[1] أَدْ ࢽَࢽْغَرُو، کَمْبْرْسٜلَࢽْ جِرٜوُرُو وَلِّیٜࢽَدْ، کْمَࢽْدٜ عِیسَى أَلْمَسِیوُیٜࢽْ کَتّٜ أَࢽْدِیَ اللَّهَیٜࢽْ ࢽَࢻْتُ ࢽَࢽْلٜوَیٜیَ؞
[2] عِیسَى ࢽَࢽْغَرُو جَوَلْ کَمْبْرْسٜىٰࢽْ سٜرْ ثُرُوࢽْجُࢽْ دْغَیْیٜࢽَ أَدْرُو ࢽغَوُو ࢻَࢽْدِیٜࢽَ، کُورُو کَرْوُࢽْدٜ ثُرُو تْمَ دَرَجَ اللَّهیٜࢽْ کْجِجْࢽَ؞
[3] کُورُو أَدَ کُوجْࢽَرُو ثُرُو بُوࢽٜىٰمَࢽْ کَرْوُࢽْدٜ کْجِجْࢽَ، بُوࢽٜدْ کَࢽَدِ ثُوُدِرُو ࢽُوࢽِیٜࢽَدْرُو؞
[4] کَࢽَدِدْ یٜ حَلْ ࢽغْلَ ثُوُدِ، کُورُو حَلْ ࢽغْلَدْ یٜ تْمَ ثُوُدِ؞
[5] تْمَدْ تِیسَمْ ثُوُدِوَوُو، اللَّه کَرْوُࢽْدٜرُو رُحُࢽْجُ سَدْࢽَیٜࢽْ کْرَوُوࢽْجُ ثَکّْࢽَدْرُو؞
[6] أَوِمَ رَࢽْغِیٜࢽَ بَوُووَلَࢽْ أَلْمَسِیوُ أَمْ اللَّهَ غَ وَجَࢽَ ࢽَࢽْغَرُو سَ کَلْکَلْࢽِࢽْ کَࢽُو؞
[7] کِیَدِّࢽْ کَمْ لَا کَمْ جِرٜمَ ࢽَࢽْغَرُو رُوࢽْجُ ثِ، وَࢽٜىٰ کَمْ لَا کَمْ ࢽغْلَ ࢽَࢽْغَرُو رَکْثٜ رُوࢽْجُ ثِ؞
[8] أَمَّ اللَّه أَࢽْدِرُو کْرَوُوࢽْجُ ࢽغَیْࢽِࢽْ ࢻْلٜسَغَیْ: أَࢽْدِ بِوُوُ دُوُوࢽْ، أَلْمَسِیوُ أَࢽْدِ ࢽَࢽْغَرُو کَࢽُو؞
[9] تُو، أَࢽْدِ کْرْمَ بُࢽْجُیٜࢽْ جِرٜوُرُو وَلِّیٜࢽَدْرُو، أَدَ کُوجْࢽَرُو تِیٜࢽْ غْرْغَدُ اللَّهیٜرُو کَࢽِیٜ؞
[10] سَ أَࢽْدِ کْلَدُووَدْࢽْ کَرْمُو تَدَ اللَّهیٜࢽْ اللَّهَ سُولُودِیٜࢽَا، أَدَ کُوجْࢽَرُو سُولُودِیٜࢽَدْ رُوࢽْجُیٜࢽْ ࢽجْکَّوُو ࢻَࢽْدِیٜ؞
[11] کُورُو أَدْ رُࢽْجُ غْࢽِ، کْمَࢽْدٜ عِیسَى أَلْمَسِیوُیٜࢽْ ࢽَ اللَّهیٜࢽْ کَرْوُࢽْدٜ کْجِجْࢽَ، تِیٜࢽْ کْرْمَ سُولُو ࢻَࢽْدِیٜࢽَدْ؞
[12] أَدْ ࢽَࢽْغَرُو، جِرِ کَمْ ࢻَلّٜࢽْ بِوُ دُࢽِیَرُو ࢽغَیٜ بِوُیٜࢽْ کَرْمُو ࢽغَاࢽَدْ غَیْ، ࢽغَیْࢽِࢽْ کَرْمُودْ أَمْ سَمَّرُو تَتَرْغَادَ، تَیِ سَمَّ بِوُ ثَدْࢽَدْرُو؞
[13] کَوُ اللَّه أَتَّوْرَ ثِرُو، دُࢽِیَلَࢽْ بِوُ مبٜجِ، أَمَّ سَ أَتَّوْرَ بَوُودْࢽْ وُواْمْ غْࢽَدِیوَوُو؞
[14] أَدْ یَیٜ جَمَࢽْ ࢽَوِ آدَمْبٜࢽْ تَیْ ࢽَوِ مُوسَیٜرُو کُدٜرُو کَرْمُودْ کْلَ أَمْ سَمَّیٜࢽْ کْرْغَ، حَرْ أَمْ بِوُوَ یٜسْتُ ࢽَوِ آدَمْبٜیَ ثَمُࢽْ ثَدْࢽِّدْمَا لٜجْࢽَ؞ ࢽَوِ آدَمْدْ ثَمُࢽُو تِ ࢻُوُࢽْ کْࢽْدٜمَدْیٜ؞
[15] أَمَّ کْࢽْجُودْ أَیَوْدَ ثَمُࢽْ غْࢽِ؞ أَیَوْ کَمْ ࢻَلْدْیٜ ࢽَࢽْغَرُو أَمْ ࢽغْوُ کَسُࢽُووَ، أَدَ کُوجْࢽَرُو سٜرْ اللَّهیٜیَ کْࢽْجُو سٜرْ عِیسَى أَلْمَسِیوُ کَمْ ࢻَلْدْیٜیَ أَمْ ࢽغْوُرُو تَسَرْغَاࢽَ؞
[16] کُورُو کْࢽْجُودْ أَوُو أَیَوْ کَمْ ࢻَلْدْیٜ ثُوُدْࢽَدَ ثَمُࢽْ غْࢽِ؞ أَوُووَ شَرَ أَیَوْ ࢻَلْ جْغَࢽَدْ وُواْمْ کِوُدُو، أَمَّ کْࢽْجُو أَیَوْ کَدَا جْغَࢽَدْ ࢽَࢽْجِرٜ کِوُدُو؞
[17] کَمْ ࢻَلْ ࢽَࢽْغَرُو کْلَ أَیَوْ کَمْ ࢻَلْدْیٜࢽْ کَرْمُو کْلَ أَمْ سَمَّیٜࢽْ کْرْمَیْ ثُࢽُودِ، أَدَ کُوجْࢽَرُو أَمْ سٜرْ ࢽغْوُوَ کْࢽْجُو ࢽَࢽْجِرٜىٰیَ ثَمُویِمَسُودْ عِیسَى أَلْمَسِیوُ وُوتّٜ کَمْ ࢻَلْدْیٜࢽْ رُووَ دَسَاࢽٜ کْرْمَیْ ثَࢽُودِ؞
[18] أَدْ ࢽَࢽْغَرُو، جِرِ أَیَوْ کَمْ ࢻَلّٜ أَمْ سَمَّرُو وُواْمْ ثُوُدِدْ غَیْ، ࢽغَیْࢽِࢽْ کْࢽْدُو ࢽَࢽْجِرٜىٰ کَمْ ࢻَلّٜ أَمْ سَمَّرُو جِرٜمَرُو وَلْدُوَ رُووَ ثُوُدِ؞
[19] أَوُووَ غَࢽَمْبُ کَمْ ࢻَلّٜࢽْ أَمْ ࢽغْوُ بِوُوُرُو وَلْجَࢽَدْ غَیْ، ࢽغَیْࢽِࢽْ غَ کَمْ ࢻَلّٜࢽْ أَمْ ࢽغْوُ جِرٜوُرُو وَلْجَیْ؞
[20] کُورُو أَیَوْدْ ࢽغْوُجُورُو أَتَّوْرَ کَدِیُو، أَمَّ ࢽَ بِوُ ࢽغْوُجْࢽَدْࢽْ، سٜرْ اللَّهیٜ تِیَ جَوْرُو کُوجِرُو ࢽغْوُیٜࢽُو؞
[21] ࢽغَیْࢽِࢽْ جِرِ بِوُدْ کَرْمُولَࢽْ کْرْمَیْ ثُࢽُودْࢽَدْ غَیْ، ࢽغَیْمَࢽْ سٜرْ اللَّهیٜ ࢽَࢽْجِرٜىٰࢽْ کْرْمَیْ ثُࢽُودٜ رُو سَوِسُویٜ کْمَࢽْدٜ عِیسَى أَلْمَسِیوُیٜࢽْ ثُوُدِ؞