[1] کُورُو عِیسَى وَلْدٜ ثِ بْرْمْبٜࢽْ جَمَا أَلَمْدُ بَدِیٜࢽُو؞ أَمْ کَدَ کَدَمِ ࢽَࢽْجُࢽْ ثَࢻْتَࢽٜ، حَرْ مَارَرُو ࢽغَیٜ ࢽَࢻْکٜࢽُو؞ أَمْدْ سَمَّ یٜ ثِدِلَࢽْ ثِ بْرْمْدْیٜࢽْ دَجَࢽَ ࢽغَیْ دُوُوࢽْ،
[2] أَوُو کَدَࢽْ مِسَلْࢽِࢽْ جَمَا أَلَمْغٜࢽُو؞ ثُرُو أَلَمْدُࢽْجُیٜࢽْ تَیِرُو:
[3] «ࢻَࢽُّواْ، کَمْ لَا کُلُورُو أَلْغَمَ جْجْرْدُرُو کِلُوُو؞
[4] جْجْرْجِ ࢽغَیْ دُوُوࢽْ، کَسُࢽِ لَا جَوَلْࢽِࢽْ ࢻِیَدَ؞ دَجِ ࢽغُدُووَ إِسَࢽٜ ثُوتُّو غٜوُو؞
[5] کَسُࢽِ لَا یٜ ࢽَ کَوْ کَوْوَ کَتِّ ࢽغْوُ بَوُووَلَࢽْ ࢻِیَدَ؞ کَتِّ ࢽغْوُ بَوُودْرُو، سَدْمَࢽْ رِیٜࢽُو؞
[6] أَمَّ کْࢽْغَلْ سَمٜرُو تَتْکٜࢽِّیَ، کَوْسُ جَوْجٜ ࢻْرْدُ بَوُو ࢽَࢽْغَرُو رِمْجٜ ࢽغَمْغٜࢽُو؞
[7] کَسُࢽِ لَا یٜ ࢽَ ࢽغِوِیَࢽْ ࢻِیَدَ؞ ࢽغِوِدْ رِجٜ أَلْغَمَدَ کِمِثِّیٜ، کْلَ ثَکّْࢽِّ؞
[8] أَمَّ کَسُࢽِ لَادْ یٜ ࢽَ کَتِّ ࢽغْلَاࢽْ ࢻِیَدَࢽِّیَ، رِجٜ کْلَ ࢻِثّٜ ࢽٜمَ تَیْ دَجٜ کٜکُّو، لَا تَدَ ࢻِیَکُّ ࢻِیَکُّ، لَا ࢻِرَکُّ ࢻِرَکُّ، لَا مِیَ مِیَ،» یٜࢽُو؞
[9] دَجِ عِیسَیٜ تَیِرُو: «کَمْ سْمُوࢽْجُوَمَدْ ࢻَࢽْجُو!» یٜࢽُو؞
[10] ࢽَ عِیسَیٜࢽْ وُࢽْدُمَ غَدٜ بَوُورُو وَلْیٜࢽِّیَ، تَیِ مٜوُࢽْ یِࢽْدِࢽْدَ أَمْࢽْجُ غَدٜ تِیَ دِرِجَࢽٜ کْلْجَࢽَدَ کْلَ مِسَلَّدْیٜࢽْ تِیَ کٜوُورُو؞
[11] عِیسَیٜ: «ࢽَیِرُو أَسْرْ ࢽُودُو بَرْغَا اللَّهیٜ ࢽُودُرُو أَمَرْدْغْࢽَ، أَمَّ تَیِ دَوُࢽْدُوࢽْ بَوُومَسُودْرُو أَوِسُو مِسَلْࢽِࢽْ وُلْدِیے؞
[12] ࢽغَیْمَ: ‹ثَرُیْمَ، أَسُجَیْوَوُو؞ ࢻَࢽْجَیْمَ، ثَرِوَوُو؞ أَدْ غْࢽِیَ، اللَّهرُو وَلْدَࢽٜ بِوُࢽْجَ غَوُرْدْࢽَ!›» یٜࢽُو؞
[13] کُورُو عِیسَى وَلْدٜ تَیِرُو: «مِسَلْ أَدَ أَسُࢽُوِّ وَ؟ أَوِیَوِࢽْ غْلٜ مِسَلَّ غَدٜ أَسُࢽُوِ؟
[14] کَسُࢽِ جْجْرْدُمَدْ مَࢽَ اللَّهیٜ جْجْرْجُو؞
[15] کَسُࢽِ کْلَ جَوَلّٜࢽْ ࢻِدْࢽَسُودْ، تَیِمَ أَمْ مَࢽَدَ ࢻَࢽْجَࢽَ دُوُوࢽْ، سَدْمَࢽْ إِوُلِیسْ إِسٜ مَࢽَ تَیِلَࢽْ ࢻِدْࢽَدَ ثُتُّلُوِدْ وُو؞
[16] تَیِ ࢽَ کَوْوَࢽْ ࢻِدَࢽَسُودْ یٜ، تَیِمَ أَمْ مَࢽَدَ ࢻَࢽْجَیْیَمَ، کَرْوُ کْجِیَرُو ثَمُویِدْ وُو؞
[17] أَمَّ تَیِلَࢽْ ࢻْرْدُ بَوُو ࢽَࢽْغَرُو، تُسَّیْوَوُو؞ کْلَ مَࢽَدْیٜࢽْ کُتُّ ثَسَیْیَ، بِ أَمْ تَیِیَ بَسَرْجَیْیَمَ، وَجَࢽٜ کُولْجَیْ؞
[18] أَمْ لَاسُو یٜ کَسُࢽِ ࢽَ ࢽغِوِیَࢽْ ࢻِدْࢽَسُودْ، تَیِمَ أَمْ مَࢽَدَ ࢻَࢽْجَࢽَ دُوُوࢽْ،
[19] کَرْوُࢽْغَیْ دِیُو سُو، أَرْسِیے مَࢽْغَرْدُ سُو، أَوُو غَدٜ لُوَࢻْتُ سُو کَرْوُࢽْجَرُو ࢽغَسَیٜ مَࢽَدَ کْࢻْثَࢽٜ تَیِرُو ࢻَیْدَجِیوَوُودْ وُو؞
[20] أَمَّ تَیِ ࢽَ کَتِّ ࢽغْلَاࢽْ ࢻِدَࢽَسُودْ، تَیِمَ أَمْ مَࢽَدَ ࢻَࢽْجَࢽٜ ࢽغُوجَࢽٜ کَرْوُࢽْجَࢽْ رُوجَࢽَ تَیِرُو ࢻَیْدَجِیے، ࢽٜمَ لَا تَدَࢽْجُ ࢻِیَکُّ، لَا ࢻِرَکُّ، لَا مِیَ مِیَ ثَسَکِّدْ وُو؞»
[21] کُورُو عِیسَى وَلْدٜ: «ࢻَتْلَدَ کْمُوࢽْ تْمْدَرُو رَ ثِدِیَ دْغْلّٜࢽْ غْࢽَدُرُو ثَوُدِ وَ؟ أَعَ، تِیَ کْلَ غْࢽَدُرَمْࢽْجُیٜࢽْ غْࢽَجَیْ؞
[22] أَوِمَ غْرَادَ ࢻٜدٜرُو ثُلُوِوَوُودْ بَوُو، کُورُو أَوِمَ أَسْرّٜ إِسَࢽُودِوَوُودْ یٜ بَوُو؞
[23] کَمْ سْمُوࢽْجُوَمَدْ ࢻَࢽْجُو!»
[24] کُورُو تَیِرُو: «أَوُو ࢻَࢽُّوِرُو حَࢽْغَلْ غْࢽَࢽُواْ! جِرِ أَمْبُو ࢽغَلْغْوَّدْ غَیْ، ࢽَیِ یٜرُو ࢽغَلْࢽْجَغَیْ، کُورُو أَدَ کُوجْࢽَ ࢽَیِرُو ࢽجَسَرْغَیْ؞
[25] کَمْ ࢽَࢽْجُࢽْ أَوُووَمَدْ، تِرُو ثَسَرْغَیْ، أَمَّ کَمْ ࢽَࢽْجُࢽْ بَوُومَدْ، أَوُو ثْدَࢽَدْمَا تِلَࢽْ ثَمُویِ؞»
[26] کُورُو عِیسَى وَلْدٜ: «ࢽُودُو بَرْغَا اللَّهیٜدْ أَلَمَࢽْجُ کَمْ لَا کَسُࢽِ ثِدِرُو ࢻِجِیے غَیْ؞ ࢻِجِییَ،
[27] بُࢽٜ یٜࢽْ کَلْ، کَوْسُ یٜࢽْ کَلْ، بُوࢽٜوَࢽٜ ثْدِ، کَسُࢽِدْ یٜ رِجٜ وُرَجِ، أَمَّ جِرِ ࢻِࢽْ تْدِ ࢽُوجْࢽِّ؞
[28] کَتِّدْمَ ثَکّٜ ࢽٜمَ ثُلُوِ؞ بُرْوُوࢽْ کَلْ ثْدِیَ، کْلَ ࢻِثِّ؞ کْلَ ثُتُّلُوِیَ، سِمْ ثْدِ؞
[29] بَࢻِیَمَ، تَیِدَ ࢽغُوجٜ ثْوْرْدِ، سَ کَلَیٜ إِسْࢽَ ࢽَࢽْغَرُو؞»
[30] کُورُو عِیسَى وَلْدٜ: «أَوِرُو ࢽُودُو بَرْغَا اللَّهیٜیَ رَتَّلْغْیْیٜ؟ مِسَلْ ࢻِࢽْ غْلٜ تِیَ ࢻِسَرْࢽِیٜ؟
[31] أَلَمَࢽْجُ کَسُࢽِ مُتَرّٜ غَیْ؞ کَسُࢽِ مُتَرّٜدْ، ثُرُو کَسُࢽِیَ أَمْ ثِدِلَࢽْ ࢻِجَیْ سَمَّیٜࢽْ تِمَ تْࢽْغْرِ وُو؞
[32] أَمَّ ࢻِجَیْیَ، رِجٜ کْسْکَوَ جْرْوُلَࢽْ سَمَّرُو کُرَ وُورُو وَلْجٜ، دْلَمْ کُرَ کُرَ ثْدٜ، حَرْ ࢽغُدُوسُو رَکْثَࢽٜ کَوْدِࢽْجُࢽْ ࢻَࢽّجَ ثَدَࢽْدِ،» یٜࢽُو؞
[33] کْلَ رَکْتُࢽْجَ ࢻَࢽْدُیٜࢽْ عِیسَى تَیِرُو مَࢽَ اللَّهیٜیَ مِسَلْ کَدَ جِرِ أَدْغَیْࢽِࢽْ وُلْیٜىٰࢽُو؞
[34] مِسَلْࢽِࢽْ غْࢽِیَ، أَوِمَ تَیِرُو وُلْجْغْࢽِّ؞ أَمَّ سَ ࢽَࢽْجُࢽْ جَمَ بَوُورُو وَلْجِیَ، ࢻُوُرَوَࢽْجُرُو أَوِسُو ࢻِسَرْجِیے؞
[35] یِمْ أَدَ دُࢽِیَ لْمْدُ ثْدِ دُوُوࢽْ، عِیسَیٜ ࢻُوُرَوَࢽْجُرُو: «لٜࢽِیُو بْرْمْدَ ࢻَلِّیُو ثِ إِࢽْغِیٜ تُودْرُو کُوࢽِیُو!» یٜࢽُو؞
[36] دَجِ جَمَدَ کُولْیٜرَࢽِّیَ، مَارَدْࢽْ عِیسَىٰ ࢽغُوجَࢽٜ لٜىٰرَ؞ مَارَ غَدٜ یٜ رُوکُّوࢽْجُࢽْ مبٜجِ؞
[37] دَجِ کَرُوَ دُࢽُووَ ثِجٜ إِࢽْغِ بْرْمْبٜ ثَمْبَلْجٜ مَارَدْرُو ࢻِدِیٜ، حَرْ مَارَدَ لْࢻْتُ مَیٜࢽُو؞
[38] سَدْࢽْ عِیسَى ࢽغَوُو مَارَدْیٜࢽْ کْلَࢽْجُ بِرْلَࢽْ کْࢽْمْ ثْدِ؞ ࢻُوُرَوَࢽْجُدْ تِیَ کْࢽْمْࢽِࢽْ کٜسَࢽْغْرَࢽِّیَ، تِرُو: «سَیِࢽَّ، ࢽُیْیٜ، ࢽِ لَمْبُوࢽْمْ بَوُو وَ؟» یٜرَ؞
[39] عِیسَى ثِجٜ کَرُوَدْرُو جْکَّدٜ إِࢽْغِ بْرْمْبٜدْرُو: «وَلْدْࢽٜ غْمْ بُوࢽٜ!» یٜࢽِّیَ، کَرُوَدْ دَجٜ دُࢽِیَ غْمْبُو وَلْیٜࢽُو؞
[40] دَجِ عِیسَیٜ تَیِرُو: «أَوِرُو یَایٜوْ؟ کُوَ یَیٜ کَمْبْرْسٜࢽْدُو بَوُو وَ؟» یٜࢽُو؞
[41] ࢻُوُرَوَࢽْجُدْ جَوْرُو رِجَࢽٜ أَمَࢽْجَرُو: «أَ! وُࢽْدُ غْلٜ کَمْ أَتّْ؟ کَرُوَا بْرْمْبَمَ مَࢽَࢽْجُ جَغَیْ!» یٜرَ؞