[1] کْرَمِیَ، ࢽَیِ أَتَّوْرَ ࢽُوࢽُوَّسُورُو وُلْࢽْجَغَکِّ، کَمْ رُوࢽْجُوَلَࢽْ، کْࢽْدُوُو وَدَیٜدْ کْلَࢽْجُࢽْ مٜࢽَّرُو ࢽُوࢽُوِّ وَ؟
[2] مِسَلُّو کَمُ کوَادْ تِرُو وَدَلَࢽْ کْلَّادَ کوَدْ رُوࢽْجُوَمَا؞ أَمَّ کوَدْ کَࢽُووَ، وَدَدْ کْلَࢽْجُࢽْ بَوُو؞
[3] أَدْ ࢽَࢽْغَرُو کوَدْ رُوࢽْجُوَ دُوُوࢽْ کوَ غَدٜ کِدُووَ، تِیَ کْࢽْجْࢽَمَرُو ࢽغُوجَیْ؞ أَمَّ کوَࢽْجُ کَࢽُووَ، وَدَ أَدْ کْلَࢽْجُࢽْ بَوُو، کوَ غَدٜ کِدُو یَیٜ، تِ کْࢽْجْࢽَمَ غْࢽِ؞
[4] کْرَمِیَࢽِ، جِرِ أَدْغَیْࢽِࢽْ ࢽَیِ یٜ تِیے أَلْمَسِیوُیٜࢽْ وَدَرُو ࢽُوَّ، ࢽغَیْࢽِࢽْ کَمْ غَدٜىٰرُو وَلُّوِ، تِ کَرْمُولَࢽْ ثِجْࢽَدْیٜرُو، کُورُو ࢽٜمَ اللَّهرُو یَکِّیٜ؞
[5] سَ حَلْ تِییٜلَࢽْ دْغَیْیٜࢽَدْࢽْ، جَرَوَࢽْدٜ بِوُیٜ وَدَ ثْسَࢽْغْࢽَدْ تِیࢽْدٜیَ ثَکّٜ ࢽٜمَ کَرْمُویٜ کٜکِّیٜ؞
[6] أَمَّ أَوُو ثَلَࢽْ رُوسَࢽَدَ ࢻِرْدِیٜ ࢽُیْیٜࢽَ ࢽَࢽْغَرُو، کْرْمَ وَدَدْ کْلَࢽْدٜࢽْ بَوُو، ࢽغَیْࢽِࢽْ جَوَلْ ثَیٜ وَدَ رُوُوَدَیٜࢽْ غْࢽِ، جَوَلْ بْرِࢽْ رُحُیٜࢽْ وُولُودِیَ اللَّهیٜرُو وَلِّیٜ؞
[7] تُو، أَوِ غْلٜ وُلِّیٜ؟ وَدَ أَتَّوْرَیٜدْ بِوُ وَ؟ أَعَ، تْمَّرُو ࢽغَیْ غْࢽِ! وَدَیٜࢽْ غْࢽِیَ، بِوُ ࢽُوکِّوَوُو؞ مِسَلُّو ثَ وَدَیٜ: «بَرٜ مَࢽْغَرْ دِمِّ،» ثْࢽِّیَ، مَࢽْغَرْدَ أَسُکّْࢽِ؞
[8] أَمَّ بِوُدْ وَدَیٜࢽْ دَمَ کِوَࢽْدْࢽِّیَ، مَࢽْغَرْ جِرِ جِرِ کَرْوُࢽِرُو کٜکُّو، وَدَ بَوُوࢽِࢽْ بِوُ ࢽُࢽَ ࢽَࢽْغَرُو؞
[9] ثَلَࢽْ سَ وَدَ بَوُولَࢽْ رُوࢽِیَ کْرْغَکُّو، أَمَّ وَدَدْ کَدِࢽِّیَ، بِوُدْ رُووَرُو وَلْجٜ وُدْ کَࢽُکُّو؞
[10] وَدَ رُو کُدُومَدْ وُرُو کَرْمُو سُکُّدُو؞
[11] بِوُدْ وَدَیٜࢽْ دَمَ ثُوَࢽْدٜ وُوَ جَمْبَسٜ وَدَدْیٜࢽْ رُورُو سٜسُو؞
[12] أَدْغَیْمَ أَتَّوْرَدْ تَیِرْ، کُورُو وَدَࢽْجُدْ تَیِرْ یٜ، جِرٜ یٜ، ࢽغْلَ یٜ؞
[13] تُو، أَوُو ࢽغْلَ أَدْ وُرُو کَرْمُو وَ سُکُّدُو؟ أَعَ، تْمَّرُو ࢽغَیْ غْࢽِ! بِوُدْمَ بِوُرُو ࢻْلٜدُورُو أَوُو ࢽغْلَدْیٜࢽْ کِدَࢽْجُ کَرْمُویٜ وُلَࢽْ ثْدُو، وَدَدْیٜࢽْ بِوُدْ ࢽَ کُوجْࢽَرُو بِوُرُو وَلْجُورُو؞
[14] وَدَدْ أَوُو رُحُیٜرُو ࢽُوࢽِیٜࢽَ، أَمَّ وُدْ أَوُو تِییٜ، کَرٜیَ ࢻْرْدُ بِوُیٜ غَیْ سَلَدْࢽَ؞
[15] کْࢽْدُوࢽِدْمَا أَسُࢽْکِّوَوُو؞ أَوُووَ أَوُو رَاکّْࢽَدَ غْࢽِ، أَوُو وَکّْࢽَدْمَا دِکِّ؞
[16] أَوُو وَکّْࢽَدَ دِکِّیَ، وَدَدْ أَوُو ࢽغْلَرُو أَرْدِࢽْکّْࢽَ؞
[17] ࢽغَیْمَ کْرْمَ وُ غْࢽِ، بِوُ وُلَࢽْ دْغَࢽَمَدْ أَوُو أَࢽِیَ ثْدِ؞
[18] وُلَࢽْ، وُوتّٜ ࢽَࢻْتُࢽِ أَدَمْغْࢽَیٜلَࢽْ، أَوُو ࢽغْلَ ࢻِمَ دْغَࢽِّرُو ࢽُوکّْࢽَ؞ أَکُّو ࢽِیَ أَوُو ࢽغْلَ دِیُویٜ ࢽَࢽِࢽْ مبٜجِ، أَمَّ دُࢽُو تِیَ دِیُویٜ بَوُو؞
[19] ࢽغْلَ رَاکّْࢽَدَ دِکِّوَوُو، أَمَّ دِوِ وَکّْࢽَدْ تِمَ أَوُو دِکِّدْ وُو؞
[20] أَوُو وَکّْࢽَدَ دِکِّیَ، کْرْمَ وُ غْࢽِ دِکِّ، أَمَّ بِوُ وُلَࢽْ دْغَࢽَمَدْ ثْدِ؞
[21] أَدْ ࢽَࢽْغَرُو وَدَ أَدَ وُلَࢽْ ࢻَࢽْدْکِّ: أَوُو ࢽغْلَ دِیُو رَاکّْࢽَ دُوُوࢽْ، دِوِ یٜ ࢽَࢽِࢽْ مبٜجِ؞
[22] کَرْوُࢽِࢽْ وَدَ اللَّهیٜ تَیْ دَکّٜ رَاکّْࢽَ،
[23] أَمَّ وَدَ لَا غَدٜ تِیࢽِࢽْ رُکِّ؞ وَدَ أَدْ وَدَ حَࢽْغَلْࢽِیٜرُو کْرِوُ ثْکَّدٜ وُوَ کُوسُومَ وَدَ بِوُیٜ تِیࢽِࢽْ دْغَࢽَدْیٜ سْدِّ؞
[24] کُتُّࢽِ، أَوُو ࢽجُࢽُودُیٜ وُ! وُࢽْدُ غْلٜ وُوَ تِیے کَرْمُویٜ أَدْلَࢽْ سْمُویِ وُو؟
[25] کْمَࢽْدٜ عِیسَى أَلْمَسِیوُیٜࢽْ اللَّهَ وُسٜࢽِیُو! أَیْ، حَࢽْغَلْࢽِࢽْ وَدَ اللَّهیٜ غَکِّ، أَمَّ ࢽَࢻْتُࢽِ أَدَمْغْࢽَیٜلَࢽْ وَدَ بِوُیٜ غَکِّ؞