[1] أَدْ ࢽَࢽْغَرُو کْرْمَ أَمْ عِیسَى أَلْمَسِیوُوَ غَوُدْرُو وُواْمْ ࢻِمَ بَوُو،
[2] دَلِلْࢽْجُدْ وَدَ رُحُیٜ دُوُوࢽْ عِیسَى أَلْمَسِیوُیٜࢽْ رُو ࢽجُومَدْ وُوَ وَدَ بِوُیٜیَ کَرْمُویٜیَ ࢻِرْسَࢽٜ ࢽَࢽْکَمْ کْلَیٜ سِࢽَ ࢽَࢽْغَرُو؞
[3] أَوُو دُوُوࢽْ وَدَ ࢽَࢻْتُ أَدَمْغْࢽَیٜ ࢽَࢽْغَرُو لَوُ رَکْثٜ ثْدْࢽِّدَ اللَّه کِدُو؞ بِوُ ࢽَࢽْغَرُو تَدَࢽْجُوَ أَلَمَ تِیࢽْدٜ بِوُمَیٜ غَیْࢽِࢽْ جُوَجِیٜ تِیلَࢽْ بِوُدْرُو وُواْمْ غْࢽَیٜىٰࢽُو؞
[4] أَدَ دِیُوࢽْجُدْ، ࢽَࢽْجِرٜ وَدَ وُلْجْࢽَدْ أَࢽْدِ دُوُوࢽْ ࢽَࢻْتُ تِییٜࢽْ غْࢽِ، رُحُیٜࢽْ دْغَیْیٜࢽَدْلَࢽْ تْدُو؞
[5] أَمْ دُوُوࢽْ حَلْ تِییٜࢽْ دَسَاࢽَمَدْ حَࢽْغَلْࢽْجَ کْلَ أَوُو تِییٜࢽْ کْرْغَ، أَمَّ أَمْ دُوُوࢽْ حَلْ رُحُیٜࢽْ دَسَاࢽَمَدْ حَࢽْغَلْࢽْجَ کْلَ أَوُو رُحُیٜࢽْ کْرْغَ؞
[6] حَلْ تِییٜدْ کَرْمُو، أَمَّ حَلْ رُحُیٜدْ رُووَ ࢽَࢽْلٜوَا؞
[7] أَوُووَ حَلْ تِییٜدْ کْلَدُو اللَّهیٜ، دَلِلْࢽْجُدْ وَدَ اللَّهیٜ جْغَیْوَوُو، تْمَّرُو رَکْثٜ جْغَیْوَوُو؞
[8] أَمْ حَلْ تِییٜیَ غَوُدْ رَکْثَࢽٜ أَرْدِیَ اللَّهیٜ ثَوَࢽْدِوَوُو؞
[9] أَمَّ ࢽَیِدْ حَلْ تِییٜࢽْ غْࢽِ، رُحُیٜࢽْ کْرْغَوْ، رُحُ اللَّهیٜ ࢽَیِلَࢽْ دْغَࢽَ ࢽَࢽْغَرُو؞ کَمْ دُوُوࢽْ رُحُ أَلْمَسِیوُیٜ تِلَࢽْ دْغَࢽِّدْ، تِدْ أَلْمَسِیوُیٜ غْࢽِ؞
[10] أَلْمَسِیوُدْ ࢽَیِلَࢽْ کْرْغَا، تِیدْ بِوُ ࢽَࢽْغَرُو ࢽُࢽَ، أَمَّ رُحُدْ ࢽَࢽْجِرٜ ࢽَࢽْغَرُو رُو ثِ؞
[11] کُورُو تِ عِیسَىٰ کَرْمُولَࢽْ ثْسَࢽْغْࢽَدْیٜ رُحُࢽْجُ ࢽَیِلَࢽْ کْرْغَا، دَجِ تِ أَلْمَسِیوُوَ کَرْمُولَࢽْ ثْسَࢽْغْࢽَدْ رُحُࢽْجُ ࢽَیِࢽْ دْغَࢽَدْیٜࢽْ تِیࢽْدُو ࢽُومَدْ یٜرُو رُو ثَکِّ؞
[12] کْرَمِیَ، أَدْمَ ࢽَࢽْغَرُو وَجِࢻْࢽْدٜ مبٜجِ، أَمَّ حَلْ تِییٜࢽْ دْغَرُو غْࢽِ،
[13] أَوُووَ حَلْ تِییٜࢽْ دْغَوَّا، ࢽُوِ، أَمَّ رُحُدْیٜࢽْ کْࢽْدُو تِییٜدَ یٜجُوَّا، رُووَ دْغَوِ؞
[14] أَمْ دُوُوࢽْ رُحُ اللَّهیٜ تَیِیَ سِمُوجِمَدْ تَیِمَ تَدَوَ اللَّهیٜدْ وُو؞
[15] رُحُ ࢻَࢽْدُوَّدْ ࢽَیِیَ کَرٜیَوَرُو غْࢽِ ࢽغٜدُو حَرْ وَلْدُوٜ رِࢽُوِدْ، أَمَّ رُحُ ࢽَیِیَ تَدَوَ اللَّهیٜرُو دِیُومَدَ ࢻَࢽْدُوَّ، تِلَࢽْ کُواْ سَمِّیٜ: «أَبَّ، بَوَ!» ࢽِیٜ؞
[16] رُحُ اللَّهیٜ کْلَࢽْجُدْ کَرْوُࢽْدٜیَ رُوکُّو أَࢽْدِ تَدَوَ اللَّهیٜ وُورُو شٜدَجِ،
[17] کُورُو أَࢽْدِ تَدَوَدْرُو، أَࢽْدِ یٜ وَرَسَوُ، وَرَسَوُ اللَّهیٜ یٜ، وُوتّٜ أَلْمَسِیوُوَ رُوکُّو وَرَسَوُ؞ تِیَ کَلُّو بُوࢽٜ کِیَیْیٜیَ، تِیَ کَلُّو یٜ دَرَجَ ࢻَࢽْدِیٜ؞
[18] وُیٜࢽَّ بُوࢽٜ جَمَࢽْ کْرْمَیٜدْ مَرْتَوَ دَرَجَ أَࢽْدِرُو ࢻُوُࢽْ ࢻْلٜدِیدْیٜیَ ࢽَجِیوَوُو؞
[19] أَوُووَ أَلَکْتْࢽَ سَمَّ ࢻْلٜدُ تَدَوَ اللَّهیٜیَ غَࢽْغَدَارُو غُرٜجَیْ؞
[20] أَوُو أَلَکَّدَدْ ࢻَیْدَ بَوُورُو کَلَکْتْࢽَ، أَمَّ رَوُوࢽْجُࢽْ غْࢽِ، اللَّه دُوُوࢽْ تِیَ کَلَکْثْࢽَدْ ࢽَࢽْغَرُو؞ اللَّهیٜ رَوُوࢽْجُدْ تِمَ
[21] أَوُو أَلَکَّدَ کْلَࢽْجُدْ ࢽَࢽْکَرٜیَ ࢽجْࢻْتُیٜیَ ࢻِرْدَࢽٜ ࢽَࢽْکَمْ کْلَیٜ دَرَجَا تَدَوَ اللَّهیٜدْیٜࢽْ ࢽُوَࢽْجُ یٜ ثُوَࢽْدِ؞
[22] کُوَ یَیٜ أَوُو أَلَکَّدَ سَمَّ کْلَ تِلُوࢽَّ ࢽجْمْجٜ بُوࢽٜ کْࢽْجَمْبِیٜ ثَیْرُو ࢽُوࢽِیٜࢽَ؞
[23] أَوُو أَلَکَّدَ رُࢽْجُ غْࢽِ، أَࢽْدِ دُوُوࢽْ رُحُ اللَّهیٜ ࢽٜمَ بُرْوُویٜرُو ࢻَࢽْدِیٜࢽَدْ، أَࢽْدِ یٜ کَرْوُࢽْدٜࢽْ ࢽجْمِّیٜ تَدَوَ اللَّهیٜرُو وَلْدُࢽْدٜ، وُوتّٜ تِیࢽْدٜیَ مٜرُدُدَ غَࢽْغَدَارُو غُرٜࢽِیٜ؞
[24] تْمَ تَیْیٜࢽَ أَدْلَࢽْ ࢽجْکَّوُو ࢻَࢽْدِیٜࢽَ، أَوُووَ تْمَ تُرُیْدْ تْمَ غْࢽِ؞ وُࢽْدُ غْلٜ أَوُو ثُرُیْدَ تْمَجِ؟
[25] أَمَّ أَوُو رُیْیٜوَوُودَ تْمَࢽِیٜࢽَا، ࢽٜدِّیٜ کَࢽَدِلَࢽْ تِیَ غُرٜࢽِیٜ؞
[26] کُورُو ࢽغَیْمَࢽْ رُحُدْ دَوُ ࢽَࢽْلَوُࢽْدٜىٰࢽْ بَࢽَسَغَیْ، جِرِ مُودُوَ ࢽغْلَرُو دِیٜدَ ࢽُوࢽِیٜࢽْدٜ، أَمَّ رُحُدْ کْلَࢽْجُ أَࢽْدِرُو مَࢽَ وُلْدِوَوُولَࢽْ اللَّهَ سَکُّورِ؞
[27] تِ أَوُو کَرْوُࢽْ دْغَࢽَ کُرُومَدْ ࢽِیَ رُحُیٜ ࢽُوجْࢽَ، تِ رُحُدْ کْلَ أَوُو اللَّه ثْرَاࢽَیٜࢽْ مُمِࢽَّرُو ثُکُّورِ؞
[28] کُورُو اللَّه أَمْ تِیَ ثَرَاࢽَ یٜ، کْلَ ࢻَسَلْࢽْجُیٜࢽْ بُواْجْࢽَ یٜرُو أَوِ یَیٜیَ ࢽغْلَرُو ثْدِّرُو ࢽُوࢽِیٜࢽَ؞
[29] أَوُووَ أَمْ دُوُوࢽْ اللَّه ثَمَࢽْ تَیِیَ ࢽُوجْࢽَدْ، تَیِ یٜ ثَمُࢽُو تَدَࢽْجُیٜرُو وَلْجَرُو کَدَرْجْࢽَ، تِ کَرُ تَدَوَ ࢽغْوُیٜرُو وَلْجُورُو؞
[30] تَیِ کَدَرْجْࢽَدَ بُواْیٜࢽُو، کُورُو تَیِ بُواْجْࢽَدَ جِرٜوُرُو کِدُو، کُورُو تَیِ جِرٜوُرُو ثْدْࢽَدْرُو دَرَجَ کَیْࢽُو؞
[31] تُو، کْلَ أَوُو أَࢽِیٜࢽْ أَوِ غْلٜ وُلِّیٜ؟ اللَّهدْ کَاࢽدٜیَ، وُࢽْدُ وَدُمَࢽْدٜرُو وَلْجِ؟
[32] تِ دُوُوࢽْ تَدَࢽْجُدْمَا کُولْجْࢽِّ أَࢽْدِ سَمَّ ࢽَࢽْغَرُو ثِࢽَدْ، ࢽدَیِࢽْ غْلٜ أَࢽْدِرُو تِیَ کَلُّو أَوُو سَمَّا سٜرَّرُو سَدِوَوُو؟
[33] وُࢽْدُ أَمْ اللَّه کْرٜجْࢽَا ࢽغَدَرْجِ؟ اللَّهدْمَ تَیِیَ جِرٜوُرُو دِیُومَ وُو!
[34] وُࢽْدُ غْلٜ تِ دُوُوࢽْ وُواْمْ غْࢽَجِیدْ؟ عِیسَى أَلْمَسِیوُدْ تِمَ ࢽُࢽَدْ وُو، أَدَ کُوجْࢽَرُو تِمَ کَرْمُولَࢽْ ثِجْࢽَ یٜ، کْمْبُورَمْ اللَّهیٜࢽْ أَࢽْدِرُو اللَّهَ سَکُّورِ یٜدْ وُو؞
[35] وُࢽْدُ أَࢽْدِیَ کْرَوُو أَلْمَسِیوُیٜیَ ࢻِرْسَغَیْ؟ بُوࢽٜ وَ، رَ کُتُّ، رَ بَسَرِ، رَ کْࢽَ، رَ کَجْمُࢽَمْبُ، رَ مَسِوَ، رَ کَشَغَرْ وَ؟
[36] کِتَوُلَࢽْ رُوُوَدَدْ غَیْ: «ࢽِ ࢽَࢽْغَرُو أَࢽْدِیَ دَبْدُ سْرَمْبُو رُورُو سٜىٰسِ؞ دِمِیَ دُوَرَمْبُو ࢽجَدُویٜ غَیْرُو أَࢽْدِیَ ࢽغُوسَࢽَ؞»
[37] أَمَّ ثُرُو أَوُو أَࢽِ سَمَّیٜࢽْ تِ أَࢽْدِیَ سَرَاࢽَدْیٜࢽْ کْࢽَّسَرْوُمَا کُوجْࢽَرُو وَلِّیٜࢽَ؞
[38] تَبَّتُّو ࢽُوکّْࢽَ، کَرْمُو بِ رُو، مَلَیْیَوَ بِ کْرْمَیْیَ، لَمَرَّ کْرْمَیٜ بِ ࢻُوُیٜ، بِ کْࢽْدُوُووَ،
[39] أَوُو سَمٜىٰ بِ ثِدِیٜ، بِ أَوُو أَلَکَّدَ غَدٜ ࢻِمَ رَکْثٜ أَࢽْدِیَ کْرَوُو اللَّهیٜ کْمَࢽْدٜ عِیسَى أَلْمَسِیوُلَࢽْ تُوَࢽْدِدَ ࢻِرْسَیْوَوُو؞