[1] یِمْ أَࢽِࢽْ ثَیٜ غَیْ جَمَ کَدَ ࢽَ عِیسَیٜࢽْ مبٜجِ، کُورُو أَوِمَ کْمْبُویٜ ࢽَࢽْجَࢽْ بَوُو؞ دَجِ عِیسَى ࢻُوُرَوَࢽْجُوَ ࢽَࢽْجُرُو بُواْجٜ تَیِرُو:
[2] «جَمَ کَدَ أَدَ ࢽجُࢽُوکّْࢽَ، دَلِلْࢽْجُدْ کُ رُوکُّوࢽِلَࢽْ کَوُࢽْجَ یَکُّ، کُورُو أَوِمَ کْمْبُویٜ ࢽَࢽْجَࢽْ بَوُو ࢽَࢽْغَرُو؞
[3] کْࢽَࢽْجَا دُوُوࢽْ تَیِیَ ࢻَࢽّجَرُو لٜجَرُو سَلَمّْکِّیَ، جَوَلَّࢽْ دُࢽُوࢽْجَ بَوُورُو وَلْجِ، لَاࢽجَ کُرُوُࢽْ إِسَࢽَ ࢽَࢽْغَرُو،» یٜࢽُو؞
[4] ࢻُوُرَوَدْیٜ تِرُو: «ࢽدَرَࢽْ غْلٜ کَرَا أَدْࢽْ کَمْ رَکْثٜ کْمْبُو ثُوَࢽْدٜ جَمَ أَࢽِیَ أَمْبَجِ؟» یٜرَ؞
[5] عِیسَیٜ تَیِرُو: «بُرُودِ ࢽدَوُ ࢽَࢽْدُوࢽْ؟» ثْࢽٜ کِوُورْࢽِّیَ، تِرُو: «تُلُرْ،» یٜرَ؞
[6] دَجِ عِیسَى جَمَدَ ثَکّٜ ثِدِࢽْ ࢽَࢻْکٜرَ؞ بُرُودِ تُلُرْدَ ࢽغُوجٜ اللَّهرُو أَرْدِیٜࢽِّیَ، ࢻْسَکْثٜ ࢻُوُرَوَࢽْجُرُو ثٜ ࢻُوُ جَمَدْیٜࢽْ غْࢽَجَ ثْࢽٜ ࢻُوُࢽْجَࢽْ غْࢽَیٜرَ؞
[7] بُࢽِ سَࢽَࢽَ یٜ ࢽَࢽْجَࢽْ مبٜجِ؞ عِیسَى بُࢽِدْ یٜیَ ࢽغُوجٜ اللَّهرُو أَرْدِیٜࢽِّیَ، ࢻُوُرَوَࢽْجُرُو ثٜ ࢻُوُ أَمْدْیٜࢽْ غْࢽَجَ یٜࢽُو؞
[8] جَمَدْ جَوُࢽٜ کُلْیٜرَ؞ ࢻُوُرَوَدْ غَࢻْتُواْدَ ثَࢻْکٜرَࢽِّیَ، جُواْ کَلَرَمْ تُلُرْ کٜسْمْبْرُو؞
[9] ࢽَدْࢽْ أَمْ أَلَمَ دْوُ دٜوُ غَیْ مبٜجِ؞ دَجِ عِیسَى جَمَدَ سَلَمْغٜࢽِّیَمَ،
[10] تِیَ ࢻُوُرَوَࢽْجُوَ مَارَرُو ࢽغَسَیٜ ثِدِ دَلْمَࢽُتَیٜرُو لٜىٰرَ؞
[11] دَجِ ࢻَرِسَوَ لَا إِسَࢽٜ کَمْبِوُ عِیسَرُو ࢽجْدُّو بَدِیٜرَ؞ تِیَ رِجَࢻْتُرُو أَلَمَ لَا سَمٜىٰ تَیِرُو ࢻْلٜجُوُورُو مَیٜرَ؞
[12] أَمَّ عِیسَى ثَࢻْتِیٜ سِࢽْجٜ: «أَوِرُو أَمْ جَمَࢽْ أَدْیٜ أَلَمَ مَجَیْدْ؟ جِرٜمَرُو ࢽَیِرُو وُلْࢽْجَغَکِّ، أَلَمَ ࢻِمَ أَمْ جَمَࢽْ أَدْیٜرُو ࢻْلٜدِیوَوُو،» یٜࢽُو؞
[13] دَجِ تَیِیَ کُولْجٜ مَارَدْرُو وَلْدٜ ࢽغَیٜ بْرْمْ ࢻَلْجٜ کَࢽْجِ تُودْرُو کُویٜࢽُو؞
[14] ࢻُوُرَوَدْ ࢽغٜسَّࢽٜ بُرُودِ ࢽغُوجَࢽِّ؞ بُرُودِ ࢻَلْ ثُرُو مَارَدْیٜࢽْ غْࢽِیَ، ࢽَࢽْجَࢽْ أَوُو کْمْبُویٜ بَوُو؞
[15] عِیسَى سْمُوࢽْجَ کَسّٜ تَیِرُو: «یِسْ ࢻَرِسَوَا مَیْ حِرُدُسَّیٜرُو حَࢽْغَلْ غْࢽَࢽُواْ!» یٜࢽُو؞
[16] تَیِدْ کَتّٜࢽْجَࢽْ کْلَ بُرُودِࢽْجَ بَوُویٜࢽْ مَࢽَ بَدِیٜرَ؞
[17] عِیسَى أَدَ أَسُجٜ تَیِرُو: «أَوِرُو کْلَ بُرُودِ ࢽَࢽْدُوࢽْ بَوُویٜࢽْ مَࢽَࢽُوِدْ؟ رَ، کُوَ یَیٜ رُوٜ أَسُࢽُوِّ وَ؟ ࢽَیِ کْلَ تِکّٜرْࢽَا وَ؟
[18] سِمْࢽْدُووَ دُوُوࢽْ رُوَّوُو وَ؟ سْمُوࢽْدُووَ دُوُوࢽْ ࢻَࢽُّوَّوُو وَ؟ رَ، ࢽَیِ ࢽغٜسْکَدَ؟
[19] بُرُودِ أُوُ أَمْ دْوُ أُوُرُو ࢻْسَکّٜىٰکّْࢽِیَ، غَࢻْتُواْدْࢽْ جُواْ ࢽدَوُ یِمْبْرُوْ؟» یٜࢽُو؞ تِرُو: «مٜوُࢽْ یِࢽْدِࢽْ،» یٜرَ؞
[20] عِیسَیٜ: «کُورُو بُرُودِ تُلُرْ أَمْ دْوُ دٜوُرُو ࢻْسَکّٜىٰکّْࢽِیَ، غَࢻْتُواْدْࢽْ جُواْ کَلَرَمْ ࢽدَوُ یِمْبْرُوْ؟» تِرُو: «تُلُرْ،» یٜرَ؞
[21] دَجِ تَیِرُو: «تُو، کُوَ یَیٜ أَسُࢽُوِّ وَ؟» یٜࢽُو؞
[22] عِیسَىٰ ࢻُوُرَوَࢽْجُوَ بْلَ بَیْتْسَیْدَیٜرُو کَدِرَࢽِّیَ، أَمْ لَا کَمْبُ لَآ ثَوُدٜ عِیسَىٰ لُواْجَࢽٜ کَمْدَ لٜجُو یٜرَ؞
[23] دَجِ عِیسَى کَمْبُدَ مُکُّویٜࢽْ ثْدَࢽٜ جٜجٜ ࢽغَوُو بْلَیٜرُو کِتُّلُوُو؞ سِمْࢽْجُرُو لَلَّرِ تْوَجِیٜ تِرُو مُکُّو غْࢽَجِیٜ: «أَوُو لَا رُمِ وَ؟» ثْࢽٜ تِیَ کِوُورُو؞
[24] کَمْبُدْ کْلَ سَࢻْثٜ: «آه، أَمْ رُکِّ، أَمَّ أَلَمَࢽْجَ کْسْکَ دَدَجَیْ غَیْ،» یٜࢽُو؞
[25] کُورُو عِیسَى وَلْدٜ سِمْࢽْجُرُو مُکُّو غْࢽَیٜىٰࢽِّیَ، رِثّٜ سِمْ ثُوَࢽْدٜ أَوِسُو ࢻَرَکُّو ثُرُیْرُو وَلْیٜࢽُو؞
[26] دَجِ عِیسَیٜ: «بَرٜ بْلَدْمَرُو وَلْدْمٜ ࢽغَامِّ!» ثْࢽٜ کَمْدَ سَلَمْجٜ ࢻَدُورُو لٜجُو یٜࢽُو؞
[27] عِیسَىٰ ࢻُوُرَوَࢽْجُوَ بْلَدٜیَسُو ثِدِ بْرْࢽِ کَیْسَرِیَ ࢻِلِبِیٜࢽْ دَسَاࢽَدْرُو لٜىٰرَ؞ کْلَ جَوَلّٜࢽْ دُوُوࢽْ، عِیسَیٜ ࢻُوُرَوَࢽْجُرُو: «وُࢽْدُرُو وُوَ أَمْسُودْ ࢽغُوسٜرَ؟» ثْࢽٜ تَیِیَ کِوُورُو؞
[28] تَیِیٜ: «أَمْ لَا یَحْیـَى کَسَلَمَ ثَࢽِ، لَایٜ ࢽَوِ إِلْیَ ثَࢽِ، لَایٜ ࢽَوِیَ کُرٜىٰ ࢻَلْࢽْجَ ثَࢽِ،» یٜرَ؞
[29] دَجِ عِیسَى وَلْدٜ: «ࢽَیِدْ، وُࢽْدُرُو وُوَ ࢽغُوسٜوْ؟» ثْࢽٜ تَیِیَ کِوُورْࢽِّیَ، بِتُرُسّٜ: «ࢽِمَ أَلْمَسِیوُدْ وُو!» یٜࢽُو؞
[30] أَمَّ عِیسَى سْمُوࢽْجَ کَسّٜ تَیِرُو بَرٜ وُࢽْدُمَرُو تِ وُࢽْدُرُو وُلْجَغَࢽِّ یٜࢽُو؞
[31] کُورُو عِیسَى ࢻُوُرَوَࢽْجُرُو اللَّه کَدَرْجْࢽَ تَدَ کَمْبٜدْ کُتُّ تَیْ دَجٜ ثَࢽٜ أَمْوُرَوَا وُرَوَ رِمَࢽَّیٜیَ مَلْمْبَ أَتَّوْرَیٜیَ تِیَ وَجَࢽٜ رُورُو ثٜىٰسِ، کُورُو کَوُ یَکُّوَ رُووَرُو وَلْجٜ ثِجِ ثْࢽٜ تَیِیَ أَلَمْدُ بَدِیٜࢽُو؞
[32] أَدَ ࢻٜدٜرُو تَیِرُو وُلْیٜىٰࢽُو؞ بِتُرُسْ تِیَ سْغْرِرُو ثُتُّلُوٜ تِرُو ࢽجْکَّدُو بَدِیٜࢽُو؞
[33] أَمَّ عِیسَى سُوُورْدٜ ࢻُوُرَوَࢽْجُوَ کِرُࢽِّیَ، بِتُرُسُّو جْکَّدٜ: «ࢽَࢽِ کُولّٜ، إِوُلِیسْ! أَوُو کَرْوُࢽْمْلَࢽْ تَمَّدْ اللَّهیٜ غْࢽِ، کَمْبٜ!» یٜࢽُو؞
[34] دَجِ عِیسَى جَمَدَ ࢻُوُرَوَࢽْجُوَا ࢽَࢽْجُرُو بُواْجٜ تَیِرُو: «کَمْ لَا وُوَ غَ ثْرَاࢽَا، مْرَدُ کْلَࢽْجُیٜ وَجُو کْسْکَࢽْجُ کَرْمُویٜ ࢽغُوجُو وُوَ سْغَ؞
[35] دَلِلْࢽْجُدْ وُࢽْدُ دُوُوࢽْ رُوࢽْجُ رِوُو ثْرَاࢽَمَدْ رُوࢽْجُدَ ثُوَتْکِ، أَمَّ وُࢽْدُ دُوُوࢽْ وُوَ کَوُرِ کْجِ اللَّهیٜیَ ࢽَࢽْغَرُو رُوࢽْجُ ثُوَتْکْࢽَمَدْ رُوࢽْجُدَ ثْرِوِ؞
[36] کَمْ دُࢽِیَ أَدْ ࢽغَا جْغَࢽْدٜ رُوࢽْجُ أَسَرْجِیَ، ࢽدَ رِوَࢽْجُ؟
[37] أَوِ غْلٜ کَمْ ثٜ رُوࢽْجُ ثُوَࢽْدِ؟
[38] وُࢽْدُ دُوُوࢽْ جَمَࢽْ أَمْ کْࢽْجْࢽَ سُو، أَوُو دِوِ سُو دِیُویٜ أَدْࢽْ کْلَ وُوَ مَࢽَࢽِیَیٜࢽْ ࢽَࢽْغُجْࢽَمَدْ، تَدَ کَمْبٜدْ یٜ دَرَجَ بَوَࢽْجُیٜࢽْ مَلَیْیَوَ سَمٜىٰیَ رُوکُّو إِسِیَ، تِیَ ࢽَࢽْغُجِ،» یٜࢽُو؞