[1] کُورُو عِیسَى وَلْدٜ: «جِرٜمَرُو ࢽَیِرُو وُلْࢽْجَغَکِّ، أَمْ لَا ࢽَ أَدْࢽْ دَادَ مبٜجِ، کَوُ کَوُࢽْجَ دَجِدْرُو، ࢽُودُو بَرْغَا اللَّهیٜ کْࢽْدُوُووَرُو إِسِ ثَرُیْ،» یٜࢽُو؞
[2] ࢽغَوُو أَدْیٜࢽْ کَوُ أَرَکُّوَ عِیسَى ثِجٜ بِتُرُسَّ یَعْࢼُوبَا یَحْیـَىٰ رُࢽْجَا ࢽغُوجٜ کْلَ کَوْ کُرُوُ لَایٜرُو غٜوَ؞ ࢻُوُࢽْجَࢽْ عِیسَیٜ أَلَمَࢽْجُ ࢻَلْدٜ
[3] کَجْمُࢽْجُ یٜ بُلْ ࢻُوکْ تَیْ دَجٜ یِیلْجِرُو وَلْیٜࢽُو، جِرِ وُࢽْدُمَ دُࢽِیَلَࢽْ کَرٜ تُلْجٜ رَکْثٜ بُلْجِوَوُودْ غَیْ؞
[4] کُورُو ࢽَوِ إِلْیَا ࢽَوِ مُوسَىٰ تَیِرُو ࢻْلٜدَغَࢽٜ عِیسَىٰ جَࢽْدٜدُ بَدِیٜرَ؞
[5] دَجِ بِتُرُسّٜ عِیسَرُو: «سَیِࢽَّ، أَࢽْدِ ࢽَ أَدْࢽْ مبٜجِدْ جَوْرُو ࢽغْلَ؞ کُولّٜ ࢽغُرْوُو یَکُّ لَمِّیُو: ࢻَلْ کَاࢽْمْ، ࢻَلْ ࢽَوِ مُوسَیٜ، ࢻَلْ یٜ ࢽَوِ إِلْیَیٜ،» یٜࢽُو؞
[6] أَوُو وُلْجِدْمَا ࢽُوجْࢽِّ، تَیِ رِجَࢽَ ࢽَࢽْغَرُو؞
[7] دَجِ ࢻُوࢻُووْ إِسٜ تَیِیَ جَکّٜࢽُو؞ ثُرُو ࢻُوࢻُووْدْیٜࢽْ کُواْ ࢽُکْثٜ: «أَدْمَ تَدَࢽِ وُو، تِیَ جَوْرُو رَاکّْࢽَ؞ مَࢽَࢽْجُ ࢻَࢽُّواْ!» یٜࢽُو؞
[8] سَدْمَࢽْ مٜمٜىٰرَࢽِّیَ، عِیسَى تِلُوࢽْجُ لُوࢽْ غْࢽِیَ، وُࢽْدُمَا ثَرُࢽِّ؞
[9] کْلَ کَوْدْیٜࢽْ جْࢻْثَیْ دُوُوࢽْ، عِیسَى تَیِرُو سَࢻْثِیٜ بَرٜ أَوُو ثَرُࢽَ أَدَ وُࢽْدُمَرُو وُلْجَغَࢽِّ، سَیْ تَدَ کَمْبٜدْ کَرْمُولَࢽْ ثِجِیَ دُوُوࢽْ یٜࢽُو؞
[10] تَیِ یٜ لَمَرْ أَدَ ثُرُوࢽْجَࢽْ رُویٜرَ، أَمَّ أَوِ مَاࢽَ کَرْمُولَࢽْ ثِدُیٜدْ وُورُو کَتّٜࢽْجَࢽْ تَوُورِ کَسَرْغَ؞
[11] دَجِ ࢻُوُرَوَدْیٜ تِرُو: «أَوِرُو مَلْمْبَ أَتَّوْرَیٜدْ سَیْ ࢽَوِ إِلْیَ بُرْوُوجٜ إِسِ ثَࢽِدْ؟» ثَࢽٜ تِیَ کٜوُورُو؞
[12] عِیسَیٜ تَیِرُو: «جِرٜمَرُو ࢽَوِ إِلْیَ بُرْوُوࢽْ إِسٜ أَوِسُو کَلْکَلُّو کَلَکْثِ؞ أَوِرُو غْلٜ کِتَوُلَࢽْ تَدَ کَمْبٜدْ تَیْ دَجٜ کُتُّ ثَࢽٜ أَمْ تِیَ رُجَࢽٜ وَجَیْ رُوُوَدَدْ؟
[13] أَمَّ ࢽَیِرُو وُلْࢽْجَغَکِّ، ࢽَوِ إِلْیَ إِسْࢽَ، کُورُو أَوِسُو کُتُّ رُوࢽْجَ ثْرَاࢽَا تِرُو کٜدُّو، جِرِ کْلَࢽْجُࢽْ کِتَوُلَࢽْ رُوُوَدَدْ غَیْ،» یٜࢽُو؞
[14] ࢽَ ࢻُوُرَوَ غَࢻْثَࢽَدْیٜرُو کَدِرَࢽِّیَ، أَمْ کَدَ کَدَمِ تَیِیَ دِرِجَࢽٜ کْلْجَࢽَ، کُورُو مَلْمْبَ أَتَّوْرَیٜ یٜ تَیِرُو کَمْبِوُ ثَدِّ کٜرُو؞
[15] جَمَدْ عِیسَىٰ کٜرُࢽِّیَمَ، تَیِ سَمَّ أَجَࢻْثَࢽٜ ثَغَسٜ إِسَࢽٜ تِیَ لٜوَیٜرَ؞
[16] دَجِ عِیسَیٜ ࢻُوُرَوَدْرُو: «کْلَ أَوِیٜࢽْ تَیِیَ کَمْبِوُ دِوِ؟» ثْࢽٜ تَیِیَ کِوُورُو؞
[17] ثُرُو جَمَدْیٜࢽْ کَمْ لَایٜ تِرُو: «سَیِࢽَّ، تَدَࢽِ ࢽِرُو ࢽجُکُّدْکُّو؞ تِ کَرُوَا، سٜدَࢽْدْ تِرُو مَࢽَ دَࢻْثْغْࢽَ؞
[18] ࢽدَرَࢽْ یَیٜ کَرُوَدْ تِیَ ثْدَیْیَ، تِیَ ثِدِرُو بْࢻْ غْࢻْثِیٜ، ثِࢽْجُ ࢽغَ بِلْوُوَ شٜرِࢽْجُ ࢽَلْجٜ سُجِ؞ سٜدَࢽْدَ دُجَرُو ࢻُوُرَوَࢽْمْبَ لُواْیٜکّْࢽِیَ، تَیِرُو کَتْکٜرُو،» یٜࢽُو؞
[19] عِیسَیٜ تَیِرُو: «ࢽَیِ أَمْ جَمَࢽْ أَدْیٜسُو کَمْبْرْسٜࢽَمْبُوُ، حَرْ سَوِ غَیْرُو دَوُࢽْدُوࢽْ دْغَکِّ؟ کُورُو سَوِ غَیْرُو ࢽَیِیَ رَࢽّجَکِّ؟ تَدَدَ وُرُو سُکُّدُواْ!» یٜࢽُو؞
[20] دَجِ تَدَدَ تِرُو کٜکُّدُو؞ سٜدَࢽْدْ عِیسَىٰ کِرُࢽِّیَمَ، تَدَدَ بَکْثٜ، کَرْ کَرْ لُولُوجٜ ثِدِرُو ثُرٜ ثِࢽْجُ ࢽغَ بِلْوُوَ ࢻْرْوْرْیٜࢽُو؞
[21] عِیسَیٜ بَوَ تَدَدْیٜدْرُو: «تْࢽْ سَوِ غَیْ أَدْ تِرُو وَکَّجِیے؟» ثْࢽٜ تِیَ کِوُورُو؞ کَمْدْیٜ تِرُو: «غَࢽَࢽْجُࢽْ؞
[22] تِیَ ࢽجٜجُورُو ࢽغْوُرُو کَࢽُّ سُو، إِࢽْغِ سُورُو غْࢻْثْغْࢽَ؞ رَࢽْغْمِیَ، مَرْࢽٜ ࢽجُࢽُوسَࢽٜ أَࢽْدِیَ سَسَࢽٜ!» یٜࢽُو؞
[23] دَجِ عِیسَیٜ تِرُو: «أَ! رَࢽْغْمِیَ؟ کَمْ دُوُوࢽْ مْرْسَجْࢽَمَدْرُو أَوِسُو یُوجِ!»
[24] سَدْمَࢽْ بَوَ تَدَدْیٜ کُواْ سَࢻْثٜ: «مْرْسَࢽْجْکّْࢽَ، مَرْࢽٜ کَمْبْرْسٜࢽَمْبُࢽِࢽْ بَࢽَسْغْࢽٜ!» یٜࢽُو؞
[25] عِیسَى أَمْ کَدَ ࢽَدْرُو ثَغَسٜ إِسَیْرُو کِرُࢽِّیَ، سٜدَࢽْدْرُو جْکَّدٜ: «ࢽِمَ سٜدَࢽْ مُوَ کْغْࢽْجِمَ، وَدَ ࢽجِکِّ، تِیَ کُولّٜ لُوٜ، بَرٜ غَدٜرُو تِرُو ࢽغَامِّ!» یٜࢽُو؞
[26] دَجِ سٜدَࢽْدْ بُرْوُ ثَکّٜ تَدَدَ تَیْ دَجٜ بَکْثٜ ࢻْرْدَکْثٜ کُولْجٜ کِلُوُو؞ تَدَدْ أَلَمَ کَمِࢽْ غَیْرُو وَلْجٜ، حَرْ أَمْ ࢽغْوُیٜ: «تِ بَوُو، ࢽُࢽَ!» یٜرَ؞
[27] أَمَّ عِیسَى تِیَ مُکُّویٜࢽْ ثْدَࢽٜ سَࢻْکٜࢽِّیَ، تَدَدْ ثِجٜ دَیٜࢽُو؞
[28] عِیسَى ࢻَدُورُو کْرْغَاࢽِّیَ، ࢻُوُرَوَࢽْجُیٜ رُࢽْجَࢽْ تِرُو: «أَوِرُو سٜدَࢽْدَ دُدَ أَࢽْدِرُو کَتْکٜرُو؟» ثَࢽٜ تِیَ کٜوُورُو؞
[29] عِیسَیٜ تَیِرُو: «مُودُوَࢽْ غْࢽِیَ، جَوَلْ سٜدَࢽْ جِرِ أَدَ دُدُیٜ بَوُو،» یٜࢽُو؞
[30] دَجِ عِیسَىٰ ࢻُوُرَوَࢽْجُوَ ࢽَدَ کُولْجَࢽٜ ثِدِ غَلِلٜىٰࢽْ کُویٜرَ؞ عِیسَى وُࢽْدُمَ ࢽُوجِیَ ثْرَاࢽِّ،
[31] دَلِلْࢽْجُدْ ࢻُوُرَوَࢽْجُوَ أَلَمْجِ ࢽَࢽْغَرُو؞ تَیِرُو: «تَدَ کَمْبٜدَ مُکُّو أَمْبٜرُو سْرْثَّغَࢽٜ تِیَ رُورُو ثٜىٰسِ؞ ࢽغَوُو تِیَ ثٜىٰسْࢽَیٜࢽْ کَوُ یَکُّوَ رُووَرُو وَلْجٜ ثِجِ،» یٜࢽُو؞
[32] أَمَّ ࢻُوُرَوَدْ مَࢽَ أَدَ أَسُجَࢽِّ، کُورُو تِیَ کُورُورُو رِیٜرَ؞
[33] دَجِ عِیسَىٰ ࢻُوُرَوَࢽْجُوَ بْرْࢽِ کَࢻَرْࢽَامبٜرُو کَدِرَ؞ عِیسَى ثُرُو ࢻَدُویٜࢽْ دُوُوࢽْ، تَیِرُو: «کْلَ أَوِیٜࢽْ جَوَلَّࢽْ کَمْبِوُ دِوِدْ؟» ثْࢽٜ تَیِیَ کِوُورُو؞
[34] أَمَّ تَیِ ثِࢽْجَ کَجَࢽِّ، دَلِلْࢽْجُدْ جَوَلَّࢽْ کَمْبِوُ کْلَ وُࢽْدُࢽْجَ کُرَ وُویٜࢽْ ثَدْࢽَ ࢽَࢽْغَرُو؞
[35] دَجِ عِیسَى ࢽَࢻْثٜ تَیِ مٜوُࢽْ یِࢽْدِࢽْدَ بُواْجٜ تَیِرُو: «کَمْ لَا ࢻُوُمَرُو وَلْدُ ثْرَاࢽَا، جَمَ سَمَّیٜ ࢽغَوُومَا وُولُودِࢽْجَارُو وَلْجُو!»
[36] دَجِ تَدَاࢽَ لَآ ࢽغُوجٜ دَوُࢽْجَࢽْ إِسَدَیٜىٰࢽُو؞ تَدَدَ ࢽغَࢽْجِرُو ࢽغُویٜࢽِّیَ، تَیِرُو:
[37] «وُࢽْدُ دُوُوࢽْ تَدَاࢽَ أَدْ غَیْیَ ثُࢽِلَࢽْ ثْمُواْࢽَمَدْ، وُمَا سْمُواْ؞ کُورُو وُࢽْدُ دُوُوࢽْ وُوَ سْمُواْࢽَمَدْ، وُوَ غْࢽِ، تِ وُوَ سُࢽُودْࢽَمَدَ ثْمُواْ،» یٜࢽُو؞
[38] یَحْیـَیٜ عِیسَرُو: «سَیِࢽَّ، کَمْ لَا سٜدَࢽْسُو ثُࢽْمْلَࢽْ دُجِ کِرُیْیٜࢽْدٜیَ، أَࢽْدِیَ سَاࢽِّ ࢽَࢽْغَرُو، تِرُو دَࢻْکٜىٰیْیٜ!» یٜࢽُو؞
[39] أَمَّ عِیسَیٜ: «بَرٜ تِرُو دَࢻْکْوِّ، دَلِلْࢽْجُدْ وُࢽْدُمَ ثُࢽِلَࢽْ أَوُو أَجَبَّ لَآ ثْدِدْ رَکْثٜ دِوِࢽِ وُلْجِوَوُو؞
[40] أَوُووَ کَمْ لَوَلَمَࢽْدٜ غْࢽِدْ کَاࢽدٜ؞
[41] وُࢽْدُ دُوُوࢽْ ࢽَیِ أَلْمَسِیوُیٜ ࢽَࢽْغَرُو إِࢽْغِ کْࢽْجَیٜ غْمْدُواْلُومْ ࢻَلْ ࢽجَدْࢽَمَدْ، جِرٜمَرُو ࢽَیِرُو وُلْࢽْجَغَکِّ، تْمَّرُو مُکُووَࢽْجُ ࢻُثِّوَوُو؞
[42] «وُࢽْدُ دُوُوࢽْ تَدَوَ سَࢽَࢽَ وُوَ مْرْسَسَࢽَسُو أَࢽِیٜ ࢻَلْࢽْجَا ثَکّٜ تَلْجٜ بِوُ ثْدِدْ، کَمْدْیٜ دَوْࢽْجُرُو کَوْ ࢽٜدُرَمْ مَࢻْࢽْدِ لُجَغَࢽٜ بْرْمْبُو غْࢻْثَاࢽَمَ تِرُو ࢽغَلْوُو؞
[43] مُکُّوࢽْمْ ࢽجَکّٜ تَلّْمٜ بِوُ دِمِیَ، تِیَ کَمّٜ! مُکُّو یِࢽْدِیَ کَࢽُّ جَاࢽَمَیٜ تْمَّرُو ࢽُیْوَوُورُو ࢽغَوُودْرُووَ، مَسْکِࢽْ رُو سَوِسُویٜرُو ࢽغَامَّمَ ࢽِرُو ࢽغَلْوُو؞
[44] [ثُرُو جَاࢽَمَیٜدْࢽْ کُرِ تِیدَ جَوُیْدْ سَࢽُیْوَوُو، کُورُو کَࢽُّدْ یٜ تْمَّرُو ࢽُیْوَوُو؞]
[45] کُورُو سِࢽْمْ ࢽجَکّٜ تَلّْمٜ بِوُ دِمِیَ، تِیَ کَمّٜ! سِ یِࢽْدِیَ کَࢽُّ جَاࢽَمَیٜرُو ࢽِیَ غْࢻْتُوُدْرُووَ، دُࢽْغُ رُو سَوِسُویٜرُو ࢽغَامَّمَ ࢽِرُو ࢽغَلْوُو؞
[46] [ثُرُو جَاࢽَمَیٜدْࢽْ کُرِ تِیدَ جَوُیْدْ سَࢽُیْوَوُو، کُورُو کَࢽُّدْ یٜ تْمَّرُو ࢽُیْوَوُو؞]
[47] کُورُو سِمّْمْ ࢽجَکّٜ تَلّْمٜ بِوُ دِمِیَ، تِیَ کُلَیْࢽٜ! سِمْ یِࢽْدِیَ کَࢽُّ جَاࢽَمَیٜرُو ࢽِیَ غْࢻْتُوُدْرُووَ، سِمْ ࢻَلَّ ࢽُودُو بَرْغَا اللَّهیٜرُو ࢽغَامَّمَ ࢽِرُو ࢽغَلْوُو؞
[48] ثُرُو جَاࢽَمَیٜدْࢽْ کُرِ تِیدَ جَوُیْدْ سَࢽُیْوَوُو، کُورُو کَࢽُّدْ یٜ تْمَّرُو ࢽُیْوَوُو؞
[49] «وُࢽْدُسُو کَࢽُّلَࢽْ مَࢽْدَارُو وَلْجِ؞
[50] مَࢽْدَدْ ࢽغْلَ، أَمَّ کْلَمْبُو وَلْیٜࢽُووَ، جِرِ ࢻِࢽْ غْلٜ ثَیٜࢽْجُ غَیْرُو وَلْجِ؟ أَدْ ࢽَࢽْغَرُو ࢽَیِ کْلَࢽْدُو مَࢽْدَارُو وَلُّواْ، أَمَࢽْدُووَ یٜ ࢽَࢽْلٜوَࢽْ دْغَیْوُو!»