[1] دَوُࢽْدُوࢽْ کْࢽْجْࢽَ ثَدِ ثَࢽِ ࢻَࢽِّیٜࢽَ، کُورُو کْࢽْجْࢽَ دُوُوࢽْ جِرِࢽْجُ ࢽَ کْرْدِیَیٜمَࢽْ تْدِوَوُودْ: حَرْ کَمْ لَا کَمُ بَوَࢽْجُیٜیَ مَجِ؞
[2] کُورُو رُوکُرَ دِوِ! کَرْوُکُتَّ دِوٜ کَمْ أَوُو أَدَ ثْدْࢽَدَ دَوُࢽْدُوࢽْ تُلُوَّمَ ࢽغْلَ وُو!
[3] وُدْ تِیلَࢽْ ࢽَࢽْدُوࢽْ غْࢽِ یَیٜ، کَرْوُلَࢽْ ࢽَیِیَ رُوکُّو، کُورُو کْلَ کَمْ أَوُو أَدَ ثْدْࢽَدْیٜࢽْ وُ مبٜجِ غَیْرُو شَرَ کَمّْکّْࢽَ،
[4] سَ ثُ کْمَࢽْدٜ عِیسَیٜࢽْ ثَࢻْتُوِیَ، رُحُࢽِ یٜ کْࢽْدُوُو کْمَࢽْدٜ عِیسَیٜࢽْ کُࢽْدٜࢽُّو مبٜجِ دُوُوࢽْ،
[5] کَمْ أَدَ مُکُّو إِوُلِیسّٜرُو یَکُّواْ، تِیࢽْجُوَ ثٜجُو، یِمْ کْمَࢽْدٜیَ رُحُࢽْجُ ࢽجْکَّوُو ثُوَࢽْدُورُو؞
[6] أَوُلُو بُوࢽْدُودْ ࢽغْلَ غْࢽِ! یِسْ تْࢽْغْرِ رُࢽْغُو سَمَّا إِسَࢻُجِیرُو ࢽُوࢽُوِّ وَ؟
[7] ࢽَیِدْ رُࢽْغُو یِسْ بَوُووَ غَیْ، یِسْ دِࢽَدَ تُلُوُواْ، رُࢽْغُو بْرِࢽُّو وَلُّواْ، أَوُووَ ࢽغْلَرُو لَیَࢽْدٜ ࢽجْکَّیِرَمْبٜدْ دُوَادَ، تِمَ أَلْمَسِیوُ وُو؞
[8] أَدْ ࢽَࢽْغَرُو ࢽغْمْرِدَ دِیُو، یِسْ دِࢽَ، وُوتّٜ یِسْ ࢽَࢽْکْلَدُویٜیَ ࢽَࢽْدِوِیٜیَلَࢽْ غْࢽِ، بُرُودِ یِسْ بَوُووَ، وُوتّٜ ࢽَࢽْتَیِرَّ جِرٜیَلَࢽْ دِیُو؞
[9] ثُرُو وُوتِیَࢽِیٜࢽْ ࢽَیِرُو جَوَلْ کْࢽْجْࢽَوُیٜࢽْ لُوُواْرُو رُوُࢽْجَغَکّْࢽَ،
[10] أَمَّ أَوُو وُلْدُ رَاکّْࢽَدْ کْࢽْجْࢽَمَ دُࢽِیَ أَدْیٜ غْࢽِ، بِ مَࢽْغَرْدُمَ، بِ ࢽدَلْدُمَ، بِ سْࢽْمْ غَمَ، أَدْ غْࢽِیَ، سَیْ دُࢽِیَࢽْ لُوُوِیَ؞
[11] أَعَ، أَوُو رُوُࢽْجَغَکّْࢽَدْ تِمَ کَمْ عِیسَىٰ غَمَ ثْࢽِ دُوُوࢽْ کْࢽْجْࢽَمَ، بِ مَࢽْغَرْدُمَ، بِ سْࢽْمْ غَمَ، بِ رَرَدُمَ، بِ مبَلْمَ، بِ ࢽدَلْدُمَا، بَرٜ تِرُو کْلْدْغْوِّ، بَرٜ کَمْ أَدْغَیْیَ مَسْࢽَمَ دِوِّ؞
[12] أَوِ لَمْبُوࢽِ أَمْ دٜیَیٜدَ شَرَدُرُو؟ أَمْ ثُرُویٜدْمَا شَرَࢽُوِ، مَرٜ؟
[13] أَمْ دٜیَیٜدَ اللَّه شَرَجِ؞ «کَمْ دِوِدَ دَوُࢽْدُوࢽْ تُلُوُواْ!»