[1] تُو، کَارِࢽْدٜ ࢽَوِ إِبْرَاهِیمْدْ، أَوِ غْلٜ وُلِّیٜ؟ ࢽَࢻْتُࢽْجُ أَدَمْغْࢽَیٜࢽْ، کْلَ کَمْبْرْسٜىٰࢽْ أَوِ أَسُجُو؟
[2] ثَ ࢽَوِ إِبْرَاهِیمْ کِدَ دِیُولَࢽْ جِرٜمَرُو وَلْیٜࢽُووَ، دَلِلْ أَوُلُو بُویٜ ثْدَࢽَ، أَمَّ ࢻُوُ اللَّهیٜࢽْ غْࢽِ؞
[3] تُو، أَوِ کِتَوُ وُلْجُو؟ «ࢽَوِ إِبْرَاهِیمْ اللَّهَ مْرْسَجْࢽَ ࢽَࢽْغَرُو، اللَّه تِیَ جِرٜمَرُو ࢽغُویٜࢽُو؞»
[4] کَمْ کِدَ ثْدِدْرُو بِیَࢽْجُدْ کْࢽْجُو غْࢽِ، أَلْوَسِ؞
[5] أَدْ یَیٜ کَمْ دُوُوࢽْ کِدَ ثْدِوَوُو، أَمَّ اللَّه أَمْ دِوِیَ جِرٜوُرُو دِیُومَا مْرْسَجِدْ، کَمْبْرْسٜࢽْجُ ࢽَࢽْغَرُو تِیَ جِرٜمَرُو ࢽغُوجِ؞
[6] ࢽَوِ دَاوُدَ یٜ کَمْ دُوُوࢽْ اللَّه تِیَ کِدَࢽْجُ غْࢽِ ࢽَࢽْغَرُو جِرٜمَرُو ࢽغُوجِدْیٜ بَرْغَࢽْجُ وُلْجْࢽَدْ غَیْ:
[7] «بَرْغَࢽْجَ أَمْ أَیَوْوَࢽْجَ یٜ غَوُرْدْࢽَ، بِوُوَࢽْجَ یٜ جَکَّدَدْ؞
[8] بَرْغَࢽْجُ کَمْ کْمَࢽْدٜ تِرُو بِوُࢽْجُ تْمَّرُو غْࢽَجِیوَوُودْ؞»
[9] بَرْغَ أَدْ أَمْ کَجَادَ رُࢽْجَیٜمَ وَ؟ رَ، جْمْبْلْمْبَ یٜ ثَوَࢽْدِ؟ کَمْبْرْسٜ ࢽَوِ إِبْرَاهِیمْبٜ ࢽَࢽْغَرُو اللَّه تِیَ جِرٜمَرُو ࢽغُوجْࢽَرُو وُلِّیٜ؞
[10] دْلْوُ ࢻِلَࢽْ تِیَ جِرٜمَرُو ࢽغُویٜرَ؟ کَجَࢽْجُوَلَࢽْ رَ جْمْبْلْمْلَࢽْ؟ سَ تِ کَجَادَلَࢽْ غْࢽِ، جْمْبْلْمْدْلَمَࢽْ؞
[11] کَجَدَ أَلَمَ غَیْرُو کِوَࢽْدُو، أَلَمَ دُوُوࢽْ سَ کَجَدْࢽِّࢽْ کَمْبْرْسٜࢽْجُ ࢽَࢽْغَرُو ࢽَࢽْجِرٜ ثُوَࢽْدْࢽَدَ تَبَّثِّیدْ؞ ࢽغَیْࢽِࢽْ ࢽَوِ إِبْرَاهِیمْ بَوَ أَمْ کَمْبْرْسٜیَ جْمْبْلْمْ دَسَاࢽَ سَمَّیٜرُو وَلْیٜࢽُو، تَیِ یٜیَ کَمْبْرْسٜࢽْجَ ࢽَࢽْغَرُو جِرٜوُرُو ࢽغُوجَرُو؞
[12] کُورُو بَوَ أَمْ کَجَادَیٜ یٜرُو وَلْیٜࢽُو، تَیِ دُوُوࢽْ کَجَادَ رُࢽْجُ غْࢽِ، جَوَلْ کَمْبْرْسٜىٰ بَوَࢽْدٜ ࢽَوِ إِبْرَاهِیمْ سَ جْمْبْلْمْلَࢽْ جْغَࢽَدْ یٜیَ جَغَیْدْ؞
[13] اللَّه ࢽَوِ إِبْرَاهِیمْبَ کَدُوُࢽْجُوَرُو وَرَسَمَ دُࢽِیَیٜرُو وَلْجِ ثْࢽٜ وَدُ ࢽغُویٜࢽُو، وَدُ دُوُوࢽْ وَدَ أَتَّوْرَیٜ غَلَࢽْ غْࢽِ، ࢽَࢽْجِرٜ کَمْبْرْسٜلَࢽْ إِسِدْیٜࢽْ تِرُو ثِࢽَدْ؞
[14] ثَ وَدَ غَلَࢽْ أَمْسُو وَرَسَوُرُو وَلْیٜرَا، کَمْبْرْسٜدْ یٜ بُووُ ࢻَتْ، وَدُدْ یٜ ࢻَیْدَࢽْجُ بَوُورُو وَلْجْࢽَ،
[15] وَدَدْ غْرْغَدُ اللَّهیٜ ثُوُدِ ࢽَࢽْغَرُو؞ ࢽَ وَدَ بَوُولَࢽْ وَدَ غَࢽَمْبُ یٜ بَوُو؞
[16] أَدْمَ ࢽَࢽْغَرُو وَدُدْ أَوُو کَمْبْرْسٜىٰ وُو؞ دَلِلْ وَدُ سٜرْلَࢽْ إِسِدْ، تِمَ کَدُوُ سَمَّرُو تَبَّثُّوُورُو، کَمْ وَدَ جْغَࢽَمَ رُࢽْجُرُو غْࢽِ، کَمْ کَمْبْرْسٜ ࢽَوِ إِبْرَاهِیمْبٜیَ جْغَࢽَمَ یٜرُو، تِ دُوُوࢽْ بَوَ أَࢽْدِ سَمَّیٜدْ؞
[17] کِتَوُلَࢽْ رُوُوَدَدْ غَیْ: «ࢽِیَ بَوَ جَمَ کَدَ کَدَمِیٜرُو ࢽغِدْکُّو؞» تِدْ اللَّهَ کَسَثّْࢽَ، اللَّه دُوُوࢽْ أَمْ سَࢽُࢽَرُو رُو ثَکّٜ أَوُو بَوُووَ مٜࢽَّرُو ثْدِدْ؞
[18] تْمَ بَوُو یَیٜ، ࢽَوِ إِبْرَاهِیمْ تْمَجٜ اللَّهَ مْرْسَجٜ ࢽغَیْࢽِࢽْ بَوَ جَمَ کَدَیٜرُو وَلْیٜࢽُو، اللَّهیٜ تِرُو: «کَدُوُࢽْمْ ࢽغْوُجَیْ،» ثْࢽَّدْ غَیْ؞
[19] تِ کْرْوُࢽْجُ مِیَ غَیْ دُوُوࢽْ، کِیَرِجْࢽَ یٜ، کُورُو سَارَتُ یٜ ثَمْبِوَوُورُو ثُرُࢽَ یَیٜ، کَمْبْرْسٜࢽْجُ دُࢽُو بَوُورُو وَلْجْࢽِّ؞
[20] وَدُ اللَّهیٜ شٜکُّ بَوُووَلَࢽْ کَسَثّٜ کَمْبْرْسٜࢽْجُلَࢽْ دُࢽُووَرُو وَلْیٜࢽُو، کُورُو اللَّهرُو دَرَجَ کَیْࢽُو،
[21] أَوُو اللَّه ثْدِ ثْࢽَّدَ ثْدِرُو تَبَّتُّو مْرْسَجْࢽَ ࢽَࢽْغَرُو؞
[22] ࢽغَیْࢽِࢽْ کَمْبْرْسٜࢽْجُ ࢽَࢽْغَرُو اللَّه تِیَ جِرٜمَرُو ࢽغُویٜࢽُو؞
[23] مَࢽَ رُوُوَدَ أَدْ: «تِیَ جِرٜمَرُو ࢽغُویٜࢽُو،» تِ رُࢽْجُرُو غْࢽِ،
[24] أَࢽْدِ یٜرُو رُوُوَادَ؞ اللَّه أَࢽْدِ یٜیَ جِرٜوُرُو ࢽغُوسَیْ، تِ دُوُوࢽْ کْمَࢽْدٜ عِیسَىٰ کَرْمُولَࢽْ ثْسَࢽْغْࢽَدَ مْرْسَࢽِیٜࢽَ ࢽَࢽْغَرُو؞
[25] عِیسَدَ بِوُوَࢽْدٜ ࢽَࢽْغَرُو سْرْثَّغَࢽٜ کَࢽُو، کُورُو جِرٜوُرُو وَلِّیُورُو کَرْمُولَࢽْ ثِیٜࢽُو؞