[1] کْرَمِیَ، کَوُرِ کْجِ وُلْࢽْجَغَکّْࢽَدَ إِسَتَࢽّجَغَکِّ، کَوُرِ کْجِ دُوُوࢽْ مُووُوَّ یٜ، کْلَࢽْجُࢽْ دَࢽُوَّ یٜ؞
[2] کَوُرِ ࢽَیِرُو وُلْࢽْجَغَکّْࢽَدَ رُوࢽُوِیَ، تِلَࢽْ ࢽجْکَّوُو ࢻَࢽْدُوِ؞ أَدْ غْࢽِیَ، بُووُ ࢻَتُّو کَسَدُّوَّ؞
[3] أَوِسُوࢽْ ࢻُوُࢽُّو کَوُرِ وُ یٜ مُواْکّْࢽَدَ ࢽَیِرُو ࢽجَدّْکّْࢽَ: کِتَوُلَࢽْ رُوُوَدَدْ غَیْ، أَلْمَسِیوُ بِوُوَࢽْدٜ ࢽَࢽْغَرُو کَࢽُو،
[4] تِیَ سِتّْرَیٜرَ، دَجِ یِمْبٜ یَکُّوَ کَرْمُولَࢽْ ثِیٜࢽُو، کِتَوُلَࢽْ رُوُوَدَدْ غَیْ؞
[5] کٜࢻَسُّو ࢻْلٜیَادَ، کُورُو تَیِ مٜوُࢽْ یِࢽْدِࢽْدْرُو،
[6] دَجِ کْرَمِیَ یٜرْ أُوُمَا کُوجْࢽَرُو ࢽَ تِلُوࢽْ ࢻْلٜیَادَ؞ ࢽغْوُࢽْجَ حَرْ کُرُو مبٜجِ، أَمَّ لَاࢽجَ رُو ثَرْمْبْࢽَ؞
[7] ࢽغَوُو أَدْیٜࢽْ یَعْࢼُوبَرُو ࢻْلٜیَادَ، کُورُو کْࢽْغَیَمْبَ سَمَّرُو؞
[8] دَرْیٜرَمْبُو، کَمْ سَ ثْدْࢽِّࢽْ تَمْبْࢽَ غَیْرُو، وُ یٜرُو ࢻْلٜیَادَ؞
[9] کْࢽْغَیَمْبَ سَمَّࢽْ وُمَ غَࢽَ وُو، وُ کْࢽْغَیَمْلَࢽْ بُواْدُ تِکّْࢽِ، جَمَ اللَّهیٜدَ بَسَرْࢽْکّْࢽَ ࢽَࢽْغَرُو؞
[10] أَمَّ أَوُو وَلّْکّْࢽَدْ سٜرْ اللَّهیٜࢽْ وَلْیٜکُّو، کُورُو سٜرْدَ بُووُرُو غْࢽِ ࢻْلٜسُوُو؞ أَیْ، کْࢽْغَیَمْبَ سَمَّا کُوجْࢽَرُو ࢽغْࢽْࢻْتْکّْࢽَ، أَمَّ وُ غْࢽِ، سٜرْ اللَّهیٜ وُلَࢽْ دْغَࢽَدْ؞
[11] أَدْ ࢽَࢽْغَرُو وُرُو بِ تَیِرُو وَلْیٜࢽُو یَیٜ، أَکُّو أَوُو مَوُوࢽِیٜ کَسَدُّوَّدْ؞
[12] تُو، أَلْمَسِیوُ کَرْمُولَࢽْ ثِجْࢽَرُو مَوُوجَیْدْ، ࢽدَیِࢽْ غْلٜ أَمْࢽْدُو لَا کَرْمُولَࢽْ ثِدُ بَوُو ثَࢽِ؟
[13] أَمَّ کَرْمُولَࢽْ ثِدُ بَوُووَ، أَلْمَسِیوُ یٜ ثِجْࢽِّ؞
[14] کُورُو أَلْمَسِیوُ ثِجْࢽِّرُو وَلْیٜࢽُووَ، مَوُودُࢽْدٜدْ یٜ بُووُ، کَمْبْرْسٜࢽْدُودْ یٜ بُووُ،
[15] حَرْ اللَّهرُو شٜدَوُ کَتُّوُیٜرُو وَلِّیٜࢽَ، دَلِلْࢽْجُدْ اللَّه أَلْمَسِیوُوَ کَرْمُولَࢽْ ثْسَࢽْغْࢽَ ࢽِیٜࢽَ، أَمَّ أَمْ سَࢽُࢽَ کَرْمُولَࢽْ ثِجَیْوَوُورُو وَلْیٜࢽُووَ، أَسٜ تِیَ ثْسَࢽْغْࢽِّ؞
[16] أَوُووَ أَمْ سَࢽُࢽَدْ کَرْمُولَࢽْ ثِجَیْوَوُووَ، أَلْمَسِیوُ یٜ ثِجْࢽِّ؞
[17] کُورُو أَلْمَسِیوُ کَرْمُولَࢽْ ثِجْࢽِّیَ، کَمْبْرْسٜࢽْدُودْ ࢻَیْدَ بَوُو، کُورُو یَیٜ ࢽَیِ ثُرُو بِوُوَࢽْدُویٜࢽْ؞
[18] أَدْغَیْمَ أَمْ أَلْمَسِیوُیٜ رُو ثَرْمْبْࢽَدْ یٜ ࢻَثَّاࢽَ؞
[19] دُࢽِیَ أَدْ رُࢽْجُمَرُو تْمَࢽْدٜ أَلْمَسِیوُرُو کٜکِّیٜیَ، دُࢽِیَ سَمَّࢽْ أَࢽْدِمَ أَوُو ࢽجُࢽُودُیٜ وُو؞
[20] أَمَّ جِرٜمَرُو أَلْمَسِیوُ کَرْمُولَࢽْ ثِجْࢽَ، کُورُو تَیِ رُو ثَرْمْبْࢽَ سَمَّیٜࢽْ تِمَ بُرْوُوࢽْ ثِجُو؞
[21] کَرْمُودْ کَمْبٜࢽْ إِسْࢽَ ࢽَࢽْغَرُو، کَرْمُولَࢽْ ثِدُدْ یٜ کَمْبٜࢽْ کَدِیُو؞
[22] أَمْ سَمَّ ࢽَوِ آدَمْلَࢽْ سَࢽُیْدْ غَیْ، ࢽغَیْࢽِࢽْ سَمَّ أَلْمَسِیوُلَࢽْ رُو ثَوَࢽْدِ،
[23] أَمَّ کْوُ کْوُرُو، بُرْوُوࢽْ أَلْمَسِیوُ، دَجِ کْࢽْدٜࢽْجُࢽْ أَمْ أَلْمَسِیوُیٜ،
[24] ࢽغَوُو أَدْیٜࢽْ سَ ࢽجٜرُورَمْبٜ ثْدِ؞ سَدْࢽْ أَلْمَسِیوُ مَیْیَ سَمَّا کْرْمَیْ سُو، کْࢽْدُوُو سُو سَمَّآ بَوُورُو ثْدٜ کْرْمَیْدَ اللَّه بَوَدْرُو ثِ؞
[25] أَوُووَ أَلْمَسِیوُدْ حَرْ کَوُ اللَّه کْلَدُووَࢽْجُ سَمَّا ثِدِیَ سِࢽْجُیٜرُو ثَکِّرُو، سَیْ کْرْمَیْ ثُࢽُودِیَ؞
[26] کْلَدُو دَرْیٜىٰ بَوُورُو وَلْجِدْ تِمَ کَرْمُو وُو،
[27] أَوُووَ: «اللَّه أَوُو سَمَّا ثِدِیَ سِࢽْجُیٜرُو ثَکّْࢽَ؞» أَمَّ تِیٜ: «أَوُو سَمَّا ثِدِیَࢽْجُرُو ثَکّْࢽَ،» ثْࢽَّدْ، ࢻَرَکُّو تِ دُوُوࢽْ أَوُو سَمَّا ثِدِیَࢽْجُرُو ثَکّْࢽَدْ دَوُࢽْ بَوُو؞
[28] کُورُو سَ أَوُو سَمَّ ثِدِیَࢽْجُࢽُّو وَلْجِیَ، دَجِ تَدَدْ کْلَࢽْجُ ثِدِیَ تِ أَوُو سَمَّا ثِدِیَࢽْجُرُو ثَکّْࢽَدْیٜرُو وَلْجِ، ࢽغَیْࢽِࢽْ اللَّه أَوُو سَمَّࢽْ أَوِ یَیٜرُو وَلْجِ؞
[29] ࢽغَیْ دُوُوࢽْ، أَمْ دُوُوࢽْ ثُجُ أَمْ سَࢽُࢽَیٜرُو تَیِرُو کَسَلَ ثَدّْࢽَدْ، أَوِ غْلٜ مَاࢽَࢽْجُ وُو؟ ثَ جِرٜمَرُو أَمْ سَࢽُࢽَدْ کَرْمُولَࢽْ ثِجَیْوَوُورُو وَلْیٜࢽُووَ، أَوِرُو ثُجُࢽْجَرُو کَسَلَ ثَدِّ؟
[30] أَࢽْدِ یٜ، أَوِرُو سَ ࢻِ یَیٜ تَجِرْوَࢽْ دْغَیْیٜࢽَدْ؟
[31] تَبَّتْ، کْلَ ࢽَیِ کْرَمِیَࢽِیٜࢽْ کْمَࢽْدٜ عِیسَى أَلْمَسِیوُلَࢽْ أَوُلُو بُوࢽِدْ جِرٜدْ غَیْ، یِمْبِ یَیٜ رُوࢽِ کَرْمُورُو سَلَمْغْکّْࢽَ؞
[32] بْرْࢽِ أَࢻِسَیٜلَࢽْ بُࢽْدِیَا مْلْدْکّْࢽَدْ، أَوِ کْلَ کُرُو کَمْبٜࢽْ وُرُو ࢻَیْدَࢽْجُ وُو؟ ثَ أَمْ سَࢽُࢽَدْ کَرْمُولَࢽْ ثِجَیْوَوُورُو وَلْیٜࢽُووَ، «ࢽدَ بُیْیُو یَیْیُو، بَرِ ࢽُیْیٜ ࢽَࢽْغَرُو؞»
[33] بَرٜ جَمْبَدُوِّ: أَمْ دِوِیَ دْغَدْ حَلْ ࢽغْلَ بَࢽَّجِ؞
[34] حَࢽْغَلْࢽْدُورُو وَلْدْࢽُواْ، بِوُ دِیُو کُولُّواْ، ࢽَࢽْغُࢽُواْرُو وُلّْکِّ: لَاࢽدُو اللَّهَ ࢽُوجَࢽِّ؞
[35] أَمَّ کَمْ لَایٜ: «ࢽدَیِࢽْ أَمْ سَࢽُࢽَدْ کَرْمُولَࢽْ ثِجَیْ؟ کُورُو تِیے جِرِ ࢻِیَ ثَلُوِ؟» ثْࢽٜ ثُوُورِ؞
[36] ࢽِ حَࢽْغَلْ بَوُووَ! أَوُو ࢽَدْمَّدْ رِجِوَوُو، سَیْ ࢽُیْیَ دُوُوࢽْ؞
[37] کُورُو أَوُو ࢽَدْمِدْ، کَجِمْ ࢻُوُࢽْ رِجِدَ غْࢽِ ࢽَدْمِ، کَسُࢽِ رُࢽْجُ، بِ أَلْغَمَیٜ، بِ أَوُو غَدٜىٰ؞
[38] دَجِ اللَّه تِرُو تِیے جِرِ ثْرَاࢽَرُو ثِ، کَسُࢽِ ࢻِ یَیٜرُو جِرِ کَاࢽجُ ثِ؞
[39] دَ تِییٜ سَمَّ تِلُو غْࢽِ، کَمْبٜ رُࢽْجُ، لْمَࢽّٜ رُࢽْجُ، ࢽغُدُویٜ رُࢽْجُ، بُࢽِیٜ رُࢽْجُ؞
[40] تِییَ سَمٜىٰ مبٜجِ، ثِدِیٜ یٜ مبٜجِ، أَمَّ دَرَجَ تِییَ سَمٜىٰیَ ثِدِیٜیَ غَدٜغَدٜ؞
[41] دَرَجَ کْࢽْغَلّٜ غَدٜ، کُمْبَلّٜ غَدٜ، سِلُّووُوَیٜ غَدٜ، کُورُو سِلُّووُوَدْ یٜ دَرَجَࢽْجَ غَدٜغَدٜ؞
[42] ثِࢽُواْ أَمْ سَࢽُࢽَیٜدْ یٜ ࢽغَیْ؞ کَرْمُولَࢽْ تْࢽَدْࢽَ، رُو ࢽجْࢻْثِوَوُولَࢽْ ثِجِ؞
[43] دَرَجَ بَوُووَلَࢽْ تْࢽَدْࢽَ، دَرَجَالَࢽْ ثِجِ؞ دُࢽُو بَوُووَلَࢽْ تْࢽَدْࢽَ، دُࢽُووَلَࢽْ ثِجِ؞
[44] تِیے أَدَمْغْࢽَیٜلَࢽْ تْࢽَدْࢽَ، رُحُلَࢽْ ثِجِ؞ تِیے أَدَمْغْࢽَیٜ مبٜجِدْ، تِیے رُحُیٜ یٜ مبٜجِ؞
[45] کِتَوُلَࢽْ ࢽغَیْ رُوُوَدَ: «ࢽَوِ آدَمْ کَمْ بُرْوُویٜدْ أَلَوْ رُووَرُو وَلْجْࢽَ؞» آدَمْ دَرْیٜىٰدْ رُحُ رُو ࢽجُومَرُو وَلْجُو؞
[46] أَمَّ أَوُو رُحُیٜدْ أَوُو بُرْوُویٜ غْࢽِ؞ أَوُو أَدَمْغْࢽَیٜ بُرْوُوࢽْ إِسِ، دَجِ أَوُو رُحُیٜ؞
[47] کَمْ بُرْوُویٜ ثِدِࢽْ تْدْࢽَدْ، تِ ثِدِیٜ؞ کَمْ کْࢽْیِࢽْدِیٜدْ، تِ سَمٜىٰ؞
[48] جِرِ کَمْ ثِدِیٜدْ غَیْ، تَیِ ثِدِیٜ یٜ ࢽغَیْ؞ کُورُو جِرِ کَمْ سَمٜىٰدْ غَیْ، تَیِ سَمٜىٰ یٜ ࢽغَیْ؞
[49] جِرِ ثَمُࢽُو کَمْ ثِدِیٜدْرُو وَلِّیٜࢽَدْ غَیْ، ثَمُࢽُو کَمْ سَمٜىٰدْ یٜرُو وَلِّیٜ؞
[50] کْرَمِیَ، أَوُو وُلّْکِّدْ تِمَ تِییَ بُوَ ࢽُودُو بَرْغَا اللَّهیٜیَ وَرَسَجَیْوَوُو، أَوُو ࢽُومَدْ یٜ رُو ࢽجْࢻْثِوَوُودَ وَرَسَجِوَوُو؞
[51] ࢻَࢽُّواْ، أَسْرْ لَا وُلْࢽْجَغَکِّ: أَࢽْدِ سَمَّ غْࢽِ رُو رْمْبِیٜ، أَمَّ أَࢽْدِ سَمَّ ࢻَلَّدَرُو وَلِّیٜ،
[52] سَمْ ࢻَلْࢽِࢽْ، کْمْتْ سِمْبٜࢽْ، ࢽُکْتُ دَرْیٜىٰ کَࢽْغَدِیٜࢽْ؞ أَوُووَ کَࢽْغَدِدْ ࢽُکْثِ، أَمْ سَࢽُࢽَدْ کَرْمُولَࢽْ ثِجَࢽٜ غَدٜرُو ࢽجْࢻْثَیْوَوُو، کُورُو أَࢽْدِ سَمَّ ࢻَلَّدَرُو وَلِّیٜ؞
[53] أَدْغَیْمَ تِیے ࢽجْࢻْثِ أَدْ غَدٜرُو ࢽجْࢻْثِوَوُورُو وَلْجُو، کُورُو تِیے ࢽُومَ أَدْ غَدٜرُو ࢽُیْوَوُورُو وَلْجُو؞
[54] سَ دُوُوࢽْ تِیے ࢽجْࢻْثِ أَدْ غَدٜرُو ࢽجْࢻْثِوَوُورُو وَلْجِ، کُورُو تِیے ࢽُومَ أَدْ غَدٜرُو ࢽُیْوَوُورُو وَلْجِدْࢽْ، دَجِ أَوُو کِتَوُلَࢽْ رُوُوَدَدْ وَکَّجِ: «کَرْمُووَ کْࢽَّسَرْ ثُࢽْدْࢽَ!»
[55] «کَرْمُو، ࢽدَ کْࢽَّسَرْࢽْمْ؟ کَرْمُو، ࢽدَ کْࢽِوُࢽْمْ؟»
[56] کْࢽِوُ کَرْمُویٜدْ بِوُ، کُورُو کْࢽْدُوُو بِوُیٜدْ وَدَ؞
[57] اللَّه تِ دُوُوࢽْ أَࢽْدِرُو کْمَࢽْدٜ عِیسَى أَلْمَسِیوُیٜࢽْ کْࢽَّسَرْ سَدِدَ وُسٜࢽِیُو!
[58] أَدْمَ ࢽَࢽْغَرُو، کْرَمِیَࢽِ ࢽجَرَاکّْࢽَسُو، دُࢽُووَرُو دَࢽُواْ، بَرٜ أَوِمَ ࢽَیِیَ تْمْبَلْࢽْجَࢽِّ، سَوِ یَیٜ ثُرُو کِدَ کْمَࢽْدٜىٰࢽْ ࢻُوُ بُیْوُو؞ ࢽُوࢽُواْ، کْمَࢽْدٜرُو ࢽغْࢽْࢻْتُࢽْدُودْ بُووُرُو وَلْجِوَوُو؞