[1] تْلَمْبَ أَمْبٜیَ مَلَیْیَوَیٜیَلَࢽْ جَࢽْدٜࢽْکِّ یَیٜ، أَمَّ کْرَوُو وُلَࢽْ بَوُورُو وَلْیٜࢽُووَ، وُدْ ࢽُکْتُ سُیٜ کَلَلَ ࢽغْوُوَ بَسْ؞
[2] کُورُو ࢽَوِࢽَوِ دِکّٜ أَسْرَّ إِلْمُوَ سَمَّا أَسُکّٜ کَمْبْرْسٜ حَرْ کَوْ کُرُوُ سْࢽَکْتُیٜ تَکّْࢽَ یَیٜ، أَمَّ کْرَوُو وُلَࢽْ بَوُورُو وَلْیٜࢽُووَ، وُدْ أَوِمَ غْࢽِ؞
[3] کُورُو کْࢽْدَࢽِ تَکّْࢽَ سَمَّا سَدَارُو یِکّٜ تِیࢽِ یٜ وَرْدُرُو سْرْتْکْکِّ یَیٜ، أَمَّ کْرَوُو وُلَࢽْ بَوُورُو وَلْیٜࢽُووَ، رِوَࢽِ بَوُو؞
[4] کْرَوُودْ کَࢽَدِیَ یٜ، سٜرَّ یٜ؞ کْرَوُودْ، ࢽَࢽْدْرِ تِیَ ثْدَیْوَوُو، أَوُلُو جُوُیْوَوُو، رُوکُرَ یٜ ثْدِوَوُو،
[5] تِدْ أَوِمَ ثَࢽْدْࢽِّ ثْدِوَوُو، کْلَࢽْجُرُو مَجِوَوُو، دُوَࢽْ غْرْغَجِوَوُو، أَوُو دِوِ کَرْوُࢽْ رُوجِوَوُو،
[6] تِدْ کْلَ ࢽَࢽْدِوِیٜࢽْ کَرْوُکْجِ ࢻْلٜجِوَوُو، أَمَّ کْلَ أَوُو جِرٜىٰࢽْ کَرْوُکْجِ ࢻْلٜجِ؞
[7] کْرَوُودْ أَوُو سَمَّا غَوُرْجِ، أَوُو سَمَّا مْرْسَجِ، أَوُو سَمَّࢽْ تْمَجِ، أَوُو سَمَّࢽْ ࢽٜثِّ؞
[8] کْرَوُودْ تْمَّرُو ثٜرِوَوُو؞ ࢽَوِࢽَوِ دِیُودْ، بَوُورُو وَلْجِ؞ تْلَمْبَ غَدٜࢽْ مَࢽَ دِیُودْ، ثٜرِ؞ إِلْمُدْ، بَوُورُو وَلْجِ؞
[9] أَوُووَ إِلْمُࢽْدٜدْ یٜ ثِࢽْجُوَ، کُورُو ࢽَوِࢽَوِࢽْدٜدْ یٜ ثِࢽْجُوَ،
[10] أَمَّ أَوُو کَلْکَلْدْ إِسِیَ، سَدْࢽْ أَوُو ثِࢽْجُوَدْ بَوُورُو وَلْجِ؞
[11] غَࢽَࢽِلَࢽْ جَࢽْدٜࢽِدْ جَࢽْدٜ تَدَاࢽَیٜ، حَࢽْغَلْࢽِدْ یٜ حَࢽْغَلْ تَدَاࢽَیٜ، کُورُو تْمَࢽِدْ یٜ تَدَاࢽَیٜ؞ وُرَیٜکّْࢽِیَ، أَوُووَ تَدَاࢽَیٜدَ کُولْیٜکُّو؞
[12] کْرْمَ مِسَلْ کُدْرَمْبٜࢽْ غَیْࢽِࢽْ بُجِ بُجِ رُیْیٜ، أَمَّ سَدْࢽْ سِمْبَ سِمْبَلَࢽْ رُیْیٜ؞ کْرْمَ ࢽُودُࢽِدْ ثِࢽْجُوَ، أَمَّ سَدْࢽْ اللَّه وُوَ کَلْکَلُّو ࢽُوسْࢽَدْ غَیْ کَلْکَلُّو ࢽُوکِّ؞
[13] کْرْمَ أَوُو یَکُّ أَࢽِ دَسَیِ: کَمْبْرْسٜیَ تْمَا کْرَوُووَ، أَمَّ تَیِ سَمَّلَࢽْ کْرَوُودْ تِمَ کُرَ وُو؞