[1] کْلَ دَ سْࢽْمْبُو تِࢽَیٜࢽْ، أَࢽْدِ سَمَّ إِلْمُ تَیْیٜࢽَرُو ࢽُوࢽِیٜࢽَ؞ إِلْمُدْ کَمْبَ ࢻُجِیے، أَمَّ کْرَوُودْ دُࢽُووَرُو ثْدِ؞
[2] کَمْ دُوُوࢽْ کْلَࢽْجُوَ أَوُو لَا ࢽُوجْࢽَرُو ࢽغُویٜࢽُووَ، کُورُومَ جِرِ وَجِࢻْثْࢽَدْ غَیْرُو ࢽُوجْࢽِّ،
[3] أَمَّ کَمْ لَا اللَّهَ کِرَوُووَ، اللَّه تِیَ ࢽُوجْࢽَ؞
[4] تُو، کْلَ دَ سْࢽْمْبُو تِࢽَا ࢽغْرُویٜࢽْ، سْࢽْمْ دُࢽِیَلَࢽْ أَوِمَ غْࢽِ یٜ، اللَّه تِلُودْرُو کَجِیَ، غَدٜ بَوُو یٜرُو ࢽُوࢽِیٜࢽَ؞
[5] أَوُووَ أَلَوَ لَا سَمٜ یٜࢽْ کَلْ، ثِدِیَ یٜࢽْ کَلْ مبٜجِ ثَࢽِ یَیٜ، أَلَوَ کَدَا کْمَوَ کَدَا مبٜجِدْ غَیْ،
[6] أَدْ یَیٜ ࢽَࢽْدٜࢽْ اللَّهدْ تِلُو، تِ بَوَ، تِلَࢽْ أَوِ یَیٜ إِسِ، تِ ࢽَࢽْغَرُو کْرْغَیْیٜ، کُورُو کْمَࢽْدٜ عِیسَى أَلْمَسِیوُدْ یٜ تِلُو، تِیٜࢽْ أَوِ یَیٜ إِسِ، تِیٜࢽْ کْرْغَیْیٜ؞
[7] أَمَّ أَمْ سَمَّ غْࢽِ إِلْمُ أَدَ ثَدَ؞ لَاࢽجَ غُمْکِیَا ثَرِࢽَدْرُو حَرْ کْرْمَرُو دَ جَغَرِیَ، سْࢽْمْبُو تِࢽَدْ غَیْرُو جَغَرِ، کُورُو کَرْوُࢽْجَ کِبَّجْࢽِّدْ تَیِرْ غْࢽِرُو وَلْجِ؞
[8] کْمْبُو غْࢽِ سَسَکّٜ اللَّهَ کَرْࢽِّیٜ؞ بُو وَࢽِیٜیَ، تْغْرْدِیٜوَوُو؞ بُیْیٜیَ، تْرْغَیْیٜوَوُو؞
[9] أَمَّ حَࢽْغَلْ غْࢽَࢽُواْ، بَرٜ ࢽَࢽْکَمْ کْلَیٜࢽْدُو أَدْ أَمْ لَوُدَ ثَکّٜ تَلْجَࢽِّ؞
[10] کَمْ لَا کَرْوُࢽْجُ کِبَّجْࢽِّ دُوُوࢽْ ࢽِ إِلْمُوَدْ ࢻَدُو سْࢽْمْبٜࢽْ مَسْࢽَ دِمِ ࢽغِرُووَ، أَدْ ثَکّٜ دَ سْࢽْمْبُو تِࢽَا جْغْرِوَوُو وَ؟
[11] ࢽغَیْࢽِࢽْ کْلَ إِلْمُࢽْمْبٜࢽْ کْرَمِ لَوُ دُوُوࢽْ تِ ࢽَࢽْغَرُو أَلْمَسِیوُ ࢽُࢽَدْ ࢻَثِّیے؞
[12] کْرَمِیَࢽْدُورُو بِوُ ࢽغَیْࢽِࢽْ یِدُّوِیَ، کُورُو کَرْوُࢽْجَ کِبَّجْࢽِّدَ لُورُࢽُوِیَ، أَلْمَسِیوُمَرُو بِوُ کِدُّوْ؞
[13] أَدْمَ ࢽَࢽْغَرُو دَ ࢽغْرُودْ ثَکّٜ کْرَمِࢽِ تَلْجِرُو وَلْیٜࢽُووَ، غَدٜرُو دَ ࢽغْرْکِّوَوُو، بَرٜ کْرَمِࢽِیَ یَکّْکّٜ تَلْجْࢽِّرُو؞