[1] وُࢽْدُ یَیٜ ࢻُوُوُ کْرْمَیْ ثَࢽُودِدْرُو دَوْ کُولْجُوُو، کْࢽْدُوُو دُوُوࢽْ اللَّهیٜࢽْ إِسِوَوُودْ ࢻَلْمَ بَوُو، کُورُو تَیِ دَسَاࢽَدَ اللَّه غَلَجُو؞
[2] أَدْ ࢽَࢽْغَرُو کَمْ ࢻُوُمَا غَ وَجِمَدْ أَوُو اللَّه غَلَجْࢽَدَ غَ وَجْࢽَ، کُورُو تَیِ وَجَࢽَمَدْ وُواْمْ کْلَࢽْجَرُو غْرْجَغَیْ؞
[3] أَوُووَ ࢻُوُوُدْ أَمْ ࢽغْلَ ثَدِسُورُو غْࢽِ، أَمْ دِوِ ثَدِسُورُو أَوُو رِدُیٜ وُو؞ ࢻُوُمَدَ رِدُ رَامِّ؟ تُو، أَوُو ࢽغْلَ دٜ، أَرْدِیَ ࢽَࢽْجُࢽْ ࢻَࢽْدْمِ؞
[4] تِدْ کِدَمَ اللَّهیٜ ࢽَࢽْلٜوَࢽْمْ ࢽَࢽْغَرُو؞ أَمَّ دِوِ دِمِرُو وَلْیٜࢽُووَ، تِیَ رِࢽٜ، بُووُرُو غْࢽِ کَشَغَرْࢽْجُوَدْ؞ آه، تِدْ اللَّهیٜ کِدَمَࢽْجُ، تِمَ رْمْبُومَ دُوُوࢽْ غْرْغَدُ اللَّهیٜ کَمْ دِوِ ثْدْࢽَرُو غْرْجِیمَدْ وُو؞
[5] تُو، دُولٜرُو ࢻُوُوُدْرُو دَوْ کُولْغْوِ، غْرْغَدُ اللَّهیٜ رِدَ رُࢽْجُرُو غْࢽِ، سَرِوُ کَرْوُࢽْدُویٜ ࢽَࢽْغَرُو؞
[6] کْلَ أَدْیٜمَࢽْ أَکِّ بِیَࢽُوِدْ، أَوُووَ ࢻُوُوُدْ کِدَوُ اللَّهیٜ أَوُو مُکُّوࢽْجَرُو ثَکّْࢽَا کِسَّغَیْ؞
[7] وُࢽْدُ یَیٜرُو أَوُو وَجِࢻْࢽْجُدَ یُواْ؞ أَکِّیَ، أَکِّ بِیَࢽُواْ؞ جُلَا، جُلَ بِیَࢽُواْ؞ مَرْتَوَا، مَرْتَوَ یُواْ؞ دَرَجَا، دَرَجَ یُواْ؞
[8] وُࢽْدُ یَیٜ کَمَࢽْجُوَ رَوُو غْࢽِیَ، بَرٜ وُࢽْدُمَ تِیَ أَوُو لَارُو جْغَࢽِّ، کَمْ کَمَࢽْجُوَ ثْرَاࢽَدْ أَوُو وَدَیٜ سَمَّا ثْدْࢽَ ࢽَࢽْغَرُو؞
[9] وَدَوَ أَࢽِ: «بَرٜ کْࢽْجْࢽَ دِمِّ، بَرٜ رُو کَمْبٜ تُلُوُمِّ، بَرٜ ࢽَمْبَرْوُ دِمِّ، بَرٜ مَࢽْغَرْ دِمِّ،» کُورُو وَدَ غَدٜ سَمَّ ثُرُو مَࢽَ أَدْیٜمَࢽْ تُوَࢽْدْࢽَ: «کْمَسْکِࢽْمْبَ کْلَࢽْمْ غَیْرُو رَیٜ!»
[10] کْرَوُودْ دِوِ کَمَࢽْجُرُو ثْدِّوَوُو؞ کْرَوُودْ تِمَ أَوُو وَدَیٜ سَمَّا دِیُودْ وُو؞
[11] جَمَࢽْ ࢻِلَࢽْ کْرْغَیْیٜرُو ࢽُوࢽُوَّ؞ سَ کْࢽْمْلَࢽْ ثِدُیٜ ثْدْࢽَ، ࢽجْکَّوُودْ کْرْمَ سَ کَسَتُّ بَدِࢽِیٜࢽَدْ یَیٜرُو غْرٜࢽْدٜ دٜلْ کَرْࢽْجْࢽَ ࢽَࢽْغَرُو؞
[12] بُࢽٜ یٜ کُودُ ثْدِ، دُࢽِیَ وَدُ یٜ کَرْࢽْجْࢽَ؞ کِدَ دُوُیٜ وَࢽِیُو، بَرِمِ ࢽُرّٜ ࢽغُوࢽِیُو؞
[13] کْࢽْدْغَیْ جُسّْࢽَ کَوْسُ غَیْرُو دِیُو، کْلَرِوُوࢽَمْبُوَ سَغَرَࢽْدُوَلَࢽْ غْࢽِ، کْࢽْجْࢽَا ࢽَࢽْجَࢽٜیَلَࢽْ غْࢽِ، کُورُو لَوَلَا ࢽَࢽْدْرِیَلَࢽْ غْࢽِ؞
[14] أَمَّ حَلْ کْمَࢽْدٜ عِیسَى أَلْمَسِیوُیٜیَ ࢽغُوࢽُواْ، بَرٜ مَࢽْغَرْ تِییٜ غَلْدُ دَبَّرْࢽُوِّ؞