[1] دَجِ عِیسَىٰ ࢻُوُرَوَࢽْجُوَ بْرْمْدَ ࢻَلْجَࢽٜ کُوجَࢽٜ ثِدِ غْرَسَوُیٜرُو کَدِرَ؞
[2] عِیسَى مَارَدْلَࢽْ جْࢻْکٜࢽِّیَمَ، کَرُوَمَ لَا کَوْرِلَلَࢽْ ثُلُوٜ تِیَ کَࢻْکٜىٰࢽُو؞
[3] کَمْدْ کَوْرِلَلَࢽْ کْرْغَ، کُورُو وُࢽْدُمَ رَکْثٜ تِیَ ثِکّٜرِوَوُو؞ سَرْغَلَمَࢽْ تِیَ غٜرُورُو یُوجِوَوُو؞
[4] ثَلَࢽْ ࢽغْوُرُو سِࢽْجُوَ مُکُّوࢽْجُوَرُو سَرْغَ ثَسَکّْࢽَ یَیٜ، کُلُّمْ کْجَࢽْ کْجَࢽُّو کَکَمْجِ؞ وُࢽْدُمَ رَکْثٜ تِیَ رُوجِوَوُو؞
[5] بُࢽٜیَ کَوْسُوَ ثُرُو کَوْرِلَا کَوْوَایٜࢽْ بُرْوُ ثَکّٜ تِیࢽْجُ کَوْࢽِࢽْ رٜرٜجِ کْرْغَ؞
[6] کَمْدْ عِیسَىٰ کُرُوُࢽْ کِرُࢽِّیَ، ثْغَسٜ إِسٜ ࢻُوُࢽْجُࢽْ تُࢽْغُرُمْجٜ ࢽغُجٜ
[7] دُࢽُوࢽْجُرُو یِلْجٜ: «أَوِ لَمْبُوࢽْمْ وُرُو، عِیسَى تَدَ اللَّه مَیْ سَمٜمَیٜ؟ ࢻُوُ اللَّهیٜࢽْ لُواْࢽْجْکّْࢽَ، بَرٜ وُرُو أَجَوُ غْࢽَسْغْمِّ!» یٜࢽُو؞
[8] أَدَ وُلْدُࢽْجُدْ، عِیسَیٜ ثَلَࢽْ تِرُو: «سٜدَࢽْ، کَمْدَ کُولّٜ لُوٜ!» ثْࢽَّ ࢽَࢽْغَرُو؞
[9] دَجِ عِیسَیٜ تِرُو: «وُࢽْدُ ثُࢽْمْ؟» ثْࢽٜ کِوُورْࢽِّیَ، تِیٜ: «ثُࢽِ کْوُ سُوجِیَیٜ، أَࢽْدِ کَدَ ࢽَࢽْغَرُو،» یٜࢽُو؞
[10] بَرٜ تَیِیَ ثِدِدْلَࢽْ دُجْࢽِّرُو عِیسَىٰ ࢽغْوُرُو لُواْیٜࢽُو؞
[11] ࢽَدْࢽْ أَلَدٜ کَدَ کْلَ کَوْ کُرُوُیٜࢽْ ࢽٜوُو ثَدِ یٜ مبٜجِ؞
[12] کُورُو سٜدَࢽَّدْ عِیسَىٰ لُواْجَࢽٜ: «اللَّهدٜیَدْرُو دُسَغَࢽٜ ثُرُوࢽْجَرُو ࢽغَیِیُو!» یٜرَ؞
[13] تَیِرُو أَمَرْجِیٜ ثَلُوٜ ثُرُو أَلَدٜیَدْیٜرُو کَسَرْغَوُو؞ دَجِ أَلَدٜیَدْ أَلَمَ دْوُ یِࢽْدِ غَیْ ࢽغْرْمْجَࢽٜ کَوْلَࢽْ جْࢻْثَࢽٜ بْرْمْدْرُو ࢻِدَغَࢽٜ إِࢽْغِیٜ ࢽغُوجٜ کَسُࢽُو؞
[14] سْࢽِیَ أَلَدٜیَیٜدْ ثَغَسٜ لٜجَࢽٜ بْلَدَ کَرَاࢽجُوَلَࢽْ لَوَرْدَ أَمْبُو وُلْیٜىٰرَ؞ أَمْدْ یٜ أَوُو وَکَّجْࢽَدَ کُرُورُو کٜلُوُو؞
[15] ࢽَ عِیسَیٜرُو إِسَࢽٜ کَمْ دُوُوࢽْ تِلَࢽْ کْوُ سٜدَࢽَّیٜ ثَلُوُࢽَدْ کَجْمُࢽْجُ یٜ لُجْࢽَ، حَࢽْغَلْࢽْجُ یٜ کَلْکَلْجْࢽَ ࢽَࢻْکَدَ کٜرُࢽِّیَ، رِیٜرَ؞
[16] تَیِ لَمَرْ أَدَ ثَرُࢽَدْ أَوُو کَرُوَمَدَ أَلَدٜیَدَرُو وَکَّجْغْࢽَدَ أَمْدْرُو وُلْیٜىٰرَ؞
[17] دَجِ أَمْدْ یٜ عِیسَى ثِدِࢽْجَ کُولْجُورُو تِیَ لُواْدُ بَدِیٜرَ؞
[18] عِیسَى مَارَدْرُو ࢽغَیِ دُوُوࢽْ، کَمْ تِلَࢽْ سٜدَࢽَّ ثَلُوُࢽَدْ یٜ عِیسَىٰ لُواْجٜ کَسَثُّو رُوکُّوࢽْجُࢽْ دْغَ یٜࢽُو؞
[19] عِیسَى تِرُو أَمَرْجْغْࢽِّ، تِرُو: «وَلْدْࢽٜ ࢻَࢽّْمْبُو، سٜرْ کُرَ کْمَࢽْدٜ ࢽِرُو ࢽجْدّْࢽَدَ جِرِ ࢽِیَ ࢽجُࢽُوࢽْجْࢽَدَ تَیِرُو سَتْکْࢽٜ!» یٜࢽُو؞
[20] دَجِ کَمْدْ لٜجٜ ثِدِ بْلَمٜوُیٜࢽْ سٜرْ کُرَ عِیسَى تِرُو ثْدّْࢽَدَ أَمْبُو وُلْدُوُ بَدِیٜࢽُو؞ تَیِ سَمَّ أَجَࢻْکٜرَ؞
[21] کُورُو عِیسَى وَلْدٜ مَارَدْࢽْ بْرْمْدَ ࢻَلْجٜ کُویٜࢽِّیَ، جَمَ کَدَ إِسَࢽٜ تِیَ دِرِجَࢽٜ کْلْیٜرَ؞ عِیسَى ثِ بْرْمْبٜࢽْ دُوُوࢽْ،
[22] کَمْ لَا وُرَوَ دَࢽْدَلْدْیٜ ࢻَلْࢽْجَ ثُࢽْجُ جَیْرُسْ ࢽَدْرُو کَدِیُو؞ عِیسَىٰ کِرُࢽِّیَ، ࢻُوُࢽْجُࢽْ تُࢽْغُرُمْجٜ
[23] تِیَ جَوْرُو لُواْجٜ: «ࢻٜرُوࢽِ کْلَیَکُّ ࢽُو ثْدِ؞ أَرٜ مُکُّوࢽْمْ تِرُو غْࢽَغْࢽٜ، ࢽغَجُو رُووَرُو دْغَرُو!» یٜࢽُو؞
[24] عِیسَى ثِجٜ کَمْدَ رُوکُّو لٜىٰرَ؞ کُورُو جَمَ کَدَ جَاࢽٜ تِرُو کْکْلْدَغَࢽٜ تِیَ غْغْرْࢻْکٜىٰرَ؞
[25] کَمُ لَا یٜ ࢽَدْࢽْ مبٜجِ، کْرْوُ مٜوُࢽْ یِࢽْدِࢽُّو بُ ࢻِدُࢽْجُ دَجْࢽِّ؞
[26] مُکُّو کَرْوُࢽْمَ ࢽغْوُسُویٜࢽْ جَوْرُو لٜیْیَ ثَࢽَ، کُورُو کْࢽْدَࢽْجُ سَمَّا ثُوَتْکْࢽَ یَیٜ، کَلْکَلْࢽْجُ ثُوَࢽْدْࢽِّ، کَسُوَدْ ࢻُوُ جُوُیْ؞
[27] دَجِ لَوَرْ عِیسَیٜدَ ࢻَࢽْغٜࢽِّیَ، کَمُدْ إِسٜ ࢽغَوُویٜࢽْ سُسُجٜ کَلْوُࢽْجُدَ لٜىٰࢽُو،
[28] أَوُووَ کَرْوُࢽْجُࢽْ: «تُو، کَجْمُࢽْجُ بَسْ لٜکِّیَ، ࢽغَکِّ،» ثْࢽِ؞
[29] سَدْمَࢽْ بُ ࢻِدُࢽْجُ دَیٜࢽُو، کُورُو ࢽَࢽْلٜوَ ثُوَࢽْدْࢽَرُو تِیࢽْجُࢽْ ࢻَࢽْغٜࢽُو؞
[30] سَدْمَࢽْ عِیسَى یٜ کْࢽْدُوُو تِلَࢽْ ثُلُوُࢽَرُو أَسُجٜ دَوُ جَمَدْیٜࢽْ سُوُورْدٜ: «وُࢽْدُ کَلْوُࢽِ لٜجُو؟» ثْࢽٜ کِوُورُو؞
[31] ࢻُوُرَوَࢽْجُدْیٜ تِرُو: «أَ! جَمَدْ ࢽِرُو کْکْلْدَغَࢽٜ غْغْرْمْࢽْجَاࢽَ رُمَّ دُوُوࢽْ، وُࢽْدُ ࢽِیَ لٜࢽْجُورُو کُورْمِدْ؟» یٜرَ؞
[32] أَمَّ عِیسَى مٜمٜجٜ کَمْ أَدَ ثْدْࢽَدَ کُرُورُو مَیٜࢽُو؞
[33] کَمُدْ أَوُو تِرُو وَکَّجْغْࢽَدَ ࢽُوجْࢽَ ࢽَࢽْغَرُو، رِجٜ لُولُوجِیَرُو إِسٜ ࢻُوُࢽْجُࢽْ تُࢽْغُرُمْجٜ تِرُو جِرٜدْ ࢽغَا وُلْیٜىٰࢽُو؞
[34] دَجِ عِیسَیٜ تِرُو: «ࢻٜرُوࢽِ، کَمْبْرْسٜࢽْمْ ࢽَࢽْغَرُو ࢽجْکَّوُو ࢻَࢽْدْمَّ! کْلٜوَࢽْ لٜࢽٜ، ࢽَࢽْلٜوَ یَدٜ!» یٜࢽُو؞
[35] عِیسَى تِرُو مَࢽَجِیے ࢽغَیْ دُوُوࢽْ، أَمْ لَا ࢻَدُو ࢻُوُمَ دَࢽْدَلّٜدْرُو إِسَࢽٜ تِرُو: «ࢻٜرُوࢽْمْ بَوُوجْࢽَ؞ أَوِرُو مَلْمْدَ غَدٜرُو سُوُولّْمِ؟» یٜرَ؞
[36] أَمَّ عِیسَى أَوُو وُلْجَیْدَ ࢻَࢽْغٜࢽِّیَ، ࢻُوُمَ دَࢽْدَلّٜدْرُو: «بَرٜ رِࢽْمِّ، بِیَ یَسَرَیْ!» یٜࢽُو؞
[37] بِتُرُسَّ یَعْࢼُوبَا یَࢽْجُغْࢽَ یَحْیـَىٰ غْࢽِیَ، بَرٜ وُࢽْدُمَ غَدٜ تِیَ جْغَࢽِّ یٜࢽُو؞
[38] ࢻَدُو ࢻُوُمَ دَࢽْدَلّٜدْرُو کَدِرَࢽِّیَ، عِیسَى جَمَ ثَࢻْتَࢽَ کَلَلَ ࢻِجَیْ کِرُو، لَا سُو ثَدِ، لَا وَیْیُو ثَࢽِ؞
[39] کْرْغَاࢽِّیَ، عِیسَیٜ تَیِرُو: «أَوِرُو کَلَلَ ࢻِࢽُوِ یٜ، سُو دِوِ یٜدْ؟ ࢻٜرُودْ بَوُوجْࢽِّ، کْࢽْمْ ثْدِ،» یٜࢽُو؞
[40] أَمَّ تِیَ رُجَࢽٜ تِرُو کَاسُ کٜدُّو؞ أَمْدْ سَمَّا دٜیَرُو کِتُّلُوُࢽِّیَ، ࢻٜرُودْیٜ بَوَا یَا أَمْ تِیَ ثَسَدُّوُࢽَدَا ࢽغُوجٜ ࢽَ ࢻٜرُودْیٜرُو کَسَرْغَوُو؞
[41] ࢻٜرُودَ مُکُّویٜࢽْ کِدَࢽِّیَ، تِرُو: «تَلِتَ کُمْ!» یٜࢽُو، مَاࢽَࢽْجُدْ: «ࢻٜرُومَ، ࢽِرُو وُلْࢽْجْغْکِّ، ثِࢽٜ!»
[42] سَدْمَࢽْ ࢻٜرُودْ ثِجٜ دَدَدُ بَدِیٜࢽُو؞ تِدْ کْرْوُࢽْجُ مٜوُࢽْ یِࢽْدِࢽْ؞ أَدَ کٜرُࢽِّیَ، جَوْرُو أَجَࢻْکٜرَ؞
[43] دَجِ عِیسَى وَدَ ثٜ تَیِرُو بَرٜ وُࢽْدُمَ لَوَرْ أَدَ ࢻَࢽْجْࢽِّ یٜࢽُو؞ کُورُو أَوُو کْمْبُویٜ ࢻٜرُودْرُو ثَدُو یٜࢽُو؞