[1] کْلَ وُرِ مُمِࢽَّرُو ثَࢻْتُیٜࢽْ، وَدَ جَمَ عِیسَىٰ غَوُ لَرْدُ غَلَتِیَیٜرُو یِکّْࢽَدْ غَیْرُو، ࢽَیِ یٜ دٜوُو!
[2] مَوُیٜ یِمْ بُرْوُویٜیَ وُࢽْدُࢽْدُو یَیٜ کْلَ رِوَࢽْجُیٜࢽْ أَوُو لَا أَجَجُو؞ دَجِ إِسْکِّیَ، مْرَدُ أَوُو لَا ثَࢻْتُیٜ بَوُو؞
[3] سَ إِسْکِّیَ، أَمْ مْرْسَࢽُوَّدَ وُوتِیَ مُکُّوࢽَّ جُوَغْکّٜ کْࢽْجُوࢽْدُودَ جٜرُجَلٜمْبُو ثَادِ؞
[4] لٜدُࢽِدْ یٜ جُسّْࢽَرُو وَلْیٜࢽُووَ، دَجِ تَیِیَ رُوکُّو لٜࢽِیٜ؞
[5] ࢽغَوُو لَرْدُ مَکِدُوࢽِیَیٜࢽْ کُوکّْࢽَیٜࢽْ، ࢽَࢽْدُورُو إِسْکِّ، لَرْدُ مَکِدُوࢽِیَیٜࢽْ کُوکِّ ࢽَࢽْغَرُو؞
[6] وَࢽٜىٰ ࢽَࢽْدُوࢽْ کَوُ غَࢽَرُو بِ ࢽَࢽْغْرِمَرُو ࢽَمّْکِّ، ࢽغَیْࢽِࢽْ ࢽدَرَ لٜکِّ یَیٜ بَࢽَسُوٜ بْلَوُرُو دِکِّ؞
[7] أَوُووَ کْرْمَ کُودُ دِکِّ رُࢽْجُࢽْ غْࢽِ کُرُوࢽْدُو رَاکُّو، دَلِلْࢽْجُدْ، کْمَࢽْدٜ أَمَرْسٜىٰࢽُووَ، کَوُ غَࢽَرُو ࢽَࢽْدُوࢽْ دْغَکِّرُو تْمَࢽِ مبٜجِ؞
[8] أَمَّ حَرْ ࢽغْمْرِ ࢻٜࢽْتِکُوسّٜرُو بْرْࢽِ أَࢻِسَیٜࢽْ ࢽَمّْکِّ،
[9] ثِࢽَّ کِدَ ࢻَیْدَایٜ وُرُو ࢻَرَکُّو ࢻْرْمْسْغْࢽَ ࢽَࢽْغَرُو، أَمَّ وَدُوُ ࢽغْوُوَ؞
[10] تِمُوتِ إِسِیَ، تِرُو کِسْکْࢽُواْ رِدُ بَوُووَرُو دَوُࢽْدُوࢽْ ࢽَࢻْثُو، کِدَ کْمَࢽْدٜىٰ وُ غَیْ ثْدِ ࢽَࢽْغَرُو؞
[11] بَرٜ وُࢽْدُمَ تِیَ رُجْࢽِّ؞ ࢽَࢽِرُو إِسُورُو تِیَ کْلٜوَࢽْ سَلَمُّواْ، کْرَمِیَا رُوکُّو غُرٜکِّ ࢽَࢽْغَرُو؞
[12] کْرَمِࢽْدٜ أَࢻُولُسْدْ، ࢽَࢽْدُورُو کْرَمِیَا رُوکُّو لٜجَرُو جَوْمَرُو تِیَ لُواْࢽْکّْࢽَ، أَمَّ کْرْمَ لٜدُ سَمْ ثْرَاࢽِّ؞ دَمَ ثُوَࢽْدِیَ، لٜجِ؞
[13] ࢻَادَرُو دْغَیْوُو، کَمْبْرْسٜࢽْدُوࢽْ دُࢽُووَرُو دَࢽُواْ، کَرْوُࢽْدُو غٜرُواْ، دُࢽُووَرُو وَلُّواْ؞
[14] أَوُو سَمَّا کْرَوُولَࢽْ دٜوُو؞
[15] إِسْتِࢻَࢽُسَّ أَمْ ࢻَࢽّجُیٜیَ بُرْوُوࢽْ لَرْدُ أَکَیَیٜࢽْ عِیسَىٰ کَسَثَّࢽَ یٜ، مُمِࢽَّرُو کِدَ ࢽجْدُّورُو دُࢽُو ثَدْࢽَ یٜرُو ࢽُوࢽُوَّ؞ کْرَمِیَ، ࢽَیِیَ لُواْࢽْجَکّْࢽَ،
[16] أَمْ أَࢽِ غَیْ غَیْوُو، أَمْ ࢽغْࢽْࢻْتَࢽٜ کِدَ ثَدْࢽَدْࢽْ کُࢽْدٜࢽُّو؞
[17] کْࢽْدٜ إِسْتِࢻَࢽُسَّ ࢻُورْتُࢽَتُسَّ أَکَیِکُسَّیٜ کَرْوُࢽِ کْجِجْࢽَ، دَلِلْࢽْجُدْ ࢽَیِ بَوُو یَیٜ، ثُجُࢽْدُورُو وَلْجَࢽَ ࢽَࢽْغَرُو؞
[18] أَوُووَ رُوࢽِیَ کَاࢽدُووَ جَوْرُو إِسَبُوجَاࢽَ؞ أَمْ أَࢽِ غَیْرُو بْرْسْمْ یُواْ؞
[19] جَمَ عِیسَىٰ غَوُ لَرْدُ أَسِیَیٜدْ لٜوَࢽْجَیْ؞ أَکِلَا یَ بِلْکِسُوَ یٜ جَوْمَرُو کْمَࢽْدٜ ࢽَࢽْغَرُو لٜوَࢽْجَیْ، کُورُو جَمَ ࢻَࢽّجَࢽْ ثَࢻْتَیْدْ یٜ لٜوَࢽْجَیْ؞
[20] کْرَمِیَ سَمَّ لٜوَࢽْجَیْ؞ کَتّٜࢽْدُوࢽْ لٜوَ کْرَوُویٜࢽْ لٜوَدْࢽُواْ؞
[21] وُمَ بُلُسْ لٜوَ أَدَ مُکُّوࢽِلَࢽْ رُوُیٜکُّو؞
[22] وُࢽْدُ دُوُوࢽْ کْمَࢽْدٜیَ ثْرَاࢽِّدْ، بَسْکُوَدَرُو وَلْجُو! کْمَࢽْدٜ، أَرٜ!
[23] سٜرْ کْمَࢽْدٜ عِیسَیٜ ࢽَیِلَࢽْ دْغَ!
[24] کْرَوُوࢽِ عِیسَى أَلْمَسِیوُ ࢽَࢽْغَرُو ࢽَیِ سَمَّلَࢽْ دْغَ؞