[1] وُمَ بُلُسْ رَوُو اللَّهیٜࢽْ کْࢽْغَیَمْ عِیسَى أَلْمَسِیوُیٜرُو وَلْدُرُو بُواْوَدَا کْرَمِࢽْدٜ سَسْتَࢽِسُوَدْ
[2] جَمَ اللَّهیٜ بْرْࢽِ کُورِࢽْتِیٜࢽْ دَسَاࢽَ، وُوتّٜ أَمْ دُوُوࢽْ عِیسَى أَلْمَسِیوُلَࢽْ تَیِرْ یٜ، مُمِࢽْ یٜرُو وَلْدُرُو بُواْوَدَدْرُو، کُورُو أَمْ ࢽَ ࢻِࢽْ یَیٜ ثُ کْمَࢽْدٜ عِیسَى أَلْمَسِیوُیٜ کْمَࢽْجَ یٜ، کَاࢽدٜ یٜیَ بُواْجَیْ سَمَّ یٜرُو:
[3] اللَّه بَوَࢽْدٜیَ کْمَ عِیسَى أَلْمَسِیوُوَ ࢽَیِرُو سٜرَّ ࢽَࢽْلٜوَا ࢽجَدُو!
[4] سَوِ یَیٜ ࢽَیِ ࢽَࢽْغَرُو اللَّهࢽِیَ وُسٜࢽْکِّ، دَلِلْࢽْجُدْ ࢽَیِرُو عِیسَى أَلْمَسِیوُلَࢽْ سٜرْ ࢽجَدْࢽَ ࢽَࢽْغَرُو؞
[5] جِرِ ࢻِࢽْ یَیٜ مَࢽَ سَمَّا إِلْمُ سَمَّالَࢽْ أَرْسِیے جِرٜىٰ تِلَࢽْ ࢻَࢽْدُوَّ،
[6] شٜدَ کْلَ أَلْمَسِیوُیٜࢽْ دَوُࢽْدُوࢽْ تَبَّتْکَادَدْ غَیْ،
[7] ࢽغَیْࢽِࢽْ کْࢽْجُو رُحُ اللَّهیٜ ࢻَلْمَ ࢽَیِیَ مَوْࢽْجَࢽِّࢽْ ࢻْلٜدُ کْمَࢽْدٜ عِیسَى أَلْمَسِیوُیٜ غَࢽْغَدَارُو غُرٜࢽُوِ؞
[8] تِ کْلَࢽْجُ حَرْ سَ ࢽجٜرُورَمْبٜرُو دُࢽُو ࢽجَدٜ یِمْ کْمَࢽْدٜ عِیسَى أَلْمَسِیوُیٜࢽْ سَرِوُ بَوُووَرُو وَلُّوِ؞
[9] اللَّه أَمَࢽْمَ، تِ دُوُوࢽْ تَدَࢽْجُ عِیسَى أَلْمَسِیوُ کْمَࢽْدٜدَ رُوکُّو ࢽَࢻْتُ ࢽَࢽْیَاࢽَیٜ دٜوُورُو بُواْࢽْجَࢽَدْ؞
[10] کْرَمِیَ، ثُ کْمَࢽْدٜ عِیسَى أَلْمَسِیوُیٜࢽْ ࢽَیِیَ لُواْࢽْجَکِّ، ࢽَیِ سَمَّیٜ ثِࢽْدُو تِلُوجُو، بَرٜ کَتّٜࢽْدُوࢽْ یَکْتُ مبٜجِرُو وَلْجْࢽِّ، أَمَّ حَࢽْغَلْࢽْدُو تِلُوجُو، ࢽِیَࢽْدُو یٜ تِلُوجُو؞
[11] تُو، کْرَمِیَࢽِ، أَمْ ࢻَدُو یَ کْلُووُیٜ وُرُو دَوُࢽْدُوࢽْ کَمْبِوُوَرُو وُلْسَاࢽَ؞
[12] أَوُو وُلّْکِّدْ تِمَ وُࢽْدُࢽْدُو یَیٜ: «وُدْ بُلُسّٜ،» لَایٜ: «وُدْ أَࢻُولُسّٜ،» لَایٜ: «وُدْ کٜࢻَسّٜ،» لَایٜ: «وُدْ أَلْمَسِیوُیٜ،» ثْࢽِ؞
[13] أَلْمَسِیوُدْ یَکَّدَ وَ؟ بُلُسَّ وَ ࢽَیِ ࢽَࢽْغَرُو کْسْکَ کَرْمُویٜرُو جَجَا؟ رَ، ثُ بُلُسّٜࢽْ وَ ࢽَیِرُو کَسَلَ ࢽغٜدُّو؟
[14] کْرِࢻُسَّ غَیُسَّرُو غْࢽِیَ، وُࢽْدُࢽْدُومَرُو کَسَلَ یِدّْکّْࢽِرُو اللَّهَ وُسٜࢽْکّْࢽَ،
[15] بَرٜ وُࢽْدُمَ کَسَلَ ࢽَیِرُو ثُࢽِلَࢽْ ࢽجَدّْࢽَرُو وُلْجْࢽِّرُو؞
[16] أَسٜ، أَمْ ࢻَدُو إِسْتِࢻَࢽُسّٜ یٜرُو کَسَلَ یِدّْکّْࢽَ، أَمَّ تَیِࢽْ ࢽغَوُوࢽْ أَمْ غَدٜرُو کَسَلَ یِدّْکّْࢽَا ࢽُوکّْࢽِ؞
[17] أَلْمَسِیوُ وُوَ أَمْبُو کَسَلَ ࢽجْدُّورُو غْࢽِ، کَوُرِ کْجِ وُلْدُوُرُو سُࢽُودُو، کُورُو مَࢽَ ࢽَࢽْرَشِدُیٜࢽْ غْࢽِ، بَرٜ کْسْکَ کَرْمُویٜ أَلْمَسِیوُیٜدْ بُووُرُو وَلْجْࢽِّرُو؞
[18] أَمْ ࢻَثَّغَیْدْرُو کَوُرِ کْسْکَ کَرْمُویٜدْ حَࢽْغَلْࢽَمْبُ، أَمَّ أَࢽْدِ ࢽجْکَّوُو ࢻَࢽْدِیٜدْرُو تِ کْࢽْدُوُو اللَّهیٜ،
[19] کِتَوُلَࢽْ رُوُوَدَدْ غَیْ: «ࢽَࢽْرَشِدُ رَشِدُوَیٜدَ بَوُورُو دِکِّ، إِلْمُ إِلْمُوُیٜدْ یٜیَ بَوُورُو کَلَࢽْغْکِّ؞»
[20] تُو، ࢽدَ کَمْ رَشِدُدْ؟ ࢽدَ غُوࢽِ أَتَّوْرَیٜدْ؟ ࢽدَ مَࢽَمَ جَمَࢽْ أَدْیٜدْ؟ اللَّه ࢽَࢽْرَشِدُ دُࢽِیَ أَدْیٜدَ حَࢽْغَلْࢽَمْبُرُو کَلَکْثْࢽِّ وَ؟
[21] أَوُووَ ࢽَࢽْرَشِدُ اللَّهیٜࢽْ أَمْ دُࢽِیَیٜ ࢽَࢽْرَشِدُࢽْجَلَࢽْ تِیَ ࢽُوجَࢽِّدْ، اللَّه دْلْوُ حَࢽْغَلْࢽَمْبُ مَوُوࢽِیٜدْیٜࢽْ کَمْبْرْسٜوُوَ ࢽجْکَّوُورُو ࢽغْلَرُو کِرُو؞
[22] یَوْدِیَ أَلَمَ ثَوُورِ، أَمْ غْرٜسّٜ یٜ ࢽَࢽْرَشِدُ مَجَیْ،
[23] أَمَّ أَࢽْدِ أَلْمَسِیوُ کْسْکَرُو جَادَا مَوُوࢽِیٜ، یَوْدِیَدْرُو أَوُو تَلْدُیٜ، یَوْدِیَ غْࢽِدْرُو أَوُو حَࢽْغَلْࢽَمْبُیٜ؞
[24] أَمَّ أَمْ اللَّهیٜ بُواْجْࢽَدْ، یَوْدِیَ یٜࢽْ کَلْ، یَوْدِیَ غْࢽِ یٜࢽْ کَلْ، أَلْمَسِیوُدْ کْࢽْدُوُو اللَّهیٜ یٜ، ࢽَࢽْرَشِدُ اللَّهیٜ یٜ،
[25] دَلِلْࢽْجُدْ أَوُو ࢽَ اللَّهیٜࢽْ حَࢽْغَلْࢽَمْبُرُو ثَرُیْدْ کَمْبَ ࢽَࢽْرَشِدُࢽْ کُوجْࢽَ، کُورُو أَوُو ࢽَ اللَّهیٜࢽْ ࢽَࢽْلَوُرُو تْمَجَࢽَدْ یٜ کَمْبَ دُࢽُوࢽْ کُوجْࢽَ ࢽَࢽْغَرُو؞
[26] کْرَمِیَ، بُواْدُࢽْدُو رُیْوُو: کْلَ ࢽَࢻْتُ ࢽَࢽْعَدَمْغْࢽَیٜࢽْ دَوُࢽْدُوࢽْ رَشِدُ ࢽغْوُ بَوُو، کْࢽْدُوُووَ یٜ ࢽغْوُ بَوُو، أَمْ دَرَجَا یٜ ࢽغْوُ بَوُو؞
[27] أَمَّ اللَّه رَشِدُوَا ࢽَࢽْغُرُو ثَکُّورُو أَوُو دُࢽِیَࢽْ حَࢽْغَلْࢽَمْبُیٜدَ کْرٜجْࢽَ، أَمْ دُࢽُووَا ࢽَࢽْغُرُو ثَکُّورُو أَوُو دُࢽِیَࢽْ لَوُدْ یٜیَ کْرٜجْࢽَ،
[28] کُورُو أَوُووَ مٜࢽَّا بَوُورُو دِیُورُو أَوُو دُࢽِیَࢽْ بَتِّ یٜ، وَادَ یٜ، بَوُو یٜدَ کْرٜجْࢽَ،
[29] بَرٜ أَدَمْغْࢽَ ࢻِمَ ࢻُوُ اللَّهیٜࢽْ أَوُلُو جُوُࢽِّرُو؞
[30] تِیٜمَࢽْ ࢽَیِدْ عِیسَى أَلْمَسِیوُیٜرُو وَلْیٜوْ، تِ دُوُوࢽْ اللَّهیٜࢽْ ࢽَࢽْرَشِدُࢽْدٜرُو وَلْجْࢽَدْ، ࢽَࢽْجِرٜیَ ࢽَࢽْتَیِرَّ مٜرُدُوَࢽْ کُࢽْدٜࢽُّو؞
[31] ࢽغَیْࢽِࢽْ کِتَوُلَࢽْ رُوُوَدَدْ غَیْ: «کَمْ أَوُلُو جُوُیْمَدْ کْمَࢽْدٜࢽْ أَوُلُو جُوُو!»