[1] أَدْغَیْࢽِࢽْ أَࢽْدِدَ وُولُودِیَ أَلْمَسِیوُیٜیَ کِسْتُوُوُ أَسْرْ اللَّهیٜیَرُو ࢽغُوسَ؞
[2] کْلَ أَدْیٜࢽْ دُولٜ کِسْتُوُمَدْ أَمَࢽَّرُو وَلْجُو؞
[3] وُیٜࢽَّ شَرَ وُرُو سْدُّوِیَ، بِ أَلْکَلِ أَدَمْغْࢽَیٜ لَا سْدِّیَ، أَوِمَ غْࢽِ؞ أَیْ، کْلَࢽِمَرُو شَرَ یِدّْکِّوَوُو؞
[4] کَرْوُࢽِلَࢽْ سَرِوُوَرُو تْمَکّْࢽِ، أَمَّ أَدْ غْࢽِ وُوَ جِرٜمَرُو سْدِ، شَرَمَࢽِدْ کْمَࢽْدٜ؞
[5] أَدْ ࢽَࢽْغَرُو بَرٜ کَوُ سَࢽْجُ ثْدِرُو وُࢽْدُمَرُو شَرَ یِدُّوِّ، سَیْ کْمَࢽْدٜ إِسِیَ، تِ دُوُوࢽْ أَوُو ثُرُو دُوُیٜࢽْ غْرَادَ یٜ ࢻْلٜجِ، ࢽِیَ کَرْوُ کَمْبٜࢽْ دْغَࢽَ یٜ ࢻٜدٜرُو ثُتُّلُوِدْ؞ سَدْࢽْ وُࢽْدُ یَیٜ جَجَکْتُࢽْجُ کَلْکَلْ ࢽَ اللَّهیٜࢽْ ثُوَࢽْدِ؞
[6] تُو، کْرَمِیَ، کْࢽْدْغَیْࢽْدٜىٰࢽْ بَرٜ أَوُو کِتَوُلَࢽْ رُوُوَدَا کُوࢽُوِّرُو رِوُورُو، ࢽَیِ ࢽَࢽْغَرُو أَوُو أَࢽِیَ وُ کْلَࢽِیَ أَࢻُولُسَّا وُسَࢽَرُو ࢽغُوکّْࢽَ؞ ࢽغَیْࢽِࢽْ وُࢽْدُࢽْدُومَ رُوکُرَ ثْدٜ کَمْ لَآ ثُجُ کَمْ غَدٜىٰرُو جْغَیْوَوُو؞
[7] وُࢽْدُ أَمْبَ کُوࢽْمَّرُو ࢽِیَ ࢽجْدُو؟ أَوِ تَمَّ دُوُوࢽْ مُواْمِّ وُو؟ مُواْمَّا، أَوِ ࢽَࢽْغَرُو مُواْمِّ غَیْ أَوُلُو بُمِ؟
[8] حَرْ کُلُّوَّ! حَرْ غَرِوُࢽُوَّ! ࢽَیِ أَࢽْدِیَ رُوکُّو غْࢽِ مَیْیَرُو وَلُّوَّ! ثَ مَیْیَرُو وَلُّوَّا، أَࢽْدِ یٜ ࢽَیِیَ رُوکُّو کْرْمَیْ ࢽُودِیٜ!
[9] أَمَّ کُرُوࢽِیٜࢽْ اللَّه أَࢽْدِ کْࢽْغَیَمْبَدَ ࢽَ کْࢽْدَرْیٜىٰرُو غْࢽَسَاࢽَ، أَمْ دُوُوࢽْ تَیِرُو شَرَ کَرْمُویٜ ثَدّْࢽَدْ غَیْ؞ ࢻُوُ دُࢽِیَا مَلَیْیَوَا أَمْسُووَیٜࢽْ أَوُو مَࢽَیٜرُو وَلِّیٜࢽَ؞
[10] أَلْمَسِیوُ ࢽَࢽْغَرُو أَࢽْدِدْ حَࢽْغَلْࢽَمْبُوُ، أَمَّ ࢽَیِدْ أَلْمَسِیوُلَࢽْ رَشِدُوَ! أَࢽْدِدْ دُࢽُوࢽْدٜ بَوُو، أَمَّ ࢽَیِدْ دُࢽُوࢽْدُووَ! ࢽَیِدْ دَرَجَا، أَࢽْدِدْ رُوَدَ؞
[11] حَرْ کْرْمَرُو کْࢽَا ࢽغُدُوَ ࢻَࢽِّیٜ، کَرٜ دِࢽَ لُوَدَا، بَبَکَّدَ، ࢻَدُو بَوُووَ یٜ کْرْغَیْیٜ،
[12] کُورُو ࢽغْࢽْࢻْتِیٜ مُکُّوࢽْدٜࢽْ کِدَ دِیٜ؞ رَرَسَیْیَ، بَرْغَ دْࢻْکْیْیٜ، بَسَرْسَیْیَ، ࢽٜدِّیٜ،
[13] مَࢽَکُتُّ أَࢽْدِرُو وُلْسَغَیْیَ، سٜرْ یِدِّیٜ؞ أَࢽْدِ جَمْبُو دُࢽِیَیٜ غَیْرُو وَلِّیٜࢽَ، ࢽغَبْدُلَ أَمْ سَمَّیٜ غَیْرُو، حَرْ کُمَرُو؞
[14] ࢽَیِرُو أَدَ رُوُدُࢽِدْ، ࢽَیِیَ ࢽَࢽْغُرُو ࢽجَکُّورُو غْࢽِ، تَدَوَࢽِ جَوْرُو رَاکّْࢽَ غَیْ سْمُوࢽْدُو کَسْتُرُو؞
[15] أَوُووَ مَلْمْبَ دْوُ کَدَ أَلْمَسِیوُلَࢽْ ࢻَࢽْدُوِ یَیٜ، بَوَ کَدَ غْࢽِ تَوْ؞ وُمَ کَوُرِ کْجِیٜࢽْ عِیسَى أَلْمَسِیوُلَࢽْ بَوَࢽْدُورُو وَلْیٜکُّو؞
[16] أَدْ ࢽَࢽْغَرُو ࢽَیِیَ لُواْࢽْجَکِّ، مِسَلْࢽِ غَیْوُو؞
[17] دَلِلْ أَدْرُو تِمُوتِ تَدَࢽِ جَوْرُو رَاکّْࢽَ یٜ، کْمَࢽْدٜࢽْ أَمَࢽَّ یٜدَ جُوَࢽْغٜىٰرَکُّو؞ تِدْ کْࢽْدْغَیْࢽِ دُوُوࢽْ أَلْمَسِیوُلَࢽْ دِکّٜ ࢽدَرَࢽْ یَیٜ، دَوُ جَمَ عِیسَىٰ غَوُ ࢻِیٜࢽْ یَیٜ یِکّْرَکِّدَ ࢽَیِرُو إِسَتَࢽّجَغَیْ؞
[18] أَمْ لَا ࢽَࢽْدُورُو إِسْکِّوَوُورُو تْمَجَࢽٜ رُوکُرَوُرُو وَلْجَࢽَ،
[19] أَمَّ کْمَࢽْدٜ کَسَثِّیَ، تُسّْࢽِّࢽْ ࢽَࢽْدُورُو إِسْکّٜ رُوکُرَوُ أَࢽِیٜ مَࢽَࢽْجَ غْࢽِ، کْࢽْدُوُوࢽْجَ ࢽُوکِّ،
[20] أَوُووَ ࢽُودُو بَرْغَا اللَّهیٜدْ مَࢽَࢽْ غْࢽِ، کْࢽْدُوُوࢽْ کْرْغَ؞
[21] أَوِ رَوُوْ؟ کَآ وَ ࢽَࢽْدُورُو إِسْکِّ، رَ کْرَوُووَ ࢻْکَّ ࢻَرَکَّࢽْ إِسْکِّ؟