[1] دَجِ عِیسَى ࢽَدَ کُولْجٜ ثِدِ یَحُدِیَیٜ ࢽغَوُو بْرْمْ جُورْدَࢽِیٜࢽْ دْغَࢽَرُو لٜىٰࢽُو؞ ثَیٜ غَیْ جَمَ کَدَ تِرُو ثَࢻْتَغَࢽٜ، کُورُو وَلْدٜ تَیِیَ أَلَمْدُ بَدِیٜࢽُو؞
[2] ࢻَرِسَوَ لَا عِیسَىٰ رِجَࢻْتُرُو إِسَࢽٜ تِرُو: «کَمْ کَمُࢽْجُ دْࢻْتَدْ حَلَلْ وَ؟» ثَࢽٜ تِیَ کٜوُورُو؞
[3] عِیسَیٜ تَیِرُو: «أَوِ ࢽَوِ مُوسَى ࢽَیِرُو وَدَرُو ࢽجَدُو؟» یٜࢽُو؞
[4] تِرُو: «ࢽَوِ مُوسَى کَکَّدُ کَمُ دْࢻْتَیٜ رُوُࢽْمٜ تِیَ کُولْدُ کوَرُو أَمَرْجْغْࢽَ،» یٜرَ؞
[5] عِیسَیٜ تَیِرُو: «کْلَکِبُّࢽْدُو ࢽَࢽْغَرُو ࢽَوِ مُوسَى وَدَ أَدَ ࢽَیِرُو رُوُࢽْغٜىٰرَ؞
[6] أَمَّ بَدِدُرَمْࢽِࢽْ: ‹اللَّه تَیِیَ کُوࢽغوَا کَمُوَرُو أَلَکّٜࢽُو؞›
[7] ‹دَلِلْ أَدْیٜرُو کوَ بَوَࢽْجُوَ یَࢽْجُوَا کُولْجٜ کَمُࢽْجُرُو کْرْدِیٜ
[8] تَیِ یِࢽْدِسُو تِیے ࢻَلُّو وَلْجَیْ؞› أَدْغَیْمَ کُوَ أَدْࢽْ ࢻُوُࢽْ تَیِدْ یِࢽْدِ غْࢽِ، تِلُورُو وَلْجَࢽَ؞
[9] أَدْ ࢽَࢽْغَرُو أَوُو اللَّه کْلْجْࢽَدَ بَرٜ کَمْ ࢻِرْجْࢽِّ!» یٜࢽُو؞
[10] تَیِ ࢻَدُوࢽْ دُوُوࢽْ، ࢻُوُرَوَࢽْجُ کْلَ مَࢽَ أَدْیٜࢽْ تِیَ کٜوُورُو؞
[11] عِیسَیٜ تَیِرُو: «وُࢽْدُ دُوُوࢽْ کَمُࢽْجُوَ دْࢻْثٜ غَدٜ ࢽِیَجْࢽَدْ تِرُو بِوُ ثْدّٜ کْࢽْجْࢽَ ثْدْࢽَ؞
[12] کُورُو کَمُ دُوُوࢽْ کوَࢽْجُوَ دْࢻْثٜ غَدٜ ࢽِیَجْࢽَدْ، تِ یٜ کْࢽْجْࢽَ ثْدْࢽَ،» یٜࢽُو؞
[13] أَمْ لَا عِیسَى یَلَّࢽْجَ سَࢽَࢽَا مُکُّوࢽْ لٜجُورُو ࢽَࢽْجُرُو ثَوُدِ دُوُوࢽْ، ࢻُوُرَوَدْ أَمْدَ وُسَیٜرَ؞
[14] عِیسَى أَدَ کِرُࢽِّیَ، کَرْوُࢽْجُ وَجٜ ࢻُوُرَوَࢽْجُرُو: «یَلَّدَ کُولُّواْ ࢽَࢽِرُو إِسَ، بَرٜ تَیِرُو دَࢻْکْوِّ! ࢽُودُو بَرْغَا اللَّهیٜدْ أَمْ تَیِ غَیْیٜ ࢽُوَࢽْجَ، دِیٜ!
[15] جِرٜمَرُو ࢽَیِرُو وُلْࢽْجَغَکِّ، وُࢽْدُ دُوُوࢽْ تَدَاࢽَ غَیْ ࢽُودُو بَرْغَا اللَّهیٜدَ کَسَثّْࢽِّدْ تْمَّرُو ࢽغَیِوَوُو!» یٜࢽُو؞
[16] دَجِ یَلَّدَ ࢽغَࢽْجِرُو ࢽغُوجٜ کْلَࢽْجَرُو مُکُّو غْࢽَجِیٜ تَیِرُو بَرْغَ دْࢻْکٜىٰࢽُو؞
[17] عِیسَى ثِجٜ جَوَلْ کِدَࢽِّیَ، کَمْ لَا ثْغَسٜ إِسٜ ࢻُوُࢽْجُࢽْ تُࢽْغُرُمْجٜ تِرُو: «مَلْمْ ࢽغْلَمَ، أَوِ دِکّٜ رُو سَوِسُویٜ ࢻَࢽْدْکِّ؟» ثْࢽٜ تِیَ کِوُورُو؞
[18] عِیسَیٜ تِرُو: «أَوِرُو وُوَ ࢽغْلَمَࢽْ بُواْسْمِ؟ اللَّه غْࢽِیَ، وُࢽْدُمَ ࢽغْلَ بَوُو؞
[19] وَدَوَدَ ࢽُوࢽْمَّ: بَرٜ رُو کَمْبٜ تُلُوُمِّ، بَرٜ کْࢽْجْࢽَ دِمِّ، بَرٜ ࢽَمْبَرْوُ دِمِّ، بَرٜ شٜدَکَمْبُ دِمِّ، بَرٜ کَمْبَ جَمْبَࢽْمٜ کْࢽْدَࢽْجُ بُمِّ، بَوَࢽْمْبَ یَࢽْمْبَرُو دَرَجَ یٜ!» یٜࢽُو؞
[20] کَمْدْیٜ: «سَیِࢽَّ، تْࢽْ غَࢽَࢽِلَࢽْ وَدَ أَࢽِ سَمَّا غَکّْࢽَ،» یٜࢽُو؞
[21] عِیسَى تِیَ ࢽِࢽِجٜ کِرَوُو؞ تِرُو: «أَوُو ࢻَلْ ࢽِیَ مَوْࢽْجْࢽَ؞ لٜࢽٜ کْࢽْدَࢽْمْ سَمَّا لَدٜ تَلَاوَرُو یٜ، أَرْسِیے سَمٜلَࢽْ ࢻَࢽْدْمِ؞ دَجِ أَرٜ وُوَ سْغَیْ!» یٜࢽُو؞
[22] کَمْدْ مَࢽَ أَدَ ࢻَࢽْغٜࢽِّیَ، تِ جَوْرُو غَرِوُ ࢽَࢽْغَرُو ࢻْکَّࢽْجُ کْرْجٜ کَرْوُ کُتُّوَرُو سَࢻْکَدَࢽْ؞
[23] عِیسَى مٜمٜجٜ ࢻُوُرَوَࢽْجُرُو: «غَرِوُیٜ ࢽُودُو بَرْغَا اللَّهیٜرُو ࢽغَوُوࢽْجُ جَوْرُو جَوْ، دِیٜ!» یٜࢽُو؞
[24] ࢻُوُرَوَدْ مَࢽَ أَدَ أَجَࢻْکٜرَ؞ أَمَّ عِیسَى وَلْدٜ تَیِرُو: «تَدَوَࢽِ، ࢽُودُو بَرْغَا اللَّهیٜرُو ࢽغَوُودْ جَوْرُو جَوْ!
[25] غَرِوُیٜ ࢽُودُو بَرْغَا اللَّهیٜرُو ࢽغَوُوࢽْجُدْرُو کَرِمُویٜ ثُوُرِ رِوُرَیٜࢽْ کُودُࢽْجُمَ بُدُ وُو!» یٜࢽُو؞
[26] ࢻُوُرَوَدْ ثَیٜمَا کُوجْࢽَرُو أَجَࢻْثَࢽٜ أَمَࢽْجَرُو: «أَسْشَ! أَدْغَیْیَ، وُࢽْدُ غْلٜ ࢽجْکَّوُو ثُوَࢽْدِ؟» یٜرَ؞
[27] عِیسَى تَیِیَ ࢽِࢽِجٜ: «کَمْبُو یُوجِوَوُو، أَمَّ اللَّهرُو غْࢽِ؞ اللَّهرُو أَوِسُو یُوجِ!» یٜࢽُو؞
[28] دَجِ بِتُرُسّٜ تِرُو: «أَکُّو أَࢽْدِ أَوِࢽْدٜسُو کُولِّیٜ ࢽِیَ ࢽجْغَیْیٜࢽَ،» یٜࢽِّیَ،
[29] عِیسَیٜ: «جِرٜمَرُو ࢽَیِرُو وُلْࢽْجَغَکِّ، وُࢽْدُمَ ثُࢽِیَ کَوُرِ کْجِ اللَّهیٜدَ ࢽَࢽْغَرُو ࢻَدُو، بِ یٜیْیَ، بِ کَࢽَّ، بِ بَوَ، بِ یَ، بِ یَلَّ، بِ کُلُو کُولْجْࢽَدْ
[30] دُࢽِیَ أَدْمَࢽْ ࢻَدُو، یٜیْیَ، کَࢽَّ، یَ، یَلَّ، کُلُو غَدٜغَدٜ مِیَ مِیَ کُتُّوَسُوࢽْ ثُوَࢽْدِوَوُومَ بَوُو؞ کُورُو لٜیْرَ وَکَّجِیَ، رُو سَوِسُویٜ یٜ ثُوَࢽْدِ؞
[31] أَمَّ أَمْ بُرْوُویٜ ࢽغْوُ دَرْیٜىٰرُو وَلْجَیْ، کُورُو دَرْیٜىٰ یٜ بُرْوُویٜرُو وَلْجَیْ،» یٜࢽُو؞
[32] عِیسَىٰ ࢻُوُرَوَࢽْجُوَ جَوَلْ جٜرُجَلٜمْبٜ ࢽغُوجَࢽَ دُوُوࢽْ، عِیسَى تَیِࢽْ ࢻُوُࢽُّو لٜدُ ثْدِ؞ ࢻُوُرَوَدْ أَجَࢻْثَࢽَ، کُورُو أَمْ تِیَ جَغَیْسُودْ یٜ رِجَࢽَ؞ کُورُو عِیسَى وَلْدٜ مٜوُࢽْ یِࢽْدِࢽْدَ سْغْرِرُو ثُتُّلُوٜ أَوُو تِرُو ࢻُوُࢽْ وَکَّجِیدَ تَیِرُو وُلْدُوُ بَدِیٜࢽُو؞
[33] تَیِرُو: «ࢻَࢽُّواْ، جٜرُجَلٜمْبُو لٜࢽِیٜ، تَدَ کَمْبٜدَ مُکُّو وُرَوَ رِمَࢽَّیٜیَ مَلْمْبَ أَتَّوْرَیٜیَرُو سْرْثَّغَࢽٜ شَرَ رُو تُلُوُویٜ تِرُو ثَدّٜ مُکُّو کْرْدِیَیٜرُو ثَسَکّٜ،
[34] تَیِ یٜ تِیَ رُجَࢽٜ تِرُو لَلَّرِ تْوَجَغَࢽٜ کِرْوُولَࢽْ جَجَرْجَࢽٜ رُورُو ثٜىٰسِ؞ کُورُو کَوُ یَکُّوَ رُووَرُو وَلْجٜ ثِجِ،» یٜࢽُو؞
[35] دَجِ تَدَوَ جَبَدِیٜ یَعْࢼُوبَا یَحْیـَىٰ ࢽَ عِیسَیٜرُو إِسَࢽٜ تِرُو: «سَیِࢽَّ، أَوُو ࢽجُوُورِیٜمَدَ أَࢽْدِرُو سَدّْمِیَ، رَیِیٜ!» یٜرَ؞
[36] عِیسَیٜ تَیِرُو: «أَوِ ࢽَیِرُو ࢽجَدّْکِّیَ، رَوُوْ؟» ثْࢽٜ تَیِیَ کِوُورُو؞
[37] تِرُو: «مَرْࢽٜ، کْرْمَیْࢽْمْ دَرَجَا ࢻَࢽْدْمِیَ، کُولْسَࢽٜ ࢽَمِّیُو، ࢻَلْ کْمْبُورَمّْمْلَࢽْ، ࢻَلْ یٜ وَیْلَࢽْمْلَࢽْ!» یٜرَ؞
[38] عِیسَیٜ تَیِرُو: «أَوُو کُورُوَّدْمَا ࢽُوࢽُوِّ؞ رَࢽْغُوٜ کْࢽْجَرَمْ یَکِّدْࢽْ یَوِ وَ؟ کُورُو رَࢽْغُوٜ کَسَلَ دِکِّدَ دِوِ وَ؟» ثْࢽٜ تَیِیَ کِوُورْࢽِّیَ،
[39] تِرُو: «آه، رَࢽْغِیٜ!» یٜرَ؞ عِیسَیٜ تَیِرُو: «کْࢽْجَرَمْ یَکِّدْࢽْ یَوِ یٜ، کَسَلَ دِکِّدَ دِوِ یٜ؞
[40] أَمَّ کْمْبُورَمِّلَࢽْ سُو، وَیْلَࢽِلَࢽْ سُو ࢽَࢻْتَدْ، وُ غْࢽِ کَمْبُو أَمَرْغْکِّ، ࢽَ أَࢽِدْ أَمْ تَیِرُو دَبَّرْغَادَیٜ،» یٜࢽُو؞
[41] ࢻُوُرَوَ مٜوُ غَࢻْثَࢽَدْ أَدَ ࢻَࢽْغٜرَࢽِّیَ، یَعْࢼُوبَا یَحْیـَىٰرُو غْرْغَیٜىٰرَ؞
[42] دَجِ عِیسَى تَیِ سَمَّا بُواْجٜ تَیِرُو: «ࢽُوࢽُوَّ، ثُرُو جَمَ کْرْدِیَسُویٜࢽْ أَمْ دُوُوࢽْ جَمَ تَیِیَ مَیْیَرُو ࢽغُوجَࢽَسُودْ تَلَاوَࢽْجَا جَوْرُو رَثَّاࢽَ، کُورُو ࢻُوُمَࢽْجَسُو یٜ أَمْࢽْجَرُو کْࢽْدُوُو ࢻْلٜجَغَیْ؞
[43] أَمَّ دَوُࢽْدُوࢽْ ࢽغَیْ غْࢽِ؞ وُࢽْدُ دُوُوࢽْ دَوُࢽْدُوࢽْ کُرَرُو وَلْدُ ثْرَاࢽَمَدْ وُولُودِࢽْدُورُو وَلْجُو!
[44] کُورُو وُࢽْدُ دُوُوࢽْ ࢻُوُمَࢽْدُورُو وَلْدُ ثْرَاࢽَمَدْ کَرٜیَ ࢽَیِ سَمَّیٜرُو وَلْجُو!
[45] أَوُووَ تَدَ کَمْبٜدْمَ تِرُو ࢽَࢽْوُولُودِ ثَدُّورُو غْࢽِ کَدِیُو، ࢽَࢽْوُولُودِ ثْدُو رُوࢽْجُ ثُو أَمْ ࢽغْوُ مٜرُجُورُو کَدِیُو،» یٜࢽُو؞
[46] عِیسَىٰ ࢻُوُرَوَࢽْجُوَ بْلَ جٜرِکُویٜرُو کَدِرَ؞ جَمَ کَدَا رُوکُّو جٜرِکُولَࢽْ کٜلُوُࢽِّیَ، کَمْبُ لَا ثُࢽْجُ بَرْتِمَوُسْ تَدَ تِمَوُسّٜ ثِ جَوَلّٜࢽْ ࢽَࢻْکَدَ لُواْ ثْدِ مبٜجِ؞
[47] عِیسَى کَمْ ࢽَجَرَتّٜدْ کُوجِرُو ࢻَࢽْغٜࢽِّیَ، کُواْ سَࢻْتُ بَدِجٜ: «عِیسَى، تَدَ مَیْ دَاوُدَیٜ، وُوَ ࢽجُࢽُوسْࢽٜ!» یٜࢽُو؞
[48] أَمْ ࢽغْوُ تِرُو جَکَّدٜ مْدْکْ ࢽَࢻْثُو یٜرَ، أَمَّ ثَیٜیَ کُوجْࢽَرُو کُواْ سَࢻْثٜ: «تَدَ مَیْ دَاوُدَیٜ، وُوَ ࢽجُࢽُوسْࢽٜ!» یٜࢽُو؞
[49] دَجِ عِیسَى دَجٜ: «تِیَ بُواْࢽُواْ إِسُو!» یٜࢽُو؞ کَمْبُدَ بُواْجَࢽٜ: «بَرٜ تْمَ کُولّْمِّ! ثِࢽٜ ࢽِیَ بُواْࢽْجِ،» یٜرَ؞
[50] کَمْبُدْ أَوُوࢽْجُ جَکْتُیٜ غْࢻْثٜ ثِجٜ ࢽَ عِیسَیٜرُو کَدِیُو؞
[51] عِیسَیٜ تِرُو: «أَوِ ࢽِرُو ࢽجْدّْکِّیَ، رَامْ؟» ثْࢽٜ تِیَ کِوُورُو؞ کَمْبُدْیٜ: «سَیِࢽَّ، سِمْ ࢻَࢽْدْکِّیَ، رَاکُّو!» یٜࢽُو؞
[52] دَجِ عِیسَیٜ تِرُو: «لٜࢽٜ، کَمْبْرْسٜࢽْمْ ࢽَࢽْغَرُو ࢽجْکَّوُو ࢻَࢽْدْمَّ!» یٜࢽُو؞ سَدْمَࢽْ سِمْ ثُوَࢽْدٜ جَوَلَّࢽْ عِیسَىٰ غَ بَدِیٜࢽُو؞