[1] ࢽغَوُو کَوُ غَࢽَیٜࢽْ عِیسَى بْرْࢽِ کَࢻَرْࢽَامبٜرُو وَلَّدَࢽِّیَ، جَمَدْ تِ ࢻَدُوࢽُّو ࢻَࢽْغٜرَ؞
[2] أَمْ ࢽغْوُ إِسَࢽٜ ثَࢻْتَࢽٜ، حَرْ ثِࢽَّمَࢽْ ࢽَ بَوُورُو وَلْیٜࢽُو؞ تَیِرُو مَࢽَ اللَّهیٜ ثْدِّ دُوُوࢽْ،
[3] أَمْ دٜوُ کَمْ تِیے ࢽُࢽَا لَا ࢽغُوجَࢽٜ إِسَࢽٜ ࢽَࢽْجُرُو کٜوُدُو؞
[4] أَمَّ جَمَ ثَࢻْتَࢽَ ࢽَࢽْغَرُو رَکْثَࢽٜ عِیسَىٰ کَرْࢽْجَیْوَوُودْ، دَجِ سُورُودْرُو جَوَࢽٜ کْلَ سُورُودْیٜ ࢽَ عِیسَى دْغَࢽَدْࢽْ کَجَࢽٜ کَمْدَ کْلَ بْࢽَرَمْࢽْجُیٜࢽْ سَیٜىٰرَ؞
[5] عِیسَى کَمْبْرْسٜࢽْجَدَ کِرُࢽِّیَ، کَمْ تِیࢽْجُ ࢽُࢽَدْرُو: «تَدَࢽِ، بِوُࢽْمْ غَوُرْدْࢽَ،» یٜࢽُو؞
[6] دَجِ مَلْمْبَ أَتَّوْرَیٜ لَا ࢽَدْࢽْ ࢽَࢻْکَدَ کَرْوُࢽْجَࢽْ:
[7] «أَوِرُو کَمْ أَتّْ ࢽغَیْ وُلْجِ؟ اللَّهَ غَسْکَجْࢽَ، دِیٜ! اللَّه غْࢽِیَ، وُࢽْدُمَ کَمْبُو بِوُ غَوُرْجِیے بَوُو، مَرٜ؟» ثَࢽِ؞
[8] سَدْمَࢽْ عِیسَى أَوُو کَرْوُࢽْجَیٜ أَسُجٜ تَیِرُو: «أَوِرُو کَرْوُࢽْدُوࢽْ أَوُو أَࢽِیَ وُلُّوِدْ؟
[9] ࢽدَسُو غْلٜ کَمْ تِیࢽْجُ ࢽُࢽَ أَدْرُو بُدُ وُو: ‹بِوُࢽْمْ غَوُرْدْࢽَ› وُلْدُمَ رَ ‹ثِࢽٜ بْࢽَرَمّْمْ ࢽغُوࢽٜ لٜࢽٜ!› وُلْدُمَ؟
[10] ࢽُوࢽُواْ، تَدَ کَمْبٜدْ ࢽَࢽْجُࢽْ کْࢽْدُوُو بِوُ أَمْبٜ دُࢽِیَلَࢽْ غَوُرْدُیٜ مبٜجِ!» یٜࢽُو؞ دَجِ کَمْ تِیࢽْجُ ࢽُࢽَدْرُو:
[11] «ࢽِرُو وُلْࢽْجْغْکِّ، ثِࢽٜ بْࢽَرَمّْمْ ࢽغُوࢽٜ ࢻَࢽّْمْبُو لٜࢽٜ!» یٜࢽُو؞
[12] سَدْمَࢽْ کَمْدْ ࢻُوُ أَمْ سَمَّیٜࢽْ ثِجٜ بْࢽَرَمْࢽْجُ ࢽغُوجٜ لٜىٰࢽُو؞ تَیِ سَمَّ جَوْرُو أَجَࢻْثَࢽٜ اللَّهَ ثُوࢽْغُورْࢽٜ: «أَوُو أَدْ غَیْ ࢽغَلْتٜمَ رُیْیٜࢽْدٜ!» یٜرَ؞
[13] کُورُو عِیسَى وَلْدٜ ثِ بْرْمْبٜرُو کَدِیُو؞ أَمْ کَدَ کَدَمِ ࢽَࢽْجُرُو إِسَࢽٜ تَیِیَ أَلَمْغٜࢽُو؞
[14] کُودُ ثْدِ دُوُوࢽْ، لٜوِ تَدَ أَلْࢻَوُسّٜ کِدَرَمْࢽْجُ أَکِّ مُواْیٜࢽْ ࢽَࢻْکَدَا کِرُو؞ عِیسَیٜ تِرُو: «وُوَ سْغَیْ!» یٜࢽِّیَ، ثِجٜ تِیَ غِیَ؞
[15] عِیسَى ࢻَدُو لٜوِیٜࢽْ مَسْࢽَرُو ࢽَࢻْثْࢽَ دُوُوࢽْ، أَکِّ مُواْمَسُووَ بِوُمَ غَدٜسُووَ کَدَ یٜ تِیَ ࢻُوُرَوَࢽْجُوَ رُوکُّو مَسْࢽَ دِیُورُو ࢽَࢻْکٜرَ، تَیِ غَیْ کَدَ تِیَ جَاࢽَ ࢽَࢽْغَرُو؞
[16] مَلْمْبَ أَتَّوْرَیٜ کْوُ ࢻَرِسَوَیٜ لَا عِیسَى بِوُمَسُووَ أَکِّ مُواْمَسُووَ رُوکُّو مَسْࢽَ ثَدِرُو کٜرُࢽِّیَ، ࢻُوُرَوَࢽْجُرُو: «أَوِرُو عِیسَى أَکِّ مُواْمَسُووَ بِوُمَ غَدٜسُووَ رُوکُّو مَسْࢽَ ثَدِدْ؟» یٜرَ؞
[17] عِیسَى أَدَ ࢻَࢽْغٜࢽِّیَ، تَیِرُو: «کَمْ دُوࢽْدِ غْࢽِیَ، کَمْ ࢽغَدْ لُواْتُورْ مَجِوَوُو؞ جِرٜمَسُووَ غْࢽِ، بِوُمَسُووَ بُواْدُرُو کَدِکُّو،» یٜࢽُو؞
[18] ࢻُوُرَوَ ࢽَوِ یَحْیـَیٜیَ ࢻَرِسَوَیٜیَ أَسٜمْ ثَدَیْ دُوُوࢽْ، أَمْ لَا ࢽَ عِیسَیٜرُو إِسَࢽٜ تِرُو: «أَوِرُو ࢻُوُرَوَ یَحْیـَیٜیَ ࢻَرِسَوَیٜیَ أَسٜمْ ثَدَیْ، أَمَّ ࢻُوُرَوَࢽْمْ ثَدَیْوَوُودْ؟» ثَࢽٜ کٜوُورُو؞
[19] عِیسَیٜ تَیِرُو: «مَیْ لَرُسَیٜ دَوُࢽْجَࢽْ دُوُوࢽْ، ࢽغَلَدِیَ أَسٜمْ ثَدَیْ وَ؟ أَعَ، مَیْ لَرُسَیٜ دَوُࢽْجَࢽْ دُوُوࢽْ، أَسٜمْ ثَدَیْوَوُو؞
[20] أَمَّ سَ إِسٜ مَیْ لَرُسَیٜدَ دَوُࢽْجَࢽْ ثَتُّلُوِیَ، سَ أَدْࢽْ دُوُوࢽْ أَسٜمْ ثَدَیْ؞
[21] «وُࢽْدُمَ غُࢽْتُ بَتَّ بْرِࢽّٜ إِࢽْغِرُو ثَکّٜ ثَࢻْتْࢽِّ ࢽغُوجٜ کَجْمُ دِࢽَرُو ثُکُّدُدِوَوُو؞ ࢽغَیْ ثْدِیَ، بَتَّ بْرِࢽْدْ دِࢽَدْیٜࢽْ ثَࢻْتٜ کَرْدُدْ ثَیٜمَرُو کُرَرُو وَلْجِ؞
[22] کُورُو وُࢽْدُمَ دِبٜࢽْ بْرِࢽْ ࢽغُوجٜ سَتْکِ دِࢽَرُو ࢻِجِیوَوُو؞ ࢽغَیْ ثْدِیَ، دِبٜࢽْدْ سَتْکِدَ ࢻَلْجِ؞ دِبٜࢽْ یٜ بَوُو، سَتْکِ یٜ بَوُو؞ أَعَ، أَمْسُو دِبٜࢽْ بْرِࢽْدَ سَتْکِ بْرِࢽُّو ࢻِجَغَیْ،» یٜࢽُو؞
[23] یِمْ تُسْتُیٜیَ لَا عِیسَىٰ ࢻُوُرَوَࢽْجُوَ کُلُو أَلْغَمَیٜ رٜجَࢽٜ کُوجَیْ دُوُوࢽْ، ࢻُوُرَوَدْ کْلَ أَلْغَمَیٜ ࢻِࢻِرْدُ بَدِیٜرَ؞
[24] ࢻَرِسَوَ لَایٜ تِرُو: «أَکُّو رُیْ، أَوِرُو ࢻُوُرَوَࢽْمْ أَوُو یِمْ تُسْتُیٜیَ کْࢽْدُورُو حَرَمْدَ ثَدِدْ؟» یٜرَ؞
[25] عِیسَیٜ تَیِرُو: «سَ ࢽَوِ دَاوُدَا أَمْࢽْجُوَ کْࢽَ ࢻَࢽْجَࢽَدْࢽْ، أَوُو ثْدْࢽَدَ ࢽغَلْتٜمَ کِتَوُلَࢽْ کْرَࢽُوِّ وَ؟
[26] جَمَࢽْ أَبِیَتَرْ رِمَࢽْ کُرَیٜدْࢽْ ثُرُو ࢻَدُو اللَّهیٜرُو ࢽغَیٜ بُرُودِ سَدَایٜ ࢽغُوجٜ جْغْرٜ أَمْࢽْجُ یٜرُو ثٜ غٜوُو؞ رِمَࢽَّرُو غْࢽِیَ، أَمْ غَدٜرُو بُرُودِ سَدَایٜ ࢽغْرُودْ حَرَمْ!»
[27] دَجِ عِیسَیٜ تَیِرُو: «اللَّه کَمْدَ یِمْ تُسْتُیٜ ࢽَࢽْغَرُو أَلَکْثْࢽِّ، یِمْ تُسْتُیٜدَ کَمْ ࢽَࢽْغَرُو أَلَکّٜࢽُو؞
[28] أَدْ ࢽَࢽْغَرُو تَدَ کَمْبٜدْ کْمَ یِمْ تُسْتُیٜ، دِیٜ!» یٜࢽُو؞