[1] أَدْ ࢽَࢽْغَرُو ࢽَࢻْتُ یَوْدِیٜدْ أَوِ ࢻَیْدَࢽْجُ وُو؟ أَوِ کَجَدْیٜ رِوَࢽْجُ وُو؟
[2] جِرِ ࢻِࢽْ یَیٜ ࢽغْوُ مبٜجِ؞ کُرَࢽْجُدْ، مُکُّو یَوْدِیَدْیٜرُو کَوُرِ اللَّهیٜ ثَسَکّْࢽَ؞
[3] تُو، ࢽدَ؟ لَاࢽجَ کَسَثَّࢽِّیَ، کَسَتُّࢽَمْبُࢽْجَدْ أَمَࢽْ اللَّهیٜ بَوُورُو ثْدِ وَ؟
[4] أَعَ، تْمَّرُو ࢽغَیْ غْࢽِ! کَمْ ࢻِ یَیٜ کَتُّوُمَرُو وَلْجِ یَیٜ، اللَّهدْ جِرٜمَ دْغَیْ، کِتَوُلَࢽْ رُوُوَدَدْ غَیْ: «مَࢽَࢽْمْلَࢽْ جِرٜمَرُو ࢽُوࢽْجَیْ یٜ، شَرَࢽْجَیْیَ، کْࢽَّسَرْ ࢻَࢽْدْمِ یٜ؞»
[5] أَمَّ جِرٜࢽَمْبُࢽْدٜدْ ࢽَࢽْجِرٜ اللَّهیٜ ࢻْلٜجِیَ، أَوِ وُلِّیٜ؟ اللَّه أَجَوُ غْࢽَدُوُمَدْ جِرٜࢽَمْبُمَ وَ؟ کْلَ مَࢽَ کَمْبٜࢽْ مَࢽَیٜکُّو؞
[6] أَعَ، تْمَّرُو ࢽغَیْ غْࢽِ! أَدْ غْࢽِیَ، ࢽدَیِࢽْ غْلٜ اللَّه أَمْ دُࢽِیَیٜیَ شَرَجِ؟
[7] کَتُّوُࢽِلَࢽْ جِرٜ اللَّهیٜ ࢽغْوُرُو تْرْغَࢽٜ اللَّهرُو دَرَجَ ثَدِیَ، أَوِرُو غْلٜ کُورُو یَیٜ وُوَ بِوُمَرُو شَرَسَیْ؟
[8] کُورُو أَوِرُو غْلٜ حَرْ ࢽغَیْ وُلْدِوَوُودْ: ࢽدَ دِوِ دِیُو، ࢽغْلَ إِسُورُو؟ أَمْ لَا مَࢽَࢽْدٜ ثَدِ أَدْمَا یِکّْرَیْیٜ ثَࢽِ؞ تَیِدْ، وُواْمْࢽْجَ جُسّْࢽَ!
[9] أَوِ غْلٜ؟ أَࢽْدِ یَوْدِیَدْ أَمْ غَدٜرُو وَ ࢽغَلْوُو؟ أَعَ، تْمَّرُو ࢽغَیْ غْࢽِ! یَوْدِیَا کْرْدِیَا سَمَّ ࢻْرْدُ کْࢽْدُوُو بِوُیٜࢽْ دَسَاࢽَرُو ثَلَࢽْ ࢻْلٜࢽِیٜࢽَ؞
[10] کِتَوُلَࢽْ رُوُوَدَدْ غَیْ: «جِرٜمَ بَوُو، ࢻَلْمَ بَوُو،
[11] کَمْ أَسُجْࢽَ بَوُو، اللَّهَ مَدَمَ بَوُو؞
[12] تَیِ سَمَّ جَوَلْ کُولْجَࢽَ، کْلَ تِلُوࢽَّ ࢻَیْدَ بَوُورُو وَلْجَࢽَ، کَمْ ࢽغْلَ دِیُومَ بَوُو، ࢻَلْمَ بَوُو؞
[13] ࢽغُواْلْجُوࢽْجَ کَوْرِ کَادَ غَیْ، تْلَمْࢽْجَࢽْ أَمْبَ جَمْبَجَیْ؞ ࢻْرْدُ کَ ثِࢽْجَیٜࢽْ دَوِ ࢻُسِیٜیَ؞
[14] ثِࢽْجَ بَسْکُدُوَ مَࢽَکُتُّوَࢽْ ثْمْبْرْࢽَ؞
[15] سِࢽْجَ کَمْ ࢽجٜجُورُو دُویْ،
[16] جَوَلْࢽْجَࢽْ مَسِوَا کُدْرَآ،
[17] کُورُو جَوَلْ ࢽَࢽْلٜوَیٜ ࢽُوجَࢽِّ؞
[18] أَدْغَیْمَ اللَّه رِدَ کَرْوُࢽْجَࢽْ بَوُو؞»
[19] أَوِ یَیٜ أَتَّوْرَ وُلْجِدْ، أَمْ ࢻْرْدُ کْࢽْدُوُو أَتَّوْرَیٜࢽْ دَسَاࢽَرُو وُلْجِیرُو ࢽُوࢽِیٜࢽَ، ࢽغَیْࢽِࢽْ ثِ وُࢽْدُیٜ یَیٜ غْمْ ثْدُو، دُࢽِیَ سَمَّا شَرَ اللَّهیٜرُو ثَادُو؞
[20] أَیْ، ࢽُودُ بِوُیٜدْ أَتَّوْرَیٜࢽْ إِسِ، أَدْ ࢽَࢽْغَرُو وُࢽْدُمَ وَدَ أَتَّوْرَیٜ غَلَࢽْ ࢻُوُ اللَّهیٜࢽْ جِرٜمَرُو وَلْجِوَوُو؞
[21] أَمَّ کْرْمَدْ ࢽَࢽْجِرٜ اللَّهیٜ وَدَ أَتَّوْرَیٜ غَلَࢽْ غْࢽِ تُوَࢽْدِ، أَتَّوْرَا کِتَوُوَ ࢽَوِیَیٜیَ تِیَ شٜدَجَࢽَ؞
[22] ࢽَࢽْجِرٜ اللَّهیٜدْ عِیسَى أَلْمَسِیوُیٜ مْرْسَدُیٜࢽْ أَمْ کَسَتُّوُ سَمَّرُو إِسِ، غَیِرْدُ بَوُو؞
[23] تَیِ سَمَّ بِوُ ثَدْࢽَ یٜ، دَرَجَ اللَّهیٜ ࢽَجَغَࢽِّ یٜ،
[24] أَمَّ مٜرُدُ عِیسَى أَلْمَسِیوُلَࢽْ تُوَࢽْدِدْیٜࢽْ دٜرُو سٜرْࢽْجُلَࢽْ جِرٜوُرُو وَلْجَیْ؞
[25] اللَّه ࢽَࢽْجِرٜࢽْجُ ࢻْلٜجُورُو، أَلْمَسِیوُوَ لَیَ ࢻَسْتُ غْرْغَدُࢽْجُیٜرُو کَیْࢽُو، کُورُو ࢽغَیْࢽِࢽْ تِیَ بُࢽْجُیٜࢽْ کَمْبْرْسٜلَࢽْ کَسَثَّࢽٜ جِرٜوُرُو وَلْجَیْ؞ أَوُووَ اللَّه أَࢻُࢽْجُ ࢽَࢽْغَرُو بِوُوَ کُرٜىٰ وُواْمْجْࢽِّ؞
[26] أَدَ دِیُوࢽْجُدْ، جَمَࢽْ کْرْمَیٜࢽْ ࢽَࢽْجِرٜࢽْجُ ࢻْلٜجُورُو، ࢽغَیْࢽِࢽْ اللَّهدْمَ جِرٜ یٜ، کَمْ عِیسَىٰ کَسَتُّمَدَ جِرٜمَرُو ثْدِمَ یٜ وُو؞
[27] ࢽدَ غْلٜ أَوُلُو بُودْ؟ بَوُو! کْلَ وَدَ جِرِ ࢻِیٜࢽْ؟ کْلَ وَدَ کِدَیٜࢽْ؟ أَعَ، کْلَ وَدَ کَمْبْرْسٜىٰࢽْ؞
[28] ࢽُوࢽُواْ، کَمْ وَدَ غَلَࢽْ غْࢽِ، کَمْبْرْسٜلَࢽْ جِرٜمَرُو وَلْجِرُو تَبَّتْکٜىٰیْیٜ؞
[29] رَ، اللَّهدْ اللَّه یَوْدِیَ رُࢽْجَیٜ وَ؟ کْرْدِیَیٜ یٜ، غْࢽَ؟ آه، کْرْدِیَیٜ یٜ،
[30] اللَّهدْ ࢻَلْمَ ࢽَࢽْغَرُو، تِ دُوُوࢽْ أَمْ کَجَادَا کَمْبْرْسٜىٰࢽْ جِرٜوُرُو ثْدِ، کُورُو جْمْبْلْمْبَ یٜیَ کَمْبْرْسٜىٰࢽْ جِرٜوُرُو ثْدِدْ؞
[31] أَدْ ࢽَࢽْغَرُو کْلَ کَمْبْرْسٜىٰࢽْ أَتَّوْرَدَ بَوُورُو دِیٜ وَ؟ أَعَ، تْمَّرُو ࢽغَیْ غْࢽِ! أَتَّوْرَدَ تَبَّتْکٜىٰیْیٜ؞