَ رِࢽٜ!
[21] اللَّه دْلَمْبَ أَلَلَدَ کُولْجْࢽِّرُو وَلْیٜࢽُووَ، ࢽِ یٜیَ سَمْ کُولْࢽْجِوَوُو؞
[22] ࢽَࢽّغْلَا ࢽَࢽْجَوْوَ اللَّهیٜیَ رُیْ، ࢽَࢽْجَوْ کَࢽْجِ أَمْ ثَسُرْࢽَیٜࢽْ، أَمَّ ࢽَࢽّغْلَࢽْجُ کَࢽْجِࢽْمْلَࢽْ؞ سَیْ ࢽَࢽّغْلَࢽْجُدْلَࢽْ دْغَمِیَ، أَدْ غْࢽِیَ، ࢽِ یٜیَ کَمْࢽْجَیْ؞
[23] کُورُو تَیِ یٜ، کَمْبْرْسٜࢽَمْبُلَࢽْ دَسَاࢽِّرُو وَلْیٜࢽُووَ، وَلْدَࢽٜ تَیِیَ تَࢽْجَیْ، ࢽَ اللَّهیٜࢽْ کْࢽْدُوُو تَیِیَ تَࢽْدُیٜ مبٜجِ؞
[24] ࢽِدْ، دْلَمْ یَ جَیْتُࢽْ کَرَایٜلَࢽْ کَمْࢽْجَࢽٜ یَ جَیْتُࢽْ ࢻَدُویٜرُو تَࢽّغٜىٰرَ، ࢽِرُو أَلَلَ غْࢽِ؞ بَلّٜ تَیِ دْلَمْبَ کْسْکَ ࢻَدُویٜدْ، یَ جَیْتُࢽْ کَاࢽجَیٜرُو تَࢽْدُوُدْ جَوْ وَ؟
[25] کْرَمِیَ، أَسْرْ أَدَ ࢽُوࢽُوِیَ، رَاکُّو، بَرٜ إِلْمُوُرُو کْلَࢽْدُووَ ࢽغُوࢽُوِّ: کْلَکِبُّ جَمَ إِسْرَاءِیلَیٜ لَاࢽجَا ثْدَࢽَ، حَرْ ثُرُو کْرْدِیَیٜࢽْ ࢽَࢽّغْوُࢽْجَ سَمَّ اللَّهرُو إِسَیْرُو؞
[26] ࢽغَیْࢽِࢽْ جَمَ إِسْرَاءِیلَیٜ سَمَّ ࢽجْکَّوُو ثَوَࢽْدِ، کِتَوُلَࢽْ رُوُوَدَدْ غَیْ: «ࢽجْکَّیِمَ سِیُوࢽْلَࢽْ إِسِ، کَدُوُ یَعْࢼُوبَیٜیَ أَوُو ࢽَࢽْمُمِࢽّٜ غْࢽِدَ ࢻَیْجِ؞
[27] أَدْمَ أَمَࢽْ تَیِیَ ࢽدْمِّیٜدْ: بِوُوَࢽْجَ ثِࢽّْکِّ؞»
[28] کَࢽْجِ کَوُرِ کْجِدْیٜࢽْ ࢽَیِ ࢽَࢽْغَرُو تَیِدْ کْلَدُو اللَّهیٜ، أَمَّ کَࢽْجِ کْرٜ اللَّهیٜدْیٜࢽْ کَارِیَدْ ࢽَࢽْغَرُو تَیِدْ تَرَاࢽَ؞
[29] أَوُووَ اللَّه کْࢽْجُوࢽْجُوَ بُواْدُࢽْجُوَا تْمَّرُو ࢻَلْجِوَوُو؞
[30] ࢽَیِدْ ثَلَࢽْ اللَّهَ غَࢽَمْبُوُ دُوُوࢽْ کْرْمَ غَࢽَمْبُࢽْجَ ࢽَࢽْغَرُو ࢽَیِیَ ࢽجُࢽُوࢽْجَࢽَ؞
[31] ࢽغَیْمَࢽْ تَیِدْ یٜ کْرْمَ غَࢽَمْبُوُ ࢽَࢽْغَرُو کَࢽْجِمَرِ ࢻَࢽْدُوَّ، تَیِ یٜ کْرْمَ کَࢽْجِمَرِ ثَوَࢽْدُورُو؞
[32] اللَّه کَࢽْجِمَرِࢽْجُ أَمْ سَمَّرُو ࢻْلٜجُوُورُو، تَیِیَ ثَکّٜ کُوسُووُ غَࢽَمْبُیٜرُو وَلْیٜرَ؞
[33] اللَّهیٜ ࢽَࢽْرَشِدُࢽْجُوَ إِلْمُࢽْجُوَدْ جَوْمَرُو کُرَ، ثِࢽْجَمَ بَوُو! وُواْمْࢽْجُ یٜ ࢽُودِوَوُو، جَوَلْࢽْجُ یٜ أَسُدِوَوُو!
[34] «وُࢽْدُ غْلٜ ࢽِیَ کْمَࢽْدٜىٰ ࢽُوجُو؟ وُࢽْدُ غْلٜ غَلَمَࢽْجُرُو وَلْجُو؟»
[35] «وُࢽْدُ غْلٜ بُرْوُوࢽْ اللَّهرُو أَوُو لَا ثُو، تِرُو ثْکّْرْمْبِرُو؟»
[36] أَوُووَ أَوُو سَمَّ تِلَࢽْ یٜ، تِیٜࢽْ یٜ، تِ ࢽَࢽْغَرُو یٜ دْغَیْ؞ تِرُو حَرْ أَبَدَرُو دَرَجَ تِیُو! أَمِࢽْ؞