[1] کَمْࢽْدُو لَا سُوࢽْجُ کْلَ کَمَࢽْجُیٜࢽْ ثْدَࢽَا، ࢽدَیِࢽْ ࢽَ مُمِࢽَّیٜرُو غْࢽِ، ࢽَ کْرْدِیَیٜرُو لٜࢽُوٜ شَرَ ࢽجَدِّدْ؟
[2] رَ، مُمِࢽَّدْ دُࢽِیَرُو شَرَ ثَدِّرُو ࢽُوࢽُوِّ وَ؟ کُورُو ࢽَیِمَ دُࢽِیَرُو شَرَ یِدُّوِیَ، مَرْتَوَ لَمَرْ تْࢽْغْرِمَا شَرَدُیٜ ࢽَغْوِّ وَ؟
[3] مَلَیْیَوَرُو شَرَ یِدِّیٜرُو ࢽُوࢽُوِّ وَ؟ بَلّٜ لَمَرَّ دُࢽِیَ أَدْیٜ؟
[4] أَدْ ࢽَࢽْغَرُو لَمَرَّ أَࢽِ غَیْ شَرَرُو تَوَّا، أَوِرُو أَمْ دُوُوࢽْ ࢽَ جَمَ عِیسَىٰ غَوُیٜࢽْ أَوِمَ غْࢽِدْرُو سُوࢽْدُو یَدُوِدْ؟
[5] ࢽَࢽْغُࢽُواْرُو وُلّْکِّ؞ ࢽغَیْمَ رَشِدُ دَوُࢽْدُوࢽْ رَکْثٜ کَتّٜ کْرَمِیَیٜࢽْ شَرَ کَمْجِ ࢻَلْمَ بَوُو وَ؟
[6] کْرَمِ لَا کْرَمِ کَمَࢽْجُوَ شَرَرُو ثَدِ، کُورُو أَدْ ࢻُوُ غَࢽَمْبُوُیٜࢽْ!
[7] أَوِرُو وَلْیٜࢽُو یَیٜ، شَرَ کَتّٜࢽْدُوࢽْ دِیُودْ ࢽجُرُوࢽْدُو؞ جِرٜࢽَمْبُ ࢽَیِرُو ࢽجَدِّیَمَ ࢽغَلْوُو، غْࢽَ؟ کْࢽْدَࢽْدُو جَوُیْیَمَ ࢽغَلْوُو، غْࢽَ؟
[8] أَمَّ ࢽَیِ کْلَࢽْدُو جِرٜࢽَمْبُ سُو، کْࢽْدَ بُو سُو، حَرْ کْرَمِیَمَرُو یِدُّوِ!
[9] رَ، جِرٜࢽَمْبُوُ ࢽُودُو بَرْغَا اللَّهیٜࢽْ وَرَسَ ثَوَࢽْدِوَوُورُو ࢽُوࢽُوِّ وَ؟ بَرٜ جَمْبَدُوِّ! أَمْ دِوِ، بِ سْࢽْمْ غَوُ، بِ کْࢽْجْࢽَوُ، بِ کَمُکَمُ، بِ لُتُّوُ،
[10] بِ بَرْوُوَ، بِ مَࢽْغَرْدُوُ، بِ مبَلْوُ، بِ رَرَدُوُ، بِ جَمْبَوُ ࢻِمَ ࢽُودُو بَرْغَا اللَّهیٜیَ وَرَسَجَیْوَوُو؞
[11] ثَلَࢽْ لَاࢽدُومَ ࢽغَیْ؞ أَمَّ ࢽَیِیَ کَسَلْࢽْجَࢽَ، تَیِرُّو وَلُّوَّ، کُورُو ثُ کْمَࢽْدٜ عِیسَى أَلْمَسِیوُیٜیَ رُحُ اللَّهࢽْدٜیَیٜࢽْ جِرٜوُرُو وَلُّوَّ؞
[12] «أَوُو سَمَّ وُرُو أَمَرْدْغْࢽَ،» ࢽُوِ، أَمَّ أَوُو سَمَّ غْࢽِ ࢻَیْدَا وُو؞ «أَوُو سَمَّ وُرُو أَمَرْدْغْࢽَ،» أَمَّ وُ کُولّْکّٜ أَوِمَ سُࢽُودِوَوُو؞
[13] «کْمْبُودْ ثُرُویٜ، ثُرُو یٜ کْمْبُویٜ،» ࢽُوِ، کُورُو اللَّه تَیِ یِࢽْدِسُووَ بَوُورُو ثْدِ؞ تِیدْ أَوُو کْࢽْجْࢽَیٜ غْࢽِ، تِدْ کْمَࢽْدٜىٰ، کُورُو کْمَࢽْدٜ یٜ تِییٜ؞
[14] اللَّه کَرْمُولَࢽْ کْمَدَ ثْسَࢽْغْࢽَ، کُورُو أَࢽْدِ یٜیَ کْࢽْدُوُوࢽْجُࢽْ سَسَࢽْغِ؞
[15] تِیࢽْدُودْ ࢽَشَ أَلْمَسِیوُیٜرُو ࢽُوࢽُوِّ وَ؟ تُو، ࢽَشَ أَلْمَسِیوُیٜ ࢽغُوکّٜ ࢽَشَ جَوَرّٜرُو دِکِّ وَ؟ أَعَ، تْمَّرُو ࢽغَیْ غْࢽِ!
[16] رَ، کَمْ جَوَرُّو کْلْدْغْࢽَمَدْ تِیَ رُوکُّو تِیے ࢻَلُّو وَلْجَࢽَرُو ࢽُوࢽُوِّ وَ؟ أَکُّو أَوُو کِتَوُ وُلْجْࢽَدْ: «تَیِ یِࢽْدِسُو تِیے ࢻَلُّو وَلْجَیْ؞»
[17] أَمَّ کَمْ کْمَࢽْدٜرُو کْلْدْغْࢽَمَدْ تِیَ رُوکُّو رُحُ ࢻَلُّو وَلْجَیْ؞
[18] کْࢽْجْࢽَرُو کَدْࢽُواْ! بِوُ کَمْ ثْدْࢽَ سَمَّ دٜیَ تِییٜࢽْ کْرْغَ، أَمَّ کْࢽْجْࢽَمَ تِیࢽْجُمَرُو بِوُ ثْدِّ؞
[19] رَ، تِیࢽْدُودْ ࢻَدُو رُحُ اللَّهیٜ، تِدْ ࢽَیِࢽْ دْغَࢽَ، کُورُو اللَّهیٜࢽْ إِسِرُو ࢽُوࢽُوِّ وَ؟ ࢽَیِدْ کَاࢽدُو غْࢽِ،
[20] اللَّه ࢽَیِیَ تَمَࢽْلَࢽْ ࢽجَسُوُࢽَ؞ أَدْ ࢽَࢽْغَرُو تِیࢽْدُولَࢽْ اللَّهرُو دَرَجَ یُواْ!