[1] جٜرُجَلٜمْبَ کَرْࢽْجَࢽٜ غْرٜ بْلَ بَیْتْࢻَجٜىٰیَ بَیْتَࢽِیٜیَ ࢽَ کَوْ جَیْتُࢽّٜدْرُو کَدِرَࢽِّیَ، عِیسَى ࢻُوُرَوَࢽْجُیٜ یِࢽْدِ ثُࢽُودٜ
[2] تَیِرُو: «بْلَ ࢻُوُࢽْدُویٜدْرُو لٜࢽُواْ! ࢽغَوُوِیَمَ، کُتَّ کُورُویٜ وُࢽْدُمَ تِرُو ࢽغَلْتٜ جُوَࢽِّ تُوَدَ ࢽَغْوِ؞ ࢻْرَࢽْغُواْ کُدُواْ!
[3] کَمْ لَایٜ ࢽَیِرُو: ‹أَوِرُو أَدَ دِوِ؟› ثْࢽِیَ، تِرُو: ‹کْمَدْ تِلَࢽْ مْرَدُࢽْجُوَ، کْرْمَمَ کَلَکْثِ،› وُلْغْࢽُواْ!»
[4] دَجِ لٜجَࢽٜ کُتَّدْ لَیْلَࢽْ ثِ ࢻَدُویٜࢽْ تُوَدَ ࢽَیٜىٰرَ؞ کُتَّدَ ࢻْرَکْثَیْ دُوُوࢽْ،
[5] أَمْ لَا ࢽَدْࢽْ دَادَیٜ تَیِرُو: «أَوِ دِوِ؟ أَوِرُو کُتَّدَ ࢻْرَࢽْغُوِ؟» یٜرَ؞
[6] جِرِ عِیسَى تَیِرُو وُلْجْغْࢽَدْ غَیْرُو جَاوُ ثَدْࢽٜ أَمْدْ یٜ تَیِیَ کُولْیٜرَ؞
[7] دَجِ کُتَّدَ ࢽَ عِیسَیٜرُو ثَوُدٜ کَلْوُوَࢽْجَ کْلَدْرُو ࢻٜرْجَغَࢽٜ عِیسَى جُوَࢽٜ ࢽَࢻْکٜࢽُو؞
[8] جَمَ کَدَ یٜ کَلْوُوَࢽْجَ کْلَ جَوَلّٜࢽْ ࢻٜرْیٜرَ، لَا یٜ ࢽغْلَیْ کَرَاࢽْ کَمْجَࢽٜ جَوَلْدْلَࢽْ سْرٜتْکٜرَ؞
[9] أَمْ ࢻُوُ غْرْجَࢽَ سُو، ࢽغَوُوࢽْجُ جَاࢽَ سُو کُواْ سَࢻْثَࢽٜ: «حُوسَࢽَّ! بَرْغَا تِ ثُ کْمَࢽْدٜىٰࢽْ إِسِمَدْ!
[10] ࢽُودُو بَوَࢽْدٜ مَیْ دَاوُدَیٜ إِسِمَدَ بَرْغَاجُو! حُوسَࢽَّ، مَیْ سَمٜمَرُو دَرَجَ تِیُو!» ثَࢽِ؞
[11] أَدْغَیْمَ عِیسَى جٜرُجَلٜمْبُو إِسٜ ࢻَدُو اللَّهیٜرُو کْرْغَوُو؞ أَوِسُو کِرُࢽِّیَ، دُࢽِیَ لْمْجْࢽَ ࢽَࢽْغَرُو، تَیِ مٜوُࢽْ یِࢽْدِࢽْدَ رُوکُّو ثَلُوٜ بْلَ بَیْتَࢽِیٜرُو لٜىٰرَ؞
[12] وَجْࢽَࢽْجُوَ عِیسَى ࢻُوُرَوَࢽْجُوَ بْلَ بَیْتَࢽِیٜلَࢽْ کٜلُوُࢽِّیَ، کْࢽَ تِیَ کِدَ؞
[13] کُرُوُࢽْ یَ تَرْمُیٜ کَلُࢽْجُوَ کِرُࢽِّیَ، وَࢽٜىٰ تَدَ ثُوَࢽْدِ ثْࢽٜ ࢽَدْرُو کَدِیُو؞ کَدِࢽِّیَ، کَلُ غْࢽِیَ، أَوِمَ ثُوَࢽْدْࢽِّ، دَلِلْࢽْجُدْ سَ تَرْمُیٜ غْࢽِ ࢽَࢽْغَرُو؞
[14] دَجِ عِیسَیٜ تَرْمُدْرُو: «بَرٜ وُࢽْدُمَ غَدٜرُو تَدَࢽْمْ جُوُࢽِّ!» یٜࢽُو؞ کُورُو ࢻُوُرَوَࢽْجُ أَدَ ࢻَࢽْغٜرَ؞
[15] دَجِ عِیسَىٰ ࢻُوُرَوَࢽْجُوَ جٜرُجَلٜمْبُو کَدِرَ؞ عِیسَى بَلْبَلَّ ࢻَدُو اللَّهیٜرُو ࢽغَیٜ لَدُومَسُووَ ࢽجُوُومَسُووَا دُدُ بَدِیٜࢽُو؞ تٜوُرْ وُرِ ثَࢽْجِمَسُویٜیَ ࢽَࢻْتُرَمْ تَتَّوَرْ لَدُومَسُویٜیَا تْمْبَلْجٜ
[16] وُࢽْدُ یَیٜرُو ࢻَدُو اللَّهیٜدْیٜࢽْ کَرٜیَ کُودُ دَࢻْکٜىٰࢽُو؞
[17] دَجِ جَمَدَ أَلَمْجٜ تَیِرُو: «کِتَوُلَࢽْ رُوُوَدَ: ‹ࢻَࢽِّدَ ࢻَدُو مُودُوَیٜ جَمَ دُࢽِیَ سَمَّیٜلَࢽْ بُواْجَیْ،› أَمَّ ࢽَیِدْ تِیَ جُوࢽْغُو غْࢽْدٜوُیٜرُو کَلَکّٜوْ!» یٜࢽُو؞
[18] وُرَوَ رِمَࢽَّیٜیَ مَلْمْبَ أَتَّوْرَیٜیَ أَدَ ࢻَࢽْغٜرَࢽِّیَ، جَوَلْ عِیسَىٰ ࢽجٜجُویٜ مَدُ بَدِیٜرَ؞ عِیسَىٰ رِجَࢽَ، دَلِلْࢽْجُدْ جَمَ سَمَّ أَلَمْدُࢽْجُدَ أَجَࢻْثَࢽَ ࢽَࢽْغَرُو؞
[19] دُࢽِیَ لْمْغٜࢽِّیَ، عِیسَىٰ ࢻُوُرَوَࢽْجُوَ بْرْࢽِدْࢽْ کٜلُوُو؞
[20] وَجْࢽَࢽْجُوَ سُوَ لْࢻْ جَوَلْدْیٜࢽْ کُوجَیْ دُوُوࢽْ، یَ تَرْمُیٜدَ حَرْ ࢻْرْدُࢽْجُرُو ࢽغَوْ ࢽغَمْجْࢽَ کٜرُو؞
[21] دَجِ بِتُرُسْ تَکْثٜ عِیسَرُو: «سَیِࢽَّ، أَکُّو رُیْ! تَرْمُ بَسْکُࢽْمَّدْ ࢽغَمْجْࢽَ!» یٜࢽُو؞
[22] عِیسَیٜ تَیِرُو: «اللَّهَ مْرْسَࢽُواْ!
[23] جِرٜمَرُو ࢽَیِرُو وُلْࢽْجَغَکِّ، وُࢽْدُ دُوُوࢽْ کَوْ کُرُوُ أَدْرُو: ‹ثِࢽٜ بْرْمْبُو ࢻِدْغْࢽٜ!› ثْࢽٜ کَرْوُࢽْجُࢽْ شٜکُّ بَوُورُو أَوُو وُلْجْࢽَدْ وَکَّجِرُو مْرْسَجِیَ، وَکَّجِ؞
[24] أَدْ ࢽَࢽْغَرُو ࢽَیِرُو وُلْࢽْجَغَکِّ، أَوِ یَیٜ مُودُوَلَࢽْ کُورُوِیَ، تِیَ ࢻَࢽْدُوَّرُو مْرْسَࢽُواْ، کَاࢽدُوجِ؞
[25] مُودُوَرُو دَࢽُوَّ دُوُوࢽْ، کَمْ لَا کَرْوُࢽْ تَوَّا، تِیَ غَوُرْࢽُواْ! بَوَࢽْدُو مَیْ سَمٜمَ یٜ بِوُࢽْدُو غَوُرْࢽْجَغَیْ؞
[26] [أَمَّ تِیَ غَوُرْࢽُوِّیَ، بَوَࢽْدُو مَیْ سَمٜمَ یٜ بِوُࢽْدُو غَوُرْࢽْجَغَیْوَوُو؞]»
[27] کُورُو عِیسَىٰ ࢻُوُرَوَࢽْجُوَ وَلْدَࢽٜ جٜرُجَلٜمْبُو کَدِرَ؞ عِیسَى ثُرُو ࢻَدُو اللَّهیٜࢽْ دَدَجِ دُوُوࢽْ، وُرَوَ رِمَࢽَّیٜیَ مَلْمْبَ أَتَّوْرَیٜیَ أَمْوُرَوَا ࢽَࢽْجُرُو إِسَࢽٜ
[28] تِرُو: «کْࢽْدُوُو ࢻِلَࢽْ أَوُو أَࢽِیَ دِمِ؟ وُࢽْدُ ࢽِرُو کْࢽْدُوُو أَوُو أَࢽِیَ دِیُویٜدَ ࢽجُو؟» ثَࢽٜ تِیَ کٜوُورُو؞
[29] عِیسَیٜ تَیِرُو: «وُ یٜ ࢽَیِرُو کُورُو ࢻَلْ ࢽجَدّْکِّ، وُرُو جَاوُدَ سٜوُو؞ سِوِیَ، وُ یٜ کْࢽْدُوُو ࢻِلَࢽْ أَوُو أَࢽِیَ دِکِّدَ ࢽَیِرُو وُلْࢽْجَغَکِّ؞
[30] کَسَلَ یَحْیـَى جَمَرُو ثْدّْࢽَدْ، سَمٜىٰࢽْ کَدِیُو رَ کَمْبٜࢽْ؟ وُرُو جَاوُدَ سٜوُو!» یٜࢽُو؞
[31] دَجِ کَتّٜࢽْجَࢽْ سَوَرْدَࢽٜ: «‹سَمٜىٰࢽْ› وُلِّیٜیَ، أَࢽْدِرُو: ‹تُو، أَوِرُو غْلٜ تِیَ کَسَدُّوِّدْ؟› ثْࢽٜ سَوُورِ؞
[32] أَمَّ ‹کَمْبٜࢽْ› وُلِّیٜ وَ؟» یٜرَ؞ أَدَ وُلْدُࢽْجَدْ، جَمَدَ رِجَࢽَ، دَلِلْࢽْجُدْ أَمْ سَمَّ یَحْیـَىٰ ࢽَوِرُو ࢽغُوجَࢽَ ࢽَࢽْغَرُو؞
[33] دَجِ عِیسَرُو: «ࢽُوࢽِیٜࢽْدٜ،» یٜرَ؞ عِیسَیٜ تَیِرُو: «وُ یٜ کْࢽْدُوُو ࢻِلَࢽْ أَوُو أَࢽِیَ دِکِّدَ وُلْࢽْجَغَکِّوَوُو،» یٜࢽُو؞