[1] دُࢽِیَ وَیٜࢽِّیَمَ، وُرَوَ رِمَࢽَّیٜیَ أَمْوُرَوَ جَمَیٜیَ مَلْمْبَ أَتَّوْرَیٜیَ مَجِلِسْوُ سَمَّا ثِ تِلُووَرُو سَوَرِ کٜدُو؞ دَجِ عِیسَىٰ ثٜکّٜرٜ ثَادٜ مُکُّو غُومْࢽَ بِلَتُسّٜرُو کٜسَکُّو؞
[2] بِلَتُسّٜ عِیسَرُو: «ࢽِمَ وَ مَیْ یَوْدِیَیٜدْ وُو؟» ثْࢽٜ تِیَ کِوُورُو؞ عِیسَیٜ: «ࢽِمَ وُلّْمْ، وُمَ!» یٜࢽُو؞
[3] وُرَوَ رِمَࢽَّیٜدْ أَوُو کَدَࢽْ عِیسَىٰ بُرْوُیٜرَ؞
[4] دَجِ بِلَتُسْ وَلْدٜ تِرُو: «کَلَکّْمْبَوُو وَ؟ أَوُو کَدَࢽْ بُرْوُࢽْجَࢽَدَ ࢻَࢽّْمِّ وَ؟» ثْࢽٜ تِیَ کِوُورُو؞
[5] أَمَّ عِیسَى کُوَ یَیٜ تِرُو کَلَکْثْغْࢽِّ، حَرْ بِلَتُسْ أَجَࢻْکٜࢽُو؞
[6] ثَمَࢽْ کْرْوُ ࢽغُسُوࢽْ سَلَ أَدْلَࢽْ غُومْࢽَدْ کُوسُومَ ࢻَلْ جَمَ ثَوُورْࢽَدَ تَیِرُو سَلَمْجِیے؞
[7] سَ أَدْࢽْ کَمْ لَا أَمَࢽْجُوَ تُرُ ثَدٜ کَمْ ثٜىٰسٜ کُوسُولَࢽْ رُوجَࢽَ مبٜجِ، ثُࢽْجُ بَرَبَّسْ؞
[8] دَجِ جَمَ ࢽَ غُومْࢽَیٜدْرُو إِسَࢽٜ أَوُو ثَمَࢽْ تَیِرُو ثَدِّدَ ࢽجْدُّورُو تِیَ کُورُو بَدِیٜرَ؞
[9] بِلَتُسّٜ تَیِرُو: «مَیْ یَوْدِیَیٜدَ وَ ࢽَیِرُو سَلَمْࢽْجَغَکِّیَ، رَوُوْ؟» ثْࢽٜ تَیِیَ کِوُورُو؞
[10] أَوُووَ ࢽَࢽْدْرِࢽْجَ ࢽَࢽْغَرُو وُرَوَ رِمَࢽَّیٜدْ عِیسَىٰ مُکُّوࢽْجُرُو سْرْتْکٜىٰرَرُو ࢽُوجْࢽَ؞
[11] أَمَّ وُرَوَ رِمَࢽَّیٜدْ جَمَدَ ثَسَکّٜ ثُجُ عِیسَیٜرُو بَرَبَّسَّ تَیِرُو سَلَمْجُوُو یٜرَ؞
[12] بِلَتُسّٜ وَلْدٜ تَیِرُو: «أَوِ غْلٜ کَمْ تِیَ مَیْ یَوْدِیَیٜلَࢽْ بُواْࢽُوِدْرُو یِدّْکِّ؟» ثْࢽٜ تَیِیَ کِوُورُو؞
[13] کُواْ سَࢻْثَࢽٜ: «کْسْکَرُو تِیَ جَغْࢽٜ ࢽُو!» یٜرَ؞
[14] بِلَتُسّٜ: «أَوِرُو؟ أَیَوْ أَوِیٜ ثْدُو؟» یٜࢽِّیَ، ثَیٜ بَوُورُو کُواْ سَࢻْثَࢽٜ: «کْسْکَرُو تِیَ جَغْࢽٜ ࢽُو!» یٜرَ؞
[15] دَجِ بِلَتُسْ أَوُو رُوࢽْجَیٜ ثْدِیَ ثْرَاࢽَ ࢽَࢽْغَرُو، تَیِرُو بَرَبَّسَّ سَلَمْغٜىٰࢽُو؞ أَمَّ ثَکّٜ عِیسَىٰ کِرْوُولَࢽْ جَجَرْیٜرَࢽِّیَ، تِیَ کْسْکَرُو جَجَارُو مُکُّوࢽْجَرُو کٜکُّو؞
[16] دَجِ سُوجِیَدْ عِیسَىٰ ثُرُو بَلْبَلَّ غُومْࢽَرِیٜرُو ثَادٜ کْوُࢽْجَ سُوجِیَیٜ سَمَّا بُواْجَࢽٜ ثَࢻْکٜرَ؞
[17] کَلْوُ کِمٜ تِرُو لُجَغَࢽٜ أَرِیَوُ کَرِییٜ کْلٜجَࢽٜ کْلَࢽْجُرُو غْࢽَیٜىٰرَ؞
[18] دَجِ تِرُو: «اللَّه ࢽغْوُرُو، مَیْ یَوْدِیَیٜ!» وُلْدُوُ بَدِیٜرَ؞
[19] کَلَࢽْ کْلَࢽْجُ بَبَکْثَࢽٜ لَلَّرِ تِرُو تْوَجَغَࢽٜ ࢻُوُࢽْجُࢽْ تُࢽْغُرُمْجَࢽٜ تِرُو دَرَجَ کٜدُو؞
[20] تِرُو رُدُ غْࢽَجَغَࢽٜ کٜرْࢽِّیَ، کَلْوُ کِمٜدَ رِࢽْجَࢽٜ کَجْمُࢽْجُ ثَیٜدَ لُجَغَࢽٜ تِیَ کْسْکَرُو جَدُوُرُو کٜسَدُو؞
[21] کَمْ لَا بْلَ کُرَࢽٜىٰ مبٜجِ، ثُࢽْجُ سِمَࢽْ، تِدْ أَلٜکْسَࢽْدَا رُࢻُسَّیٜ بَوَࢽْجَ؞ کَرَاࢽْ ثِجْࢽَ کُودُ ثْدِ دُوُوࢽْ، سُوجِیَدْ دُࢽُودُࢽُوࢽْ تِیَ ثَسَکّٜ کْسْکَ عِیسَیٜدَ ࢽغُوجٜ لٜىٰرَ؞
[22] عِیسَىٰ ࢽَ تِرُو غُولْغُوتَ ثَࢽِدْرُو کٜسَدُو، غُولْغُوتَیٜ مَاࢽَࢽْجُدْ ࢽَ بُوُو کْلَیٜ؞
[23] عِیسَرُو دِبٜࢽْ ثُرُوࢽْجُࢽْ أَوُو لَا مِرْ ثَࢽِ دِیَدَا ثَرُو کٜدُو، أَمَّ کْࢽْجَرُو وَیٜࢽُو؞
[24] دَجِ تِیَ کْسْکَرُو جَجَغَࢽٜ کَجْمُࢽْجُ ࢽغُوجَࢽٜ وُࢽْدُࢽْجَ یَیٜ ࢽُوَࢽْجُ ثُوَࢽْدُورُو وَلَوَلَ ثَدٜ کَتّٜࢽْجَࢽْ دَغَرْیٜرَ؞
[25] سَ عِیسَىٰ جَجَاࢽَدْ، سَ لْغَرْ سُوَیٜ؞
[26] أَلُّو أَیَوْࢽْجُ کْلَࢽْ رُوُوَدَدْ: مَیْ یَوْدِیَیٜ؞
[27] غْࢽْدٜوُ یِࢽْدِ یٜیَ تِیَ رُوکُّو جَیٜىٰرَ، ࢻَلْدْ کْمْبُورَمْࢽْجُلَࢽْ، ࢻَلْدْ یٜ وَیْلَࢽْجُلَࢽْ؞
[28] [أَدْغَیْمَ أَوُو کِتَوُلَࢽْ رُوُوَدَدْ وَکَّیٜࢽُو؞ تِیٜ: «أَمْسُو تِیَ بِوُمَرُو ࢽغُویٜرَ،» ثْࢽَّ؞]
[29] أَمْ کَمْجَࢽَ کُوجَیْسُودْ تِرُو رُدُ غْࢽَجَغَࢽٜ کْلَࢽْجَ کَلَکَلَکْثَࢽٜ تِرُو: «أَࢻْ! ࢽِ ࢻَدُو اللَّهیٜیَ وُرْࢽْمٜ ثُرُو کَوُ یَکُّیٜࢽْ تَࢽْدْمِدْ،
[30] ࢽدَ کْسْکَدْࢽْ جْمّٜ کْلَࢽْمْ مُویٜ!» ثَࢽِ؞
[31] وُرَوَ رِمَࢽَّیٜ یٜ مَلْمْبَ أَتَّوْرَیٜیَ رُوکُّو أَدْغَیْ تِرُو رُدُ غْࢽَجَغَࢽٜ أَمَࢽْجَرُو: «أَمْ غَدٜیَ ثْکَّاࢽَ، أَمَّ رَکْثٜ کْلَࢽْجُ ثْمُویِوَوُو!
[32] أَلْمَسِیوُ مَیْ إِسْرَاءِیلَوُیٜدْ کْسْکَدْࢽْ کْرْمَ جْࢻْثُو، رُیْیُو تِیَ کَسَدِّیُو!» ثَࢽِ؞ غْࢽْدٜوُ یِࢽْدِ تِیَ رُوکُّو جَجَاࢽَدْ یٜ عِیسَىٰ رَرَیٜرَ؞
[33] کَوْسُ کْلَ دَوُ دُوُوࢽْ، دُࢽِیَ ࢽغَ تْمْجٜ ثْلْمْبُو وَلْجٜ، حَرْ سَ یَکُّ کَجِرِیٜرُو کِیَدُو؞
[34] سَ یَکُّ کَجِرِیٜدْ عِیسَى کُواْ دُࢽُووَرُو سَࢻْثٜ: «إٜلُویْ، إٜلُویْ، لَمَ سَبَکْتَࢽِ؟» یٜࢽُو، مَاࢽَࢽْجُدْ «اللَّهࢽِ، اللَّهࢽِ، أَوِرُو وُوَ کُولْسٜمْ؟»
[35] أَمْ ࢽَدْࢽْ دَجَࢽَدْ أَدَ ࢻَࢽْغٜرَࢽِّیَ، لَاࢽجَیٜ: «ࢻَࢽُّواْ، ࢽَوِ إِلْیَا بُواْجِ!» یٜرَ؞
[36] دَجِ ࢻَلْࢽْجَ ثْغَسٜ لٜجٜ سُوسُو ࢽغُوجٜ دِبٜࢽْ ثُومْثُومْبُو لْࢻْثِیٜ ثُتُّلُوٜ کَرُو لَسِّیٜ عِیسَرُو سَیٜىٰࢽُو؞ تِیٜ: «ࢽدَ کُولُّواْ، ࢽَوِ إِلْیَ إِسٜ تِیَ کْسْکَدْࢽْ ثْسَیِیَ، رُیْیُو!» یٜࢽُو؞
[37] دَجِ عِیسَى کُواْ دُࢽُووَرُو سَࢻْثٜ رُو کِرْمْبُو؞
[38] سَ أَدْࢽْ جُوَ ثُرُو ࢻَدُو اللَّهیٜࢽْ دْغَࢽَدْ سَمٜࢽْ تَمِیَ کْلَ ثِدِیَࢽَّرُو کُدٜرُو ࢻَرَکْ یِࢽْدِرُو کَرْغَدَࢽْ؞
[39] کَجَلَّ سُوجِیَیٜ ࢻُوُ عِیسَیٜࢽْ دَادَدْ جِرِ عِیسَى بَوُوجْࢽَدَ کِرُࢽِّیَ، تِیٜ: «جِرٜمَرُو کَمْ أَدْ تَدَ اللَّهیٜدْمَ!» یٜࢽُو؞
[40] کَمُوَ لَا یٜ کُرُوُࢽِࢽْ أَوُو أَࢽِیَ لَوَرْجَیْ مبٜجِ؞ ثُرُوࢽْجَࢽْ مَرْیَمْ مَغْدَلَا مَرْیَمْ یَعْࢼُوبَ غَࢽَا جُوسِیَیٜ یَࢽْجَا سَلُومِیَ؞
[41] سَ عِیسَى ثِدِ غَلِلٜىٰدْࢽْ تِیَ جَاࢽٜ بَࢽَجَغَیْ؞ کُورُو کَمُوَ غَدٜ کَدَ عِیسَىٰ جَاࢽٜ جٜرُجَلٜمْبُو إِسَࢽَ یٜ ࢽَدْࢽْ مبٜجِ؞
[42] یِمْ أَدْ یِمْ دَبَّرْدُیٜ؞ وَجِیَ یِمْ تُسْتُیٜ ࢽَࢽْغَرُو، دُࢽِیَ کَجِرِیٜࢽِّیَ،
[43] یُوسُࢻُ کَمْ أَرِمَتِیَیٜ، تِ ثُرُو مَجِلِسْوُدْیٜࢽْ جَوْرُو کَمْ کُرَ یٜ، ࢽُودُو بَرْغَا اللَّهیٜدْیٜ کْࢽْدٜࢽْجُ غُرٜجِ یٜ، ࢽَ غُومْࢽَ بِلَتُسّٜرُو رِدُ بَوُووَرُو لٜجٜ کَمِࢽْ عِیسَیٜدَ تِرُو ثَدُورُو کِوُورُو؞
[44] بِلَتُسْ عِیسَى ࢽَغَتُّو بَوُوجْࢽَدَ أَجَࢻْثٜ کَجَلَّ سُوجِیَیٜدَ بُواْجٜ عِیسَى تُسّْࢽَ وَ بَوُوجْࢽَدْرُو کِوُورُو؞
[45] کَجَلَّدْیٜࢽْ عِیسَى بَوُوجْࢽَرُو أَسُیٜࢽِّیَ، کَمِࢽّجُدَ یُوسُࢻُرُو کَیْࢽُو؞
[46] دَجِ یُوسُࢻُ لٜجٜ لُووُواْࢽْ بَتَّ لِࢽّٜ ثِوٜ کَمِࢽْدَ کْسْکَدْلَࢽْ ثْسَیٜ بَتَّدْࢽْ کْکْرْجٜ کَوْرِ ثُرُو کَوْیٜࢽْ لَجَࢽَ لَارُو ثَکّٜ سْࢽَجٜ ثِ کَوْرِدْیٜرُو کَوْ کُرَ تْمْبَلْیٜىٰࢽُو؞
[47] مَرْیَمْ مَغْدَلَا مَرْیَمْ جُوسِیٜ یَࢽْجُوَ یٜ لَوَرْجَࢽٜ ࢽَ عِیسَىٰ سْࢽَجَࢽَدَ کٜرُو؞