[1] کْرَوُو مَࢽُواْ، کْࢽْجُووَ رُحُ اللَّهیٜ ࢻَࢽْدُو جَوْرُو رَوُواْ، مَسَمَّࢽُّو ࢽَوِࢽَوِ دِیُو؞
[2] کَمْ تْلَمْ غَدٜࢽْ جَࢽْدٜجِمَدْ أَمْبُو غْࢽِ، اللَّهرُو جَࢽْدٜجِیے، أَوُووَ وُࢽْدُمَ أَوُو وُلْجِدَ أَسُجِوَوُو، دَلِلْࢽْجُدْ رُحُ اللَّهیٜࢽْ أَوُووَ أَسْرّٜ جَࢽْدٜجِ ࢽَࢽْغَرُو؞
[3] أَمَّ کَمْ ࢽَوِࢽَوِ ثْدِمَدْ أَمْبُو جَࢽْدٜجِیٜ تَیِیَ إِسَدُࢽُووَجِیے، کَرْوُࢽْجَرُو دُࢽُو ثِ، کْرَوُولَࢽْ رُوࢽْجَ یٜ إِسَبُوجِیے؞
[4] کَمْ تْلَمْ غَدٜࢽْ جَࢽْدٜجِمَدْ کْلَࢽْجُرُو دُࢽُو ثِ، أَمَّ کَمْ ࢽَوِࢽَوِ ثْدِمَدْ جَمَ عِیسَىٰ غَوُرُو دُࢽُو ثِ؞
[5] ࢽَیِ سَمَّ تْلَمْبَ غَدٜࢽْ جَࢽْدٜࢽُوِیَ، رَاکُّو، أَمَّ أَدَ کُوجْࢽَرُو ࢽَوِࢽَوِ دِوِیَمَ، رَاکُّو؞ کَمْ ࢽَوِࢽَوِ ثْدِمَدْ کَمْ تْلَمْبَلَࢽْ جَࢽْدٜجِمَدَ کُوجْࢽَ، کَمْ لَا ࢻِسَرْجٜ جَمَدْرُو دُࢽُو ثِ غْࢽِیَ؞
[6] تُو، کْرَمِیَ، ࢽَࢽْدُورُو إِسْکّٜ ࢽَیِرُو وَحَیِ سُو، إِلْمُ سُو، ࢽَوِࢽَوِ سُو، أَلَمْدُ سُولَࢽْ غْࢽِ، تْلَمْبَلَࢽْ جَࢽْدٜࢽْغٜىٰرَکُّووَ، أَوِ غْلٜ ࢽَیِرُو ࢻَیْدَࢽْجُ وُو؟
[7] أَوُووَ رُو بَوُووَ أَلْغَیْدَ بِ کُمْبِ غَیْ کُواْࢽْجَ کَلْکَلُّو ࢽُکْثَیْوَوُووَ، ࢽدَیِࢽْ غْلٜ أَوُو ࢻُجَیْ بِ جَجَیْدْ أَسُدِ؟
[8] کُورُو کَࢽْغَدِ کَلْکَلُّو ࢻُجَیْوَوُووَ، وُࢽْدُ غْلٜ کْرِوُرُو دَبَّرْدِ؟
[9] ࢽَیِ یٜ ࢽغَیْ؞ تْلَمْࢽْدُوࢽْ مَࢽَ کَلْکَلْ غْࢽِ دِوِیَ، ࢽدَیِࢽْ غْلٜ أَوُو وُلُّوِدْ أَسُدِ؟ مَࢽَ کَرَا دٜرُو یِدُّوِ؞
[10] دُࢽِیَࢽْ تْلَمْبَ جِرِ جِرِ کَدَ مبٜجِ، کُورُو تْلَمْ مَاࢽَࢽْجُ بَوُووَ ࢻَلْمَ بَوُو؞
[11] أَدْ ࢽَࢽْغَرُو تْلَمْبٜ مَاࢽَࢽْجُ ࢽُوکّْࢽِرُو وَلْیٜࢽُووَ، کَمْدْرُو کُسُوتُّورُو وَلّْکّْࢽَ، کَمْدْ یٜ وُرُو کُسُوتُّورُو وَلْجْࢽَ؞
[12] ࢽَیِ یٜ ࢽغَیْ؞ کْࢽْجُووَ رُحُیٜدَ ࢻَࢽْدُو جَوْرُو رَاوَّ ࢽَࢽْغَرُو، أَوُو جَمَ اللَّهیٜیَ إِسَدُࢽُووَجِیدَ ࢽغْوُرُو مَࢽُواْ؞
[13] أَدْمَ ࢽَࢽْغَرُو کَمْ تْلَمْ غَدٜࢽْ جَࢽْدٜجِمَدْ کْࢽْجُو ࢻِسَرْدُیٜ ثُوَࢽْدُورُو مُودُوَ ثْدُو؞
[14] تْلَمْ غَدٜࢽْ مُودُوَ دِکِّیَ، رُحُࢽِدْ مُودُوَ ثْدْࢽَ، أَمَّ حَࢽْغَلْࢽِدْ أَوِمَرُو ࢻَیْدَجْࢽِّ؞
[15] تُو، أَوِ غْلٜ دِکِّ؟ رُحُࢽِࢽْ مُودُوَ دِکِّ، کُورُو حَࢽْغَلْࢽِ یٜࢽْ مُودُوَ دِکِّ؞ رُحُࢽِࢽْ أَیْیَ ࢽجُࢽْغُورُویٜ یٜکِّ، کُورُو حَࢽْغَلْࢽِ یٜࢽْ أَیْیَ ࢽجُࢽْغُورُویٜ یٜکِّ؞
[16] أَدْ غْࢽِیَ، رُحُࢽْمْلَࢽْ اللَّهَ وُسٜࢽْمِیَ، کَمْ دُوُوࢽْ أَوُو أَࢽِیَ ࢽُوجْࢽِّدْ أَوُو وُلّْمَّدَ أَسُجِوَوُووَ، ࢽدَیِࢽْ غْلٜ وُسٜدُࢽْمْدْرُو «أَمِࢽْ!» ثْࢽِ؟
[17] ࢽغْلَرُو اللَّهَ وُسٜࢽْمِ یَیٜ، کَمَࢽْمْدْیٜ کَرْوُࢽْجُ دُࢽُووَجِوَوُو؞
[18] تْلَمْبَ غَدٜࢽْ جَࢽْدٜدُࢽْ ࢽَیِ سَمَّا کُوࢽْجَکّْࢽَ ࢽَࢽْغَرُو اللَّهَ وُسٜࢽْکِّ،
[19] أَمَّ دَوُ جَمَ اللَّهیٜࢽْ کَلْمَ دْوُ مٜوُ تْلَمْلَࢽْ وُلّْکِّ یَیٜرُو أَمْ غَدٜیَ أَلَمّْکُّورُو کَلْمَ أُوُمَ حَࢽْغَلْࢽِلَࢽْ وُلّْکِّیَ، رَاکُّو؞
[20] کْرَمِیَ، کْلَ حَࢽْغَلّٜࢽْ بَرٜ یَلَّرُو وَلُّوِّ؞ کْلَ أَوُو دِوِیٜࢽْ یَلَّ سَࢽَࢽَرُو وَلُّواْ، أَمَّ کْلَ حَࢽْغَلْدْیٜࢽْ رَشِدُوَرُو وَلُّواْ!
[21] أَکُّو أَوُو أَتَّوْرَلَࢽْ رُوُوَدَدْ: «کْمَࢽْدٜىٰ: ‹جَمَ أَدْرُو أَمْ تْلَمْ غَدٜىٰیَ ثِ کُسُوتُّووَیٜیَیٜࢽْ جَࢽْدٜغْکِّ، أَمَّ أَدْسُوࢽْ وُوَ کْرْࢽْسَیْوَوُو،› یٜࢽُو؞»
[22] أَسٜ، تْلَمْبَدْ ࢽَࢻْتُ أَلَمَیٜ ثَدِ، عِیسَىٰ غَوُرُو غْࢽِ، غَࢽَمْبُوُرُو، ࢽَوِࢽَوِدْ یٜ غَࢽَمْبُوُرُو غْࢽِ، عِیسَىٰ غَوُرُو؞
[23] أَدْ ࢽَࢽْغَرُو، جَمَ عِیسَىٰ غَوُ سَمَّ ثَࢻْتَࢽٜ تْلَمْبَ غَدٜࢽْ جَࢽْدٜجَیْ دُوُوࢽْ، أَمْ أَوُو أَࢽِیَ ࢽُوجَࢽِّ بِ عِیسَىٰ غَوُ غْࢽِ إِسَࢽٜ ࢽَدْرُو ࢽغَسَیِیَ، ࢽَیِیَ جُورِیَرُو ࢽغُوࢽْجَیْوَوُو وَ؟
[24] أَمَّ ثَمُّودْࢽْ أَمْ سَمَّ ࢽَوِࢽَوِ ثَدِ دُوُوࢽْ، کَمْ عِیسَىٰ غَمَ غْࢽِ بِ أَوُو أَࢽِیَ ࢽُوجْࢽِّ لَا ࢽَدْرُو ࢽغَیِیَ، تَیِ سَمَّ ࢽَࢽْغَرُو تِ بِوُمَرُو تَبَّتُّو ࢽُوجِ، تَیِ سَمَّ ࢽَࢽْغَرُو شَرَ تِیَ ثْدَیْ،
[25] أَسْرْ کَرْوُࢽْجُیٜ کَادَرُو وَلْجٜ، ࢻْدْرْیٜرُو تْمْدٜ اللَّهرُو أَمْبْثِّیٜ: «جِرٜمَرُو اللَّه دَوُࢽْدُوࢽْ!» ثْࢽِ؞
[26] تُو، کْرَمِیَ، أَوِ غَیْ غْلٜ؟ ثَࢻْتُوِیَ، وُࢽْدُࢽْدُو یَیٜ أَیْیَ ࢽجُࢽْغُورُویٜ بِ أَلَمْدُ، بِ وَحَیِ ثُوُدِ، بِ مَࢽَ تْلَمْلَࢽْ ثْدِ، بِ ࢻِسَرْجِ؞ أَوُو سَمَّ جَمَدَ إِسَدُࢽُووَجُوُورُو تْدُو؞
[27] أَمْ لَا تْلَمْلَࢽْ جَࢽْدٜجَیْیَ، بَرٜ یِࢽْدِ بِ یَکُّ کُوجْࢽَرُو مَࢽَ ثَدْࢽِّ، ࢻَلْ ࢻَلّٜࢽْ ثَدُو، کُورُو کَمْ لَا ࢻِسَرْجُو؞
[28] ࢻِسَرْدُمَ بَوُورُو وَلْیٜࢽُووَ، وُࢽْدُࢽْجَ یَیٜ دَوُ ثَمُّودْیٜࢽْ غْمْ ثْدُو، کْلَࢽْجُوَ اللَّهَرُو جَࢽْدٜجُوُو؞
[29] ࢽَوِیَ یِࢽْدِ بِ یَکُّ مَࢽَ ثَدُو، أَمْ غَدٜ یٜ مَࢽَدَ غَیِرْجَ؞
[30] وَحَیِ لَا کَمْ غَدٜ ࢽَدْࢽْ ࢽَࢻْکَدَرُو بَیِࢽْدِییَ، بُرْوُویٜ مَࢽَ ثْدِدْ غْمْ ثْدُو؞
[31] أَمْ سَمَّ ثَرُو، دُࢽُو ثَوَࢽْدُورُو، ࢽَیِ سَمَّ رَࢽْغُوٜ ࢻَلْ ࢻَلّٜࢽْ ࢽَوِࢽَوِ دِوِ؞
[32] ࢽَوِیَ رُحُࢽْجَ ࢽَوِࢽَوِیٜدَ ثَرِوِ،
[33] أَوُووَ اللَّهدْ اللَّه حَࢽْغَلْسَࢽْغُویٜ غْࢽِ، اللَّه ࢽَࢽْلٜوَیٜ؞ جَمَ مُمِࢽَّ سَمَّیٜࢽْ تْدِدْ غَیْ،
[34] کَمُوَدْ ثُرُو ثَمُّویٜࢽْ غْمْ ثَدُو، أَوُووَ جَࢽْدٜدُ تَیِرُو أَمَرْدْغْࢽِّ، أَمَّ أَتَّوْرَ یٜ وُلْجْࢽَدْ غَیْ، کْࢽْغَارُو ࢽَࢻْثَ؞
[35] أَوُو لَآ ࢽُودُ ثَرَاࢽَا، کوَوَࢽْجَا ࢻَدُوࢽْ ثَوُورُو؞ ثُرُو ثَمُّویٜࢽْ کَمُیٜ مَࢽَ دِیُودْ جَوْرُو ࢽَࢽْغُوَ؞
[36] مَࢽَ اللَّهیٜدْ ࢽَیِلَمَࢽْ وَ بَدِیٜࢽُو؟ رَ، ࢽَیِ رُࢽْدُومَا ࢽَࢽْجَا؟
[37] کَمْ لَا تِ ࢽَوِ بِ تِلَࢽْ کْࢽْجُو رُحُیٜیَرُو تْمَیٜࢽُووَ، أَوُو رُوُࢽْجَغَکّْࢽَدْ وَدَ کْمَࢽْدٜىٰ وُورُو أَسُجُو؞
[38] کَمْ لَا أَدَ کِسْتُوُرُو وَجِیَ، تِرُو کِسَّغَیْوَوُو؞
[39] تُو، کْرَمِیَࢽِ، ࢽَوِࢽَوِ دِیُو جَوْرُو رَوُواْ، بَرٜ تْلَمْبَ غَدٜࢽْ جَࢽْدٜدُ دَࢻْکْوِّ،
[40] أَمَّ أَوِ یَیٜ جِرِ جُسّْࢽَا سَوِیَدَالَࢽْ تْدِرُو وَلْجُو؞