[1] سَلَ لَیَ ࢽجْکَّیِرَمْبٜیَ سَلَ بُرُودِ یِسْ بَوُووَیٜیَرُو کَوُ یِࢽْدِ غَࢻْثُو؞ کُورُو وُرَوَ رِمَࢽَّیٜیَ مَلْمْبَ أَتَّوْرَیٜیَ جَوَلْ عِیسَىٰ ࢽَࢽْغَلَࢽْ تَمٜ رُورُو ࢽجٜجُویٜ مَجَیْ؞
[2] تَیِیٜ: «سَیْ سَلَ کُوجِیَ دُوُوࢽْ، بَرٜ جَمَ حَࢽْغَلْسَࢽْغُو ثَسَࢽْغْࢽِّ!» یٜرَ؞
[3] عِیسَى بْلَ بَیْتَࢽِیٜلَࢽْ ࢻَدُو سِمَࢽْ دْرِمَیٜࢽْ مَسْࢽَ ثْدِ دُوُوࢽْ، کَمُ لَا سْࢽْدَلْ ثُرُوࢽْجُࢽْ کَوُدِ مْࢽْدٜمِ یٜ، جَوْرُو تَمَࢽَّ یٜ، ثُࢽْجُ ࢽَرْدِ ࢽغُوجٜ إِسٜ سْࢽْدَلْدَ دَوْیٜࢽْ ࢽَمْجٜ کَوُدِدَ کْلَ عِیسَیٜرُو ࢻِیٜىٰࢽُو؞
[4] أَمْ لَا أَوُو أَدَ کُتُّرُو ثَرُࢽٜ کَتّٜࢽْجَࢽْ: «أَوِرُو کَوُدِدَ بَسَرْجِدْ؟
[5] ثَ کَوُدِ أَدَ دِࢽَرِیُسْ یٜرْ یَکُّ کُوجْࢽَرُو ثَلَدٜ وُرِدَ تَلَاوَرُو ثَدْࢽَ!» ثَࢽٜ تِرُو سَرِوُ غْࢽَدُوُ بَدِیٜرَ؞
[6] أَمَّ عِیسَیٜ تَیِرُو: «تِیَ کُولُّواْ! أَوِرُو تِیَ سُوُولُّوِ؟ وُرُو جَوْرُو سٜرْ سْدّْࢽَ؞
[7] تَلَاوَسُودْ سَوِسُورُو ثُرُوࢽْدُوࢽْ مبٜجِ، کُورُو سَوِ یَیٜ، رَاوَّا، رَࢽْغُوٜ تَیِیَ بَࢽَغْوِ، أَمَّ وُدْ سَوِسُورُو غْࢽِ ثُرُوࢽْدُوࢽْ دْغَکِّ؞
[8] کَمُ أَدْ أَوُو رَکْثْࢽَدَ ثْدُو؞ کَوُدِ أَدَ تِیࢽِرُو ࢻِجِیٜ سِتّْرَࢽِرُو وُوَ دَبَّرْسٜىٰࢽُو؞
[9] جِرٜمَرُو ࢽَیِرُو وُلْࢽْجَغَکِّ، ࢽدَرَࢽْ یَیٜ ثُرُو دُࢽِیَ ࢽغَیٜࢽْ کَوُرِ کْجِ اللَّهیٜدَ وُلْجَیْ ࢽغُسُوࢽْ، کَمُ أَدَ تَکْتُرُو أَوُو سْدّْࢽَدْ یٜیَ وُلْجَیْ،» یٜࢽُو؞
[10] دَجِ یَحُسَ إِسْکَرِیُوتْ مٜوُࢽْ یِࢽْدِࢽْدْیٜ ࢻَلْࢽْجَ عِیسَىٰ مُکُّو وُرَوَ رِمَࢽَّیٜرُو سْرْتُّوُرُو ࢽَࢽْجَرُو لٜىٰࢽُو؞
[11] أَدَ ࢻَࢽْغٜرَࢽِّیَ، کَرْوُࢽْجَ کْجِجٜ تِرُو وُرِ ثَدِ ثَࢽٜ وَدُ ࢽغُویٜرَ؞ یَحُسَدْ دَمَ عِیسَىٰ تَیِرُو سْرْتُّوُیٜ مَدَ بَدِیٜࢽُو؞
[12] یِمْ بُرْوُویٜ سَلَ بُرُودِ یِسْ بَوُووَیٜࢽْ، یِمْ دُوُوࢽْ ࢽغْلَرُو لَیَ ࢽجْکَّیِرَمْبٜدَ دُوَجَیْدْ کِدْࢽِّیَ، ࢻُوُرَوَࢽْجُیٜ تِرُو: «ࢽدَرَࢽْ لٜࢽِیٜ مَسْࢽَ لَیَیٜدَ ࢽِرُو دَبَّرْࢽْجْغْیْیٜ بُمِ؟» ثَࢽٜ تِیَ کٜوُورُو؞
[13] دَجِ عِیسَى ࢻُوُرَوَࢽْجُیٜ یِࢽْدِ ثُࢽُودٜ تَیِرُو: «بْرْࢽِدْرُو ࢽغَوُواْ، کَمْ لَا بُلٜ إِࢽْغِیَ ࢽغُوجْࢽَا کْلَ کْلُّوِ؞ تِیَ غَیْوُو،
[14] ࢻَدُو دُوُوࢽْ ࢽغَاࢽَیٜ کْمَدْرُو وُلْغْࢽُواْ: ‹سَیِࢽَّیٜ کُسُوتُّورَمْ ࢽَ ࢻُوُرَوَࢽْجُوَ رُوکُّو مَسْࢽَ لَیَیٜدَ ثَدِدْ ࢽدَرَࢽْ؟›
[15] ࢽَیِرُو سُورُو سَمٜىٰ ࢽغِمْ کُرَ ثُرُوࢽْ کَرٜیَ دَبَّرْغَدَ ࢻْلٜࢽْجَغَیْ؞ ࢽَدْࢽْ مَسْࢽَدَ أَࢽْدِرُو دَبَّرْسَغَࢽُواْ!» یٜࢽُو؞
[16] دَجِ ࢻُوُرَوَدْ لٜجَࢽٜ بْرْࢽِدْرُو ࢽغَسَیٜ جِرِ عِیسَى تَیِرُو وُلْجْغْࢽَدْ غَیْ أَوِسُو کٜوَࢽْدُو؞ أَدْغَیْمَ مَسْࢽَ لَیَیٜدَ دَبَّرْیٜرَ؞
[17] کْࢽْغَلْ کِکُّرْࢽِّیَ، عِیسَى مٜوُࢽْ یِࢽْدِࢽْدَ رُوکُّو کَدِرَ؞
[18] ࢽَࢻْثَࢽَ مَسْࢽَ ثَدِ دُوُوࢽْ، عِیسَیٜ: «جِرٜمَرُو ࢽَیِرُو وُلْࢽْجَغَکِّ، کَمْࢽْدُو ࢻَلْ وُوَ مُکُّو کْلَدُووَیٜرُو سْرْࢽْسِیے، رُوکُّومَرُو مَسْࢽَ دِیٜ،» یٜࢽُو؞
[19] کَرْوُࢽْجَ جَوْرُو کُتَّجٜ ࢻَلْ ࢻَلّٜࢽْ وُࢽْدُ یَیٜ: «وُمَ وَ؟» ثْࢽٜ تِیَ کُورُو بَدِیٜࢽُو؞
[20] عِیسَیٜ تَیِرُو: «ثُرُو مٜوُࢽْ یِࢽْدِࢽْدْیٜࢽْ کْرْغَ، کَمْ دُوُوࢽْ وُوَ بُوُرُرُو مُکُّو یَکِّیٜࢽَدْ؞
[21] تَدَ کَمْبٜدْ سَࢻْتِدْمَ، جِرِ کْلَࢽْجُࢽْ کِتَوُلَࢽْ رُوُوَدَدْ غَیْ، أَمَّ کَمْ دُوُوࢽْ تَدَ کَمْبٜدَ کْلَدُووَࢽْجُرُو سْرْثِّیدْ، کُتُّࢽْجُ! ثَ کَمْ أَدْ تَمْبْࢽِّمَ تِرُو ࢽغَلْوُو!» یٜࢽُو؞
[22] مَسْࢽَ ثَدِ دُوُوࢽْ، عِیسَى بُرُودِ ࢽغُوجٜ اللَّهرُو أَرْدِیٜࢽِّیَ، ࢻْسَکْثٜ تَیِرُو ثٜ: «ࢽغُوࢽُواْ، أَدْ تِیࢽِ،» یٜࢽُو؞
[23] کُورُو کْࢽْجَرَمْ ࢽغُوجٜ اللَّهرُو أَرْدِیٜࢽِّیَ، تَیِرُو ثٜ تِلَࢽْ تَیِ سَمَّ کٜسَࢽُو؞
[24] عِیسَیٜ تَیِرُو: «أَدْمَ بُࢽِ أَمَࢽْ ࢽدْࢻْتَیٜ دُوُوࢽْ أَمْ کَدَ ࢽَࢽْغَرُو ࢻِدْࢽَدْ وُو؞
[25] جِرٜمَرُو ࢽَیِرُو وُلْࢽْجَغَکِّ، ࢽَ أَدْࢽْ ࢻُوُࢽْ غَدٜرُو إِࢽْغِ إِࢽَبّٜ یَکِّوَوُو، حَرْ یِمْ ࢽُودُو بَرْغَا اللَّهیٜࢽْ بْرِࢽُّو یَکِّرُو،» یٜࢽُو؞
[26] دَجِ أَیْیَ اللَّهَ ࢽجُࢽْغُورُویٜ یٜىٰرَࢽِّیَ، ثَلُوٜ کَوْ جَیْتُࢽّٜرُو لٜىٰرَ؞
[27] عِیسَیٜ ࢻُوُرَوَࢽْجُرُو: «ࢽَیِ سَمَّ ࢽغَوُورُو وَلْدُوِ، أَکُّو أَوُو کِتَوُلَࢽْ رُوُوَدَدْ: ‹سْࢽِدَ بَࢽْغْکِّیَ، دِمِیَدْ تَتَرْدَیْ؞›
[28] أَمَّ کَرْمُولَࢽْ ثِکِّیَ، ࢽَیِیَ بُرْوُوࢽْجَکّٜ ثِدِ غَلِلٜىٰرُو لٜکِّ،» یٜࢽُو؞
[29] بِتُرُسّٜ تِرُو: «تَیِ سَمَّ ࢽغَوُورُو وَلْدَیْ یَیٜ، وُدْ ࢽغَوُورُو وَلْدْکِّوَوُو!» یٜࢽُو؞
[30] عِیسَیٜ: «جِرٜمَرُو ࢽِرُو وُلْࢽْجْغْکِّ، کُ بُࢽٜ أَدْمَࢽْ کَوُ غُدُواْمْ یِࢽْدِرُو کُوکُّورٜ ثَکِّدْرُو، وُوَ یَکُّرُو أَࢽْغْرْسْمِ،» یٜࢽُو؞
[31] أَمَّ بِتُرُسّٜ کُواْ دُࢽُووَرُو سَࢻْثٜ تِرُو: «دُولٜ ࢽِیَ رُوکُّو ࢽُیْیٜرُو وَلْیٜࢽُو یَیٜ، تْمَّرُو ࢽِیَ أَࢽْغْرْࢽْجْکِّوَوُو!» یٜࢽُو؞ تَیِ سَمَّ یٜ ࢽغَیْ وُلْیٜرَ؞
[32] ࢽَ تِرُو غٜسّٜمَࢽِ ثَࢽِدْرُو کَدِرَࢽِّیَ، عِیسَیٜ ࢻُوُرَوَࢽْجُرُو: «ࢽَ أَدْࢽْ ࢽَمُّواْ دُوُوࢽْ، مُودُوَ دِکّٜ،» یٜࢽُو؞
[33] دَجِ عِیسَى بِتُرُسَّ یَعْࢼُوبَا یَحْیـَأٓ ࢽغُوجٜ رُوکُّو لٜجَࢽٜ کَرْوُࢽْجُ کُتَّجٜ رُوࢽْجُ جَوْرُو بَࢽَّدُ بَدِیٜࢽُو؞
[34] تَیِرُو: «کَرْوُࢽِ جَوْرُو کُتَّجْࢽَ، حَرْ ࢽُکِّ غَیْ؞ ࢽَ أَدْࢽْ دَࢽُواْ، ࢻَادَرُو دْغَیْوُو!» یٜࢽُو؞
[35] غَࢽَ لَا کُرُوُجٜ ثِدِرُو تْمْدِیٜ، یُوجِیَ، سَ بُوࢽٜىٰدْ تِیَ ثْدَࢽِّرُو مُودُوَ دِیُو بَدِیٜࢽُو؞
[36] تِیٜ: «أَبَّ، بَوَ، أَوِسُو ࢽِرُو یُوجِ؞ کْࢽْجَرَمْ بُوࢽٜىٰ أَدَ وُلَࢽْ ࢽغُوࢽٜ! أَدْ یَیٜ أَوُو وُ رَاکّْࢽَ غْࢽِ، أَوُو ࢽِ رَامَّدْمَ!» یٜࢽُو؞
[37] ࢽَ ࢻُوُرَوَࢽْجُیٜرُو وَلَّدَࢽِّیَ، کْࢽْمْ ثَدِ ࢽَیٜىٰࢽُو؞ بِتُرُسُّو: «سِمَࢽْ، کْࢽْمْ وَ دِمِ؟ أَسْشَ! سَ ࢻَلُّو رَࢽْغْمٜ ࢻَادَرُو دْغَمْبَوُو وَ؟
[38] بَرٜ جَرَࢻْتُوِّرُو ࢻَادَرُو دْغَیْوُو، مُودُوَ دٜوُو! رُحُ کَمْبٜدْ ثْرَاࢽَ، أَمَّ تِیࢽْجُدْ دُࢽُو کْسْکٜیَ!» یٜࢽُو؞
[39] کُورُو وَلْدٜ لٜجٜ مَࢽَ ثَیٜدْلَࢽْ مُودُوَ کِدُو؞
[40] ࢽَࢽْجَرُو وَلَّدَࢽِّیَ، ثَیٜ غَیْ کْࢽْمْ ثَدِ ࢽَیٜىٰࢽُو، سِمْࢽْجَ ࢽغَ کُرْوُووُجْࢽَ ࢽَࢽْغَرُو؞ أَوُو تِرُو وُلْدُوُیٜمَ ࢽُوجَࢽِّ؞
[41] یَکُّیٜرُو وَلَّدَࢽِّیَ، تَیِرُو: «کُوَمِسُوࢽْ کْࢽْمْبُو بُووَدَࢽْدُو تُسُّوِ وَ؟ ثٜرْࢽَ! سَدْ ثْدْࢽَ، تَدَ کَمْبٜدَ مُکُّو بِوُمَسُویٜرُو سْرْثَّاࢽَ؞
[42] ثِࢽُواْ، لٜࢽِیُو! أَکُّوࢽْجُ کَمْ وُوَ سْرْࢽْسِیمَدْ دٜلْ کَرْࢽْجْࢽَ!» یٜࢽُو؞
[43] سَدْمَࢽْ عِیسَى مَࢽَ ثْدِ ࢽغَیْ دُوُوࢽْ، یَحُسَ مٜوُࢽْ یِࢽْدِࢽْدْیٜ ࢻَلْࢽْجَ کَدِیُو؞ جَمَ کَدَ یٜ ࢽَ وُرَوَ رِمَࢽَّیٜیَ مَلْمْبَ أَتَّوْرَیٜیَ أَمْوُرَوَ جَمَیٜیَیٜࢽْ کَشَغَرْ سُو، کَ سُو مُکُّوࢽَّ تِیَ رُوکُّو کَدِرَ؞
[44] ثَمَࢽْ تِ سْرْتُّوُمَࢽْجُدْ تَیِرُو بْلَاࢽَࢽْ إِسَࢽُوجِیٜ: «کَمْ تِرُو لٜوَ کْرَوُویٜ یِدّْکِّدْ، تِمَ! تِیَ تَیْوُو، ࢻْرْسْتِوَوُورُو یَدُواْ!» ثْࢽَّ؞
[45] دَجِ یَحُسَ کَدِࢽِّیَمَ، ࢽَ عِیسَیٜرُو إِسٜ: «سَیِࢽَّ!» ثْࢽٜ تِرُو لٜوَ کْرَوُویٜ کِدُّو؞
[46] دَجِ عِیسَىٰ مُکُّوࢽْ دَࢻْ کٜدَ؞
[47] أَمْ ࢽَࢽْجُࢽْ دَجَࢽَدْیٜ ࢻَلْࢽْجَ کَشَغَرْ ࢻِثّٜ وُولُودِ رِمَࢽْ کُرَیٜیَ بَکْثٜ سْمُوࢽْجُ تْࢽْ کَمْغٜࢽُو؞
[48] عِیسَیٜ تَیِرُو: «أَ! ࢽَیِ کَشَغَرْ سُو، کَ سُو مُکُّوࢽَّ وُوَ غْࢽْدٜمَ غَیْ تَرُو وَ إِسُوِدْ؟
[49] یِمْ ࢽغُسُوࢽْ ࢽَࢽْدُوࢽْ ࢻَدُو اللَّهیٜࢽْ دْغَیْیٜ جَمَا أَلَمّْکِّ دُوُوࢽْ، وُوَ سْدَوِّ؞ أَمَّ أَوُو کِتَوُلَࢽْ رُوُوَدَدْ وَکَّجُو!» یٜࢽُو؞
[50] دَجِ ࢻُوُرَوَࢽْجُ سَمَّ تِیَ کُولْجَࢽٜ کٜیَسُو؞
[51] جَیْرُو لَا مَیَࢻِ غْࢽِیَ، أَوِمَ تِیࢽْجُࢽْ بَوُو عِیسَىٰ جْغَࢽَ مبٜجِ؞ أَمْدْ تِیَ کٜدَࢽِّیَ،
[52] مَیَࢻِدَ کُولْجٜ دٜ سُلْ کِیَسُو؞
[53] دَجِ عِیسَىٰ ࢽغُوجَࢽٜ ࢽَ رِمَࢽْ کُرَیٜرُو کٜسَدُو؞ ࢽَدْࢽْ وُرَوَ رِمَࢽَّیٜیَ أَمْوُرَوَ جَمَیٜیَ مَلْمْبَ أَتَّوْرَیٜیَ سَمَّ یٜ ثَࢻْکَدَرَ؞
[54] بِتُرُسْ یٜ کَتّٜ کَسْکَدَارُو حَرْ بَلْبَلَّ ࢻَدُو رِمَࢽْ کُرَیٜدْرُو تِیَ جْغَࢽٜ کْرْغَاࢽِّیَ، کَࢽُّ غْتُّورُو دَوُ غُرٜدُوُ ࢻَدُو اللَّهیٜࢽْ ࢽَࢻْکٜࢽُو؞
[55] وُرَوَ رِمَࢽَّیٜیَ مَجِلِسْوُ سَمَّا شٜدَ عِیسَىٰ رُورُو ࢽجٜجُورُو مَیٜرَ یَیٜ، ثَوَࢽْدْࢽِّ؞
[56] أَمْ کَدَ کْلَࢽْجُࢽْ شٜدَ بُووُیٜ ثَدْࢽَ، أَمَّ ثِࢽْجَ تِلُوجْࢽِّ؞
[57] دَجِ أَمْ لَا ثِجَࢽٜ شٜدَ بُووُیٜ ثَدٜ:
[58] «تِیٜ: ‹وُدْ ࢻَدُو اللَّهیٜ مُکُّو کَمْبٜࢽْ تْدَࢽْدْࢽَ أَدَ وُرْࢽْکّٜ ثُرُو کَوُ یَکُّیٜࢽْ مُکُّو کَمْبٜࢽْ غْࢽِ غَدٜ تَࢽْدْکِّ،› ࢽغَیْ ثْࢽٜ ࢻَࢽْغٜیْیٜ،» یٜرَ؞
[59] أَمَّ کْلَ أَدْیٜمَࢽْ ثِࢽْجَ تِلُوجْࢽِّ؞
[60] دَجِ رِمَࢽْ کُرَدْ ثِجٜ دَوُࢽْجَࢽْ دَجٜ عِیسَرُو: «جَاوُࢽْمْ بَوُو وَ؟ أَوِ غْلٜ أَمْ أَࢽِ کْلَࢽْمْࢽِࢽْ شٜدَجَیْدْ؟» ثْࢽٜ تِیَ کِوُورُو؞
[61] أَمَّ عِیسَى ثِࢽْجُ کَجٜ جَاوُ ثِࢽِّ؞ کُورُو رِمَࢽْ کُرَدْ وَلْدٜ تِرُو: «ࢽِمَ وَ أَلْمَسِیوُ تَدَ تِ بَرْغَایٜدْ وُو؟» ثْࢽٜ تِیَ کِوُورُو؞
[62] عِیسَیٜ: «وُمَ! کُورُو تَدَ کَمْبٜدْ مُکُّو کْمْبُورَمْ مَیْ کْࢽْدُوُومَیٜࢽْ ࢽَࢻْکَدَ یٜ، ثُرُو ࢻُوࢻُووْ سَمٜىٰࢽْ کْࢽْدٜ ثْدِ یٜ رُوِ،» یٜࢽُو؞
[63] دَجِ رِمَࢽْ کُرَدْ کَلْوُࢽْجُ کَرْجٜ: «أَ! شٜدَ جِرِ ࢻِ غْلٜ غَدٜ مَࢽِیٜ؟
[64] اللَّهَ غَسْکَدُࢽْجُدَ ࢻَࢽُّوَّ؞ أَوِ غْلٜ تْمَࢽُوْ؟» ثْࢽٜ تَیِیَ کِوُورْࢽِّیَ، تَیِ سَمَّ تِرُو شَرَ کَمْجَغَࢽٜ رُوࢽْجُ تُلُوُومَ جُسُّو یٜرَ؞
[65] دَجِ لَاࢽجَ تِرُو لَلَّرِ تْوَتْوَجَغَࢽٜ سِمْࢽْجُ جَکْثَࢽٜ تِیَ بَبَکْتُ بَدِیٜرَ؞ تِرُو: «ࢽَوِࢽَوِ دٜ!» ثَࢽِ؞ أَدْغَیْمَ غُرٜدُوُدْ یٜ تِیَ ثَدَࢽٜ مَرِࢽْ بَبَکّٜرَ؞
[66] بِتُرُسْ بَلْبَلَّ ࢻَدُویٜدْࢽْ دُوُوࢽْ، کِرْ رِمَࢽْ کُرَیٜ لَا ࢽَدْرُو کَدِیُو؞
[67] بِتُرُسْ کَࢽُّ جْغْتِّ کِرُࢽِّیَ، تِیَ ࢽغْلَرُو ࢽِࢽِجٜ: «ࢽِ یٜ عِیسَى کَمْ ࢽَجَرَتّٜیَ رُوکُّو کْرْغَوْ!» یٜࢽُو؞
[68] أَمَّ بِتُرُسْ أَࢽْغْرْجٜ: «أَوُو وُلّْمِدْمَا ࢽُوکّْࢽِ، أَسُکّْࢽِ!» یٜࢽُو؞ دَجِ ثِࢽَّ ࢽغَوُورَمْبُو ثُلُوٜ غُدُواْمْ کُوکُّورٜ کٜکُّو؞
[69] کِرْدْ وَلْدٜ تِیَ ثُرٜ أَمْ ࢽَدْࢽْ دَسَاࢽَدْرُو: «کَمْ أَدْ یٜ ࢻَلْࢽْجَ!» یٜࢽُو؞
[70] کُورُو بِتُرُسْ وَلْدٜ أَࢽْغْرْیٜࢽُو؞ غَࢽَ سَمْ کِدْࢽِّیَ، أَمْ ࢽَدْࢽْ دَسَاࢽَدْیٜ بِتُرُسُّو: «ࢻَغَتُّو ࢽِ یٜ کَمْࢽْجَ ࢻَلْ، ࢽِ کَمْ ثِدِ غَلِلٜىٰ ࢽَࢽْغَرُو!» یٜرَ؞
[71] أَمَّ بِتُرُسْ کْلَࢽْجُ بَسْکُجٜ کَࢽْسِ جُوٜ: «کَمْ کْلَࢽْجُࢽْ مَࢽَࢽُوِ أَدَ ࢽُوکّْࢽِ!» یٜࢽُو؞
[72] سَدْمَࢽْ غُدُواْمْ یِࢽْدِیٜرُو کُوکُّورٜ کٜکُّو؞ دَجِ بِتُرُسْ أَوُو عِیسَى تِرُو وُلْجْغْࢽَدَ تَکّٜࢽُو؞ عِیسَیٜ: «کَوُ غُدُواْمْ یِࢽْدِرُو کُوکُّورٜ ثَکِّدْرُو، وُوَ یَکُّرُو أَࢽْغْرْسْمِ،» ثْࢽَّ؞ تَکّٜࢽِّیَ، تَیْ دَجٜ سُو ࢽغُویٜࢽُو؞