[1] أَدْ ࢽَࢽْغَرُو، ࢽِ دُوُوࢽْ أَمْبُو شَرَ یِدّْمِدْ، وُࢽْدُرُو وَلْیٜمْ یَیٜ، دَلِلْࢽْمْ أَدَ دِیُویٜ ࢻَلْمَ بَوُو، دَلِلْࢽْجُدْ ࢽِ أَمْ غَدٜرُو شَرَ یِدّْمِیَ، کْلَࢽْمْ شَرَࢽْمِ، أَوُو ثَدِدْمَا دِمِدْرُو؞
[2] شَرَ اللَّهیٜ کْلَ أَمْ کْࢽْدُو أَࢽِیَ ثَدِمَدْیٜدْ جِرٜرُو ࢽُوࢽِیٜࢽَ؞
[3] ࢽِ کَمْ، أَمْ أَوُو أَࢽِیَ ثَدِمَدْرُو شَرَ یِدّْمِ دُوُوࢽْ ࢽِ یٜ تَیِ غَیْ دِمِدْ، وُواْمْ اللَّهیٜرُو کَࢽْمِ وَ تْمَࢽْمْ؟
[4] رَ، اللَّهیٜ ࢽَࢽّغْلَࢽْجُوَ أَࢻُࢽْجُوَ کَࢽَدِࢽْجُوَ تْرْمْدَ رُیٜمْ؟ ࢽَࢽّغْلَࢽْجُدْ تُوَ دِیُورُو سِمُوࢽْجِیدَ ࢽُوࢽْمِّ وَ؟
[5] کْلَکِبُّࢽْمْبَ تُوَࢽَمْبُ کَرْوُࢽْمْبٜیَ ࢽَࢽْغَرُو یِمْ غْرْغَدُ اللَّهیٜیَ شَرَࢽْجُ جِرٜىٰ ࢻْلٜدِدَرُو أَجَوُ جَوْ ࢻِتْ کْلَࢽْمْبُو ثَࢻْکْغْمِ؞
[6] اللَّه وُࢽْدُ یَیٜرُو کْلَ کْࢽْدُوࢽْجُیٜࢽْ کَلْکَلُّو ثِ:
[7] أَمْ دُوُوࢽْ کْࢽْدُو ࢽغْلَ دِیُولَࢽْ ࢽٜثَّࢽٜ دَرَجَا بْرْسْمْبَ رُو ࢽجْࢻْثِوَوُودَا مَجَیْمَدْرُو رُو سَوِسُویٜ ثِ،
[8] أَمَّ أَمْ دُوُوࢽْ کْلَ رَوُوࢽْ جِرٜدَ وَجَࢽٜ جِرٜࢽَمْبُ جَغَیْمَدْرُو غْرْغَدُوَ کَرْوُجَوْوَ ࢻْلٜجِیے؞
[9] وُࢽْدُ دُوُوࢽْ أَوُو دِوِ دِیُومَدْ، بَسَرِیَ بُوࢽٜیَ تِیَ ثَوَࢽْدِ، بُرْوُوࢽْ یَوْدِیَ، دَجِ یَوْدِ غْࢽِ یٜیَ ثَوَࢽْدِ،
[10] أَمَّ دَرَجَا بْرْسْمْبَ ࢽَࢽْلٜوَا تِ ࢽغْلَ دِیُومَدَ ثَوَࢽْدِ، بُرْوُوࢽْ یَوْدِیَ، دَجِ یَوْدِ غْࢽِ یٜیَ ثَوَࢽْدِ؞
[11] ࢽُوࢽُواْ، اللَّه أَمْبَ غَیِرْجِوَوُو؞
[12] أَمْ سَمَّ أَتَّوْرَا ࢽُوجَࢽِّࢽْ بِوُ ثَدِمَدْ أَتَّوْرَ بَوُولَࢽْ سَࢽُیْ، کُورُو أَمْ سَمَّ ࢻْرْدُ کْࢽْدُوُو أَتَّوْرَیٜࢽْ دُوُوࢽْ بِوُ ثَدِمَدْ، أَتَّوْرَلَࢽْ تَیِیَ شَرَجَیْ؞
[13] أَتَّوْرَا کْرْࢽْدُمَسُو ࢻُوُ اللَّهیٜࢽْ جِرٜوُ غْࢽِ، أَمَّ أَتَّوْرَا غَمَسُومَ جِرٜوُرُو وَلْجَیْ وُو؞
[14] أَوُووَ کْرْدِیَ أَتَّوْرَ ثَدَࢽِّ دُوُوࢽْ حَلْࢽْجَ تَیِیَ سِمُوجِیٜ أَوُو أَتَّوْرَیٜ أَمَرْجْࢽَدَ ثَدِیَ، ثَدَࢽِّ یَیٜ، أَوُو ثَدِدْ ࢽَࢻْتُ وَدَࢽْجَیٜرُو وَلْجِ؞
[15] ࢽَࢻْتُࢽْجَیٜࢽْ أَوُو أَتَّوْرَ أَمَرْجْࢽَدْ کَرْوُࢽْجَࢽْ رُوُوَدَرُو ࢻْلٜجَیْ، حَلْࢽْجَ یٜ ࢽغَیْ شٜدَجِ، کُورُو کَرْوُࢽْجَ سَ لَاࢽْ تَیِیَ سَرِوُجِ، سَ لَا یٜࢽْ جِرٜوُرُو أَسُجِیے؞
[16] کْلَ کَوُرِ کْجِ مَوُوࢽْکِّدْیٜࢽْ یِمْ دُوُوࢽْ اللَّه عِیسَى أَلْمَسِیوُیٜࢽْ أَسْرْ أَمْبٜیَ شَرَجِدْࢽْ أَوُو أَࢽِ وَکَّجَیْ؞
[17] تُو، ࢽِ کْلَࢽْمْبُو یَوْدِ ࢽْمِدْ، أَتَّوْرَرُو ࢽجُتّْغْمِ، اللَّهلَࢽْ أَوُلُو بُمِ،
[18] رَوُو اللَّهیٜدَ ࢽُوࢽْمَّ، أَتَّوْرَدَ کْرَࢽْمَّ ࢽَࢽْغَرُو أَوُو ࢽغْلَدَ غَیِرْࢽْمِ،
[19] ࢽِمَ تَبَّتُّو کَمْبُوَیٜ جٜدُمَ وُورُو ࢽُوࢽْمَّ، ࢽِمَ کُورُو أَمْ ثُرُو دُوُیٜࢽْ دَسَاࢽَرُو ࢽُرْ کُدُومَ،
[20] أَمْ حَࢽْغَلْ بَوُووَیٜ أَلَمْدُمَ، یَلَّیٜ مَلْمْ وُورُو ࢽُوࢽْمَّ، ࢽِ أَتَّوْرَلَࢽْ إِلْمُوَ جِرٜیَ سَمَّا کَلْکَلُّو تَمَّدْ،
[21] تُو، أَمْ غَدٜرُو یِکّْرَمِ دُوُوࢽْ، کْلَࢽْمْبُو یِکّْرَمْبَوُو وَ؟ ࢽِ دُوُوࢽْ بَرٜ ࢽَمْبَرْوُ ثَدْࢽِّ وُلّْمِدْ، ࢽَمْبَرْوُ دِمْبَوُو وَ؟
[22] ࢽِ دُوُوࢽْ بَرٜ کْࢽْجْࢽَ ثَدْࢽِّ ࢽْمِدْ، کْࢽْجْࢽَ دِمْبَوُو وَ؟ ࢽِ دُوُوࢽْ غُمْکِیَا حَرَمْغَدَرُو ࢽغُوࢽْمِدْ، کَرٜ ࢻَدُووَ سْࢽْمْبٜ ࢽدَلّْمْبَوُو وَ؟
[23] ࢽِ کْلَ أَتَّوْرَیٜࢽْ أَوُلُو بُمِدْ، غَࢽَمْبُࢽْمْلَࢽْ اللَّهرُو دَرَجَ ࢽجُو وَࢽْمِ؞
[24] کِتَوُلَࢽْ رُوُوَدَدْ غَیْ: «ࢽَیِ ࢽَࢽْغَرُو کْرْدِیَ ثُ اللَّهیٜدَ بَسَّیْ؞»
[25] وَدَ أَتَّوْرَیٜ غَمِیَ، کَجَدْ ࢻَیْدَا، أَمَّ أَتَّوْرَا غَࢽَمْبُمَرُو وَلّْمِیَ، کَجَࢽْمْدْ کَجَࢽَمْبُرُو وَلْجْࢽَ؞
[26] ࢽغَیْمَ جْمْبْلْمْ وَدَ أَتَّوْرَیٜ جْغَیْیَ، کَجَࢽَمْبُࢽْجُ کَجَرُو ࢽغُوجَیْوَوُو وَ؟
[27] کُورُو کَمْ تِیلَࢽْ جْمْبْلْمْ دُوُوࢽْ أَوُو أَتَّوْرَیٜ أَمَرْجْࢽَدَ ثْدِدْ ࢽِیَ شَرَࢽْجِ، ࢽِ کِتَوُ سُو، کَجَ سُو تَمَّ دُوُوࢽْ أَتَّوْرَا غَࢽَمْبُمَدْ؞
[28] یَوْدِدْ کَمْ دٜیَࢽْ یَوْدِرُو ࢻْلٜدِیے غْࢽِ، کُورُو کَجَ جِرٜىٰدْ أَوُو تِییٜ تُرُیْ غْࢽِ،
[29] أَمَّ یَوْدِدْ کَمْ ثُرُوࢽْ یَوْدِ وُو، کُورُو کَجَدْ یٜ أَوُو کَرْوُیٜ وُو، أَرَوُیٜࢽْ غْࢽِ، رُحُ اللَّهیٜࢽْ کَدِیُو؞ ࢽجُࢽْغُورُوࢽْجُ ࢽَ أَمْبٜࢽْ غْࢽِ، ࢽَ اللَّهیٜࢽْ وُو؞