[1] وُمَ بُلُسْ رَوُو اللَّهیٜࢽْ کْࢽْغَیَمْ عِیسَى أَلْمَسِیوُیٜیَ کْرَمِࢽْدٜ تِمُوتِیَدْ جَمَ اللَّهیٜ بْرْࢽِ کُورِࢽْتِیٜࢽْ دَسَاࢽَا مُمِࢽَّ لَرْدُ أَکَیَیٜ ࢽغَلَࢽْ دَسَاࢽَ سَمَّارُو:
[2] اللَّه بَوَࢽْدٜیَ کْمَ عِیسَى أَلْمَسِیوُوَ ࢽَیِرُو سٜرَّ ࢽَࢽْلٜوَا ࢽجَدُو!
[3] بَرْغَا اللَّه بَوَ کْمَࢽْدٜ عِیسَى أَلْمَسِیوُیٜ، بَوَ کَࢽْجِمَرِیٜ، اللَّه رُو بُودَ ࢻِیٜ یَیٜ،
[4] تِ دُوُوࢽْ بَسَرِࢽْدٜ سَمَّࢽْ رُوࢽْدٜ إِسَبُوجِیدْ؞ أَدَ دِیُوࢽْجُدْ، أَࢽْدِ یٜ رُو بُودَ ࢽَ اللَّهیٜࢽْ ࢻَࢽْدِیٜࢽَدْلَࢽْ رَࢽْغِیٜ أَمْ بَسَرِ ࢻِࢽْ یَیٜ دَسَاࢽَدْیٜ رُوࢽْجَ إِسَبُوغْیْیٜ؞
[5] جِرِ بُوࢽٜ أَلْمَسِیوُ ثَࢽَدَ أَࢽْدِ یٜ جَوْمَرُو یَیْیٜدْ غَیْ، ࢽغَیْمَ أَلْمَسِیوُلَࢽْ رُو بُودَ ࢽغْوُ ࢻَࢽْدِیٜ؞
[6] بَسَرِ کِیَیْیٜیَ، أَدْ رُو بُودَࢽْدُووَ ࢽجْکَّوُو ࢻَࢽْدُوࢽْدُووَ ࢽَࢽْغَرُو، کُورُو رُوࢽْدٜ بُویٜࢽُووَ، بُوࢽٜ یَیْیٜࢽَدَ ࢽَیِ یٜ ࢽٜدُّوٜ یَوَّا، رُوࢽْدُو بُودَرُو؞
[7] کُورُو تْمَࢽْدٜ کَࢽْجِࢽْدُوࢽْ دُࢽُووَ، بُوࢽٜدْࢽْ ࢽُوَࢽْدُو مبٜجِدْ غَیْ، رُو بُودَدْ یٜࢽْ ࢽُوَࢽْدُو مبٜجِرُو ࢽُوࢽِیٜࢽَ؞
[8] کْرَمِیَ، بَسَرِ لَرْدُ أَسِیَیٜلَࢽْ أَࢽْدِیَ سَوَࢽْدْࢽَدَ ࢽُوࢽُوِیَ، رَیِیٜ؞ تَیْ دَجٜ دُࢽُوࢽْدٜ کُوجٜ، کُتُّرُو وَلْسَغَࢽٜ، حَرْ رُوࢽْدٜمَ ࢻُدِّیٜرُو تْمَࢽِیٜࢽَ؞
[9] أَیْ، أَࢽْدِ کْلَࢽْدٜمَࢽْ وُواْمْ کَرْمُویٜ غَیْ ࢻَࢽِّیٜࢽَ، ࢽغَیْمَ تْمَࢽْدٜ کْلَࢽْدٜࢽْ غْࢽِ، اللَّه أَمْ سَࢽُࢽَا ثْسَࢽْغِدْࢽْ کْرْغَ،
[10] تِ دُوُوࢽْ کَرْمُو جِرِ أَدْࢽْ سَمُواْࢽَ، ࢻُوُ یٜࢽْ سَمُویِدْ، تِمَرُو تْمَࢽْدٜ ࢽجْکَّوُویٜ کٜکِّیٜ؞
[11] ࢽَیِ یٜ مُودُوَلَࢽْ بَࢽَسَࢽُواْ، ࢽغَیْࢽِࢽْ مُودُوَ أَمْ ࢽغْوُیٜࢽْ بَرْغَ ࢻَࢽْدِیٜ، کْلَدْࢽْ أَࢽْدِ ࢽَࢽْغَرُو اللَّهَ وُسٜجَیْ؞
[12] کَرْوُࢽْدٜ شٜدَجْࢽَدْ غَیْ، أَࢽْدِدْ ࢽَࢽْرَشِدُ أَدَمْغْࢽَیٜࢽْ غْࢽِ، سٜرْ اللَّهیٜࢽْ، کُورُو کَرْوُ تِلُووَا ࢽَࢽْتَیِرْ اللَّهیٜیَلَࢽْ کْࢽْدْغَیْ دُࢽِیَࢽْ دِیٜࢽَ، مَسَمَّࢽُّو ࢽَࢽْدُوࢽْ؞ أَدْمَ دْلْوُ أَوُلُو بُوࢽْدٜىٰدْ وُو؞
[13] أَوُو غَدٜ غْࢽِ ࢽَیِرُو رُوُࢽْجَغَیْیٜ، سَیْ أَوُو کْرَࢽُوٜ أَسُࢽُوِ بَسْ؞ کُورُو ثُوتُّو أَسُࢽُوِرُو تْمَکّْࢽَ،
[14] ثَلَࢽْ غَࢽَرُو أَسُࢽُوَّدْ غَیْ؞ أَوُو رُوُࢽْجَغَیْیٜدْ تِمَ یِمْ کْمَࢽْدٜ عِیسَیٜࢽْ ࢽَیِدْ دْلْوُࢽْدٜ أَوُلُو بُویٜدْ غَیْ، أَࢽْدِ یٜ دْلْوُࢽْدُو أَوُلُو بُویٜ؞
[15] أَدَ مْرْسَࢽْکّْࢽَ ࢽَࢽْغَرُو، بَرْغَ کَوَکْیِࢽْدِ ࢻَࢽْدُواْرُو ࢽَࢽْدُورُو بُرْوُوࢽْ لٜدُرُو رَاکُّو؞
[16] أَیْ، ࢽَࢽْدُویٜࢽْ لَرْدُ مَکِدُوࢽِیَیٜرُو لٜکُّو، کُورُو مَکِدُوࢽِیَلَࢽْ وَلْدْکّٜ ࢽَࢽْدُورُو إِسْکّٜ ثِدِ یَحُدِیَیٜرُو لٜکُّورُو بَࢽَسْغْوِیَ، رَاکُّو؞
[17] ࢽِیَ ࢽغُودُࢽِ أَدْ، کْسْکٜرُو دِکّْࢽَ وَ؟ رَ، أَوُو دِکِّدَ کْلَ حَلْ کَمْبٜࢽْ وَ ࢽِیَࢽْکّٜ وُیٜ: «آه،» ࢽْکّٜ کُورُو وَلْدْکّٜ: «أَعَ،» ࢽْکِّ وَ؟
[18] اللَّه أَمَࢽْمَدْ غَیْ، کَوُرِࢽْدٜ ࢽَࢽْدُوࢽْ مَࢽَ جَمْبَیٜ غْࢽِ؞
[19] عِیسَى أَلْمَسِیوُ تَدَ اللَّهیٜ تِ دُوُوࢽْ وُوَ سِلَسَّ تِمُوتِیَ ࢽَࢽْدُوࢽْ مَوُوࢽِیٜࢽَدْ أَوُو جِرٜىٰیَ کَتُّوُیٜیَ غْࢽِ، تِلَࢽْ کُلُّمْ جِرٜرُو وَلْجْࢽَ؞
[20] أَیْ، تِلَࢽْ وَدُوَ اللَّهیٜ سَمَّ جِرٜرُو وَلْجَࢽَ، کُورُو دَرَجَ اللَّهیٜرُو تِیٜࢽْ أَࢽْدِیٜ: «أَمِࢽْ!» ࢽِیٜ؞
[21] اللَّه کْلَࢽْجُمَ أَࢽْدِیَ ࢽَیِیَا أَلْمَسِیوُلَࢽْ کْرٜسَࢽٜ دُࢽُو سَدٜ
[22] تَوَࢽْجُ غْࢽَسَغَࢽٜ کُورُو کَرْوُࢽْدٜرُو ࢽَࢻْتُ رَࢽّٜرُو رُحُࢽْجُ کٜکُّو؞
[23] وُ کْلَ رُوࢽِیٜمَࢽْ، اللَّهدْمَ شٜدَمَࢽِ وُو، بَرٜ حَࢽْغَلْࢽْدُو سَࢽْغْکّْࢽِرُو بْرْࢽِ کُورِࢽْتِیٜرُو وَلْدْکّٜ کْࢽْدٜ وَیٜکُّو؞
[24] کَمْبْرْسٜࢽْدُو رَدِّیٜ غْࢽِ، أَمَّ کَرْوُکْجِࢽْدُورُو سَوَوَࢽْدُو کِدَیٜرُو وَلِّیٜࢽَ، أَوُووَ کَمْبْرْسٜࢽْدُوࢽْ دُࢽُووَرُو دَࢽُوَّ؞