[1] حَلْࢽِیَ غَیْوُو، جِرِ وُ یٜ حَلْ أَلْمَسِیوُیٜیَ غَکِّدْ غَیْ؞
[2] أَوِ یَیٜࢽْ وُوَ تَࢽْسُوٜ أَلَمْدُ جِرِ ࢽَیِرُو ࢽجَدّْکّْࢽَدَ ࢽغْلَرُو غَوِ ࢽَࢽْغَرُو ࢽَیِیَ وُسٜࢽْجَکِّ؞
[3] أَدْ یَیٜ أَوُو أَدَ ࢽُوࢽُوِیَ، رَاکُّو: ࢻُوُمَ کُوࢽغوَ سَمَّیٜدْ تِمَ أَلْمَسِیوُ وُو، ࢻُوُمَ کَمُیٜدْ تِمَ کوَࢽْجُ وُو، کُورُو ࢻُوُمَ أَلْمَسِیوُیٜدْ تِمَ اللَّه وُو؞
[4] کُوࢽغوَ دُوُوࢽْ مُودُوَ بِ ࢽَوِࢽَوِ کْلَ جَکَّدَا ثْدِدْ ࢻُوُمَࢽْجُوَ ࢽَࢽْغُرُو ثَکِّ؞
[5] أَمَّ کَمُ دُوُوࢽْ مُودُوَ بِ ࢽَوِࢽَوِ کْلَ کَادَا ثْدِدْ ࢻُوُمَࢽْجُوَ ࢽَࢽْغُرُو ثَکِّ، کْلَࢽْجُ تْلَرْࢽَا کَلْ وُو؞
[6] أَوُووَ کَمُ کْلَࢽْجُ جَکْثِوَوُووَ، غْرْࢻْثَ؞ کْلَ غْرْࢻْتُ بِ لَرُودْ ࢽَ کَمُیٜࢽْ أَوُو ࢽَࢽْغُیٜیَ، کْلَࢽْجُ جَکْثُو؞
[7] کُوࢽغوَیٜ کْلَ جَکْتُدْ جُسّْࢽِّ، تِ ثَمُࢽُووَ دَرَجَا اللَّهیٜ ࢽَࢽْغَرُو، أَمَّ کَمُدْ دَرَجَ کُوࢽغوَیٜ؞
[8] أَوُووَ کُوࢽغوَ غْࢽِ کَمُیٜࢽْ ثُلُوُو، أَمَّ کَمُ کُوࢽغوَیٜࢽْ ثُلُوُو؞
[9] کُورُو کُوࢽغوَا غْࢽِ کَمُ ࢽَࢽْغَرُو أَلَکْثَ، أَمَّ کَمُدَ کُوࢽغوَ ࢽَࢽْغَرُو أَلَکْثَ؞
[10] دَلِلْ أَدْرُو أَلَمَ کْࢽْدُوُویٜ کْلَࢽْجُࢽْ غْࢽَدُدْ مَلَیْیَوَ ࢽَࢽْغَرُو کَمُرُو وَجِࢻْثْغْࢽَ؞
[11] أَدْ یَیٜ ࢽَ کْمَࢽْدٜىٰࢽْ کَمُدْ کُوࢽغوَا ࢻَیْیَدَ غْࢽِ، کُوࢽغوَدْ یٜ کَمُوَ ࢻَیْیَدَ غْࢽِ؞
[12] جِرِ کَمُدْ کُوࢽغوَیٜࢽْ إِسْࢽَدْ غَیْ، کُوࢽغوَدْ یٜ تَمْبُو کَمُیٜࢽْ إِسِ، أَدْغَیْمَ أَوِ یَیٜ اللَّهیٜࢽْ إِسِ؞
[13] ࢽَیِ کْلَࢽْدُومَ شَرَࢽُواْ: کَمُ کْلَ جَکْثْࢽِّࢽْ اللَّهَ ثُوُورِدْ جُسّْࢽَ وَ؟
[14] کْلَ کْࢽْدْغَیْ دُࢽِیَیٜࢽْ، کُوࢽغوَیٜ کَࢽْدُرِࢽْجُ کُرُوُوَ تِرُو أَوُو ࢽَࢽْغُوَ یَیٜ،
[15] کَمُیٜ کَࢽْدُرِࢽْجُ کُرُوُرُو رِجِیَ، تِرُو أَوُو دَرَجَیٜ، غْࢽَ؟ أَوُووَ کَࢽْدُرِࢽْجُدَ جَکْتُرَمْ غَیْرُو تِرُو ثَدْࢽَ؞
[16] کَمْ لَا کْلَ أَدْیٜࢽْ کَمْبِوُدُ ثْرَاࢽَا، أَلَمْدُ غَدٜ تَیْیٜࢽْدٜ، جَمَ اللَّهیٜ غَدٜغَدٜسُو یٜ ثَدَࢽِّ؞
[17] أَمَّ کْلَ وَدَ أَدْیٜࢽْ ࢽَیِیَ وُسٜࢽْجَکِّوَوُو، سٜرُّو غْࢽِ، سٜرْࢽَمْبُرُو ثَࢻْتُوِ ࢽَࢽْغَرُو؞
[18] بُرْوُوࢽْ ثَمُّو جَمَ اللَّهیٜرُو ثَࢻْتُوِیَ، کَتّٜࢽْدُوࢽْ یَکْتُوَّ ثَࢽِ ࢻَکّْࢽَ، کُورُو غَࢽَ جِرٜرُو ࢽغُوکّْࢽَ؞
[19] أَیْ، سَیْ کَتّٜࢽْدُوࢽْ یَکْتُوَرُو وَلْجِیَ، ࢽغَیْࢽِࢽْ أَمْ ثُرُوࢽْدُوࢽْ أَرْدِیَدَدْ ࢽُووَدَرُو وَلْجَیْ!
[20] أَسٜ، سَ ثَࢻْتُوِیَ، مَسْࢽَ کْمَیٜ غْࢽِ بُوِ؞
[21] سَ مَسْࢽَدْیٜࢽْ وُࢽْدُࢽْدُو یَیٜ ࢽَمُجٜ کْمْبُوࢽْجُ ࢽغُوجٜ جُوُیْ، ࢽغَیْࢽِࢽْ کَمْ لَا کْࢽَا، کَمْ لَا یٜ سَغَرَࢽْدْࢽَ؞
[22] أَ! کْمْبُووَ کْࢽْجَادْرُو ࢻَࢽّدُو بَوُو وَ؟ رَ، جَمَ اللَّهیٜرُو رُدُ غْࢽَغْوٜ أَمْ أَوِمَ ثَدَࢽِّدَ ࢽَࢽْغُرُو یَکُّوِ؟ تُو، أَوِ غْلٜ ࢽَیِرُو وُلْࢽْجَغَکِّ؟ ࢽَیِیَ وُسٜࢽْجَکِّ؟ أَعَ، کْلَ أَدْیٜࢽْ ࢽَیِیَ وُسٜࢽْجَکِّوَوُو؞
[23] أَوُو کْمَࢽْدٜىٰࢽْ مُواْکّْࢽَدَ ࢽَیِ یٜرُو ࢽجَدّْکّْࢽَ: کْمَࢽْدٜ عِیسَى بُࢽٜ تِیَ سْرْثَّاࢽَدْࢽْ بُرُودِ ࢽغُوجٜ
[24] اللَّهرُو أَرْدِیٜࢽِّیَ، ࢻْسَکْثٜ: «أَدْ تِیࢽِ ࢽَیِ ࢽَࢽْغَرُو تِࢽَدْ؞ وُوَ تَکْتُرُو أَدَ دٜوُو!» ثْࢽَّ؞
[25] جِرِ أَدْغَیْࢽِࢽْ کُورُو ࢽغَوُو مَسْࢽَیٜࢽْ کْࢽْجَرَمْ ࢽغُوجٜ: «کْࢽْجَرَمْ أَدْ أَمَࢽْ بْرِࢽْ بُࢽِلَࢽْ ࢽدْࢻْکَدَ؞ یِمْبِ یَیٜ تِیَ یَوِیَ، وُوَ تَکْتُرُو دٜوُو!» ثْࢽَّ؞
[26] أَوُووَ یِمْبِ یَیٜ بُرُودِدَ ࢽغْرُوٜ کْࢽْجَرَمْدْیٜࢽْ یَوِیَ، کَرْمُو کْمَࢽْدٜىٰ مَوُوࢽُوِ، حَرْ کَوُ وَلْدٜ إِسِرُو؞
[27] تُو، کَمْ جِرِ جُسّْࢽِّࢽْ بُرُودِدَ جْغْرِ بِ کْࢽْجَرَمْ کْمَیٜࢽْ ثَیْدْ تِییَ بُوَ کْمَࢽْدٜىٰرُو بِوُ ثْدُّو؞
[28] وُࢽْدُ یَیٜ کْلَࢽْجُ جَرَࢻْثُو دُوُوࢽْ، ࢽغَیْࢽِࢽْ بُرُودِدَ جْغْرُو، کْࢽْجَرَمْدْ یٜࢽْ ثَ؞
[29] أَوُووَ کَمْ تِیے کْمَیٜیَ أَسُجْࢽِّࢽْ جْغْرِ بِ ثَیْدْ، بُوࢽْجُوَ کْࢽْجَࢽْجُوَیٜࢽْ وُواْمْ کْلَࢽْجُرُو غْرْجِیے؞
[30] أَدْمَرُو ثُرُوࢽْدُوࢽْ أَمْ ࢽغْوُ دُࢽُو بَوُووَ یٜ، دُوࢽْدِ یٜ، کَدَ یٜ سَࢽُࢽَ؞
[31] جِرٜمَرُو کْلَࢽْدٜ جَرَمِّیٜرُو وَلْیٜࢽُووَ، أَࢽْدِرُو شَرَ سَدِّوَوُو،
[32] أَمَّ کْمَدْ أَࢽْدِرُو شَرَ سَدِّیَ، أَࢽْدِیَ جَوَلُّو سَسَکِّ، ࢽغَیْࢽِࢽْ أَمْ دُࢽِیَیٜیَ رُوکُّو أَࢽْدِرُو وُواْمْ غْࢽَسَغَیْوَوُو؞
[33] تُو، کْرَمِیَࢽِ، مَسْࢽَ دِیُورُو ثَࢻْتُوِیَ، وُࢽْدُ یَیٜ کَمَࢽْجُوَ غُرٜجُو؞
[34] کَمْ لَا کْࢽَࢽْجُوَا، ࢻَدُوࢽْ جُوُو، ࢽغَیْࢽِࢽْ ثَࢻْتُوِیَ، ࢽَیِرُو شَرَ ࢽجَدِّوَوُو؞ وَلْدْکّٜ إِسْکِّیَ، کْلَ أَوُو غَࢻْثْࢽَدْیٜࢽْ غَلَ یِکِّ؞