[1] دَجِ عِیسَى مِسَلْࢽِࢽْ وُرَوَ أَدِࢽْوُیٜسُورُو مَࢽَدُوُ بَدِیٜࢽُو؞ تَیِرُو: «کَمْ لَا جْرْوُ إِࢽَبّٜ ثْدٜ غَرْجٜ ثُرُودْࢽْ بْلَا إِࢽْغِ إِࢽَبّٜ تُلُوُویٜ لَجٜ سُورُو کُرُوُ جُوُورُویٜ کِدَࢽْدُو؞ دَجِ جْرْوُدَ جْرْوُوُ لَارُو أَغْرِجِیٜ بْلَوُرُورُو سَࢻْکَدَ؞
[2] سَ ࢻْرْدُویٜ کِدْࢽِّیَ، ࢽُوَࢽْجُ ثُوَࢽْدُورُو کَرٜیَࢽْجُ لَآ ࢽَ جْرْوُوُدْیٜرُو کِࢽُودُو؞
[3] أَمَّ جْرْوُوُدْ تِیَ ثَدَࢽٜ بَکْثَࢽٜ مُکُّو دٜیَ دُیٜرَ؞
[4] کُورُو وَلْدٜ کَرٜیَ غَدٜ کِࢽُودُو؞ تِ یٜیَ ثَدَࢽٜ کْلَࢽْجُ بَکْثَࢽٜ تِیَ بَسَرْیٜرَ؞
[5] کُورُو وَلْدٜ کَرٜیَ غَدٜ کِࢽُودْࢽِّیَ، تِیَ رُورُو کٜىٰسُو؞ کُورُو کَرٜیَوَ غَدٜ کَدَ کِࢽُودُو؞ لَاࢽجَا بَکّٜرَ، لَاࢽجَا کٜىٰسُو؞
[6] کَمْࢽْجُ ࢻَلْمَ تِرُو غَࢻْثُوُو، تَدَࢽْجُ جَوْرُو ثْرَاࢽَدْ؞ دَرْیٜ تِیٜ: ‹تَدَࢽِرُو دَرَجَ ثَدِ،› ثْࢽٜ تِیَ ࢽَࢽْجَرُو کِࢽُودُو؞
[7] أَمَّ جْرْوُوُدْ کَتّٜࢽْجَࢽْ: ‹أَدْمَ وَرَسَمَدْ وُو! أَرُواْ تِیَ یٜجِیُو، وَرَسَدْ کَاࢽدٜرُو وَلْجِ!› یٜرَ؞
[8] دَجِ تِیَ ثَدَࢽٜ رُورُو ثٜىٰسٜ ࢽغَوُو جْرْوُدْیٜࢽْ غْࢻْکٜرَ؞
[9] تُو، کْمَ جْرْوُیٜدْ أَوِ ثْدِ؟ إِسٜ جْرْوُوُ أَࢽِیَ رُورُو ثٜجٜ أَمْ غَدٜرُو جْرْوُࢽْجُدَ ثِ؞
[10] أَوُو کِتَوُلَࢽْ رُوُوَدَ أَدَ کْرَࢽُوِّ وَ؟ «‹کَوْ دُوُوࢽْ ࢻَدُو تَࢽْدُومَسُو وَجَࢽَمَدْ، تِمَ کَوْ تَࢽْدُویٜ سَمَّرُو ࢻَیْدَارُو وَلْجْࢽَدْ وُو؞
[11] أَدْ کْࢽْدُو کْمَࢽْدٜىٰ، أَࢽْدِرُو جَوْرُو أَجَبَّ!›»
[12] جَوَلْ تِیَ تَیٜ مَجَیْ دُوُوࢽْ، جَمَدَ رِیٜرَ، دَلِلْࢽْجُدْ کْلَࢽْجَمَࢽْ مِسَلْدَ کِدُورُو أَسُجَࢽَ ࢽَࢽْغَرُو؞ دَجِ تِیَ کُولْجَࢽٜ سَࢻْکَدَرَ؞
[13] دَجِ وُرَوَ أَدِࢽْوُیٜسُودْ عِیسَرُو ثُرُو مَࢽَࢽْجُیٜࢽْ بْلَا لَجَا ثَࢽٜ ࢻَرِسَوَ لَآ أَمْ مَیْ حِرُدُسَّ جَاࢽَ لَآ ࢽَࢽْجُرُو کٜࢽُودُو؞
[14] کَدِرَࢽِّیَ، تِرُو: «سَیِࢽَّ، ࢽِ کَمْ جِرٜمَ یٜ، وُࢽْدُمَا رِࢽْمْبَوُو یٜرُو ࢽُوࢽِیٜࢽَ، دَلِلْࢽْجُدْ غَیِرْࢽْمْبَوُو، جَوَلْ اللَّهیٜ کَلْکَلُّو یِکّْرَمِ ࢽَࢽْغَرُو؞ تُو، کَیْسَرُّو أَکِّ ࢽجُودْ حَلَلْ رَ حَرَمْ؟ یِیٜ رَ بَرٜ یِیٜࢽْدٜ؟» ثَࢽٜ تِیَ کٜوُورُو؞
[15] أَمَّ عِیسَى ࢽَࢽْمْࢽَࢻْکْࢽْجَدَ أَسُجٜ تَیِرُو: «أَوِرُو وُوَ رِجَمْسُوِ؟ وُرُو دِࢽَرِیُسْ سُکُّدُواْ رُکّٜ!» ثْࢽٜ
[16] دِࢽَرِیُسْ تِرُو کٜکُّدُو؞ تَیِرُو: «ثُوَ کْلَا وُࢽْدُیٜ تِلَࢽْ دَسَا؟» ثْࢽٜ تَیِیَ کِوُورْࢽِّیَ، تِرُو: «کَیْسَرّٜ،» یٜرَ؞
[17] دَجِ عِیسَیٜ تَیِرُو: «أَوُو کَیْسَرّٜدَ کَیْسَرُّو یُواْ، کُورُو أَوُو اللَّهیٜدَ اللَّهرُو یُواْ!» یٜࢽُو؞ أَدْغَیْمَ تِیَ جَوْرُو أَجَࢻْکٜرَ؞
[18] سَدُسِیَ لَا، تَیِ ثِࢽُواْ دُࢽِیَیٜ بَوُو وُلْجَیْدْ، ࢽَ عِیسَیٜرُو إِسَࢽٜ تِرُو کُورُو ثَدّٜ:
[19] «سَیِࢽَّ، ࢽَوِ مُوسَیٜ: ‹کَمْ لَا یَࢽْجُغْࢽَ تَدَ بَوُووَ بَوُوجٜ کَمُ کُولْجِیَ، کَمُ یَࢽْجُغْࢽَ ࢻَثّْغْࢽَیٜدَ ࢽِیَجُو یَࢽْجُغْࢽَرُو کَدُوُ مَجُوُو!› رُوُجْࢽَ؞
[20] أَکُّو یَاࢽَ تُلُرْ مبٜجِ؞ بُرْوُویٜدْ کَمُ ࢽغُوجٜ تَدَ ثُوَࢽْدْࢽِّࢽْ بَوُویٜࢽُو؞
[21] یِࢽْدِیٜدْ یٜ کَمُدَ ࢽِیَجٜ تَدَ ثُوَࢽْدْࢽِّࢽْ بَوُویٜࢽُو؞ یَکُّیٜدْ یٜ ࢽغَیْ؞
[22] أَدْغَیْمَ تَیِ تُلُرْ سَمَّ تَدَ ثَوَࢽْدْࢽِّࢽْ بَوُویٜرَ؞ دَرْیٜ کَمُدْ یٜ بَوُویٜࢽُو؞
[23] تُو، تَیِ تُلُرْسُو تِیَ ثَمُواْࢽَدْ، ثِࢽُواْ دُࢽِیَیٜࢽْ کَمُ وُࢽْدُࢽْجَیٜرُو وَلْجِ؟» ثَࢽٜ تِیَ کٜوُورُو؞
[24] عِیسَیٜ تَیِرُو: «دَلِلْ ࢽَیِ ࢻَتّْغْوَّیٜدْ، کِتَوُ بِ کْࢽْدُوُو اللَّهیٜ ࢽُوࢽُوِّ، مَرٜ؟
[25] کَرْمُولَࢽْ ثِجَیْیَ، لَرُسَ سُو، ࢽِیَ سُو ثَدِوَوُو، تَیِ أَلَمَ مَلَیْیَوَ سَمٜلَࢽْ دَسَاࢽَدْ غَیْرُو وَلْجَیْ؞
[26] کُورُو کَرْمُولَࢽْ ثِدُدْ، أَتَّوْرَ ࢽَوِ مُوسَیٜࢽْ کْرَࢽُوِّ وَ؟ کِتَوُلَࢽْ ࢽَ کَࢽُّ دَوُ ثُوثُّورِ ثَمْبِیٜدْࢽْ اللَّهیٜ مُوسَرُو: ‹وُمَ اللَّه إِبْرَاهِیمْبٜیَ إِسْحَٰࢼُیٜیَ یَعْࢼُوبَیٜیَ وُو،› ثْࢽَّ؞
[27] تِ اللَّه أَمْ سَࢽُࢽَیٜ غْࢽِ، أَمْ رُووَیٜ، دِیٜ! ࢽَیِدْ تَیْ دَࢽُوٜ ࢻَتّْغْوَّ!» یٜࢽُو؞
[28] مَلْمْبَ أَتَّوْرَیٜ ࢻَلْࢽْجَ إِسْࢽَ کَمْبِوُࢽْجَدَ کْرْࢽْجِ دُوُوࢽْ، عِیسَى تَیِرُو جَاوُ ࢽغْلَ ثِࢽَرُو أَسُیٜࢽِّیَ، تِرُو: «وَدَوَ سَمَّࢽْ ࢻِࢽْجَ کُرَ وُو؟» ثْࢽٜ تِیَ کِوُورُو؞
[29] عِیسَیٜ تِرُو: «سَمَّرُو کُرَ وُودْ تِمَ: ‹جَمَ إِسْرَاءِیلَیٜ، ࢻَࢽُّواْ، اللَّه کْمَࢽْدٜدْ تِ تِلُوࢽْجُ لُوکْ؞
[30] اللَّه کْمَࢽْمْبَ کَرْوُࢽْمْ ࢽغَࢽْ، رُوࢽْمْ ࢽغَࢽْ، حَࢽْغَلْࢽْمْ ࢽغَࢽْ، دُࢽُوࢽْمْ ࢽغَࢽْ رَیٜ!›
[31] کُورُو یِࢽْدِیٜدْ: ‹کْمَسْکِࢽْمْ یٜیَ کْلَࢽْمْ غَیْرُو رَیٜ!› وَدَوَ أَࢽِرُو کُرَ وُو غَدٜ بَوُو!» یٜࢽُو؞
[32] مَلْمْ أَتَّوْرَیٜدْیٜ تِرُو: «سَیِࢽَّ، جِرٜࢽْمْ! أَوُو وُلّْمَّدْ ࢻَغَتْ: اللَّهدْ تِ تِلُوࢽْجُ؞ تِ غْࢽِیَ، اللَّه غَدٜ بَوُو؞
[33] تِیَ کَرْوُࢽْمْ ࢽغَࢽْ، حَࢽْغَلْࢽْمْ ࢽغَࢽْ، دُࢽُوࢽْمْ ࢽغَࢽْ رَامٜ کْمَسْکِࢽْمْ یٜیَ کْلَࢽْمْ غَیْرُو رَوُودْ، لَیَسُووَ سَدَاسُووَ سَمَّرُو کُرَ وُو!» یٜࢽُو؞
[34] عِیسَى مَلْمْدْ حَࢽْغَلْ کْجِیَرُو جُوَࢻْثْغْࢽَ کِرُࢽِّیَ، تِرُو: «ࢽِیَ ࢽُودُو بَرْغَا اللَّهیٜیَ کَتّٜࢽْدُو کُرُوُ غْࢽِ!» یٜࢽُو؞ ࢽغَوُو أَدْیٜࢽْ وُࢽْدُمَ ثِࢽْجُ مُدُ کَجٜ تِرُو کُورُو غَدٜ ثْدّْࢽِّ؞
[35] ࢻَدُو اللَّهیٜࢽْ عِیسَى جَمَدَ أَلَمْدُ ثْدِ دُوُوࢽْ، تَیِرُو: «ࢽدَیِلَࢽْ مَلْمْبَ أَتَّوْرَیٜدْیٜ أَلْمَسِیوُدْ تَدَ مَیْ دَاوُدَیٜ ثَࢽِدْ؟
[36] مَیْ دَاوُدَ کْلَࢽْجُمَ رُحُ اللَّهیٜࢽْ مَࢽَجٜ: ‹کْمَࢽْدٜىٰ کْمَࢽِرُو: ࢽَمّٜ کْمْبُورَمِّلَࢽْ دُوُوࢽْ، کْلَدُووَࢽْمْبَ ثِدِیَ سِࢽْمْبٜرُو یَکّْکُّو! ثْࢽَّ؞›
[37] مَیْ دَاوُدَ کْلَࢽْجُمَ تِیَ کْمَلَࢽْ بُواْجْࢽَدْ، ࢽدَیِلَࢽْ غْلٜ أَلْمَسِیوُدْ تَدَࢽْجُرُو وَلْجِ؟» یٜࢽُو؞ جَمَ کَدَدْ کَرْوُ کْجِیَرُو تِیَ کْرْࢽْجَیْ؞
[38] ثُرُو أَلَمْدُࢽْجُیٜࢽْ عِیسَیٜ: «مَلْمْبَ أَتَّوْرَیٜرُو حَࢽْغَلْ غْࢽَࢽُواْ! کَلْوُ کُرُوُوَ دَدَدُ ثَرَاࢽَ، کُورُو کَسُوُلَࢽْ لٜوَ دَرَجَآ
[39] دَࢽْدَلَّࢽْ بِ مَسْࢽَ کُرَلَࢽْ ࢽَ دَرَجَآ جَوْمَرُو ثَرَاࢽَ؞
[40] کَمُ کوَ ࢻَثّْغْࢽَاسُویٜ کْࢽْدَࢽْجَ سَمَّا جَوُیْ یٜ، حَلْࢽْجَ غْرَدُرُو ࢻُوُ جَمَیٜࢽْ مُودُوَ کُرُوُرُو غْرْجَیْ یٜ؞ أَمْ أَࢽِیٜ أَجَوُࢽْجَ لٜیْرَࢽْ جَوْرُو کُرَ!» یٜࢽُو؞
[41] عِیسَى کَرْࢽْ سَࢽْدُوُ سَدَا ࢻِدَرَمْبٜࢽْ ࢽَࢻْکٜࢽِّیَ، جَمَدْ ثُرُو سَࢽْدُوُدْیٜرُو وُرِ ࢻِجَغَیْ لَوَرْجِ دُوُوࢽْ، أَرْسِیوُ کَدَ إِسَࢽٜ وُرِ ࢽغْوُ ࢻِجَغَیْ کِرُو؞
[42] کُورُو کَمُ ࢽغُدِ کوَ ࢻَثّْغْࢽَا لَا یٜ إِسٜ غُرْسُ کِمٜ یِࢽْدِ ࢻِیٜىٰࢽُو؞
[43] دَجِ عِیسَى ࢻُوُرَوَࢽْجُوَ بُواْجٜ: «جِرٜمَرُو ࢽَیِرُو وُلْࢽْجَغَکِّ، کَمُ ࢽغُدِ کوَ ࢻَثّْغْࢽَا أَدْ سَدَا أَمْ غَدٜىٰ سَمَّا کُوجْࢽَرُو ࢻِجْغْࢽَ؞
[44] تَیِ سَمَّ أَرْسِیࢽْجَلَࢽْ ࢽغُوجَࢽٜ ࢻِیٜىٰرَ، أَمَّ تِ ࢽغُدِ دُوُوࢽْ کْࢽْدَࢽْجُ سَمَّا ࢻِیٜىٰࢽُو؞ أَوُو رُوࢽْجُ رِوُویٜ ࢽغَا ࢻِیٜىٰࢽُو،» یٜࢽُو؞