[1] دَجِ عِیسَى ࢽَدَ کُولْجٜ بْلَ وُرَجْࢽَدْرُو کَدِیُو؞ ࢻُوُرَوَࢽْجُ یٜ تِیَ غٜیَ؞
[2] یِمْ تُسْتُیٜیَ دَࢽْدَلَّࢽْ جَمَا أَلَمْدُ بَدِیٜࢽُو؞ أَمْ تِیَ کْرْࢽْجَࢽَ ࢽغْوُسُو أَجَࢻْثَࢽٜ: «ࢽدَرَࢽْ کَمْ أَتّْ أَوُو أَࢽِیَ کِوَࢽْدُو؟ ࢽَࢽْرَشِدُ تِرُو تِࢽَ أَتّْ أَوِ؟ کُورُو ࢽدَیِلَࢽْ أَوُو أَجَبَّ أَجَبَّ مُکُّوࢽْجُیٜࢽْ تْدِ؟
[3] تِ غْࢽَ کَتَکُو کَرُومَ، تَدَ مَرْیَمْبٜ، یٜیْیَ یَعْࢼُوبَیٜیَ جُوسِیٜیَ یَحُسَیٜیَ سِمَࢽّٜیَدْ وُو؟ کُورُو یَࢽْجُغْࢽَوَ ࢻٜرُووَدَ رُوکُّو کْرْغَیْیٜ، مَرٜ؟» ثَࢽٜ تِیَ کَسَتُّرُو وَیٜرَ؞
[4] عِیسَیٜ تَیِرُو: «ࢽَوِ ثُرُو بْلَࢽْجَیٜیَ دُرْࢽْجُیٜیَ أَمْ ࢻَࢽّجَیٜیَرُو کَجِیَ، دَرَجَࢽْجُوَ،» یٜࢽُو؞
[5] أَدْ ࢽَࢽْغَرُو ࢽَدْࢽْ أَوُو أَجَبَّ أَجَبَّ رَکْثٜ ثْدْࢽِّ، سَیْ أَمْ دُوࢽْدِ غَࢽَ لَارُو مُکُّوࢽْجُ غْࢽَجِیٜ تَیِیَ إِسَࢽْغَیٜىٰࢽُو؞
[6] أَدْغَیْمَ عِیسَى کْلَ کَمْبْرْسٜࢽَمْبُࢽْجَیٜࢽْ أَجَࢻْکٜࢽُو؞ دَجِ بْلَ بْلَرُو لٜجٜ جَمَا أَلَمْدُ بَدِیٜࢽُو؞
[7] دَجِ عِیسَى مٜوُࢽْ یِࢽْدِࢽْدَ بُواْجٜ تَیِرُو کْࢽْدُوُو کْلَ سٜدَࢽَّیٜࢽْ ثٜ تَیِیَ یِࢽْدِ یِࢽْدِیٜࢽْ ࢽُودُو بَدِیٜࢽُو؞
[8] تَیِرُو وَدَ ثٜ بْلَوُرُودْرُو کَ غْࢽِیَ، بَرٜ أَوِمَ ࢽغُوجَࢽِّ: کْمْبُو، بِ ࢽغْرْوُ، بِ وُرِ،
[9] کُورُو سُࢽُو ثَسَکُّو، أَمَّ بَرٜ غْمَجٜ یِࢽْدِ ࢽغُوجَࢽِّ یٜࢽُو؞
[10] کُورُو تَیِرُو: «ࢽدَرَࢽْ یَیٜ ࢻَدُو ࢽغَوُوَّدْࢽْ ࢽَمُّواْ، حَرْ کَوُ ࢽَدَ کُولُّوِرُو؞
[11] أَمَّ ࢽدَرَࢽْ یَیٜ ࢽَیِیَ ࢽجَمُواْࢽِّ بِ مَࢽَࢽْدُو ࢻَࢽْدُ وَیٜرَا، ࢽَدَ کُولُّوِیَ، کَتِّ سِࢽْدُویٜ کَغَࢽْغُواْ، تَیِرُو شٜدَرُو وَلْجُو!» یٜࢽُو؞
[12] أَدْغَیْمَ کْࢽْغَیَمْبَࢽْجُدْ لٜجَࢽٜ أَمْبُو کَوُرِ ثَدّٜ تُوَ ثَدُو یٜرَ؞
[13] سٜدَࢽْ کَدَ دُیٜرَ، کُورُو أَمْ دُوࢽْدِ کَدَرُو کْࢽْدَوُ جَیْتُࢽّٜ ࢻِجَغَࢽٜ سَمْجَغَࢽٜ تَیِیَ إِسَࢽْغَیٜىٰرَ؞
[14] مَیْ حِرُدُسْ لَوَرْ أَࢽِ سَمَّا ࢻَࢽْغٜࢽُو، دَلِلْࢽْجُدْ ثُ عِیسَیٜدْ ࢽدَرَسُورُو تَتَرْدْغْࢽَ ࢽَࢽْغَرُو؞ أَمْ لَایٜ: «یَحْیـَى کَسَلَمَ رُووَرُو وَلْجٜ ثِجُو! أَدْمَ ࢽَࢽْغَرُو کْࢽْدُوُو أَوُو أَجَبَّ أَجَبَّ دِیُویٜ ࢽَࢽْجُࢽْ مبٜجِ،» ثَࢽِ؞
[15] لَایٜ: «تِ ࢽَوِ إِلْیَ،» ثَࢽِ؞ لَایٜ: «تِ ࢽَوِ، ࢽَوِیَ کُرٜىٰ ࢻَلْࢽْجَ غَیْ،» ثَࢽِ؞
[16] أَمَّ مَیْ حِرُدُسْ أَدَ ࢻَࢽْغٜࢽِّیَ، تِیٜ: «یَحْیـَى کَمْ کْلَࢽْجُ کَمّْکّْࢽَدْ رُووَرُو وَلْجٜ ثِجُو!» یٜࢽُو؞
[17] ثَمَࢽْ مَیْ حِرُدُسْ یَ حِرُدِیَا، تِ کَمُ یَࢽْجُغْࢽَ مَیْ ࢻِلِبُسّٜ دُوُوࢽْ، کَمُرُو ثْمُواْࢽَ؞ تِ ࢽَࢽْغَرُو، مَیْ حِرُدُسْ ثَکّٜ یَحْیـَىٰ ثَدَࢽٜ ثٜکّٜرٜ کُوسُورُو کٜسَکُّو،
[18] دَلِلْࢽْجُدْ یَحْیـَیٜ مَیْ حِرُدُسُّو: «کَمُ یَࢽْمْغْࢽَیٜ مُواْدْ حَرَمْ!» ثْࢽَّ ࢽَࢽْغَرُو؞
[19] کُورُو یَ حِرُدِیَ یَحْیـَىٰ وُلْ وَجْࢽَ، حَرْ تِیَ رُورُو ࢽجٜجُورُو مَجِ؞ أَمَّ جَوَلْ ثُوَࢽْدْࢽِّ،
[20] دَلِلْࢽْجُدْ مَیْ حِرُدُسْ یَحْیـَدْ جِرٜمَ یٜ، کَمْ اللَّهیٜ یٜرُو أَسُجِیٜ تِیَ رِجٜ ثْرِوِ ࢽَࢽْغَرُو؞ مَیْ حِرُدُسْ تِیَ کْرْࢽْجِیَ، حَࢽْغَلْࢽْجُ ثِجِ، أَدْ یَیٜ مَࢽَࢽْجُ ࢻَࢽْدُرُو ثْرَاࢽَ؞
[21] ࢽغَیْمَ دُوُوࢽْ یَ حِرُدِیَیٜ سَࢽْجُ کَدِیُو؞ سَاࢽدُرِ مَیْ حِرُدُسْ تَمْبْࢽَیٜ کِدْࢽِّیَ، مَیْ حِرُدُسْ وَکِّلَّࢽْجُوَ کَجَلَّوَࢽْجُوَ أَمْوُرَوَ ثِدِ غَلِلٜىٰیَرُو مَسْࢽَ کْجِ دَبَّرْیٜىٰࢽُو؞
[22] ࢻٜرُو یَ حِرُدِیَیٜ إِسٜ بِکّٜ کِرَࢽْدْࢽِّیَ، مَیْ حِرُدُسَّ کُسُوتُّووَࢽْجُوَ یٜ کَرْوُࢽْجَ جَوْرُو کْجِیٜࢽُو؞ مَیْدْیٜ ࢻٜرُودْرُو: «أَوِ یَیٜ رُوࢽْمْ ثْرَاࢽَدَ سُوُورٜ ࢽِرُو ࢽجِکّٜ!» یٜࢽُو؞
[23] کَࢽْسِ جُوُࢽٜ تِرُو: «کُورٜ! أَوُودْ رٜدَ ثِدِࢽِیٜرُو وَلْیٜࢽُو یَیٜ، ࢽِرُو ࢽجِکِّ،» یٜࢽُو؞
[24] دَجِ ࢻٜرُودْ ثُلُوٜ یَࢽْجُرُو: «یَࢽِ، أَوِرُو تِیَ کُورْکِّ؟» یٜࢽِّیَ، یَ حِرُدِیَیٜ: «کْلَ یَحْیـَى کَسَلَمَیٜ!» یٜࢽُو؞
[25] سَدْمَࢽْ ࢻٜرُودْ دْغَلْجٜ ࢽَ مَیْدْیٜرُو وَلْدٜ تِرُو: «وُرُو کْرْمَمَرُو کْلَ یَحْیـَى کَسَلَمَیٜ ثُرُو بُوُرُیٜࢽْ سِمِیَ، رَاکُّو!» یٜࢽُو؞
[26] مَیْدْ کَرْوُࢽْجُ جَوْرُو کُتُّ یَیٜ، کَࢽْسِ بُوࢽْجُوَ کُسُوتُّووَࢽْجُوَ ࢽَࢽْغَرُو ࢻٜرُودْرُو دَࢻْتُوُ ثْرَاࢽِّ؞
[27] سَدْمَࢽْ کُواْࢽَࢽْجُ لَارُو وَدَ ثٜ کْلَ یَحْیـَیٜدَ ثُوُدُو یٜࢽُو؞ کُواْࢽَدْ لٜجٜ کُوسُولَࢽْ کْلَ یَحْیـَیٜ کَمْجٜ
[28] کْلَࢽْجُدَ بُوُرُلَࢽْ ثُوُدٜ ࢻٜرُودْرُو کَیْࢽُو، تِ یٜ ࢽغُوجٜ یَࢽْجُرُو کَیْࢽُو؞
[29] ࢻُوُرَوَ یَحْیـَیٜ لَوَرْ أَدَ ࢻَࢽْغٜرَࢽِّیَ، إِسَࢽٜ کَمِࢽّجُ ࢽغُوجَࢽٜ ثَادٜ کَوْرِرُو ثَسَکّٜ سْࢽَیٜرَ؞
[30] کْࢽْغَیَمْبَدْ ࢽَ عِیسَیٜࢽْ ثَࢻْتَࢽٜ أَوُو ثَدْࢽَا جِرِ جَمَا أَلَمْجَࢽَا سَمَّا تِرُو وُلْیٜىٰرَ؞
[31] عِیسَیٜ تَیِرُو: «أَرُواْ رُࢽْدٜ کَرَا ࢽَ وُࢽْدُمَ بَوُو لَارُو لٜࢽِیُو، تُسُّواْ!» یٜࢽُو، دَلِلْࢽْجُدْ أَمْ کَدَ کَدَمِ ࢽَࢽْجَرُو إِسَࢽٜ وَلْدَیْ، حَرْ دَمَ مَسْࢽَ دِیُویٜمَا ثَوَࢽْدْࢽِّ ࢽَࢽْغَرُو؞
[32] دَجِ تَیِ رُࢽْجَ مَارَرُو ࢽغَسَیٜ کَرَا ࢽَ وُࢽْدُمَ بَوُورُو لٜىٰرَ؞
[33] أَمَّ لٜدُ ثَدِلَࢽْ أَمْ کَدَ تَیِیَ ثَرُࢽٜ أَسُجَࢽٜ بْلَ سَمَّࢽْ ثَلُوٜ سِلَࢽْ ثَغَسٜ تَیِࢽْ ࢻُوُࢽُّو ࢽَدْرُو لٜىٰرَ؞
[34] عِیسَى مَارَدْࢽْ جْࢻْکٜࢽِّیَ، جَمَ کَدَ ثَࢻْتَࢽَدَ ثُرٜ تَیِیَ ࢽجُࢽُویٜࢽُو، تَیِ أَلَمَ دِمِیَ سْࢽِ بَوُووَ غَیْ ࢽَࢽْغَرُو؞ دَجِ أَوُو کَدَࢽْ تَیِیَ أَلَمْدُ بَدِیٜࢽُو؞
[35] دُࢽِیَ لْمْغٜࢽِّیَ، ࢻُوُرَوَࢽْجُ إِسَࢽٜ تِرُو: «ࢽَ أَدْ کَرَا بُووُ، کُورُو دُࢽِیَ یٜ لْمْجْࢽَ؞
[36] جَمَدَ سَلَمّٜ، بْلَا بْلَدٜیَاسُورُو لٜجَ أَوُو کْمْبُویٜ ثٜسِوُو!» یٜرَ؞
[37] أَمَّ عِیسَیٜ تَیِرُو: «ࢽَیِمَ أَوُو کْمْبُویٜ تَیِرُو یُواْ!» یٜࢽُو؞ تَیِیٜ: «أَ! لٜࢽِیٜ کْمْبُو دِࢽَرِیُسْ یٜرْ یِࢽْدِیَ یُوِیٜ تَیِرُو یِیٜ وَ؟» یٜرَ؞
[38] عِیسَیٜ: «بُرُودِ ࢽدَوُ تَوْ؟ لٜࢽُواْ رُیْوُو!» یٜࢽُو؞ لٜجَࢽٜ کٜرُࢽِّیَ، تِرُو: «أُوُ بُࢽِ یِࢽْدِیَ،» یٜرَ؞
[39] دَجِ عِیسَى وَدَ ثٜ جَمَدَ یَکْثَ کْوُ کْوُرُو کْلَ کَجِمْ کْرِیٜࢽْ ࢽَࢻْثَ یٜࢽُو؞
[40] أَدْغَیْ أَمْدْ یَکْتَࢽٜ لَا مِیَ مِیَ، لَا ࢻِوُ ࢻِوُرُو ࢽَࢻْکٜرَ؞
[41] دَجِ بُرُودِ أُوُدَ بُࢽِ یِࢽْدِدَ ࢽغُوجٜ کْلَ سَمٜرُو سَࢻْثٜ اللَّهرُو أَرْدِیٜࢽِّیَ، بُرُودِدَ ࢻْسَکْثٜ ࢻُوُرَوَࢽْجُرُو ثٜ ࢻُوُ جَمَدْیٜࢽْ غْࢽَیٜرَ؞ کُورُو بُࢽِ یِࢽْدِدْ یٜیَ تَیِ سَمَّرُو دَغَرْیٜىٰࢽُو؞
[42] تَیِ سَمَّ جَوُࢽٜ کُلْیٜرَ؞
[43] ࢻُوُرَوَدْ غَࢻْتُواْ بُرُودِیٜیَ بُࢽِیٜیَا ثَࢻْکٜرَࢽِّیَ، جُواْ مٜوُࢽْ یِࢽْدِࢽْ کٜسْمْبْرُو؞
[44] أَمْ کْمْبُو أَدَ جَوُࢽَدْ کُوࢽغوَ دْوُ أُوُ؞
[45] سَدْمَࢽْ عِیسَى ࢻُوُرَوَࢽْجُدَ ثَکّٜ تِࢽْ ࢻُوُࢽُّو بْرْمْدَ کُوجَ ثِ تُودْرُو بْلَ بَیْتْسَیْدَیٜرُو لٜجَرُو مَارَرُو کَسَرْغَوُو، تِ یٜ جَمَدَ سَلَمْجِ یٜࢽُو؞
[46] تَیِیَ سَلَمْغٜࢽِّیَ، مُودُوَ دِیُورُو کْلَ کَوْ کُرُوُیٜرُو غِوَ؞
[47] کْࢽْغَلْ کِکُّرْࢽِّیَ، مَارَدْ دَوُ إِࢽْغِیٜࢽْ، عِیسَى یٜ تِ تِلُوࢽْجُ لُوکْ کْلَ کَوْیٜࢽْ؞
[48] کَرُوَ دُࢽُووَ ࢽَࢽْغَرُو ࢻُوُرَوَࢽْجُ کِیَدِّࢽْ ࢻُوُرُو لٜجَیْرُو کِرُࢽِّیَ، عِیسَى سَ یَکُّ بُࢽٜىٰࢽْ کْلَ إِࢽْغِیٜࢽْ سِلَࢽْ ࢽَࢽْجَرُو کَدِیُو؞ کَرْࢽّجَیٜࢽْ کُودُ ثْرَاࢽَ دُوُوࢽْ،
[49] عِیسَى کْلَ إِࢽْغِیٜࢽْ سِلَࢽْ لٜدُ ثْدِدَ کٜرُࢽِّیَ، کَیْمٜ کَمْ ࢽُࢽَیٜ ثَࢽٜ بُرْوُ کٜسَکُّو؞
[50] تَیِ سَمَّ تِیَ ثَرُࢽَ یٜ، کَرْوُࢽْجَ کَمْدْࢽَ یٜ؞ سَدْمَࢽْ عِیسَى تَیِرُو مَࢽَجِیٜ: «کَرْوُࢽْدُو غٜرُواْ، وُمَ! بَرٜ رِࢽُوِّ!» یٜࢽُو؞
[51] دَجِ تَیِرُو کْلْدِیٜ مَارَدْرُو کْرْغَاࢽِّیَ، کَرُوَدْ غْمْ ࢽْمْغٜࢽُو؞ تَیْ دَجَࢽٜ أَجَࢻْثَࢽَ،
[52] دَلِلْࢽْجُدْ مَاࢽَ لَمَرْ بُرُودِ أُوُیٜدَ أَسُجَࢽِّ، کْلَࢽْجَ تِکّٜرْࢽَ ࢽَࢽْغَرُو؞
[53] دَجِ بْرْمْدَ ࢻَلْجَࢽٜ کُویٜرَࢽِّیَ، ثِدِ غٜࢽٜسَرٜتّٜرُو إِسَࢽٜ مَارَدَ کٜکّٜرُو؞
[54] مَارَدْࢽْ جْࢻْکٜرَࢽِّیَمَ، أَمْ ثِدِدْیٜ عِیسَىٰ أَسُیٜرَ؞
[55] أَدْغَیْمَ أَمْدْ ثَغَسٜ ثِدِدْ ࢽغَرُو تَتَرْدَغَࢽٜ أَمْࢽْجَ دُوࢽْدِسُو کْلَ بْࢽَرَمْࢽْجَیٜࢽْ ࢽغُوجَࢽٜ ࢽدَرَ یَیٜ ࢽَ تِ مبٜجِ ࢻَࢽْجَࢽَدْرُو ࢽجَدُو بَدِیٜرَ؞
[56] بْلَدٜیَ، بِ بْلَ، بِ بْلَ کُلُویٜ، بِیَ ࢽدَرَ دُوُوࢽْ ࢽَ لٜجْࢽَ ࢽغَسُورُو أَمْ دُوࢽْدِسُودَ ࢽغُوجَࢽٜ ثَوُدٜ ثِ کَلْوُࢽْجُیٜ رُࢽْجُ لٜجَرُو تِیَ لُواْیٜرَ؞ أَمْ کَلْوُࢽْجُدَ لٜجَࢽَ سَمَّ ࢽغَیٜرَ؞