[1] کْرَمِیَ، أَدَ ࢽُوࢽُوِیَ، رَاکُّو: کَارِیَࢽْدٜ سَمَّ ثِدِیَ ࢻُوࢻُووْیٜࢽْ دَسَاࢽَ، تَیِ سَمَّ بْرْمْ ࢻَلْجَࢽٜ کُوجَࢽَ،
[2] کُورُو تَیِ سَمَّرُو ثُرُو ࢻُوࢻُووْدَ بْرْمْدَیٜࢽْ کَسَلَ ثَدّٜ ࢽَوِ مُوسَرُو کْلْیٜىٰرَ؞
[3] تَیِ سَمَّ کْمْبُو رُحُیٜدْمَا غٜوُو،
[4] کُورُو تَیِ سَمَّ کْࢽْجَ رُحُیٜدْمَا کٜسَ، أَوُووَ کَوْ رُحُیٜ تَیِیَ جْغَیْدْیٜࢽْ ثَسَࢽَ، کَوْ أَدْ تِمَ أَلْمَسِیوُ وُو؞
[5] أَدْ یَیٜ اللَّه ࢽغْوُࢽْجَیٜ کْجِࢽْجَ ࢻَࢽْجْࢽِّ، کُورُو کَرَا دْرِرُو کَمِࢽّجَا تَتَرْیٜىٰࢽُو؞
[6] لَمَرَّ أَࢽِ أَࢽْدِرُو مِسَلُّو وَلْسٜىٰرَ، جِرِ أَوُو دِوِ مَࢽْغَرْجَࢽَدْ غَیْ، بَرٜ مَࢽْغَرْࢽِیٜࢽْدٜرُو؞
[7] بَرٜ سْࢽْمْ غَوُ أَمْࢽْجَ لَا غَیْرُو وَلُّوِّ، کِتَوُلَࢽْ رُوُوَدَدْ غَیْ: «جَمَدْ کْمْبُووَ کْࢽْجَارُو ࢽَࢻْکٜرَ، کُورُو بِکّٜ رَࢽْدُورُو ثِیٜرَ؞»
[8] بَرٜ کْࢽْجْࢽَ دِیٜࢽْدٜ، أَمْࢽْجَ لَا ثَدٜ یِمْ ࢻَلْࢽِࢽْ أَمْ دْوُ ࢻِࢽْدِࢽْ یَکُّࢽْ سَࢽُࢽَدْ غَیْ؞
[9] بَرٜ أَلْمَسِیوُوَ جَرَمِّیٜࢽْدٜ، أَمْࢽْجَ لَا ثَدٜ کَدِیَ تَیِیَ ثٜىٰسْࢽَدْ غَیْ؞
[10] بَرٜ کَرْوُکُتَّ ࢻْلٜࢽُوِّ، أَمْࢽْجَ لَا ثَدٜ سِدُوُمَ تَیِیَ سِجْغْࢽَدْ غَیْ؞
[11] لَمَرَّ أَࢽِ تَیِرُو مِسَلُّو وَکَّجَاࢽَ، کُورُو سْمُوࢽْدٜ کَسْتُرُو رُوُیٜرَ، أَࢽْدِ دُوُوࢽْ سَ ࢽجٜرُورَمْبٜࢽْ دْغَیْیٜࢽَدْ؞
[12] أَدْ ࢽَࢽْغَرُو وُࢽْدُ دُوُوࢽْ تِ دَادَرُو تْمَجْࢽَدْ بَرٜ ثُرْࢽِّرُو حَࢽْغَلْ غْࢽَجُو!
[13] جَرَࢻْتُ أَمْ سَمَّا ثُوَࢽْدْࢽَ غْࢽِیَ، جَرَࢻْتُ ࢻِمَ ࢽَیِیَ ࢽجَوَࢽْدْࢽِّ؞ اللَّه أَمَࢽْمَ، کُولْجٜ دُࢽُوࢽْدُو کُوجْࢽَرُو جَرَمْࢽْجَیْوَوُو، أَمَّ جَرَࢻْتُ إِسِیَ، رَࢽْغُوٜ ࢽٜدُّوِرُو جَوَلْ لُوُویٜ ࢽجَدِ؞
[14] أَدْ ࢽَࢽْغَرُو، کْرَوُووُࢽِ، سْࢽْمْ غَرُو کَدْࢽُواْ!
[15] ࢽَیِرُو أَمْ حَࢽْغَلَّ غَیْرُو جَࢽْدٜࢽْجَغَکِّ؞ ࢽَیِ کْلَࢽْدُو أَوُو وُلّْکِّدَ شَرَࢽُواْ!
[16] کْࢽْجَرَمْ بَرْغَا تِ ࢽَࢽْغَرُو اللَّهَ وُسٜࢽِیٜدْ، تِلَࢽْ غْࢽَ بُ أَلْمَسِیوُیٜرُو کْلْدِییٜ؟ کُورُو بُرُودِ ࢻْسَࢽْغِیٜدْ، تِلَࢽْ غْࢽَ تِیے أَلْمَسِیوُیٜرُو کْلْدِییٜ؟
[17] بُرُودِ ࢻَلْ دْغَدْ، أَࢽْدِ ࢽغْوُ یَیٜ، تِیࢽْدٜ ࢻَلْمَ، أَوُووَ أَࢽْدِ سَمَّ بُرُودِ ࢻَلْدَ ࢽغْرِیٜ؞
[18] إِسْرَاءِیلَوُوَ تَࢽْغُواْ: تَیِ لَیَ جَغَرِدْ لَیَ دُوَدُرَمْدْرُو کْلْدَاࢽَ، غْࢽَ؟
[19] تُو، أَوِ وُلّْکِّ؟ دَ سْࢽْمْبُو تِࢽَدَ سْࢽْمْدْمَا أَوُو لَا وُو؟
[20] أَعَ، أَمَّ لَیَࢽْجَدْ اللَّهرُو غْࢽِ، سٜدَࢽَّرُو دُوَجَغَیْ؞ سٜدَࢽَّرُو کْلْدْغْوِیَ، رَاکّْࢽِ؞
[21] رَࢽْغُوٜ کْࢽْجَرَمْ کْمَیٜیَ کْࢽْجَرَمْ سٜدَࢽَّیٜیَیٜࢽْ یَوَّوُو؞ رَࢽْغُوٜ تٜوُرْ کْمَیٜیَ تٜوُرْ سٜدَࢽَّیٜیَلَࢽْ مَسْࢽَ دِوَّوُو؞
[22] رَ، یَکِّیٜ کْمَا ࢽَࢽْدْرِ ثْدَیْ؟ تِیَ دُࢽُوࢽْ کُوࢽِیٜࢽَ وَ؟
[23] «أَوِ یَیٜ أَمَرْدْغْࢽَ،» أَمَّ أَوُو سَمَّ غْࢽِ ࢻَیْدَا وُو؞ «أَوِ یَیٜ أَمَرْدْغْࢽَ،» أَمَّ أَوُو سَمَّ غْࢽِ کَمْبَ دُࢽُووَجِ؞
[24] وُࢽْدُ یَیٜ أَوُو ࢽغْلَ کْلَࢽْجُرُو غْࢽِ، أَمْ غَدٜىٰرُو مَجُوُو!
[25] أَوُو حَوْمَدِࢽْ ثَلَدِ سَمَّا بُیْوُو، بَرٜ سَرِوُ کَرْوُیٜ ࢽَࢽْغَرُو کْلَࢽْجُࢽْ کُوکُورُوِّ،
[26] «دُࢽِیَا أَوُووَ ثُرُوࢽْجُࢽْ دَسَاࢽَ سَمَّا کْمَࢽْدٜىٰ،» ࢽَࢽْغَرُو؞
[27] کَمْ لَا عِیسَىٰ غَمَ غْࢽِ ࢽَیِیَ دُوࢽْجَࢽٜ کَسَدُّوٜ لٜࢽُوِیَ، أَوُو ࢻُوُࢽْدُورُو ثَسَکّْࢽَ سَمَّا بُیْوُو، بَرٜ سَرِوُ کَرْوُیٜ ࢽَࢽْغَرُو کْلَࢽْجُࢽْ کُوکُورُوِّ؞
[28] أَمَّ کَمْ لَا ࢽَیِرُو: «أَدْ سْࢽْمْبُو تِࢽَ،» ثْࢽِیَ، کَمْ ࢽَیِرُو إِسَࢽُوࢽْجَاࢽَدَ سَرِوُ کَرْوُیٜیَ ࢽَࢽْغَرُو بَرٜ بُوِّ؞
[29] کَرْوُ کَاࢽدُو غْࢽِ، کَاࢽجُ وُلّْکِّ؞ أَوِرُو غْلٜ سَرِوُ کَرْوُ کَمْ غَدٜىٰ ࢽَࢽْکَمْ کْلَیٜࢽِ شَرَجِ؟
[30] اللَّهَ وُسٜࢽْکّٜ بُکِّیَ، أَوِرُو غْلٜ کْلَ أَوُو دُوُوࢽْ تِ ࢽَࢽْغَرُو اللَّهَ وُسٜࢽْکّْࢽَدْیٜࢽْ وُوَ شَرَسَیْ؟
[31] بُوِ یٜࢽْ کَلْ، یَوِ یٜࢽْ کَلْ، أَوُو دِوِ سَمَّ یٜࢽْ کَلْ، أَوِ یَیٜیَ دَرَجَ اللَّهیٜرُو دٜوُو؞
[32] بَرٜ یَوْدِیَا یَوْدِیَ غْࢽِیَ جَمَ اللَّهیٜیَا یَکُّوٜ تَلْجَࢽِّ،
[33] وُ یٜ جَوَلْ ࢻِࢽْ یَیٜ أَرْدِیَ أَمْ سَمَّیٜ مَکِّدْ غَیْ؞ أَوُووَ وُرُو غْࢽِ، أَمْ ࢽغْوُرُو أَوُو ࢻَیْدَا مَکِّ، ࢽجْکَّوُو ثَوَࢽْدُورُو؞