[1] وُدْ، کْرَمِیَ، سَ ࢽَࢽْدُورُو إِسْکّْࢽَدْ، مَࢽَ ࢽُودُوَ ࢽَࢽْرَشِدُوَلَࢽْ غْࢽِ أَسْرْ اللَّهیٜ وُلْدُرُو کَدِکُّو؞
[2] عِیسَى أَلْمَسِیوُ، تِ دُوُوࢽْ کْسْکَرُو جَادَدْرُو کَجِیَ، أَوِمَ غَدٜ ثُرُوࢽْدُوࢽْ ࢽُوکِّوَوُورُو ࢽِیَ ࢽغُوکّْࢽَ؞
[3] وُدْ، دُࢽُو بَوُووَا رِدُوَا لُولُودُ ࢽغْوُوَالَࢽْ ࢽَࢽْدُورُو کَدِکُّو،
[4] کُورُو کَوُرِࢽِیَ مَوُودُࢽِیَدَ مَࢽَ ࢻَیْدُیٜیَ ࢽَࢽْرَشِدُیٜیَࢽْ غْࢽِ، تَبَّتُّوُ رُحُ اللَّهیٜیَ کْࢽْدُوُویٜیَلَࢽْ کِدْکُّو،
[5] ࢽغَیْࢽِࢽْ کَمْبْرْسٜࢽْدُودْ ࢽَࢽْرَشِدُ کَمْبٜࢽْ غْࢽِ، کْࢽْدُوُو اللَّهیٜࢽْ کْرْغَ؞
[6] أَدْ یَیٜ ثُرُو أَمْ کَمْبْرْسٜࢽْجَࢽْ وُرَجَࢽَیٜࢽْ مَࢽَ ࢽَࢽْرَشِدُیٜ وُلِّیٜ، أَمَّ ࢽَࢽْرَشِدُ دُࢽِیَ أَدْیٜ بِ کْࢽْدُوُووُ دُࢽِیَ أَدْیٜ ࢻَثَّغَیْدْیٜ غْࢽِ،
[7] ࢽَࢽْرَشِدُ اللَّهیٜ أَسْرْلَࢽْ غْرَادَ وُلِّیٜ، ࢽَࢽْرَشِدُ دُوُوࢽْ اللَّه کَوُ دُࢽِیَ أَلَکْتِمَࢽْ دَرَجَࢽْدٜرُو کَدَرْجْࢽَدْ؞
[8] کْࢽْدُوُووُ دُࢽِیَ أَدْیٜ وُࢽْدُࢽْجَمَ أَدَ أَسُجْࢽِّ، ثَ أَسُجَࢽَا، کْمَ دَرَجَیٜدَ کْسْکَرُو جَجَغَࢽِّ؞
[9] أَمَّ کِتَوُلَࢽْ رُوُوَدَدْ غَیْ: «أَوُو سِمْ ثُرُࢽِّ، سْمُو ࢻَࢽْجْࢽِّ، کَرْوُ کَمْبٜرُو ࢽغَاࢽِّدْ، أَوُو أَࢽِیَ اللَّه أَمْ تِیَ ثَرَاࢽَرُو دَبَّرْجْغْࢽَ؞»
[10] أَࢽْدِرُو اللَّه أَوُو أَࢽِیَ رُحُࢽْجُیٜࢽْ إِسَࢽُوسَا؞ أَوُووَ رُحُدْ أَوُو سَمَّا ࢽُودُمَ، حَرْ أَوُووَ اللَّهیٜ ࢽُودُ جَوْوَدْمَا؞
[11] وُࢽْدُ غْلٜ أَوُو کَرْوُ کَمْبٜࢽْ دْغَࢽَدَ ࢽُوجُو، رُحُ کَمْبٜ تِلَࢽْ دْغَࢽَدْرُو کَجِیَ؟ ࢽغَیْمَ رُحُ اللَّهیٜرُو کَجِیَ، وُࢽْدُمَ أَوُووَ اللَّهیٜ ࢽُوجِوَوُو؞
[12] أَࢽْدِ رُحُ دُࢽِیَ أَدْیٜ غْࢽِ، رُحُ اللَّهیٜ ࢻَࢽْدِیٜࢽَ، ࢽغَیْࢽِࢽْ کْࢽْجُو سٜرّٜ اللَّه أَࢽْدِرُو سَدْࢽَدَ ࢽُوࢽِیٜ؞
[13] کُورُو أَوُو أَࢽِمَا مَࢽَࢽِیٜ، مَࢽَ دُوُوࢽْ ࢽَࢽْرَشِدُ کَمْبٜࢽْ غْࢽِ، رُحُ اللَّهیٜ أَلَمْجْࢽَدْلَࢽْ وُلِّیٜ، أَوُو رُحُیٜدَ أَمْ رُحُیٜدْرُو ࢻِسَرْغْیْیٜ؞
[14] کَمْ رُحُ تِلَࢽْ دْغَࢽِّمَدْ أَوُو رُحُ اللَّهیٜدَ کَسَثِّوَوُو، دَلِلْࢽْجُدْ تِرُو أَوُو حَࢽْغَلْࢽَمْبُیٜ، کُورُو رَکْثٜ أَسُجِوَوُو، رُحُیٜࢽْ أَسُدَیْ ࢽَࢽْغَرُو؞
[15] کَمْ تِلَࢽْ رُحُ دْغَیْمَدْ أَوِ یَیٜیَ رِجَࢻْثِ، أَمَّ تِ کْلَࢽْجُدَ وُࢽْدُمَ رِجَࢻْثِوَوُو؞
[16] «وُࢽْدُ غْلٜ ࢽِیَ کْمَࢽْدٜىٰ ࢽُوجُو، حَرْ تِیَ غَلَجِ؟» أَمَّ أَࢽْدِدْ ࢽِیَ أَلْمَسِیوُیٜ تَیْیٜࢽَ؞