[1] کَمْ کَمْبْرْسٜࢽْجُ دُࢽُو بَوُووَ مُکُّو یِࢽْدِࢽْ مُووُواْ، بَرٜ کْلَ رَایِࢽْجُیٜࢽْ کَمْبِوُ دِوِّ؞
[2] کَمْ لَا أَوُو سَمَّا جُوُیْرُو مْرْسَجْࢽَ، لَا یٜ کَمْبْرْسٜࢽْجُ دُࢽُو بَوُووَدْرُو کْرِجُوُو رُࢽْجُ جُوُیْ؞
[3] بَرٜ کَمْ جُوُیْدْ کَمْ جُوُیْوَوُودَ رُجْࢽِّ، کُورُو بَرٜ کَمْ جُوُیْوَوُودْ کَمْ جُوُیْدَ شَرَجْࢽِّ، اللَّه کَمْ جُوُیْدْ یٜیَ أَرْدِجْࢽَ ࢽَࢽْغَرُو؞
[4] ࢽِ وُࢽْدُ دُوُوࢽْ وُولُودِ کَمْ غَدٜىٰیَ شَرَࢽْمِدْ؟ دَجْࢽَ بِ دَجْࢽِّ، أَدْ أَوُو کْمَࢽْجُیٜ، کُورُو دَجِ، ࢽَ کْمَࢽْدٜىٰࢽْ کْࢽْدُوُو تِیَ إِسَدَدُوُیٜ مبٜجِ؞
[5] کَمْ لَا یِمْ لَا یِمْ غَدٜیَ کُوجْࢽَرُو تْمَجْࢽَ، کَمْ لَا یٜ یِمْ سَمَّ تِلُورُو تْمَجْࢽَ؞ وُࢽْدُ یَیٜ أَوُو کَرْوُࢽْجُیٜدَ تَبَّتُّو کَسَثُّو؞
[6] کَمْ یِمْدَ جْغَیْمَدْ کْمَࢽْدٜ ࢽَࢽْغَرُو جْغَیْ؞ کَمْ جُوُیْمَدْ یٜ کْمَࢽْدٜ ࢽَࢽْغَرُو جُوٜ اللَّهَ وُسٜجِ؞ کُورُو کَمْ جُوُیْوَوُومَدْ یٜ کْمَࢽْدٜ ࢽَࢽْغَرُو جُوُیْوَوُو، اللَّهَ وُسٜجِ؞
[7] وُࢽْدُمَ ثُرُوࢽْدٜࢽْ کْلَࢽْجُرُو غْࢽِ رُووَ دْغَیْ، کُورُو وُࢽْدُمَ ثُرُوࢽْدٜࢽْ کْلَࢽْجُرُو غْࢽِ ࢽُیْ،
[8] دَلِلْࢽْجُدْ رُووَ کْرْغَیْیٜیَ، کْمَࢽْدٜ ࢽَࢽْغَرُو دْغَیْیٜ، کُورُو کَࢽُیْیٜیَ، کْمَࢽْدٜ ࢽَࢽْغَرُو ࢽُیْیٜ؞ ࢽغَیْمَ رُووَ دْغَیْیٜ بِ ࢽُیْیٜ، أَࢽْدِدْ کْمَࢽْدٜىٰ؞
[9] دَلِلْ أَلْمَسِیوُ ࢽُࢽٜ وَلْدٜ رُووَرُو ثِجْࢽَدْ تِمَ کْمَ أَمْ سَࢽُࢽَا رُووَا سَمَّیٜرُو وَلْجُو؞
[10] تُو، ࢽِ، أَوِرُو کْرَمِࢽْمْبَ شَرَࢽْمِدْ؟ رَ ࢽِ، أَوِرُو کْرَمِࢽْمْبَ رُࢽْمِدْ؟ أَوُووَ أَࢽْدِ سَمَّ ࢻُوُ شَرَرَمْ اللَّهیٜࢽْ دَࢽِیٜ،
[11] کِتَوُلَࢽْ رُوُوَدَدْ غَیْ: «کْمَࢽْدٜىٰ: ‹وُ مبٜجِدْ جِرٜدْ غَیْ، ࢽغُرُمْࢽْغُرُمْ ࢻِ یَیٜ ࢻُوُࢽِࢽْ ࢻِدِ، کُورُو تْلَمْ ࢻِ یَیٜ وُمَ اللَّه وُورُو سَثِّ،› ثْࢽَّ؞»
[12] ࢽغَیْࢽِࢽْ وُࢽْدُࢽْدٜ یَیٜ کْلَ أَوُو ثْدْࢽَ سَمَّیٜࢽْ اللَّهرُو وُلْجِیے؞
[13] أَدْ ࢽَࢽْغَرُو بَرٜ غَدٜرُو کَتّٜࢽْدٜࢽْ شَرَ دِیٜࢽْدٜ، ثُجُ أَدْیٜرُو ࢽِیَ ࢽغُوࢽُواْ بَرٜ جَوَلْ کْرَمِیٜرُو تَکَّلْ بِ أَوُو تَلْدُیٜ غْࢽَغْوِّ؞
[14] کْمَ عِیسَى ࢽَࢽْغَرُو ࢽُوکّْࢽَ، کُورُو تَبَّتُّو أَرْدِࢽْکّْࢽَ، أَوُو دُوُوࢽْ ثِدُرَمْࢽْجُࢽْ تَیِرْ غْࢽِدْ بَوُو، أَمَّ کَمْ دُوُوࢽْ أَوُو لَآ تَیِرْ غْࢽِرُو ࢽغُوجْࢽَدْ، تِرُو أَوُودْ تَیِرْ غْࢽِ؞
[15] کْلَ أَوُو بُمِیٜࢽْ یَکّْمٜ کَرْوُ کْرَمِࢽْمْبٜ کُتَّیٜࢽُووَ، دَجِ جَوَلْ کْرَوُویٜࢽْ لُوُمَّ؞ بَرٜ کْلَ أَوُو بُمِیٜࢽْ کَمْ دُوُوࢽْ تِ ࢽَࢽْغَرُو أَلْمَسِیوُ ࢽُࢽَدْ ࢻَثّْغْࢽِّ،
[16] بِ أَوُو ࢽَیِرُو کْجِدْرُو دِوِ وُلْجَࢽِّ،
[17] أَوُووَ ࢽُودُو بَرْغَا اللَّهیٜدْ أَوُو کْمْبُووَ کْࢽْجَایٜࢽْ غْࢽِ کْرْغَ، تِدْ أَوُو ࢽَࢽْجِرٜیَ ࢽَࢽْلٜوَا کَرْوُکْجِیَ رُحُ اللَّهیٜ ثُوُدِیٜࢽْ کْرْغَ؞
[18] کَمْ ࢽَࢽْوُولُودِ أَلْمَسِیوُرُو ࢽغَیْࢽِࢽْ ثْدِّدْ، اللَّه تِیَ ثْرَاࢽَ، کُورُو أَمْ یٜ تِیَ أَرْدِجَࢽَ؞
[19] دَجِ ࢽغَیْࢽِࢽْ أَوُو دُوُوࢽْ ࢽَࢽْلٜوَ ثُوُدِ یٜ، أَمْبَ ثَکّٜ کَتّٜࢽْجَࢽْ إِسَدُࢽُووَجَغَیْ یٜدَ مَࢽِیُو!
[20] بَرٜ کْلَ کْمْبُویٜࢽْ کِدَ اللَّهیٜ وُرْࢽْمِّ؞ أَوِ یَیٜ تَیِرْ، أَمَّ جَوَلْ کَمْ غَدٜىٰرُو کْلَ أَوُو جُوُیْیٜࢽْ أَوُو تَلْدُیٜ لَا غْࢽَدُوُدْ، دِوِ؞
[21] أَوُو ࢽغْلَدْ تِمَ دَ ࢽغْرُو سُو، دِبٜࢽْ ࢽجَ سُو، أَوُو غَدٜ سَمَّࢽْ یَکّْمٜ کْرَمِࢽْمْ تَلْجِدَ وَدُ؞
[22] ࢽِدْ، کَمْبْرْسٜ کْلَ أَوُو أَࢽِیٜࢽْ تَمَّدَ کَتّٜ ࢽِیَ اللَّهَیٜࢽْ رُوࢽٜ؞ بَرْغَࢽْجُ کَمْ دُوُوࢽْ کْلَ أَوُو أَرْدِجْࢽَیٜࢽْ کْلَࢽْجُ شَرَجِوَوُودْ؞
[23] أَمَّ کَمْ شٜکُّࢽْجُوَدْ، جُوُیْرُو وَلْیٜࢽُووَ، اللَّه تِرُو شَرَ کَمْجِیے، أَوُو ثْدِدْ کَمْبْرْسٜىٰࢽْ غْࢽِ کَدِیُو ࢽَࢽْغَرُو، کُورُو أَوُو کَمْبْرْسٜىٰࢽْ إِسْࢽِّ سَمَّ بِوُ؞