[1] عِیسَى ࢻَدُو اللَّهیٜࢽْ لُوُو ثْدِ دُوُوࢽْ، ࢻُوُرَوَࢽْجُیٜ ࢻَلْ تِرُو: «سَیِࢽَّ، أَکُّو رُیْ کَوْ أَࢽِیَ سُورُو أَࢽِیَ جَوْمَرُو أَجَبَّ!» یٜࢽُو؞
[2] عِیسَیٜ تِرُو: «سُورُو مَࢻْࢽْدِ مَࢻْࢽْدِ أَࢽِیَ رُمَّ، غْࢽَ؟ کَوْ أَࢽِ سَمَّا وُرْجَࢽٜ ࢻِجَیْ، حَرْ تِلُومَ کْلَ کَمَࢽْجُیٜࢽْ غَࢻْثِوَوُورُو وَلْجِ،» یٜࢽُو؞
[3] عِیسَى کْلَ کَوْ جَیْتُࢽّٜࢽْ ࢽَ ࢻَدُو اللَّهیٜ تُرُیْدْࢽْ ࢽَࢻْثْࢽَ دُوُوࢽْ، بِتُرُسَّ یَعْࢼُوبَا یَحْیـَىٰ أَࢽْدَرَوُسَّ رُࢽْجَࢽْ إِسَࢽٜ تِرُو:
[4] «أَࢽْدِرُو وُلْسَغَࢽٜ، سَوِ أَوُو أَࢽِ وَکَّجَیْ؟ کُورُو أَوُو أَࢽِ سَمَّیٜ سَࢽْجَ ثْدِیَ، أَوِ أَلَمَ دُوُوࢽْ أَمْبُو ࢻْلٜدِیدْ وُو؟» ثَࢽٜ تِیَ کٜوُورُو؞
[5] عِیسَیٜ تَیِرُو: «حَࢽْغَلْ غْࢽَࢽُواْ، بَرٜ وُࢽْدُمَ ࢽَیِیَ ࢽجَوَتْکْࢽِّ!
[6] أَمْ ࢽغْوُ ثُࢽِلَࢽْ إِسَࢽٜ: ‹وُمَ تِ وُو!› ثَࢽٜ أَمْ کَدَا ثَوَتْکِ؞
[7] کْرِوُ ࢽَ کَرْࢽْسُووَ کُرُوُسُووَلَࢽْ ࢽُکْثْࢽَرُو ࢻَࢽُّوِیَ، بَرٜ حَࢽْغَلْࢽْدُو ثِجْࢽِّ! سَیْ أَوُو أَࢽِ بُرْوُوࢽْ وَکَّجَیْیَ دُوُوࢽْ، أَمَّ سَ ࢽجٜرُورَمْبٜ کُوَ یَیٜ ثْدْࢽِّ؞
[8] لَرْدُوَ لَرْدُ غَدٜیَ لَوَلَدَیْ، کُورُو کْرْمَیْیَ کْرْمَیْ غَدٜیَ یٜ کَتّٜࢽْجَࢽْ کْرِوُ غْرْجَیْ؞ ثِدِ یٜ ࢽَ غَدٜغَدٜࢽْ لُولُوجِ، کُورُو کْࢽَ یٜ ࢽَ ࢽَرُو ࢽغَیِ؞ أَوُو أَࢽِ سَمَّ بَدِدُرَمْ بُوࢽٜىٰ بَسْ، أَلَمَ کَمُ تِیَ ثُرُو لٜجْࢽَ غَیْ؞
[9] «حَࢽْغَلْ غْࢽَࢽُواْ! ࢻُوُ مَجِلِسّٜرُو ࢽجَسَدٜ دَࢽْدَلْسُولَࢽْ کُواْࢽْجَیْ، کُورُو وُ ࢽَࢽْغَرُو ࢻُوُ غُومْࢽَ سُو، مَیْ سُویٜࢽْ دَࢽُوِ، تَیِرُو شٜدَرُو وَلُّواْرُو؞
[10] أَدْغَیْمَ سَیْ کَوُرِ کْجِ اللَّهیٜدْ جَمَ دُࢽِیَیٜ سَمَّرُو وُلْدِییَ دُوُوࢽْ؞
[11] ࢽَیِیَ ࢽجَدَࢽٜ شَرَرُو ࢽجَسَدِیَ، بَرٜ کْلَ أَوُو وُلُّوِیٜࢽْ کَرْوُࢽْغَیْ دِوِّ؞ أَوُو وُلْدُیٜ رُحُ اللَّهیٜ سَدْࢽْ ࢽَیِرُو ࢽجَدِدَ مَࢽَࢽُواْ، دَلِلْࢽْجُدْ ࢽَیِ غْࢽِ، تِمَ مَࢽَجِ ࢽَࢽْغَرُو؞
[12] یَاࢽَ یَࢽْجُغْࢽَا سْرْثِّیٜ رُورُو ثٜىٰسِ، بَوَ یٜ تَدَࢽْجُوَ ࢽغَیْ، تَدَوَ یٜ بَوَࢽْجَا یَࢽْجَارُو تُرُ ثَدّٜ ثَسَکّٜ تَیِیَ رُورُو ثٜىٰسِ؞
[13] ثُࢽِ ࢽَࢽْغَرُو أَمْ سَمَّ ࢽَیِیَ وَࢽْجَیْ، أَمَّ کَمْ مْرْجٜ حَرْ سَ ࢽجٜرُورَمْبٜرُو دْغَࢽَمَدْ ࢽجْکَّوُو ثُوَࢽْدِ؞
[14] «سَ دُوُوࢽْ أَوُو وَادَ جَوْرُو بَتِّ مَسِوَ کُدُومَ ࢽَ تِرُو جُسّْࢽِّلَࢽْ دَادَ رُوِیَ، (کْرَدُمَدْ أَسُجُو!)، دَجِ أَمْ لَرْدُ یَحُدِیَیٜࢽْ دَسَاࢽَدْ ثِجَ کَوْرُو ثَغَسُو لٜجَ!
[15] کَمْ کْلَ سُورُوࢽْجُیٜࢽْ دْغَࢽَدْ بَرٜ جْࢻْثٜ کَرٜ ࢽغُودُرُو ثُرُو سُورُودْیٜرُو ࢽغَاࢽِّ!
[16] کُورُو کَمْ کُلُولَࢽْ دْغَࢽَدْ یٜ بَرٜ کَلْوُࢽْجُ ࢽغُودُرُو وَلْدْࢽِّ!
[17] یِمْ أَࢽِࢽْ کَمُ ثُرُووَ سُو، ࢽغَࢽْجِ ثْمْبِیَ سُودْ، کُتُّࢽْجَ!
[18] بَرٜ أَوُو أَدْ سَ کَکُیٜࢽْ وَکَّجْࢽِّرُو اللَّهَ کُورُواْ!
[19] دَلِلْࢽْجُدْ یِمْ أَࢽِࢽْ بُوࢽٜ جَوْرُو کُتُّ مبٜجِ، بُوࢽٜ دُوُوࢽْ سَ اللَّه دُࢽِیَ أَلَکْثْࢽَیٜࢽْ تَیْ کُرُو کُدٜرُو ࢽغَلْتٜمَ جِرِࢽْجُ تُوَࢽْدْࢽِّ ࢻُوُ یٜࢽْ ࢻَغَتْ تُوَࢽْدِوَوُو ࢽَࢽْغَرُو؞
[20] کُورُو ثَ کْمَࢽْدٜ بُوࢽٜ أَدْیٜ کَوُࢽْجُ ࢻُلُجْࢽِّیَ، وُࢽْدُمَ ࢽجْکَّوُو ثُوَࢽْدِوَوُو؞ أَمَّ أَمْ کْرٜجْࢽَدْ ࢽَࢽْغَرُو کَوُدَ ࢻُلُجْࢽَ؞
[21] سَ أَدْࢽْ کَمْ لَایٜ ࢽَیِرُو: ‹أَکُّوࢽْجُ أَلْمَسِیوُدْ!› بِ ‹تُواْࢽْجُ تِ!› ثْࢽِیَ، بَرٜ تِیَ یَسَرَوِّ!
[22] دَلِلْࢽْجُدْ أَلْمَسِوُوَ کَتُّوُیٜسُووَ ࢽَوِیَ کَتُّوُیٜسُووَ إِسَࢽٜ أَلَمَ سُو، أَوُو أَجَبَّ سُو ثَدٜ، یُویٜࢽُووَ، حَرْ أَمْ کْرٜجْࢽَدْمَا جَمْبَجَࢽٜ ثَوَتْکِ؞
[23] ࢽَیِدْ، حَࢽْغَلْ غْࢽَࢽُواْ! کَوُ وَکَّجِدْرُو، أَوُو سَمَّا ࢽَیِرُو وُلْࢽْجَغَکّْࢽَ؞
[24] «أَمَّ ࢽغَوُو بُوࢽٜ یِمْ أَࢽِیٜࢽْ کْࢽْغَلْ ثْلْمْبُو وَلْجِ، کُمْبَلْ یٜ ࢽُرْࢽْجُ ثِوَوُو،
[25] سِلُّووُوَسُو یٜ سَمٜلَࢽْ ثَسُرِ، کُورُو کْࢽْدُوُووَ سَمٜىٰ یٜ جَوْرُو لُولُوجَیْ؞
[26] دَجِ تَدَ کَمْبٜدْ جَوْرُو کْࢽْدُوُووَا دَرَجَآ ثُرُو ࢻُوࢻُووْیٜࢽْ إِسِ ثَرُیْ؞
[27] أَدْغَیْمَ مَلَیْیَوَࢽْجُوَ ثُࢽُودٜ تَلْغْمُو دُࢽِیَیٜ دٜوُ سَمَّࢽْ ثِ دَجِرَمْ دُࢽِیَیٜࢽْ تَیْ ثِ دَجِرَمْ سَمٜىٰرُو یَدٜ أَمْࢽْجُ کْرٜجْࢽَدَ ثَࢻْثَیْ؞
[28] «یَ تَرْمُیٜࢽْ مِسَلْ أَدَ أَسُࢽُواْ! سَ ࢻْکْتُ بَدِجٜ کَلُ رِجِیَ، ࢽَࢽْغْرِ کَرْࢽْجْࢽَرُو ࢽُوࢽُوَّ؞
[29] ࢽغَیْمَ أَوُو أَࢽِ وَکَّجَیْ رُوِیَ، تِ ثِࢽَّلَࢽْ دٜلْ کَرْࢽْجْࢽَرُو ࢽُوࢽُواْ!
[30] جِرٜمَرُو ࢽَیِرُو وُلْࢽْجَغَکِّ، أَمْ جَمَࢽْ أَدْیٜ سَࢽُیْوَوُو، سَیْ أَوُو أَࢽِ سَمَّ وَکَّجَیْیَ دُوُوࢽْ؞
[31] سَمٜیَ ثِدِیَ بَوُورُو وَلْجَیْ، أَمَّ مَࢽَࢽِ تْمَّرُو بَوُورُو وَلْجِوَوُو؞
[32] «أَمَّ یِمْ بِ سَ دُوُوࢽْ أَوُو أَࢽِ وَکَّجَیْدَ وُࢽْدُمَ ࢽُوجْࢽِّ؞ بَوَدْرُو کَجِیَ، مَلَیْیَوَ سَمٜلَࢽْ دَسَاࢽَ یٜ ࢽُوجَࢽِّ، تَدَدْ یٜ ࢽُوجْࢽِّ؞
[33] حَࢽْغَلْ غْࢽَࢽُواْ، ࢻَادَرُو دْغَیْوُو، سَࢽْجُ ࢽُوࢽُوِّ ࢽَࢽْغَرُو؞
[34] أَلَمَࢽْجُ کَمْ بْلَوُرُو ثْدِ غَیْ؞ کْࢽْدُوُو ࢻَࢽّجُرُو کِسْتُوُیٜدَ وُولُودِیَࢽْجُرُو کُولْجِیٜ وُࢽْدُࢽْجَ یَیٜرُو کِدَࢽْجُ ثٜ ثِࢽَّ غُرٜدُمَرُو ࢻَادَرُو دْغَ ثْࢽٜ سَࢻْکَدَ؞
[35] أَدْ ࢽَࢽْغَرُو ࢻَادَرُو دْغَیْوُو، دَلِلْࢽْجُدْ سَ کْمَ ࢻَدُویٜ إِسِدَ ࢽُوࢽُوِّ ࢽَࢽْغَرُو، کَجِرِ، بِ بُࢽٜ، بِ ࢻَجَرْ، بِ سُوَ،
[36] بَرٜ یٜکِّࢽّدُو بَوُو کْࢽْمْ دِوِ ࢽَیِیَ ࢽَࢽْجَغَࢽِّ!
[37] أَوُو ࢽَیِرُو وُلْࢽْجَغَکّْࢽَدَ وُࢽْدُسُورُو وُلْغْکِّ، ࢻَادَرُو دْغَیْوُو!» یٜࢽُو عِیسَیٜ؞