[1] أَࢽْدِ کَمْبْرْسٜࢽْدٜ دُࢽُووَدْ، أَرْدِیَ کْلَࢽْدٜرُو مَدَ غْࢽِ، أَمْ کَمْبْرْسٜࢽْجَ دُࢽُو بَوُووَدَ ࢽٜتُّ أَࢽْدِرُو وَجِمْسَاࢽَ؞
[2] وُࢽْدُࢽْدٜ یَیٜ کَمْبْرْسٜ کَمَࢽْجُیٜرُو دُࢽُو ࢽجَکُّورُو ࢽَࢽْلٜوَࢽْجُ ࢽَࢽْغَرُو أَرْدِیَ تِرُو مَجُوُو؞
[3] أَوُووَ أَلْمَسِیوُمَ أَرْدِیَ کْلَࢽْجُرُو مَجْغْࢽِّ، أَمَّ کِتَوُلَࢽْ رُوُوَدَدْ غَیْ: «رَدُ أَمْ ࢽِیَ رَࢽْجَیْدْیٜ کْلَࢽِرُو ثَسُکُّرْࢽَ؞»
[4] أَوُو کُرٜࢽْ کِتَوُلَࢽْ رُوُوَدَ سَمَّ أَࢽْدِیَ أَلَمْسَرُو رُوُیٜرَ، ࢽغَیْࢽِࢽْ ࢽٜتُّ یٜࢽْ، دُࢽُو ࢽجُو کِتَوُیٜ یٜࢽْ تْمَ ࢻَࢽْدِیٜ؞
[5] اللَّه ࢽٜتُّوَ دُࢽُووَ ࢽجُومَدْ ثَکُّو کْلَ عِیسَى أَلْمَسِیوُیٜࢽْ حَࢽْغَلْࢽْدُو تِلُوجُو،
[6] ࢽغَیْࢽِࢽْ کَرْوُ ࢻَلْࢽِࢽْ ثِ تِلُووَرُو اللَّه بَوَ کْمَࢽْدٜ عِیسَى أَلْمَسِیوُیٜرُو دَرَجَ یِوِ؞
[7] أَدْ ࢽَࢽْغَرُو أَلْمَسِیوُ ࢽَیِیَ ࢽجَمُواْࢽَدْ غَیْ، وُࢽْدُࢽْدُو یَیٜ کَمَࢽْجُوَ ثْمُواْ، اللَّهرُو دَرَجَ تِیُورُو؞
[8] ࢽَیِرُو وُلْࢽْجَغَکِّ، جِرٜ اللَّهیٜ ࢻْلٜدُرُو أَلْمَسِیوُ وُولُودِ أَمْ کَجَادَیٜرُو وَلْیٜࢽُو؞ أَدَ دِیُوࢽْجُدْ، وَدُ دُوُوࢽْ اللَّه کَارِیَرُو ࢽغُوجْغْࢽَدَ تَبَّثُّوُورُو،
[9] کُورُو کْرْدِیَ یٜ کَࢽْجِمَرِ اللَّهیٜ ࢽَࢽْغَرُو تِرُو دَرَجَ ثَدُورُو، کِتَوُلَࢽْ رُوُوَدَدْ غَیْ: «أَدْ ࢽَࢽْغَرُو دَوُ کْرْدِیَیٜࢽْ ࢽِیَ ࢽجُࢽْغُورْکِّ، ثُࢽْمْبُو أَیْیَ یٜغْکِّ؞»
[10] کُورُو وَلْدٜ: «ࢽَیِ کْرْدِیَسُو، جَمَࢽْجُوَ رُوکُّو کْجِ ࢻَࢽُّواْ!»
[11] کُورُو وَلْدٜ: «ࢽَیِ کْرْدِیَ سَمَّ، کْمَࢽْدٜدَ یُࢽْغُورُواْ! جَمَ سَمَّ تِیَ ثُوࢽْغُورُو!»
[12] أَدْغَیْمَ کُورُو ࢽَوِ إِشَیَیٜ: «کَدُوُ یِسَیْیٜ إِسِ، تِ دُوُوࢽْ کْرْدِیَا ࢽُودُورُو ثِجِدْ، کُورُو تِمَرُو کْرْدِیَدْ تْمَࢽْجَ ثَسَکِّ؞»
[13] اللَّه تْمَ ࢽجُومَدْ ࢽَیِرُو کَرْوُکْجِیَ ࢽَࢽْلٜوَا سَمَّ کَمْبْرْسٜىٰࢽْ ࢽَ کُوجْࢽَرُو ࢽجَدُو، تْمَࢽْدُو کْࢽْدُوُو رُحُ اللَّهیٜࢽْ ࢽغْوُرُو تْرْغَ؞
[14] کْرَمِیَࢽِ، ࢽَیِ أَوُو ࢽغْلَࢽْ کٜکْ تْمْبْرُوَّ یٜ، إِلْمُ سَمَّا تَوَّ یٜ، کُورُو رَࢽْغُوٜ کَتّٜࢽْدُوࢽْ أَلَمْدُوِ یٜرُو وُ کْلَࢽِ تَبَّتُّو ࢽُوکّْࢽَ؞
[15] أَدْ یَیٜ ࢽَیِرُو إِسَتَࢽّجَغَکُّورُو کْلَ أَوُووَ لَایٜࢽْ رِدُ بَوُووَرُو رُوُࢽْجَغَکّْࢽَ، اللَّه وُرُو سٜرْ سْدّٜ
[16] کْرْدِیَدْرُو کِدَمَ عِیسَى أَلْمَسِیوُیٜرُو وَلّْکّْࢽَ ࢽَࢽْغَرُو؞ کْرْدِیَدْ سَدَا لَا اللَّه أَرْدِجْࢽَرُو وَلْجَ، رُحُ اللَّهیٜ تَیِیَ تَیِرُّو ثْدُورُو، رِمَࢽْ غَیْ کِدَ کَوُرِ کْجِ اللَّهیٜ دِکِّ؞
[17] أَدْ ࢽَࢽْغَرُو عِیسَى أَلْمَسِیوُیٜࢽْ کِدَࢽِ اللَّهیٜ دِکِّ أَدْࢽْ دَلِلْ أَوُلُو بُویٜ تَکّْࢽَ؞
[18] أَوُو أَلْمَسِیوُ کْرْدِیَ اللَّهَ جَارُو وُیٜࢽْ ثْدْࢽَدَ غْࢽِیَ، أَوُو غَدٜ وُلّْکِّوَوُو، مَࢽَا کْࢽْدُووَلَࢽْ،
[19] کْࢽْدُوُو أَلَمَ سُو، أَوُو أَجَبَّ سُویٜ یٜࢽْ، کُورُو کْࢽْدُوُو رُحُࢽْجُیٜ یٜࢽْ أَدَ کِدُو؞ ࢽغَیْࢽِࢽْ جٜرُجَلٜمْلَࢽْ تَیْ ثِدِ إِلِرِکُمْبٜرُو یَدٜرُو دِرِکّٜ کَوُرِ کْجِ أَلْمَسِیوُیٜدَ وُلّْکّٜ تُمُوغْکّْࢽَ؞
[20] ࢽِیَࢽِدْ کَوُرِ کْجِدَ ࢽَ ثُ أَلْمَسِیوُیٜ کُورُو یَیٜ ࢽُوجَࢽِّࢽْ مَوُودُ، بَرٜ کْلَ ࢻْرْدُ کَمْ غَدٜ غْࢽَجْࢽَیٜࢽْ تَࢽْدْکّْࢽِرُو؞
[21] أَمَّ کِتَوُلَࢽْ رُوُوَدَدْ غَیْ: «أَمْ دُوُوࢽْ تَیِرُو مَࢽَ کْلَࢽْجُࢽْ وُلْجَغَࢽِّدْ ثَرُیْ، کُورُو أَمْ ࢻَࢽْجَࢽِّدْ أَسُجَیْ؞»
[22] دْلْوُ أَدْمَ ࢽَࢽْغَرُو ࢽَࢽْدُورُو ࢽغْوُرُو لٜدُ رَاکّْࢽَمَ ࢻَࢽْدْکّٜ لٜکّْࢽِ؞
[23] أَمَّ کْرْمَ ࢽَࢽِ کِدَیٜ ثِدِ أَࢽِࢽْ غَدٜرُو بَوُودْ، کُورُو سَا کَدَ ࢽَࢽْدُورُو لٜدُرُو مَکِّدْ،
[24] سَ کُوکّٜ لَرْدُ إٜسْࢻَࢽِیَیٜرُو لٜکِّیَ، ࢽَیِیَ ࢽجَرُکِّرُو تْمَکّْࢽَ، کُورُو مْرَدُࢽِ سَ غَࢽَرُو ࢽَیِیَ کُرُویٜ غَلّْکّْࢽَیٜ ࢽغَوُوࢽْ، لَرْدُدْرُو لٜکُّورُو بَࢽَسْغْوِ یٜرُو تْمَکّْࢽَ؞
[25] کْرْمَدْرُو جٜرُجَلٜمْبُو کِدَ مُمِࢽَّدْرُو ࢽجْدُّورُو لٜکِّ،
[26] أَوُووَ کْرَمِیَ لَرْدُ مَکِدُوࢽِیَیٜیَ أَکَیَیٜیَیٜدْ تَلَاوَ مُمِࢽَّ جٜرُجَلٜمْلَࢽْ دَسَاࢽَدْرُو بَࢽَ لَا کُدُورُو ࢽغْلَرُو ثَرُࢽَ؞
[27] آه، أَدَ ࢽَࢽّغْلَࢽْجَࢽْ کٜدُو، کُورُو وَجِࢻْدْ کْلَࢽْجَࢽْ مبٜجِ؞ کْرْدِیَدْ ثُرُو أَوُووَ رُحُیٜࢽْ ࢽُوَࢽْجَ کٜوَࢽْدُووَ، دَجِ کَࢽْجِ کَرٜیَیٜࢽْ بَࢽَدُدْ تَیِ یٜرُو وَجِࢻْثْغْࢽَ؞
[28] أَدْ ࢽَࢽْغَرُو، سَ کِدَ أَدَ یٜرْکّٜ أَوُو ثَࢻْثَࢽَدَ تَیِرُو یِکِّیَ، ࢽَࢽْدُویٜࢽْ لَرْدُ إٜسْࢻَࢽِیَیٜرُو لٜکِّ؞
[29] ࢽَࢽْدُورُو إِسْکِّیَ، بَرْغَ أَلْمَسِیوُیٜࢽْ ثَࢻْ إِسْکِّرُو ࢽُوکّْࢽَ؞
[30] کْرَمِیَ، کْمَࢽْدٜ عِیسَى أَلْمَسِیوُوَ کْرَوُو رُحُیٜیَ ࢽَࢽْغَرُو ࢽَیِیَ لُواْࢽْجَکِّ، وُوَ رُوکُّو مْلْدْࢽُواْ وُرُو اللَّهَ سُکُّورُواْ؞
[31] اللَّه وُوَ مُکُّو غَࢽَمْبُوُ ثِدِ یَحُدِیَیٜرُو سْمُواْ، کُورُو مُمِࢽَّدْ بَࢽَ تَیِرُو جٜرُجَلٜمْلَࢽْ یَدْکِّدَ کْجِرُو ثَوَࢽْدُورُو مُودُوَ دٜوُو؞
[32] ࢽغَیْࢽِࢽْ اللَّهیٜ ثْدِیَ، ࢽَࢽْدُورُو کَرْوُ کْجِیَرُو إِسْکِّ، ࢽَࢽْدُوࢽْ تُسْتُ ࢻَࢽْدْکِّ؞
[33] اللَّه ࢽَࢽْلٜوَیٜ ࢽَیِ سَمَّلَࢽْ دْغَ! أَمِࢽْ؞