[1] وُ کَمْبٜ، غْࢽَ؟ وُ کْࢽْغَیَمْ، غْࢽَ؟ عِیسَى کْمَࢽْدٜیَ رُکّْࢽِ وَ؟ ࢽَیِمَ غْࢽَ کِدَࢽِ کْمَࢽْدٜلَࢽْ دِکّْࢽَدْ وُو؟
[2] أَمْ غَدٜ ࢽَࢽْکْࢽْغَیَمِّدَ کَسَثَّیْوَوُو یَیٜ، ࢻَغَتْ ࢽَࢽْدُوࢽْ وُ کْࢽْغَیَمْ، کْمَࢽْدٜلَࢽْ ࢽَیِمَ تَوَ ࢽَࢽْکْࢽْغَیَمِّ تَبَّثِّیدْ وُو؞
[3] أَدْمَ أَوُو أَمْ أَیَوْ غْࢽَسَغَیْدْرُو کَلَࢽْغْکِّدْ:
[4] کْࢽْدُوُو کْمْبُووَ کْࢽْجَا ࢻَࢽْدُویٜ تَیْیٜࢽْدٜ وَ؟
[5] کْࢽْدُوُو کَمُࢽْدٜ عِیسَىٰ غَمَا رُوکُّو بْلَوُرُودُیٜ کْࢽْغَیَمْبَ غَدٜ سُو، یَاࢽَوَ کْمَیٜ سُو، کٜࢻَسْ سُو ثَدِدْ غَیْ تَیْیٜࢽْدٜ وَ؟
[6] وُوَ بَرْࢽَبَسَّ رُࢽْدٜ وَ کْࢽْدُوُو کِدَ دِیُوࢽَمْبُیٜ تَیْیٜࢽْدٜ وُو؟
[7] وُࢽْدُ ࢽغَلْتٜ یَیٜ کِدَ سُوجِیٜ ثْدِ دُوُوࢽْ وُرِࢽْجُلَࢽْ أَمْبَدِدْ؟ وُࢽْدُ یَ إِࢽَبّٜ کُوکْثِ دُوُوࢽْ تَدَࢽْجُ ثَیْوَوُودْ؟ وُࢽْدُ لْمَࢽَّ ثْࢽٜیِ دُوُوࢽْ کِیَمْ لْمَࢽَّیٜدَ ثَیْوَوُودْ؟
[8] کْلَ مَࢽَ کَمْبٜࢽْ وَ أَوُو أَࢽِیَ وُلّْکِّ؟ أَتَّوْرَ یٜ ࢽغَیْ وُلْجْࢽِّ وَ؟
[9] أَکُّو أَوُو أَتَّوْرَ ࢽَوِ مُوسَیٜࢽْ رُوُوَدَدْ: «بَرٜ دَلُو وَسْتُ ثْدِ دُوُوࢽْ ثِࢽْجُرُو ثَمْبُ یَکّْمِّ؞» اللَّه دَلُورُو وَ لَمْبُوࢽْجُوَ وُو؟
[10] ࢻَغَتْ أَࢽْدِ ࢽَࢽْغَرُو أَدَ وُلْجِ، مَرٜ؟ آه، أَࢽْدِ ࢽَࢽْغَرُو أَوُو أَدْ رُوُوَدَ: «بَرٜمَدْ تْمَࢽْجُوَلَࢽْ بَرٜ ثْدُو، وَسْتُمَدْ یٜ ࢽُوَࢽْجُ ثُوَࢽْدِرُو تْمَجُو ثْدُو؞»
[11] أَوُووَ رُحُیٜ کَرْوُࢽْدُولَࢽْ ࢽَدِیٜࢽَدْ، أَوُو دُࢽِیَیٜ ࢽَࢽْدُوࢽْ کَلَدُࢽْدٜدْ أَوُو لَا کُرَ وَ؟
[12] أَمْ غَدٜ کْࢽْدُوُو ࢽُوَࢽْجَ ࢽَࢽْدُوࢽْ مُواْیٜ ثَدَࢽَا، أَࢽْدِدْ تَیِیَ کُوجْࢽَرُو تَیْیٜࢽَ، غْࢽَ؟ أَدْ یَیٜ کْࢽْدُوُو أَدْلَࢽْ ࢻَیْدَدِیٜࢽْدٜ، ثُرُو جْکْتُ ࢻِیٜࢽْ یَیٜ مْرْࢽِیٜ، بَرٜ کَوُرِ کْجِ أَلْمَسِیوُیٜدْرُو تَکَّلْ ࢻِمَ یَکِّیٜࢽْدٜرُو؞
[13] أَمْ کِدَ ࢻَدُو اللَّهیٜࢽْ ثَدِدْ کْمْبُو ࢻَدُو اللَّهیٜࢽْ جَوُیْ، کُورُو أَمْ لَیَ دُوَدُرَمْࢽِࢽْ کِدَ ثَدِدْ ࢽُوَࢽْجَ لَیَ دُوَدُرَمْدْلَࢽْ ثَوَࢽْدِرُو ࢽُوࢽُوِّ وَ؟
[14] جِرِ أَدْغَیْ کْمَࢽْدٜ وَدَ ثٜ أَمْ کَوُرِ کْجِ مَوُودُمَسُو کِدَ کَوُرِ کْجِیٜࢽْ أَوُو کْࢽْدْغَیْࢽْجَیٜ ثَوَࢽْدُو ثْࢽَّ؞
[15] أَمَّ وُدْ کْࢽْدُوُو أَࢽِیٜ ࢻَلْࢽْجَمَلَࢽْ ࢻَیْدَدْکّْࢽِ، کُورُو ࢽُوَࢽِ ࢻَࢽْدُورُو غْࢽِ أَوُو أَࢽِیَ رُوُࢽْکِّ؞ أَوُلُو بُوࢽِ ثَتُّلُوِرُو ࢽُکّْࢽَمَ ࢽغَلْوُو؞
[16] کَوُرِ کْجِ وُلْدُࢽِدْ دَلِلْ أَوُلُو بُویٜ غْࢽِ، وُلْدُࢽْجُدْ وَجِمْسْغْࢽَ؞ کَوُرِ کْجِدَ وُلّْکِّوَوُورُو وَلْیٜࢽُووَ، کُتُّࢽِ!
[17] أَوُو أَدَ رَوُوࢽِࢽْ دِکِّیَ، أَلْوَسِ ࢻَࢽْدْکِّ، أَمَّ رَوُوࢽِࢽْ غْࢽِیَ، ࢽَࢽْوَکِّلْ مُکُّوࢽِرُو ثَسَکّْࢽَ؞
[18] تُو، أَوِ غْلٜ أَلْوَسِࢽِ وُو؟ کَوُرِ کْجِ وُلّْکِّدَ کْࢽْدُوُو دُوُوࢽْ کَوُرِ کْجِ أَدْ سِࢽَدْࢽْ ࢻَیْدَدْکّْࢽِࢽْ دٜرُو کْࢽْجُورُو؞
[19] ࢽَ أَمْ سَمَّیٜࢽْ وُ کَمْبٜ دُوُوࢽْ، ࢽغْوُࢽْجَا مُواْکُّورُو کْلَࢽِیَ کَرٜیَ تَیِ سَمَّیٜرُو کَلَکّٜکُّو؞
[20] ࢽَ یَوْدِیَیٜࢽْ، یَوْدِیَ ࢽجْکَّوُو ثَوَࢽْدُورُو، یَوْدِ غَیْرُو وَلْیٜکُّو؞ ࢽَ أَمْ ࢻْرْدُ وَدَ أَتَّوْرَیٜࢽْ دَسَاࢽَیٜࢽْ، وُ کْلَࢽِ ࢻْرْدُ وَدَیٜࢽْ دْغَکّْࢽِ یَیٜ، کَمْ ࢻْرْدُ وَدَیٜࢽْ دْغَࢽَ غَیْرُو وَلْیٜکُّو، أَمْ ࢻْرْدُ وَدَیٜࢽْ دَسَاࢽَ ࢽجْکَّوُو ثَوَࢽْدُورُو؞
[21] أَمْ وَدَ ثَدَࢽِّدَ مُواْکُّورُو، وُ یٜ کَمْ وَدَ ثْدَࢽِّ غَیْرُو وَلْیٜکُّو، أَمَّ وُدْ کَمْ وَدَ اللَّهیٜ ثْدَࢽِّ غْࢽِ، ࢻْرْدُ وَدَ أَلْمَسِیوُیٜࢽْ کْرْغَکُّو؞
[22] ࢽَ أَمْ لَوُیٜࢽْ لَوُرُو وَلْیٜکُّو، تَیِ لَوُدْ ࢽجْکَّوُو ثَوَࢽْدُورُو؞ أَدْغَیْمَ ࢽَ أَمْ سَمَّیٜࢽْ أَوُو سَمَّرُو وَلّْکّْࢽَ، جِرِ ࢻِࢽْ یَیٜ لَاࢽجَا یِکَّغْکُّورُو؞
[23] کَوُرِ کْجِ ࢽَࢽْغَرُو أَࢽِ سَمَّا دِکِّ، تِلَࢽْ ࢽُوَࢽِ ࢻَࢽْدْکُّورُو؞
[24] ثُرُو ࢽغْرْمْ سِیٜࢽْ ࢽغْرْمْغُ سَمَّ ࢽغْرْمْجَیْ یَیٜ، تِلُو لُوࢽْ لَدَدَ ثُوَࢽْدِرُو ࢽُوࢽُوِّ وَ؟ جِرِ دِوٜ ࢻَࢽْدُوِرُو ࢽغْرْمُّواْ!
[25] أَمْ بِکّٜلَࢽْ ࢽغْࢽْࢻْتَیْدْ جَوَلْ سَمَّࢽْ کْلَࢽْجَ ثَرِوِ؞ تَیِدْ أَرِیَوُ کْࢽَّسَرّٜ دْغَیْوَوُو مُواْرُو أَدَ ثَدِ، أَمَّ أَࢽْدِدْ أَرِیَوُ سَوِسُورُو دْغَیْ مُواْرُو دِیٜ؞
[26] وُدْ کَمْ ࢽَ لٜدُیٜ بَوُو غَیْرُو غْࢽِ ࢽغْرْمّْکِّ، کُورُو دَمْبٜࢽِدْ کَمْ کَسَمْ بَکْثِ غَیْرُو غْࢽِ بَࢽْغْکِّ،
[27] أَمَّ بَرٜ ࢽغَوُو کَوُرِ أَمْ غَدٜرُو وُلْغْکّْࢽَیٜࢽْ وُ کْلَࢽِ ثُرُوࢽْجَࢽْ بَوُورُو وَلّْکّْࢽِرُو تِیࢽِ جَوْرُو ࢽغْࢽْمّْکّٜ کْلَࢽِ رِوُکِّ؞