[1] کُورُو عِیسَى وَلْدٜ دَࢽْدَلُّو کْرْغَوُو؞ ࢽَدْࢽْ کَمْ لَا مُکُّو ثَࢽَا مبٜجِ؞
[2] أَمْ لَا یٜ عِیسَرُو أَیَوْ غْࢽَدُوُ ثَرَاࢽَ ࢽَࢽْغَرُو حَࢽْغَلْࢽْجَیٜࢽْ تِیَ ࢽِࢽِجَیْ، یِمْ تُسْتُیٜیَمَࢽْ کَمْدَ إِسَࢽْغَیٜىٰࢽُووَرُو؞
[3] دَجِ عِیسَى کَمْ مُکُّو ثَࢽَادْرُو: «ثِࢽٜ دَوُࢽْدٜࢽْ دَࢽٜ!» یٜࢽُو؞
[4] کُورُو جَمَدْرُو: «یِمْ تُسْتُیٜیَ ࢽغْلَ کْࢽْدُو رَ دِوِ کْࢽْدُومَ حَلَلْ وُو؟ رُو ࢽجْکَّوُو رَ رُو تُلُوُومَ حَلَلْ وُو؟» ثْࢽٜ کِوُورُو؞ أَمَّ غْمْ کٜدُو؞
[5] عِیسَى غْرْغَجٜ کْلَ کَرْوُکِبَّࢽْجَیٜࢽْ کَرْوُࢽْجُ جَوْرُو کُتَّجٜ تَیِیَ ࢽِࢽِجٜ کَمْدْرُو: «مُکُّوࢽْمْ سَࢽٜ!» یٜࢽُو؞ سَیٜࢽِّیَ، مُکُّوࢽْجُ کْلٜوَ سَلَیْرُو وَلْیٜࢽُو؞
[6] ࢻَرِسَوَدْ دَࢽْدَلْدْࢽْ کٜلُوُࢽِّیَمَ، لٜجَࢽٜ أَمْ مَیْ حِرُدُسّٜیَ رُوکُّو سَوَرْدَࢽٜ جَوَلْ عِیسَىٰ ࢽجٜجُویٜ مَیٜرَ؞
[7] دَجِ عِیسَىٰ ࢻُوُرَوَࢽْجُوَ ثِجَࢽٜ ثِ بْرْمْبٜرُو لٜىٰرَ؞ ثِدِ غَلِلٜىٰࢽْ أَمْ کَدَ کَدَمِ تِیَ غٜیَ؞ کُورُو أَمْ لَرْدُ یَحُدِیَیٜیَ
[8] جٜرُجَلٜمْبٜیَ لَرْدُ إِدُمِیَیٜیَ ثِدِ أَدِࢽَّمْ بْرْمْ جُورْدَࢽِیٜیَ ثِدِ بْرْࢽِ تِرّٜیَ سِدُوࢽّٜیَلَࢽْ کَدَ کَدَمِ یٜ أَوُو عِیسَى ثْدِسُودَ ࢻَࢽْجَࢽٜ ࢽَࢽْجُرُو کَدِرَ؞
[9] أَدْغَیْمَ عِیسَیٜ ࢻُوُرَوَࢽْجُرُو بَرٜ أَمْ کَدَ ثَࢻْتَࢽَدْ تِیَ غْغْرْࢻْثَغَࢽِّرُو مَارَ تِرُو دَبَّرْجَا یٜࢽُو؞
[10] عِیسَى أَمْ کَدَ إِسَࢽْغَجْغْࢽَ ࢽَࢽْغَرُو، أَمْ کَسُوَاسُودْ تِیَ لٜجَرُو غْغْرْࢻْتَغَیْ؞
[11] سٜدَࢽْسُو یٜ تِیَ ثَرُیْیَ، ࢻُوُࢽْجُࢽْ تُࢽْغُرُمْجَࢽٜ ࢽغُجَࢽٜ یِلْجَࢽٜ: «ࢽِ تَدَ اللَّهیٜ!» ثَࢽِ؞
[12] أَمَّ بَرٜ تِیَ إِسَࢽُوجَغَࢽِّرُو تَیِرُو جَوْرُو کِکَّدُو؞
[13] دَجِ عِیسَى کْلَ کَوْیٜرُو جُوَࢽٜ أَمْ تَیِلَࢽْ مْرَدُࢽْجُوَدَ بُواْجٜ ࢽَࢽْجُرُو کَدِرَ؞
[14] ثُرُوࢽْجَࢽْ مٜوُࢽْ یِࢽْدِࢽْ کْرٜجٜ تَیِیَ کْࢽْغَیَمْبَࢽْجُرُو غَلَیٜࢽُو؞ ࢽِیَࢽْجُدْ تِیَ رُوکُّو ࢽَࢻْثَ، تَیِیَ ثُࢽُودُو لٜجَ کَوُرِࢽْجُوَ جَمَرُو وُلْجَا،
[15] کْࢽْدُوُو سٜدَࢽْ دُدَیٜ ثَوَࢽْدُو؞
[16] أَکُّو أَمْ مٜوُࢽْ یِࢽْدِࢽْ غَلَجْࢽَدْ، تَیِمَ سِمَࢽْ کَمْ تِرُو ثُ بِتُرُسْ ثَکّْࢽَدْ،
[17] یَعْࢼُوبَ تَدَ جَبَدِیٜ، یَࢽْجُغْࢽَ یَحْیـَىٰ، تَیِ یِࢽْدِ یٜرُو ثُ بُوࢽَجِ ثَکّْࢽَ، مَاࢽَࢽْجُدْ تَدَوَ رَدُیٜ،
[18] کُورُو أَࢽْدَرَوُسْ، ࢻِلِبُسْ، بَرْتُولُومِ، مَتِیُ، تُومَ، یَعْࢼُوبَ تَدَ أَلْࢻَوُسّٜ، تَدَوُسْ، سِمَࢽْ کَمْ کَࢽْعَࢽَیٜ،
[19] یَحُسَ إِسْکَرِیُوتْ کَمْ مُکُّو کْلَدُووَیٜرُو عِیسَىٰ سْرْتُّوُمَدْ؞
[20] دَجِ عِیسَى ࢻَدُورُو وَلَّدَ؞ جَمَ کَدَ یٜ ثَیٜ غَیْ ثَࢻْتَࢽٜ، حَرْ عِیسَىٰ ࢻُوُرَوَࢽْجُوَرُو مَسْࢽَ بُورُو کَتْکٜرُو؞
[21] کْرَمِیَࢽْجُ أَدَ ࢻَࢽْغٜرَࢽِّیَ، تِیَ تَرُو لٜىٰرَ، حَࢽْغَلْ تِیَ مَوْجْࢽَ ثَࢽِ ࢽَࢽْغَرُو؞
[22] کُورُو مَلْمْبَ أَتَّوْرَیٜ جٜرُجَلٜمْلَࢽْ إِسَࢽَدْیٜ: «بٜلْجَبُلْ تِیَ ثْدَࢽَ! کْࢽْدُوُو مَیْ سٜدَࢽَّیٜࢽْ سٜدَࢽَّا دُجِ،» یٜرَ؞
[23] دَجِ عِیسَى تَیِیَ بُواْجٜ مِسَلْࢽِࢽْ تَیِرُو وُلْجِیٜ: «أَوِیَوِࢽْ إِوُلِیسْ رَکْثٜ إِوُلِیسَّ دُجِ؟
[24] کْرْمَیْ دُوُوࢽْ کْلَࢽْجُرُو یَکْتِییَ، رَکْثٜ دْغَیْوَوُو؞
[25] ࢻَدُو دُوُوࢽْ کْلَࢽْجُرُو یَکْتِییَ، ࢻَدُودْ یٜ رَکْثٜ دْغَیْوَوُو؞
[26] إِوُلِیسْ یٜ کْلَࢽْجُ لَوَلَجٜ یَکْتِییَ، رَکْثٜ دْغَیْوَوُو، دُࢽُوࢽْجُ ثٜرْࢽَ؞
[27] وُࢽْدُمَ رَکْثٜ ࢻَدُو کَمْ دُࢽُووَیٜرُو ࢽغَیٜ کْࢽْدَࢽْجُ ثْمُویِوَوُو، سَیْ کَمْ دُࢽُووَدَ ثِکّٜرِیَ دُوُوࢽْ؞ ثِکّٜرِیَ، کْࢽْدَࢽْجُ ثْمُویِ؞
[28] «جِرٜمَرُو ࢽَیِرُو وُلْࢽْجَغَکِّ، بِوُ سُو، مَࢽَ بَسْتُیٜ سُو سَمَّ کَمْبُو غَوُرْدِیے؞
[29] أَمَّ کَمْ رُحُ اللَّهیٜیَ بَسِّمَدْ، تْمَّرُو تِرُو غَوُرْدِیوَوُو؞ بِوُ حَرْ أَبَدَرُو غَوُرْدِوَوُو ثْدُو!» یٜࢽُو؞
[30] أَدَ وُلْدُࢽْجُدْ، تِ کَرُوَمَ ثَࢽِ ࢽَࢽْغَرُو؞
[31] عِیسَیٜ یَࢽْجُوَ یَࢽْجُغْࢽَسُووَ إِسَࢽٜ ثِ ࢻَدُویٜࢽْ دَجَࢽٜ أَمْ تِیَ بُواْجَرُو کٜࢽُودُو؞
[32] أَمْ کَدَ یٜ عِیسَىٰ دِرِجَࢽٜ کْلْجَࢽٜ ࢽَࢻْثَࢽَ دُوُوࢽْ، تِرُو: «یَࢽْمْبَ یَࢽْمْغْࢽَسُووَ دٜیَࢽْ ࢽِیَ مَࢽْجَیْ،» یٜرَ؞
[33] عِیسَیٜ تَیِرُو: «وُࢽْدُسُو یَࢽِیَ یَࢽِغْࢽَسُووَدْ وُو؟» یٜࢽِّیَ،
[34] أَمْ ࢽَدْࢽْ ࢽَࢻْثَࢽَدَ ࢽِࢽِجٜ: «أَکُّو یَࢽِیَ یَࢽِغْࢽَسُووَدْ!
[35] وُࢽْدُ دُوُوࢽْ أَوُو اللَّه ثْرَاࢽَا ثْدِمَدْ، تِمَ یَࢽِیَ یَࢽِغْࢽَادْ وُو!» یٜࢽُو؞