[1] تُو، أَوِ غْلٜ وُلِّیٜ؟ سٜرْ اللَّهیٜ ࢽغْوُجُورُو ثُرُو بِوُیٜࢽْ وَ دْغَیْیٜ؟
[2] أَعَ، تْمَّرُو ࢽغَیْ غْࢽِ! أَࢽْدِ بِوُرُو ࢽُیْیٜࢽَدْ، جِرِ ࢻِࢽْ غْلٜ ثُرُودْࢽْ کُورُو دْغَیْیٜ؟
[3] وُࢽْدُࢽْدٜ یَیٜرُو کَسَلَ سَدّٜ عِیسَى أَلْمَسِیوُرُو کْلْسَاࢽَدْ، کَرْمُوࢽْجُرُو کْلْسَاࢽَرُو ࢽُوࢽُوِّ وَ؟
[4] أَدْ ࢽَࢽْغَرُو، کَسَلَ کَرْمُوࢽْجُرُو کْلْسَاࢽَدْلَࢽْ تِیَ رُوکُّو سِتّْرَسَࢽَدْ، ࢽغَیْࢽِࢽْ جِرِ أَلْمَسِیوُدْ دَرَجَ بَوَدْیٜࢽْ کَرْمُولَࢽْ ثِجْࢽَدْ غَیْ، أَࢽْدِ یٜ کْࢽْدْغَیْ بْرِࢽْ دِیٜ؞
[5] کَرْمُوࢽْجُوَ ثَمُࢽُّو تِرُو کْلْدِییٜࢽَدْ، تَبَّتُّو کَرْمُولَࢽْ ثِدُࢽْجُوَ ثَمُࢽُّو تِرُو کْلْدِییٜ؞
[6] حَلْࢽْدٜ ثَیٜ دْغَیْیٜࢽَدَ تِیَ رُوکُّو کْسْکَرُو جَجَاࢽَرُو ࢽُوࢽِیٜࢽَ، دُࢽُو بِوُیٜدْ بَوُورُو وَلْجُو، بَرٜ غَدٜرُو کَرٜیَ بِوُیٜرُو وَلِّیٜࢽْدٜرُو؞
[7] کَمْ ࢽُࢽَدْ بِوُوَ ࢻِرْدَࢽٜ ࢽَࢽْکَمْ کْلَیٜ ثُوَࢽْدْࢽَ؞
[8] أَلْمَسِیوُوَ کَلُّو ࢽُیْیٜࢽَدْ، تِیَ کَلُّو رُووَ دْغَیْیٜرُو مْرْسَࢽِیٜࢽَ،
[9] کُورُو أَلْمَسِیوُ کَرْمُولَࢽْ ثِجْࢽَ ࢽَࢽْغَرُو، غَدٜرُو ࢽُیْوَوُورُو ࢽُوࢽِیٜࢽَ؞ کْࢽْدُوُو کَرْمُویٜدْ کْلَࢽْجُࢽْ بَوُو؞
[10] ࢽُوࢽْجُدْ، تِلُو لُوࢽُّو بِوُوَ بَوُورُو دِیُورُو کَࢽُو، أَمَّ رُوࢽْجُوَدْ، اللَّهرُو دَرَجَ ࢽجُورُو رُووَ دْغَیْ؞
[11] جِرِ أَدْغَیْࢽِࢽْ ࢽَیِ یٜ ࢽُوٜ کْࢽْدُوُو بِوُیٜ کْلَࢽْدُوࢽْ بَوُورُو وَلْجْࢽَ یٜ، کُورُو عِیسَى أَلْمَسِیوُلَࢽْ رُووَ دْغَوٜ اللَّهرُو دَرَجَ یِوِ یٜرُو کْلَࢽْدُووَ ࢽغُوࢽُواْ؞
[12] أَدْمَ ࢽَࢽْغَرُو بَرٜ بِوُ کْلَ تِیࢽْدُو ࢽُومَیٜࢽْ کْرْمَیْ ثُࢽُودٜ مَࢽْغَرْࢽْجُوَ غَوِّ؞
[13] بَرٜ تِیࢽْدُو کَرٜ کِدَ جِرٜࢽَمْبُ دِیُویٜ غَیْ مُکُّو بِوُیٜرُو یَکُّوِّ، أَمَّ کَرْمُولَࢽْ رُووَ ثِࢽُوَّدْ، کْلَࢽْدُووَ اللَّهرُو یُواْ، تِیࢽْدُو یٜ کَرٜ کِدَ ࢽَࢽْجِرٜ دِیُویٜ غَیْ اللَّهرُو یُواْ؞
[14] کْࢽْدُوُو بِوُیٜدْ غَدٜرُو کْلَࢽْدُوࢽْ بَوُو، ࢽَیِدْ ࢻْرْدُ وَدَیٜࢽْ غْࢽِ، ࢻْرْدُ سٜرْ اللَّهیٜࢽْ دْغَوِ ࢽَࢽْغَرُو؞
[15] تُو، أَوِ غْلٜ؟ أَࢽْدِ ࢻْرْدُ کْࢽْدُوُو وَدَیٜࢽْ غْࢽِ، ࢻْرْدُ سٜرْ اللَّهیٜࢽْ دْغَیْیٜࢽَدْ، کُورُو یَیٜ بِوُ دِیٜ وَ؟ أَعَ، تْمَّرُو ࢽغَیْ غْࢽِ!
[16] کَمْبَ غَرُو تِرُو کَرٜیَ غَیْ کْلَࢽْدُو کٜوَّ، تِ غَوِدْیٜ کَرٜیَوَرُو وَلُّوِرُو ࢽُوࢽُوِّ وَ؟ بِوُ غَدْ کَرْمُورُو ثَدِ، کُورُو اللَّهَ غَدْ ࢽَࢽْجِرٜ ثُوُدِ؞
[17] أَمَّ اللَّهَ وُسٜࢽِیُو! ࢽَیِ ثَلَࢽْ کَرٜیَوَ بِوُیٜدْ کْرْمَ کَرْوُࢽْدُو سَمَّࢽْ أَلَمْدُ جِرِ ࢽجَسَکّْرَࢽَدَ غَوٜ
[18] بِوُوَ ࢻِرْدُوٜ ࢽَࢽْکَمْ کْلَیٜ ࢻَࢽْدُوٜ کَرٜیَوَ ࢽَࢽْجِرٜىٰرُو وَلُّوَّ؞
[19] ࢽَࢻْتُࢽْدُو أَدَمْغْࢽَیٜ ࢽَࢽْغَرُو مَࢽَ کَمْبٜࢽْ مَࢽَیٜکُّو؞ جِرِ ثَلَࢽْ تِیࢽْدُو تَیِرْࢽَمْبُ سُو، ࢽَࢽْدِوِ سُورُو کَرٜیَ غَیْ کْلَࢽْدُو یِوٜ ࢽَ کُوجْࢽَرُو ࢽَࢽْدِوِرُو ثَدْࢽَدْ غَیْ، أَدْغَیْࢽِࢽْ کْرْمَ کَرٜیَ غَیْ تِیࢽْدُو ࢽَࢽْجِرٜرُو یُواْ تَیِرُّو وَلُّواْرُو؞
[20] سَ ࢽَیِ کَرٜیَوَ بِوُیٜدْࢽْ، ࢽَیِ ࢻْرْدُ کْࢽْدُوُو ࢽَࢽْجِرٜىٰࢽْ بَوُو؞
[21] أَوُووَ دُوُوࢽْ کْرْمَ تَیِیَ ࢽَࢽْغُࢽُوِدْ، سَدْࢽْ أَوِ ࢻَیْدَࢽْجَ وُو؟ أَوُووَ أَوُو أَࢽِیٜ لٜدُوُرَمْࢽْجَ کَرْمُو؞
[22] أَمَّ کْرْمَ بِوُوَ ࢻِرْدُوٜ ࢽَࢽْکَمْ کْلَیٜ ࢻَࢽْدُوٜ کَرٜیَوَ اللَّهیٜرُو وَلُّوَّدْ، ࢻَیْدَࢽْجُدْ تِمَ ࢽَࢽْتَیِرْ وُو، لٜدُوُرَمْࢽْجُ یٜ رُو سَوِسُویٜ؞
[23] أَوُووَ أَلْوَسِ بِوُیٜدْ کَرْمُو، أَمَّ کْࢽْجُو اللَّهیٜدْ کْمَࢽْدٜ عِیسَى أَلْمَسِیوُیٜࢽْ رُو سَوِسُویٜ؞