[1] کْرَمِیَ، وُدْ رَࢽْغْکّٜ ࢽَیِرُو أَمْ رُحُ تَیِیَ سِمُوجِ غَیْرُو مَࢽَࢽْجَغَکّْࢽِ، سَیْ أَمْ حَلْ تِییٜࢽْ دَسَاࢽَ، وُوتّٜ أَمْ أَلْمَسِیوُلَࢽْ تِمَلْ غَیْرُو؞
[2] کْمْبُو غْࢽِ، کِیَمْ ࢽَیِرُو ࢽجَدْکّٜ یَوْ، رَࢽْغُوَّوُودْرُو؞ کُورُو یَیٜ تِیَ رَࢽْغُوَّوُو،
[3] کُوَمِسُوࢽْ ࢽَیِ حَلْ تِییٜࢽْ کْرْغَوْ ࢽَࢽْغَرُو؞ دَوُࢽْدُوࢽْ ࢽَࢽْدْرِیَ لَوَلَآدْ، حَلْ تِییٜࢽْ دْغَوٜ کْلَ کْࢽْدْغَیْ أَدَمْغْࢽَیٜࢽْ دِوِ، غْࢽَ؟
[4] کَمْ لَایٜ: «وُ بُلُسّٜ،» لَایٜ: «وُ أَࢻُولُسّٜ،» ثْࢽِیَ، کْࢽْدْغَیْ أَدَمْغْࢽَیٜ دِوَّوُو وَ؟
[5] تُو، أَࢻُولُسْدْ وُࢽْدُ؟ بُلُسْدْ وُࢽْدُ؟ تَیِدْ وُولُودِیَ تَیِیٜࢽْ مْرْسَࢽُوَّدْ، کْمَࢽْدٜ ࢻِࢽْجَ یَیٜرُو کِدَ ثِࢽَدْ غَیْ؞
[6] وُ ࢽَدْکُّو، أَࢻُولُسْ کٜتُّو، أَمَّ اللَّه ثَکّٜ وُرَجُو؞
[7] أَدْ ࢽَࢽْغَرُو کَمْ ثْࢽَدِمَدَ ثَتِّمَدَ أَوِمَ غْࢽِ، سَیْ اللَّه ثَکّٜ وُرَجِمَدْ؞
[8] کَمْ ثْࢽَدِمَدَ ثَتِّمَدَ سَمَّ تِلُو، وُࢽْدُࢽْجَ یَیٜ أَلْوَسِ کِدَࢽْجُیٜ کَلْکَلْ ثُوَࢽْدِ؞
[9] أَࢽْدِدْ سَوَوَ کِدَ اللَّهیٜ، ࢽَیِدْ یٜ کُلُو اللَّهیٜ، تَࢽْدُو اللَّهیٜ؞
[10] کْلَ سٜرْ اللَّه وُرُو سِࢽَدْیٜࢽْ، غُوࢽِ سُورُو تَࢽْدُویٜ غَیْ ࢻْرْدُ غْࢽَیٜکُّو، کَمْ لَا غَدٜ کْلَدْࢽْ ثْدَࢽْدِ؞ أَمَّ وُࢽْدُ یَیٜ جِرِ ثْتَّࢽْدِرُو حَࢽْغَلْ غْࢽَجُو!
[11] أَوُووَ وُࢽْدُمَ رَکْثٜ ࢻْرْدُ غَدٜ غْࢽَجِوَوُو، تِ غْࢽَادَدْرُو کَجِیَ، تِمَ عِیسَى أَلْمَسِیوُ وُو؞
[12] وُࢽْدُ دُوُوࢽْ کْلَ ࢻْرْدُدْیٜࢽْ دِࢽَرْلَࢽْ، بِ رِوُلَّࢽْ، بِ کَوْ تَمَࢽَّ تَمَࢽَّلَࢽْ، بِ کْسْکَلَࢽْ، بِ کَࢽْغَلٜلَࢽْ، بِ کَجْمْلَࢽْ تَࢽْدُو ثْدِمَدْ،
[13] کِدَࢽْجُ ࢻٜدٜرُو ثُلُوِ، یِمْ کِیَمَا تِیَ إِسَࢽُوجِیے، کُورُو کَࢽُّࢽْ کِدَ وُࢽْدُیٜ یَیٜ رِجَࢻْتٜ جِرِࢽْجُ ࢻْلٜدِ ࢽَࢽْغَرُو؞
[14] کَمْ لَایٜ کِدَࢽْجُ ثْتَّࢽْدْࢽَدْ ࢽَࢻْکٜࢽُووَ، مُکُووَ ثُوَࢽْدِ؞
[15] کَمْ کِدَࢽْجُ کَࢽُّیٜ جُوُࢽَدْ تِیَ ࢻُثِّ؞ تِ کْلَࢽْجُ ࢽجْکَّوُو ثُوَࢽْدِ، أَمَّ دَوُ کَࢽُّیٜࢽْ کُوجْࢽَ غَیْ؞
[16] ࢽَیِدْ ࢻَدُو اللَّهیٜ یٜ، رُحُ اللَّهیٜ ࢽَیِلَࢽْ کْرْغَ یٜرُو ࢽُوࢽُوِّ وَ؟
[17] کَمْ لَا ࢻَدُو اللَّهیٜیَ وُرْیٜࢽُووَ، اللَّه تِیَ سِجِیے، أَوُووَ ࢻَدُو اللَّهیٜدْ تَیِرْ، کُورُو ࢻَدُودْ ࢽَیِمَ؞
[18] بَرٜ وُࢽْدُمَ جَمْبَدْࢽِّ؞ کَمْࢽْدُو لَا کْلَ دُࢽِیَ أَدْیٜࢽْ کْلَࢽْجُ رَشِدُرُو ࢽغُویٜࢽُووَ، حَࢽْغَلْ بَوُووَ غَیْرُو وَلْجُو، رَشِدُرُو وَلْجُورُو؞
[19] أَوُووَ ࢽَࢽْرَشِدُ دُࢽِیَ أَدْیٜ ࢽَ اللَّهیٜࢽْ حَࢽْغَلْࢽَمْبُ، کِتَوُلَࢽْ رُوُوَدَدْ غَیْ: «اللَّه رَشِدُوَا ࢽَࢽْغَࢽْجَࢽْ ثْدَیْ،»
[20] کُورُو: «کْمَࢽْدٜ حَࢽْغَلْ رَشِدُوَیٜدْ بُووُرُو ࢽُوجْࢽَ؞»
[21] أَدْمَ ࢽَࢽْغَرُو بَرٜ وُࢽْدُمَ کْلَ کَمْبٜࢽْ أَوُلُو جُوُࢽِّ، أَوُووَ أَوُو سَمَّ کَاࢽدُو،
[22] بُلُسْ، بِ أَࢻُولُسْ، بِ کٜࢻَسْ، بِ دُࢽِیَ، بِ رُو، بِ کَرْمُو، بِ أَوُووَ کْرْمَیٜ، بِ أَوُووَ ࢻُوُیٜ؞ أَیْ، أَوُو سَمَّ کَاࢽدُو،
[23] ࢽَیِ یٜ أَلْمَسِیوُیٜ، أَلْمَسِیوُ یٜ اللَّهیٜ؞