[1] کْرَمِیَ، أَوُو جَوْرُو کَرْوُࢽِ ثْرَاࢽَ یٜ، مُودُوَ دِکِّ یٜدْ، تِمَ إِسْرَاءِیلَوُ ࢽجْکَّوُو ثَوَࢽْدُو؞
[2] جَوْمَرُو اللَّهَ جَغَیْرُو تَیِیَ شٜدَࢽْکِّ، أَمَّ کْلَ ࢽُودُیٜࢽْ غْࢽِ،
[3] أَوُووَ ࢽَࢽْجِرٜ اللَّهیٜدَ ࢽُوجَࢽِّࢽْ ࢽَࢽْجِرٜ کَاࢽجَ مَجَࢽَ، وُوتّٜ ࢽَࢽْجِرٜ اللَّهیٜدَ کَسَثَّࢽٜ جَاࢽِّ،
[4] دَلِلْࢽْجُدْ أَلْمَسِیوُدْ تِمَ لٜدُوُرَمْ وَدَیٜدْ وُو، وُࢽْدُ دُوُوࢽْ کَمْبْرْسٜیَدْ ࢽَࢽْجِرٜ ثُوَࢽْدُورُو؞
[5] ࢽَوِ مُوسَى کْلَ ࢽَࢽْجِرٜ وَدَلَࢽْ إِسِدْیٜࢽْ ࢽغَیْ رُوُجْࢽَ: «کَمْ أَوُو أَࢽِیَ ثْدِمَدْ تَیِیٜࢽْ رُووَ دْغَیْ؞»
[6] أَمَّ ࢽَࢽْجِرٜ کَمْبْرْسٜلَࢽْ إِسِدْ ࢽغَیْ ثْࢽِ: بَرٜ کَرْوُࢽْمْلَࢽْ: «وُࢽْدُ سَمٜرُو لٜجِ؟» وُوتّٜ أَلْمَسِیوُوَ سَوُورُو،
[7] بِ: «وُࢽْدُ بْلَا دَدُرَمْ بَوُووَرُو جْࢻْثِیے؟» وُوتّٜ أَلْمَسِیوُوَ کَرْمُولَࢽْ سَࢽْغُورُو وُلّْمِّ؞
[8] أَمَّ أَوِ غْلٜ وُلْجِدْ؟ «مَࢽَدْ کَرْࢽّْمْ دٜلْࢽِࢽْ، تِ ثُرُو ثِࢽْمْبٜࢽْ یٜ، ثُرُو کَرْوُࢽْمْبٜࢽْ یٜ،» وُوتّٜ مَࢽَ کَمْبْرْسٜىٰ مَوُوࢽِیٜدْ؞
[9] ثِࢽْمْلَࢽْ «عِیسَمَ کْمَدْ وُو!» ࢽْمٜ کَرْوُࢽْمْلَࢽْ اللَّه تِیَ کَرْمُولَࢽْ ثْسَࢽْغْࢽَرُو کَسَتْکٜمَّ، ࢽجْکَّوُو ࢻَࢽْدْمِ؞
[10] أَوُووَ کَرْوُلَمَࢽْ کَمْ مْرْسَجٜ جِرٜمَرُو وَلْجِ، کُورُو ثِلَمَࢽْ کَسَثّٜ ࢽجْکَّوُو ثُوَࢽْدِ،
[11] کِتَوُلَࢽْ رُوُوَدَدْ غَیْ: «وُࢽْدُ دُوُوࢽْ تِیَ مْرْسَجْࢽَمَدْ، ࢽَࢽْغُ تِیَ ثْدَیْوَوُو؞»
[12] أَوِمَ یَوْدِیَ یَوْدِ غْࢽِیَ غَیِرْجِ بَوُو، تِ کْمَ أَمْ دُࢽِیَ سَمَّیٜدْ تَیِ دُوُوࢽْ تِیَ بُواْجَیْ سَمَّرُو جَوْرُو بَرْغَ دْࢻْثِیے،
[13] أَوُووَ: «وُࢽْدُ دُوُوࢽْ ثُ کْمَࢽْدٜىٰیَ بُواْجْࢽَمَدْ ࢽجْکَّوُو ثُوَࢽْدِ؞»
[14] تُو، ࢽدَیِࢽْ غْلٜ تِ مْرْسَجَࢽِّدَ بُواْجَیْ؟ کُورُو ࢽدَیِࢽْ تِ کْلَࢽْجُࢽْ ࢻَࢽْجَࢽِّدَ مْرْسَجَیْ؟ کُورُو ࢽدَیِࢽْ مَوُودُمَ بَوُووَ ࢻَࢽْجَیْ؟
[15] کُورُو تَیِیَ ثَࢽُودٜ لٜجَࢽِّیَ، ࢽدَیِࢽْ مَوُوجَیْ؟ کِتَوُلَࢽْ رُوُوَدَدْ غَیْ: «سِ أَمْ لَوَرْ کْجِ کُدُومَسُویٜدْ جَوْرُو شَوَ!»
[16] أَمَّ أَمْ سَمَّ غْࢽِ کَوُرِ کْجِدَ جَا؞ ࢽَوِ إِشَیَیٜ: «کْمَࢽْدٜ، وُࢽْدُ کَوُرِࢽْدٜ کَسَثُّو؟» ثْࢽَّ؞
[17] ࢽغَیْمَ کَمْبْرْسٜدْ کَوُرِ ࢻَࢽْدَیٜࢽْ إِسِ، کَوُرِ ࢻَࢽْدَدْ یٜ مَࢽَ أَلْمَسِیوُیٜࢽْ إِسِ؞
[18] أَمَّ وُیٜ: «ࢻَࢽْجَࢽِّ وَ؟» ࢽْکّٜ کُورْکِّ؞ تَبَّتُّو ࢻَࢽْجَࢽَ! «کُواْࢽْجَ دُࢽِیَ ࢽغَࢽْ ࢽُکْثْࢽَ، مَࢽَࢽْجَ حَرْ ثِ دَجِرَمْ دُࢽِیَیٜرُو لٜجْࢽَ؞»
[19] أَمَّ وُیٜ: «جَمَ إِسْرَاءِیلَیٜ أَسُجَࢽِّ وَ؟» ࢽْکّٜ کُورْکِّ؞ بُرْوُوࢽْ ࢽَوِ مُوسَیٜ: «أَمْ جَمَ غْࢽِیَ یَکّْکّٜ ࢽَࢽْدْرِ ࢽَیِیَ ࢽجَدَیْ، جَمَ حَࢽْغَلْ بَوُووَلَࢽْ ࢻَیْدَدْکّٜ ࢽجَسَکّٜ غْرْغَࢽُوِ،» ثْࢽَّ؞
[20] دَجِ رِدُ بَوُووَرُو ࢽَوِ إِشَیَیٜ: «أَمْ وُوَ مَسَࢽِّ وُوَ سٜوَࢽْدُو، أَمْ وُوَ سَوُورْࢽِّرُو کْلَࢽِ ࢻْلٜىٰکُّو،»
[21] أَمَّ کْلَ جَمَ إِسْرَاءِیلَیٜࢽْ تِیٜ: «دَبْدُ سْرَمْبُو جَمَ غَࢽَمْبُمَ کُورُو تُرُمَرُو مُکُّوࢽِ سَیٜىٰکُّو،» ثْࢽَّ؞