[1] أَلْمَسِیوُلَࢽْ جِرٜ وُلّْکِّ، کَتُّوُ غْࢽِ، حَلْࢽِ یٜ رُحُ اللَّهیٜࢽْ شٜدَسِ،
[2] کَرْوُکُتَّ کُرَا جْکْتُ ثٜرِوَوُووَ ثُرُو کَرْوُࢽِیٜࢽْ ࢻَکِّ؞
[3] ثَ یُوجِیَ، کْرَمِیَࢽِ جَمَ تِلُوࢽْ تَمْبِیٜࢽَ ࢽَࢽْغَرُو وُ کْلَࢽِ بَسْکُوَدَ یٜ، أَلْمَسِیوُوَ ࢻَیْیَدَ یٜرُو رَاکُّو؞
[4] تَیِدْ إِسْرَاءِیلَوُ، کُورُو اللَّه تَیِیَ دَࢻْثٜ تَدَوَࢽْجُرُو ثْدٜ دَرَجَ ثٜ أَمَࢽْ ࢽدْࢻْثَࢽٜ أَتَّوْرَ سُو، کِدَ أَمْبْتُّوُیٜ سُو تَیِرُو وَدُوَ ࢽغُویٜىٰࢽُو؞
[5] کَارِیَدْ کَاࢽجَ، أَلْمَسِیوُدْ یٜ کْلَ ࢽَࢻْتُࢽْجُ أَدَمْغْࢽَیٜࢽْ تَیِیٜمَࢽْ کَدِیُو، تِمَ اللَّه سَوِسُورُو بَرْغَا سَمٜ أَوُو ࢻِیٜࢽْ یَیٜ کْرْغَدْ وُو! أَمِࢽْ؞
[6] مَࢽَ اللَّهیٜ ࢻَیْدَ بَوُورُو وَلْجْࢽَ وَ؟ أَعَ؞ أَوُووَ کَدُوُ إِسْرَاءِیلَیٜ سَمَّ غْࢽِ إِسْرَاءِیلَدْ وُو،
[7] کُورُو تَدَوَ ࢽَوِ إِبْرَاهِیمْبٜ سَمَّ غْࢽِ کَدُوُࢽْجُ وُو؞ اللَّهیٜ: «أَمْ إِسْحَٰࢼُیٜࢽْ تَسَمْبِدْمَا کَدُوُࢽْمْلَࢽْ بُواْجَیْ،» ثْࢽَّ؞
[8] مَاࢽَ أَدْیٜدْ تِمَ تَدَوَ تِییٜ غْࢽِ تَدَوَ اللَّهیٜدْ، أَمَّ تَدَوَ وَدُیٜدْمَا کَدُوُرُو ࢽغُوجَیْ وُو؞
[9] أَکُّو مَࢽَ وَدُیٜدْ: «بَرِمِࢽَّ کُوَ غَیْ إِسْکِّ، سَارَتُ تَدَ ثَمْبِ؞»
[10] أَدْ رُࢽْجُ غْࢽِ، رَبٜکَ یٜ کَمْ ࢻَلْ کَارِࢽْدٜ ࢽَوِ إِسْحَٰࢼُیٜࢽْ ثُرُو ࢽغُویٜࢽِّیَ،
[11] کَوُ کَوُوَدْ تَسَمْبٜ ࢽغْلَ بِ دِوِ ثَدِرُو، ࢻَسَلْ اللَّهیٜ کَدَرْجْࢽَدْ تَبَّثُّوُورُو،
[12] رَبٜکَدْرُو: «کَرُدْ کَرٜیَ کَࢽَّدْیٜرُو وَلْجِ،» یٜࢽُو؞ ࢽغَیْمَࢽْ ࢻَسَلْ اللَّهیٜدْ کْلَ کِدَیٜࢽْ غْࢽِ، کْلَ تِ بُواْجِدْیٜࢽْ کْرْغَ؞
[13] کِتَوُلَࢽْ رُوُوَدَدْ غَیْ: «یَعْࢼُوبَا رَاکُّو، یٜسَوُوَ وَیٜکُّو؞»
[14] تُو، أَوِ غْلٜ وُلِّیٜ؟ ࢽَ اللَّهیٜࢽْ جِرٜࢽَمْبُوَ وَ؟ أَعَ، تْمَّرُو ࢽغَیْ غْࢽِ!
[15] تِیٜ ࢽَوِ مُوسَرُو: «کَمْ تِرُو کَࢽْجِمَرِ ࢻْلٜغْکِّدْرُو کَࢽْجِمَرِ ࢻْلٜغْکِّ، کُورُو کَمْ تِیَ ࢽجُࢽُوکِّدَ ࢽجُࢽُوکِّ،» ثْࢽَّ؞
[16] أَدْ ࢽَࢽْغَرُو رَوُو بِ کُواْرِ کَمْبٜࢽْ غْࢽِ، اللَّه کَࢽْجِمَرِ ࢻْلٜجِیدْمَࢽْ کْرْغَ؞
[17] کِتَوُلَࢽْ اللَّهیٜ ࢻِرَعَوْࢽَرُو: «دَلِلْ ࢽِیَ غَلَࢽْجْکّْࢽَدْ، تِمَ کْࢽْدُوُوࢽِ ࢽِلَࢽْ ࢻْلٜغْکُّو، کُورُو ثُࢽِ دُࢽِیَ ࢽغَࢽْ ثُلُوُورُو،» ثْࢽَّ؞
[18] أَدْمَ ࢽَࢽْغَرُو کَمْ کْرٜجْࢽَرُو کَࢽْجِمَرِ ࢻْلٜجِیے، کُورُو کَمْ کْرٜجْࢽَیٜ کْلَࢽْجُ کِبَّجِیے؞
[19] دَجِ ࢽِیٜ وُرُو: «تُو، ࢽغَیْرُو وَلْیٜࢽُووَ، أَوِرُو کُوَ یَیٜ أَیَوْ غْࢽَجِدْ؟ وُࢽْدُ غْلٜ رَکْثٜ رَوُوࢽْجُ وَجِدْ؟» ࢽْمٜ سُوُورْمِ؞
[20] أَمَّ ࢽِ کَمْ، ࢽِ وُࢽْدُ دُوُوࢽْ اللَّهرُو مَࢽَ کَلَکّْمِدْ؟ أَوُو تْدَࢽْدْࢽَدْیٜ تِ تِیَ ثْدَࢽْدْࢽَدْرُو: «أَوِرُو وُوَ ࢽغَیْ سْدْمْ؟» ثْࢽِ وَ؟
[21] دُوُرَمَّ کْࢽْدُوُو کْلَ تُلُو کَمَتْکَدَیٜࢽْ کَلْوُو لَا دَرَجَآ لَا یٜ دَرَجَ بَوُووَا تَࢽْدُویٜ ثْدَࢽِّ وَ؟
[22] تُو، اللَّه غْرْغَدُࢽْجُ ࢻْلٜدُوَ دُࢽُوࢽْجُ إِسَࢽُودُوُوَ ثْرَیٜ تَیِ غْرْغَدُࢽْجُیٜ دُوُوࢽْ سِدُوُرُو دَبَّرْغَدَدَ جَوْرُو کَࢽَدِلَࢽْ مْرْجْࢽَا، ࢽدَ؟
[23] أَدَ دِیُوࢽْجُدْ، دَرَجَࢽْجُ تْرْمْ تَیِ کَࢽْجِمَرِیٜ دُوُوࢽْ دَرَجَرُو دَبَّرْغَدَدْرُو إِسَࢽُودُوُ ثْرَاࢽَا، ࢽدَ؟
[24] أَࢽْدِمَا ثُرُو یَوْدِیَ رُࢽْجَیٜࢽْ غْࢽِ، ثُرُو کْرْدِیَیٜࢽْ بُواْسَࢽَ،
[25] ثُرُو کِتَوُ ࢽَوِ حُوسِیَیٜࢽْ وُلْجْࢽَدْ غَیْ: «تَیِ دُوُوࢽْ جَمَࢽِ غْࢽِدَ جَمَࢽِلَࢽْ بُواْکِّ، تِ دُوُوࢽْ تْرَاࢽِّدْ یٜیَ تْرَاࢽَلَࢽْ بُواْکِّ؞»
[26] کُورُو: «ࢽَ دُوُوࢽْ تَیِرُو: ‹ࢽَیِ جَمَࢽِ غْࢽِ،› وُلْجَࢽَدْمَࢽْ تَیِیَ تَدَوَ اللَّه کْࢽْدْغَیْمَیٜلَࢽْ بُواْجَیْ؞»
[27] ࢽَوِ إِشَیَیٜ کْلَ إِسْرَاءِیلَوُیٜࢽْ کُواْ سَࢻْثٜ: «تَدَوَ إِسْرَاءِیلَیٜ ࢽَࢽّغْوُࢽْجَ ثِدِ کٜسَ ثِ تٜکُیٜیَ ثَدْࢽَ یَیٜ، أَمْࢽْجَیٜ غَࢽَمَ ࢽجْکَّوُو ثَوَࢽْدِ،
[28] تُسِّوَوُو کْمَࢽْدٜ دُࢽِیَ ࢽغَرُو شَرَࢽْجُ ثُوتُّو کَمْجِیے،» ثْࢽَّ؞
[29] ࢽَوِ إِشَیَ ثَلَࢽْ کَوُ وَکَّجِدْرُو وُلْجْࢽَدْ غَیْ: «اللَّه کْمَࢽْدٜ مَرْتَوَمَ کَدُوُ لَآ کُولْسَغَࢽِّرُو وَلْیٜࢽُووَ، أَࢽْدِ بْرْࢽِ سُودُومْبٜ غَیْرُو وَلِّیٜ، بْرْࢽِ غُومُورّٜیَ ثَمُࢽِیٜࢽَ؞»
[30] تُو، أَوِ غْلٜ وُلِّیٜ؟ کْرْدِیَ ࢽَࢽْجِرٜ مَجَࢽِّمَسُودْ ࢽَࢽْجِرٜ ثَوَࢽْدْࢽَ، وُوتّٜ ࢽَࢽْجِرٜ کَمْبْرْسٜىٰࢽْ إِسِدْ،
[31] أَمَّ جَمَ إِسْرَاءِیلَیٜ وَدَ ࢽَࢽْجِرٜىٰ مَجَیْدَ ثَوَࢽْدْࢽِّ؞
[32] أَوِرُو؟ کَمْبْرْسٜلَࢽْ غْࢽِ، کِدَ دِیُولَࢽْ غَیْ تِیَ مَجَࢽَ ࢽَࢽْغَرُو؞ تَیِدْ کْلَ کَوْ تَلْدُیٜدْࢽْ تَلْجَࢽَ،
[33] کِتَوُلَࢽْ رُوُوَدَدْ غَیْ: «أَکُّو سِیُوࢽِّࢽْ کَوْ تَلْدُیٜ یٜ، تَکَّلْدُمَ یٜ غْࢽَࢽْکِّ، کَمْ تِیَ مْرْسَجْࢽَمَدْ، ࢽَࢽْغُ تِیَ ثْدَیْوَوُو؞»