[1] کْلَ أَوُووَ وُرُو رُوُسُوَّدْیٜࢽْ: «کُوࢽغوَیٜ کَمُ ࢽغُودُࢽَمْبُدْمَ ࢽغْلَ وُو؞»
[2] أَمَّ کْࢽْجْࢽَ وَدَرُو، کُوࢽغوَ ࢻِ یَیٜ کَمُ ࢽغُوجُو، کُورُو کَمُ ࢻِ یَیٜ کوَ ثْدُو؞
[3] کوَدْ کَمُࢽْجُرُو وَجِࢻْࢽْجُ ثُو، کُورُو کَمُدْ یٜ کوَࢽْجُرُو ࢽغَیْ ثْدُّو؞
[4] کَمُدْ تِیࢽْجُلَࢽْ کْࢽْدُوُوࢽْجُ بَوُو، کْࢽْدُوُودْ مُکُّو کوَࢽْجُیٜࢽْ کْرْغَ؞ ࢽغَیْمَ کوَدْ یٜ تِیࢽْجُلَࢽْ کْࢽْدُوُوࢽْجُ بَوُو، کْࢽْدُوُودْ مُکُّو کَمُࢽْجُیٜࢽْ کْرْغَ؞
[5] بَرٜ وُࢽْدُࢽْدُومَ کَمَࢽْجُرُو تِیࢽْجُ دَࢻْثْغْࢽِّ، سَیْ کَسَدُّوٜ کَوُ غَࢽَرُو کْلَࢽْدُو مُودُوَ دٜوُورُو ࢻَیْدُوِرُو کَجِیَ، دَجِ کَلُّو وَلْدْࢽُواْ، بَرٜ کْلَرِوُوࢽَمْبُࢽْدُو ࢽَࢽْغَرُو إِوُلِیسْ ࢽَیِیَ جَرَمْࢽْجَࢽِّرُو؞
[6] أَدَ وُلْدُࢽِدْ، وَدَ غْࢽِ، جَوَلْ لَا؞
[7] أَمْ سَمَّ وُ غَیْرُو وَلْجَیْیَ رَاکّْࢽَ، أَمَّ کَمْ ࢻِ یَیٜ ࢽَ اللَّهیٜࢽْ کْࢽْجُوࢽْجُ ثْمُواْࢽَ، لَا ࢽغَیْ، لَا یٜ ࢽغَیْ؞
[8] أَمْ کَمُ ثَدَࢽِّیَ کَمُوَ کوَ ࢻَثَّاࢽَآدْرُو وُلْغْکِّ، ࢽَࢻْتُ وُ غَیْلَࢽْ دَسَاࢽَمَ تَیِرُو ࢽغَلْوُو؞
[9] أَمَّ رَکْثَࢽٜ کْلَࢽْجَ ثَرِوِوَوُووَ، ࢽِیَ ثَدُو، جَرَوَدْرُووَ ࢽِیَ دِیُودْمَ ࢽغَلْوُو؞
[10] أَمْ ࢽِیَ ثَدْࢽَدْرُو وَدَ أَدَ یِکِّ، وُ غْࢽِ، أَمَّ کْمَࢽْدٜ: بَرٜ کَمُدْ کوَࢽْجُوَ ࢻَیْدَࢽِّ؞
[11] أَمَّ کوَࢽْجُوَ ࢻَیْدَࢽَرُو وَلْیٜࢽُووَ، ࢽِیَ بَوُووَ ࢽَࢻْثُو، بِ کوَࢽْجُوَ سُولُودَ؞ کُورُو کوَدْ یٜ بَرٜ کَمُࢽْجُوَ دْࢻْثْࢽِّ؞
[12] أَمْ غَࢻْثَࢽَدْرُو وُمَ أَدَ وُلْغْکِّ، کْمَࢽْدٜ غْࢽِ: کْرَمِ لَا کَمُ عِیسَىٰ غَمَ غْࢽِ ثْدَࢽَا، کُورُو کَمُدْ تِیَ رُوکُّو ࢽَࢻْتُ کَسَثّْࢽَا، بَرٜ کَمُدَ دْࢻْثْࢽِّ؞
[13] کُورُو کَمُ لَا کوَ عِیسَىٰ غَمَ غْࢽِ ثْدَࢽَا، کُورُو کوَدْ تِیَ ࢽَࢻْتُ کَسَثّْࢽَا، بَرٜ کوَدَ وَجْࢽِّ؞
[14] أَوُووَ کوَ عِیسَىٰ غَمَ غْࢽِدْ کَمُࢽْجُیٜࢽْ تَیِرُّو وَلْجْࢽَ، کُورُو کَمُ عِیسَىٰ غَمَ غْࢽِدْ کوَࢽْجُیٜࢽْ تَیِرُّو وَلْجْࢽَ؞ أَدْ غْࢽِیَ، یَلَّࢽْدُو تَیِرْ غْࢽِ، أَمَّ ࢽغَیْࢽِࢽْ تَیِدْ تَیِرْ؞
[15] أَمَّ تِ عِیسَىٰ غَمَ غْࢽِدْ ࢻَیْدُ کِرَوُووَ، ࢻَیْدَ؞ ࢽغَیْرُو وَلْیٜࢽُووَ، کْرَمِ کُوࢽغوَ بِ کَمُدْ تِکّٜرْࢽِّ، أَوُووَ ࢽَࢽْلٜوَࢽْ دْغَرُو اللَّه ࢽَیِیَ بُواْࢽْغٜرَ؞
[16] ࢽِ کَمُ، ࢽدَیِࢽْ غْلٜ کوَࢽْمْبَ یِکَّغْمِرُو ࢽُوࢽْمِ؟ کُورُو ࢽِ کوَ، ࢽدَیِࢽْ غْلٜ کَمُࢽْمْبَ یِکَّغْمِرُو ࢽُوࢽْمِ؟
[17] بِیَ وُࢽْدُ یَیٜ، اللَّه تِیَ بُواْجْࢽَدْ غَیْ، ࢽَࢻْتُ دُوُوࢽْ کْمَࢽْدٜ تِرُو أَمَرْجْغْࢽَدْلَࢽْ دْغَ؞ أَدْمَ وَدَ جَمَ عِیسَىٰ غَوُ سَمَّیٜرُو یِکِّدْ وُو؞
[18] کَمْ دُوُوࢽْ سَ تِیَ بُواْجَࢽَلَࢽْ کَجَࢽْجُوَدْ، بَرٜ کَجَدْࢽِّرُو وَلْجْࢽِّ؞ تِ جْمْبْلْمْلَࢽْ بُواْجَࢽَدْ، بَرٜ کَجَدْࢽِّ؞
[19] کَجَدْ أَوِمَ غْࢽِ، کَجَࢽَمْبُدْ یٜ أَوِمَ غْࢽِ، وَدَ اللَّهیٜ غَ ࢻَیْدَا وُو؞
[20] وُࢽْدُ یَیٜ ࢽَࢻْتُࢽْجُ سَ تِیَ بُواْجَࢽَدْیٜࢽْ دْغَ؞
[21] ࢽِ کَرٜیَ دُوُوࢽْ بُواْࢽْغٜرَا، بَرٜ سُوُولْدْمِّ، أَمَّ دَمَ ࢽَࢽْکَمْ کْلَیٜ ࢻَࢽْدْمِیَ، ࢻَیْدَدْࢽٜ؞
[22] کَمْ تِ کَرٜیَ دُوُوࢽْ کْمَ تِیَ بُواْجْࢽَدْ، ࢽَ کْمَیٜࢽْ تِ ࢽَࢽْکَمْ کْلَیٜ ثْدَࢽَ؞ جِرِ أَدْغَیْࢽِࢽْ کَمْ دُوُوࢽْ کْمَ تِیَ ࢽَࢽْکَمْ کْلَیٜیَ بُواْجْࢽَدْ، تِ کَرٜیَ أَلْمَسِیوُیٜ؞
[23] اللَّه ࢽَیِیَ تَمَࢽْلَࢽْ ࢽجَسُوُࢽَ، بَرٜ کَرٜیَ کَمْبٜرُو وَلُّوِّ؞
[24] کْرَمِیَ، وُࢽْدُ یَیٜ ࢽَࢻْتُ دُوُوࢽْ اللَّه تِیَ بُواْجْࢽَدْࢽْ ࢽَ اللَّهیٜࢽْ دْغَ؞
[25] کْلَ ࢻٜرُووَ کوَ ࢽُوجَࢽِّیٜࢽْ وَدَ کْمَࢽْدٜىٰ تَکّْࢽِ، أَمَّ کَمْ دُوُوࢽْ کَࢽْجِمَرِ کْمَࢽْدٜىٰࢽْ أَمَࢽَّدْ غَیْ، کُرُوࢽِ یِکِّ؞
[26] أَوُو رُکِّدْ تِمَ سُوُولْ کْرْمَیٜدْرُو ࢽغَیْ ࢽَࢻْتُدْمَ کَمْبُو ࢽغَلْوُو؞
[27] ࢽِ کَمُوَا، بَرٜ ࢻَیْدُ مَࢽْمِّ؞ کَمُ بَوُووَا، بَرٜ کَمُ ࢽغُوࢽْمِّ؞
[28] أَمَّ کَمُ ࢽغُوࢽْمِرُو وَلْیٜࢽُووَ، بِوُ دِمِّ؞ کُورُو ࢻٜرُو کوَ ࢽُوجْࢽِّ کوَ ثْدِرُو وَلْیٜࢽُووَ، بِوُ ثْدْࢽِّ؞ أَدْ یَیٜ أَمْ أَࢽِ غَیْ دُࢽِیَ أَدْࢽْ بُوࢽٜ ثَسَیْ، أَمَّ وُدْ أَدْرُو کَࢽُوِیَ، رَاکُّو؞
[29] کْرَمِیَ، أَوُو وُلّْکِّدْ: سَ کَرْࢽْجْࢽَ؞ کُوَ أَدْࢽْ ࢻُوُࢽْ أَمْ کَمُ ثَدَࢽَدْ کَمُ ثَدَࢽِّ غَیْرُو وَلْجَ،
[30] أَمْ ثٜسِرِدْ یٜ ثٜسِرِوَوُو غَیْرُو وَلْجَ، أَمْ کَرْوُکْجِ ثَدِدْ یٜ کَرْوُکْجِ ثَدِوَوُو غَیْرُو وَلْجَ، أَمْ ثَسُوِدْ یٜ أَوِمَ ثَدَࢽِّ غَیْرُو وَلْجَ،
[31] کُورُو أَمْ دُࢽِیَ أَدْࢽْ ࢻَیْدَدَیْدْ یٜ تِرُو دُࢽُو ثَدْࢽِّ غَیْرُو وَلْجَ، أَلَمَ دُࢽِیَ أَدْیٜ بَوُورُو تْدِ ࢽَࢽْغَرُو؞
[32] ࢽَیِ سُوُولْ بَوُووَرُو وَلُّوِیَ، رَاکُّو؞ کَمْ کَمُ ثْدَࢽِّدْ أَوُووَ کْمَیٜرُو سُوُولْدٜ جِرِ ثْدٜ أَرْدِیَࢽْجُ ثُوَࢽْدُورُو مَجِ؞
[33] أَمَّ کَمْ کَمُوَدْ کْلَ أَوُووَ دُࢽِیَ أَدْیٜرُو سُوُولْدٜ جِرِ ثْدٜ أَرْدِیَ کَمُࢽْجُیٜ ثُوَࢽْدُورُو مَجِ،
[34] حَࢽْغَلْࢽْجُ یَکْتْࢽَ؞ کُورُو کَمُ کوَ بَوُووَدَ ࢻٜرُو کوَ ࢽُوجْࢽِّدَ کْلَ أَوُووَ کْمَࢽْدٜىٰࢽْ سُوُولْدَیْ، تِیے یٜلَࢽْ، رُحُ یٜلَࢽْ تَیِرْ ࢽَࢻْثَرُو؞ أَمَّ کَمُ کوَادْ کْلَ أَوُووَ دُࢽِیَ أَدْیٜرُو سُوُولْدٜ جِرِ ثْدٜ أَرْدِیَ کوَࢽْجُیٜ ثُوَࢽْدُورُو مَجِ؞
[35] أَدَ وُلْدُࢽِدْ، کَتْکُࢽْ غْࢽَدُوُرُو غْࢽِ، ࢽَیِیَ بَࢽَدُوُرُو، ࢽَࢻْتُ جُسّْࢽَ دٜوُو، حَࢽْغَلْ یَکْتْࢽِّࢽْ کْمَࢽْدٜیَ غَیْوُورُو؞
[36] کَمْ لَا تْمَجِࢽْجُرُو أَوُو جُسّْࢽِّ ثْدِّرُو تْمَجْࢽَا، کُورُو جَوْرُو مْرَدُࢽْجُوَ دُوُوࢽْ لَمَرْدْ ࢽغَیْ وَجِࢻْثْࢽَا، أَوُو ثْرَاࢽَدَ ثْدُو، ࢽِیَ ثَدُو، بِوُرُو وَلْجِوَوُو؞
[37] أَمَّ کَمْ ثُرُو کَرْوُࢽْجُیٜࢽْ ࢽِیَ دُࢽُووَ ࢽغُوجْࢽَ، تِرُو دُولٜرُو وَلْجْࢽِّ، رَوُوࢽْجُ، کُورُو تِیَ تْمَجِࢽْجُ غَیْ رُودُرُو کَرْوُࢽْجُࢽْ ࢽِیَ ࢽغُوجْࢽَدْ، أَوُو ࢽغْلَ ثْدِ؞
[38] جِرِ أَدْغَیْࢽِࢽْ کَمْ تْمَجِࢽْجُ ࢽغُوجْࢽَدْ أَوُو ࢽغْلَ ثْدِ، کُورُو کَمْ ࢽغُوجْࢽِّمَدْ أَدَ کُوجْࢽَ ثْدِ؞
[39] کَمُدْ کوَࢽْجُ رُووَا تِرُو کْلَّادَ، أَمَّ کوَدْ بَوُویٜࢽُووَ، رَکْثٜ کَمْ ثْرَاࢽَا ࢽِیَجِ، أَمَّ کْمَا غَمَرُو وَلْجُو؞
[40] أَمَّ وُیٜࢽَّ ࢽغَیْ ࢽَࢻْتُدْمَ تِرُو بَرْغَا وُو، کُورُو کُرُوࢽِࢽْ وُ یٜلَࢽْ رُحُ اللَّهیٜیَ؞