[1] أَدْ ࢽَࢽْغَرُو، کْرَمِیَ، کْلَ کَࢽْجِمَرِ اللَّهیٜࢽْ ࢽَیِیَ لُواْࢽْجَکِّ، تِیࢽْدُو لَیَ رُووَ غَیْ تَیِرْ یٜ، اللَّه أَرْدِجْࢽَ یٜرُو یُواْ، ࢽغَیْمَࢽْ جِرِ وَجِࢻْثْࢽَلَࢽْ تِرُو أَمْبْتْکْوِ، أَوُووَ أَدْمَ أَمْبْتُّوُࢽْدُو جِرٜىٰ وُو؞
[2] بَرٜ ثَمُࢽُو جَمَࢽْ أَدْیٜرُو وَلُّوِّ، أَمَّ حَࢽْغَلْ بْرِࢽْ ࢽغُوࢽُواْ، ࢻَلْدْࢽُواْ، ࢽغَیْࢽِࢽْ أَوُو اللَّه ثْرَاࢽَ، وُوتّٜ أَوُو ࢽغْلَ یٜ، تْرَاࢽَ یٜ، کَلْکَلْ یٜدَ أَسُࢽُوِ؞
[3] کْلَ سٜرْ اللَّه سِࢽَدْیٜࢽْ وُیٜ وُࢽْدُࢽْدُو یَیٜرُو وُلْغْکِّ، بَرٜ کْلَࢽْدُووَ أَوُو جُسّْࢽَا کُوجْࢽَرُو ࢽغُوࢽُوِّ، أَمَّ اللَّه وُࢽْدُࢽْدُو یَیٜرُو ࢽُوَࢽْجُ کَمْبْرْسٜىٰ دَغَرْجْغْࢽَدْ غَیْ، حَࢽْغَلْ ࢽغْلَࢽْ تْمَࢽُواْ؞
[4] جِرِ أَࢽْدِ تِیے ࢻَلْࢽِࢽْ ࢽَشَ ࢽغْوُ تَیْیٜࢽَ کِدَࢽْجَ تِلُو غْࢽِدْ غَیْ،
[5] جِرِ أَدْغَیْࢽِࢽْ أَࢽْدِ ࢽغْوُ یَیٜ، أَلْمَسِیوُلَࢽْ أَࢽْدِ تِیے ࢻَلْ، کُورُو وُࢽْدُࢽْدٜ یَیٜ ࢽَشَ کَمَࢽْجُیٜ؞
[6] کْلَ سٜرْ اللَّه سَدْࢽَدْیٜࢽْ، کْࢽْجُوࢽْدٜ غَدٜغَدٜ؞ کَمْ لَا کْࢽْجُوࢽْجُ ࢽَوِࢽَوِ دِیُورُو وَلْیٜࢽُووَ، دُࢽُو کَمْبْرْسٜࢽْجُیٜࢽْ ثْدُو؞
[7] کِدَ بَࢽَیٜرُو وَلْیٜࢽُووَ، کِدَ أَدَ ثْدُو؞ أَلَمْدُمَرُو وَلْیٜࢽُووَ، أَلَمْجُو؞
[8] کَرْوُرُو دُࢽُو ࢽجُومَا، دُࢽُو ثُو، بَࢽَ ࢽجُومَا، کَرْوُ تِلُوࢽْ ثُو، ࢻُوُمَا، کَسَدُوَرُو ثُࢽُودُو، کُورُو کَࢽْجِمَرِمَا، کَرْوُ کْجِیَرُو ثْدُو؞
[9] کْرَوُوࢽْدُودْ ࢽَࢽْمْࢽَࢻْکْ بَوُووَرُو وَلْجُو! أَوُو دِوِدَ وَࢽُواْ، أَوُو ࢽغْلَدَ تَیْوُو؞
[10] کَتّٜࢽْدُوࢽْ کْرَوُو ࢽَࢽْیَاࢽَیٜلَࢽْ تْرَوُواْ، کَمَࢽْدُورُو دَرَجَ یُواْ، ࢽَیِرُو ࢽغَلْوُورُو ࢽغُوࢽُواْ؞
[11] بَرٜ کَسَدُلَࢽْ لُسُرُّو وَلُّوِّ، ࢽِیَ ࢽغُوࢽُواْ کَرْوُࢽْدُو سَمَّࢽْ کْمَࢽْدٜیَ غَیْوُو؞
[12] تْمَࢽْدُولَࢽْ کَرْوُࢽْدُو کْجِجُو، بُوࢽٜ ࢽجَلَࢽْ ࢽٜدُّواْ، مُودُوَ دِیُولَࢽْ دْغَیْوُو؞
[13] مْرَدُ مُمِࢽَّیٜ غَلُّواْ، مُکُّو یِࢽْدِࢽْ کُسُوتُّو سَوُواْ؞
[14] أَمْ ࢽَیِیَ بَسَرْࢽْجَࢽَدْرُو بَرْغَ دْࢻْکْࢽُواْ؞ آه، تَیِرُو بَرْغَ دْࢻْکْࢽُواْ، بَرٜ تَیِیَ بَسْکُࢽُوِّ؞
[15] أَمْ کَرْوُࢽْجَ کْجِیَ رُوکُّو کَرْوُࢽْدُو کْجِجُو، أَمْ ثٜسِرِیَ رُوکُّو یِرُواْ؞
[16] کَتّٜࢽْدُوࢽْ حَࢽْغَلْࢽْدُو تِلُوجُو؞ بَرٜ رُوکُرَ دِوِّ، تَلَاوَرُو کْلْدْغْࢽُواْ؞ بَرٜ کْلَࢽْدُووَ رَشِدُرُو ࢽغُوࢽُوِّ؞
[17] بَرٜ وُࢽْدُمَرُو کُتُّوَ کُتُّࢽْ یِکّْرْمْبُوِّ، أَمَّ حَࢽْغَلْ غْࢽَࢽُواْ أَوُو دُوُوࢽْ ࢻُوُ أَمْ سَمَّیٜࢽْ ࢽغْلَدَ دٜوُو؞
[18] یُوجِیَ، ࢽَیِرُو مُواْࢽْجِیرُو وَلْیٜࢽُووَ، أَمْ سَمَّا رُوکُّو ࢽَࢽْلٜوَࢽْ دْغَیْوُو؞
[19] کْرَوُووُࢽِ، بَرٜ کْلَࢽْدُورُو کُورُو مُووُوِّ، کُولُّواْ غْرْغَدُ اللَّهیٜ دَمَ ثُوَࢽْدُو، کِتَوُلَࢽْ رُوُوَدَدْ غَیْ: «کْمَࢽْدٜىٰ: ‹وُواْمْ غْࢽَدُوُدْ کَکّٜ، وُمَ رْمْبْکِّ،› ثْࢽَّ؞»
[20] أَمَّ وَدُمَࢽْمْ کْࢽَࢽْجُوَا، أَوُو کْمْبُویٜ یٜ جُوُو؞ ࢽغُدُࢽْجُوَا، أَوُو کْࢽْجَیٜ یٜ ثَ؞ ࢽغَیْ دِمِلَࢽْ کَرِمِ کَࢽُّوَ کْلَࢽْجُرُو لَࢻْکْمِ؞
[21] بَرٜ کُولّْمٜ ࢽَࢽْدِوِ رَࢽْجْغْࢽِّ، أَمَّ أَوُو ࢽغْلَ دِیُولَࢽْ کْلَ دِوِدْیٜࢽْ ࢽَسَرْدْࢽٜ؞